ꓑꓴ-ꓔ-ꓳ ꓟꓵꓽ ꓗꓪ ꓗꓳ-ꓪꓰꓼ ꓠꓻ ꓢꓴ ꓟꓬꓽ ꓡ ꓔꓬ ꓠꓬꓲ ꓞꓳ ꓠꓻ ꓚꓰꓹ ꓟꓳ-ꓓꓳ (ꓮꓟꓐꓴꓡꓮꓠꓚꓰ) ꓕꓲ ꓟ ꓠꓲꓹ ꓞ ꓠꓲꓹ ꓧꓳꓽ ꓣꓱꓽ ꓬꓯꓼ ꓔꓬ ꓡꓳ ꓐꓰ ꓧꓳꓑꓰ ꓚꓳꓦꓲꓓ ꓣꓰꓢꓑꓳꓠꓢꓰ ꓔꓰꓮꓟ ꓡꓰ the Lisu Times ꓗꓪ ꓓꓳꓽ ꓜꓳ ꓩꓴ ꓡ ꓡꓳ=
“ꓮ ꓟꓶ ꓚꓳꓦꓲꓓ ꓞꓳ ꓠꓻ ꓐꓴ ꓔꓯ ꓧꓳꓑꓰ ꓡꓰ ꓙꓽ ꓖꓶ ꓔꓸ ꓟ ꓳ-ꓢꓲ-ꓙꓲ ꓢꓯꓼ ꓦ ꓖꓴ ꓗꓪ ꓚꓰꓹ ꓛꓲ ꓡ ꓠꓹ ꓟ ꓐꓱ ꓶ꓾ ꓝꓮꓲ ꓟꓽ ꓜꓳ ꓟꓽ ꓔꓱꓹ ꓫꓵꓻ ꓡ ꓠꓬ ꓫꓵꓻ ꓟꓳ ꓔꓵꓸ ꓙ ꓓꓴ ꓗꓪ ꓮꓟꓐꓴꓡꓮꓠꓚꓰ ꓕꓲ ꓢꓶꓽ ꓠꓲꓹ ꓞ ꓣꓱꓽ ꓬꓯꓼ ꓥ= ꓕꓱ ꓟ ꓐꓱ ꓶ ꓔꓲꓺ ꓖꓶ ꓐ ꓡ ꓢꓴ ꓮ ꓡꓲ ꓟ ꓔꓯ ꓟꓲ ꓠꓲꓹ ꓒꓴ ꓒꓴ ꓘꓳ ꓣꓴ ꓥꓳ= ꓞꓳ ꓚꓬꓴꓹ ꓪ ꓚꓬꓴꓹ ꓟꓬꓱꓽ ꓗꓪ ꓔꓺ ꓙ ꓡꓯ=” ꓐꓰ ꓧꓳꓑꓰ ꓡꓠꓖꓳ ꓢꓽ ꓡ ꓙꓵꓽ ꓟꓸ ꓒ ꓮ-ꓘꓰ-ꓠꓳꓸ ꓡꓰ ꓢꓷ ꓙ ꓟꓴ ꓙ ꓩꓴ ꓡ ꓡꓳ=
ꓮꓟꓐꓴꓡꓮꓠꓚꓰ ꓟꓳ-ꓓꓳ ꓒꓵꓽ ꓠꓬ ꓑꓴ-ꓔ-ꓳ ꓟꓵꓽ ꓗꓪ Licensed ꓟꓳ-ꓓꓳ ꓥ ꓠꓬ 150 ꓢꓯꓹ꓾ Licensed ꓟꓽ ꓙꓳ ꓟ ꓠꓬ 50 ꓢꓯꓹ ꓖꓼ ꓡꓯꓼ ꓖꓼ ꓙꓲ ꓒꓵꓽ ꓡꓳ ꓐꓰ ꓢꓷꓸ ꓪ ꓡꓳ=
ꓮꓟꓐꓴꓡꓮꓠꓚꓰ ꓪꓴꓻ ꓠꓹ ꓟ ꓚꓱꓹ ꓐꓱ ꓶ ꓔꓲꓺ ꓖꓶ ꓬꓰ ꓙ ꓔ ꓙ ꓠꓲꓹ ꓫꓵ ꓢꓴ ꓐꓴ ꓠꓬ ꓮ-ꓘꓰ-ꓢꓯꓸ (ꓑꓧꓽ 09755610344ꓹ ꓰꓟꓮꓲꓡꓽ [email protected]) ꓗꓪ ꓙ ꓡꓯ ꓘꓳ ꓛꓲ ꓡꓳ ꓐꓰ ꓓꓳꓽ ꓢꓷꓸ ꓪ ꓡꓳ=
ꓮ ꓟꓶ ꓕꓱ ꓕꓲ ꓝꓲꓸ ꓑꓴ-ꓔ-ꓳ ꓠꓬ ꓗ-ꓛꓲ ꓟꓵꓽ ꓗꓪ ꓐꓰ ꓗꓳ-ꓪꓰꓼ ꓠꓻ ꓚꓲꓸ ꓡꓰ ꓢꓴ ꓠꓳꓸ 1 ꓟꓬꓽ ꓟ ꓡꓳ ꓒꓱ ꓥ ꓢꓲ꓾ ꓕꓲ ꓗꓴꓷꓼ ꓡꓱꓸꓼ ꓗꓪ ꓠꓬ ꓠꓳꓸ 3 ꓟꓬꓽ ꓟ ꓡꓳ ꓒꓱ ꓥ ꓡꓳ=
HOPE LNGO ꓠꓬ ꓟꓶ-ꓡ-ꓫꓵ-ꓓꓰ ꓘꓹ ꓗꓪ ꓬꓲꓸ ꓚꓰ ꓔꓶ ꓔꓸ ꓟ꓾ ꓑꓴ-ꓔ-ꓳ ꓡ ꓞꓳ ꓐꓴ ꓡꓰ ꓧꓳꓽ ꓣꓱꓽ ꓔꓬ ꓟ ꓜꓴ ꓥ ꓢꓲ꓾ (1) ꓠꓻ ꓢꓴ ꓔꓯ ꓠꓯ ꓞꓲꓼ ꓫꓬꓹ ꓖꓶ ꓟ ꓟꓬꓱꓽ (2) ꓬꓯ ꓒꓲꓸ ꓛꓵꓼ ꓕꓴꓸ ꓢꓴ ꓔꓯ ꓠꓽ ꓖꓶˍ ꓟ ꓐꓰ꓾ ꓬꓰ ꓜꓽ ꓬꓰ ꓓꓳ ꓚꓱꓹ ꓟꓸ ꓖꓶ_ ꓟ ꓟꓬꓱꓽ (3) ꓗꓳ-ꓪꓰꓼ ꓠꓻ ꓢꓴ ꓔꓯ ꓳ-ꓢꓲ-ꓙꓲ ꓢꓯꓼ ꓦ ꓝꓲ ꓟ ꓟꓬꓱꓽ (4) ꓫꓸ ꓓꓴ ꓟꓷꓼ ꓓꓴ ꓔꓳꓹ ꓜꓳ ꓡ ꓕꓯ ꓠꓲꓹ ꓞ ꓬꓰ ꓙ ꓔꓺ ꓙ ꓟ ꓫꓱꓸ ꓤ ꓟ ꓟꓬꓱꓽ ꓬꓰ ꓔꓬ ꓟ ꓜꓴ ꓕꓲ ꓜꓴ ꓥ ꓡꓳ=
