ꓟꓬ-ꓟ ꓗꓴꓷꓼ ꓠꓯꓸꓼ ꓚꓳꓦꓲꓓ-19 ꓠꓻ ꓓꓱꓽ ꓔꓳꓹ ꓜꓳ ꓔꓬ ꓟ ꓦꓬꓼ ꓠꓬꓲ ꓗꓪ “ꓑ ꓫꓬꓼ ꓐꓱ ꓶ ꓑ ꓫꓬ” ꓐꓯ ꓢꓲ ꓫꓱꓸ ꓤꓼ ꓔꓳꓹ ꓙ ꓠꓬꓲ ꓙ ꓡꓯ ꓘꓳ ꓔꓬ ꓡꓳ꓿
ꓧꓶꓸ ꓕꓯ ꓑ ꓫꓬꓼ ꓡꓰ ꓢꓲꓻ ꓣꓴ ꓔꓸ ꓟ ꓗꓴꓷꓼ ꓙꓵꓽ ꓜꓴ ꓡꓰ ꓙꓵꓽ ꓔꓬ ꓟ ꓦꓬꓼ ꓠꓬꓲ ꓗꓪ ꓠꓬ ꓚꓳꓦꓲꓓ-19 ꓠꓻ ꓡ ꓢꓴ ꓔꓯ ꓮ ꓫꓵꓽ ꓙ ꓫꓸ ꓟꓽ ꓛꓲ ꓔꓬ ꓖꓴ ꓖꓶ꓾ ꓧꓪꓽ ꓚꓸ ꓜ ꓚꓸ ꓠꓻ ꓫꓬꓹ ꓖꓶ ꓡ ꓥ ꓟꓲ꓾ ꓮ ꓟꓶ ꓑ ꓫꓬ ꓙꓵꓽ ꓪ ꓦꓴ ꓢꓴ ꓐꓴ ꓡꓰ ꓠꓻ ꓫꓬꓹ ꓖꓶ ꓡ ꓟ ꓐꓰ꓾ ꓜꓽ ꓓꓴ ꓔꓳꓹ ꓙ ꓡ ꓟ ꓕꓲ ꓫꓵꓽ ꓟꓲ ꓟꓽ ꓙꓳ꓿ ꓟꓽ ꓞꓲ ꓞꓳ ꓠꓻ ꓐꓴ ꓳꓫꓬꓖꓰꓠ ꓦꓻ ꓠꓹ ꓟ ꓚꓲ ꓛꓬ ꓔꓱꓹ ꓚꓲ ꓛꓬ ꓢꓯꓼ ꓕꓵꓼ ꓟ ꓔꓯ ꓥ ꓟꓲ ꓗꓽ ꓔꓸ ꓢꓲ꓾ ꓠꓯ ꓞꓲꓼ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓥ ꓟꓲ ꓞꓳꓹ ꓡꓴꓽ ꓔꓬ ꓡꓳ꓿ ꓮ ꓫꓵꓽ ꓡꓲꓸ ꓦ ꓡꓱ ꓐꓳ ꓓꓴ ꓟꓽ ꓙꓳ ꓡꓰꓳ꓿
ꓕꓱ ꓡꓱ ꓫꓸ ꓘꓶ ꓓꓴ ꓔꓳꓹ ꓜꓳꓽ ꓔꓬ ꓟ ꓟꓬ- ꓟ ꓑ ꓫꓬꓼ ꓐꓴ ꓐꓱ ꓶ ꓠꓱꓸ ꓐꓯꓼ ꓬꓰ ꓙ ꓢꓴ ꓧꓪ ꓟꓽ ꓟꓳꓻ ꓠꓬꓲ꓾ ꓑ ꓫꓬ ꓐꓱ ꓶ ꓑ ꓫꓬ ꓐꓯ ꓢꓲ ꓜꓽ ꓓꓴ ꓔꓳꓹ ꓙ ꓡꓯ ꓘꓳ ꓟ꓾ ꓠꓯ ꓞꓲꓼ ꓐꓰ ꓳꓫꓬꓖꓰꓠ ꓧꓪ ꓙ ꓡꓯ ꓘꓳ ꓟ ꓐꓰ꓾ ꓫꓵꓻ ꓟꓳ ꓔꓵꓸ ꓙ ꓟ ꓟꓬꓱꓽ ꓬꓰ ꓔꓬ ꓡꓳ꓿ ꓡ-ꓟ ꓒꓽ ꓐꓴ ꓡꓲꓸ ꓠꓬꓹ ꓟꓽ ꓙ ꓟꓬꓱꓽ ꓬꓰ ꓔꓬ ꓡꓳ꓿
ꓜꓽ ꓓꓴ ꓞꓰꓹ ꓡꓰ ꓔꓬ ꓟ ꓦꓲ ꓘꓴꓽ ꓠꓬ ꓒꓯꓽ ꓒꓴ ꓒꓴ ꓔꓶꓸ ꓠꓹ ꓟ꓾ ꓠꓯ ꓞꓲꓼ ꓣꓱ ꓬꓯꓼ ꓟ ꓦꓲ ꓠꓬ ꓒꓯꓽ ꓫꓵ ꓫꓵ ꓢꓷꓸ ꓡꓰ ꓓꓴ ꓔꓶꓸ ꓠꓹ ꓟ ꓟꓸ ꓖꓶ ꓔꓬ ꓡꓳ꓿
