ꓑꓶꓸ ꓠꓰ ꓙꓰ꓾
ꓒꓵꓽ ꓒꓽ ꓟꓽ ꓠꓬꓹ ꓟ ꓟꓵꓽ ꓗꓪ꓾ ꓣꓳ ꓗꓴꓷꓼ ꓟꓽ ꓥ ꓟ ꓟꓵꓽ ꓗꓪ
ꓒꓴ ꓧꓪ ꓤꓽ ꓐꓴ ꓑꓶꓸ ꓠꓰ ꓙꓰ꓾ ꓒꓴ ꓧꓪ ꓟꓶꓼ ꓐꓴ ꓢꓯꓼ ꓟ ꓑꓺ
ꓕꓮꓲ ꓗꓴꓷꓼ꓾ ꓟꓶ-ꓡꓯ꓾ ꓢꓰ-ꓖ-ꓑꓴ꓾ꓟꓲ ꓠꓯ ꓕꓲ ꓒꓳꓹ ꓗꓪ ꓛꓲ ꓖꓴꓳ=
ꓳꓸ ꓐꓯ ꓖꓶ꓾
ꓒꓴ ꓟ ꓖꓳ ꓗꓪ ꓟꓽ ꓞꓳꓽ ꓦꓹ꓾ ꓫꓵꓺ ꓟ ꓖꓳ ꓗꓪ ꓟꓽ ꓙꓴꓽ ꓦꓹ
ꓐꓶꓽ ꓒꓽ ꓐꓶ ꓟ ꓟꓵꓽ ꓟ ꓗꓪ꓾ ꓮ ꓔꓳ ꓕꓲ ꓫꓵꓽ ꓪ ꓟꓽ ꓓ
ꓚꓲꓸ ꓓꓳ ꓕꓽ ꓢꓲꓸ ꓪ ꓜꓽ ꓥ꓾ ꓢꓯꓼ ꓕꓵꓼ ꓕ ꓢꓲꓸ ꓓꓳ ꓪ ꓓ
ꓟꓬꓱꓽ ꓬꓰ ꓗꓹ ꓓꓴ ꓟ꓾
ꓠꓯꓼ ꓠꓯꓼ ꓫꓵ ꓫꓵ ꓔꓴ ꓢꓲꓸ ꓠꓬꓲ꓾ ꓟꓬꓱꓽ ꓗꓪ ꓠꓲꓹ ꓞ ꓔꓶꓹ ꓠ ꓔꓸ
ꓢ ꓘꓪ ꓟꓶ ꓬꓯꓸ ꓟꓬꓱꓽ ꓬꓰ ꓢꓲ꓾ ꓞꓲꓼ ꓔꓯ ꓪꓽ ꓗꓸ ꓠꓬꓹ ꓠ ꓔꓸ
ꓞꓳ ꓫꓸ ꓗꓴꓷꓼ ꓗꓪ ꓪꓴꓽ ꓡ ꓠꓰ꓾ ꓢꓷꓸ ꓠꓲꓹ ꓒꓴ ꓫꓵꓺ ꓟꓽ ꓡꓳꓼ ꓠꓰ
ꓐꓶꓽ ꓒꓽ ꓐꓯ ꓕꓳꓹ ꓕꓲ ꓡꓳꓼ ꓬꓰꓳ꓾ ꓐꓶꓽ ꓟ ꓝꓲꓺ ꓓꓴ ꓛꓱꓼ ꓬꓰ ꓡꓻꓳ
ꓜꓲꓽ ꓠꓬꓹ ꓥ꓾
ꓣꓳ ꓘꓹ ꓣꓳ ꓡꓳ ꓤ ꓟ ꓔꓯ꓾ ꓟꓽ ꓢꓲꓽ ꓙꓬ ꓠꓽ ꓟꓽ ꓔꓸ ꓐꓳ
ꓣꓳ ꓦꓲ ꓣꓳ ꓕꓲ ꓠꓱ ꓟ ꓔꓯ꓾ ꓟꓽ ꓓꓰꓽ ꓙ ꓠꓽ ꓟꓽ ꓔꓸ ꓐꓳ
ꓟꓲ ꓠꓯ ꓦꓯꓼ ꓡꓯꓼ ꓓꓰꓽ ꓙ ꓖꓶ꓾ ꓠꓬ ꓐꓲ ꓢꓲꓹ ꓢꓲꓸ ꓟꓬꓱꓽ ꓬꓰ ꓠꓬꓹ
ꓕꓲ ꓠꓬꓲ ꓔꓲꓸ ꓠꓽ ꓡꓽ ꓪ ꓥꓳ꓾ ꓠꓲꓹ ꓟ ꓫꓵꓺ ꓢꓲꓸ ꓜꓲꓽ ꓠꓬꓹ ꓥ=
ꓢꓷꓸ ꓙꓲꓽ ꓙꓳ꓾
ꓮ ꓐ ꓮ ꓟ ꓫꓵꓽ ꓪꓳꓼ ꓐꓴꓳ꓾
ꓮ ꓫꓵꓽ ꓫꓵꓽ ꓪꓴ ꓬꓲꓸ ꓔꓯ ꓓꓰꓽ꓾ ꓮ ꓡꓲ ꓕꓲ ꓗꓯ ꓬꓲꓸ ꓔꓯ ꓗꓱꓸ
ꓳꓸ ꓡꓲ ꓔꓲꓸ ꓠꓽ ꓟꓽ ꓥꓻ ꓓꓳ꓾ ꓳꓸ ꓡꓲ ꓔꓲꓸ ꓠꓽ ꓟꓽ ꓛꓱꓼ ꓡ
ꓚꓳ ꓑꓸ ꓪꓽ ꓢꓲꓸ ꓬꓰ ꓠꓬꓹꓮ ꓟꓽ꓾ ꓦ ꓐ ꓪꓽ ꓗꓸ ꓢꓲꓸ ꓠꓬꓹꓮ ꓟꓽ
ꓒꓴ ꓧꓪ ꓤꓽ ꓔꓯ ꓫꓸ ꓠꓬꓲ ꓤꓼ꓾ ꓫꓵꓺ ꓧꓪ ꓟꓶꓼ ꓔꓯ ꓫꓱꓸ ꓤꓼ ꓡꓯ=
ꓢꓴ ꓟꓵꓽ ꓢꓴ ꓡꓳ ꓛꓲꓳ ꓐꓯ ꓢꓲ꓾
ꓮ ꓑ ꓒꓴ ꓟ ꓟꓽ ꓞꓳꓽ ꓦꓹ꓾ ꓮꓸ ꓬ ꓫꓵꓺ ꓟ ꓟꓽ ꓙꓴꓽ ꓦꓹ
ꓮ ꓘꓶꓸ ꓫꓸ ꓢꓲꓸ ꓧꓪ ꓠꓬꓹ ꓥ꓾ ꓮ ꓘꓶꓸ ꓞꓰꓽ ꓢꓲꓸ ꓜꓽ ꓠꓬꓹ ꓥ
ꓬꓲꓸ ꓪ ꓡꓰ ꓐꓰ ꓜꓱꓽ ꓗꓹ ꓐꓯ꓾ ꓬꓲꓸ ꓪ ꓡꓰ ꓐꓰ ꓜꓽ ꓗꓹ ꓐꓯ
ꓦ ꓐ ꓕꓲꓽ ꓟ ꓪꓽ ꓒꓵꓽ ꓟ꓾ 7 ꓠꓬꓲ ꓜꓱꓽ ꓓꓴ ꓡꓲꓸ ꓟꓽ ꓙꓳ=
ꓠꓸ ꓪ ꓓꓴ ꓟꓽ ꓙꓳ꓾
ꓡꓯ ꓒꓯꓹ ꓗꓪ ꓒꓴ ꓠꓸ ꓪ ꓡ ꓕꓽ꓾ ꓮ ꓐ ꓦꓲ ꓗꓪ ꓡ ꓡ ꓓꓴ
ꓛꓲ ꓔꓱꓹ ꓗꓪ ꓒꓴ ꓗꓶ ꓪ ꓬꓰ ꓕꓽ꓾ ꓟꓹ ꓟ ꓦꓲ ꓗꓪ ꓜꓯꓼ ꓡ ꓓꓴ
ꓖꓳ ꓡꓱ ꓥꓳ ꓡꓳꓸ ꓖꓳ ꓡꓱ ꓠꓸ꓾ ꓠꓸ ꓪ ꓒꓴ ꓕꓲ ꓒꓯꓼ ꓟꓽ ꓓꓰꓺ=
ꓮ ꓠꓯꓺ !
ꓟꓽ ꓓꓰꓽ ꓖꓶ ꓠꓰ ꓖꓴꓽ ꓡ ꓝꓲ꓾ ꓟꓽ ꓓꓰꓼ ꓖꓶꓸ ꓖꓶ ꓟꓳꓸ ꓡ ꓝꓲ
ꓬꓲꓸ ꓗꓸ ꓘꓳ_ ꓕꓽ ꓖꓶ ꓡ ꓝꓲ꓾ ꓬꓲꓸ ꓠꓲꓹ ꓒꓴ ꓕꓽ ꓡꓯꓼ ꓡ ꓝꓲ
ꓶ ꓡꓯꓼ ꓔꓯꓸ ꓠꓰ ꓕꓽ ꓔꓯꓸ ꓟꓽ꓾ ꓫꓸ ꓓꓳꓽ ꓙꓳꓸ ꓙꓳꓽ ꓕꓽ ꓜꓳꓻ ꓟꓽ
ꓒꓴ ꓧꓪ ꓒꓽ ꓐꓴ ꓠꓲꓹ ꓟ ꓙꓬ꓾ ꓒꓴ ꓧꓪ ꓟ ꓐꓴ ꓟꓬ ꓐꓲ ꓞꓰ
ꓳꓸ ꓡꓲ ꓕꓽ ꓗ ꓬꓰ ꓝꓲ ꓟꓽ=
ꓩꓴꓸ ꓮ ꓕꓽ ꓕꓱ ꓒꓴ ꓓꓰꓽ ꓘꓶꓽ꓾ ꓦ ꓚꓮꓡꓡ ꓦ ꓕꓱꓻ ꓫꓸ ꓘꓶꓽ ꓕꓱ
ꓠꓲꓹ ꓟ ꓙꓳ ꓢꓴ ꓬꓰ ꓡꓯ ꓟꓴꓽ꓾ ꓙ ꓟꓶ ꓗꓴꓸ ꓢꓴ ꓬꓰ ꓡꓯ ꓟꓴꓽ
ꓒꓴ ꓧꓪ ꓤꓽ ꓔꓯ ꓫꓸ ꓠꓬꓲ ꓤꓼ꓾ ꓒꓴ ꓧꓪ ꓟꓶꓼ ꓔꓯ ꓫꓱꓸ ꓤꓼ ꓡꓯ=
