2021 ꓘꓳꓼ 11 ꓦ 11-12 ꓠꓬꓲ ꓘꓴꓽ ꓗꓪ ꓗ-ꓛꓲ ꓟꓵꓽ ꓗꓪ ꓗꓳ-ꓪꓰꓼ ꓚꓹ ꓟꓶ ꓢꓴ ꓐꓴ ꓗꓪ ꓐꓰ ꓑꓴ-ꓔ-ꓳ ꓡꓳ ꓒꓱ ꓢꓴ ꓠꓬ ꓠ ꓐꓼ 1 ꓟꓬꓽ ꓢꓴ ꓗꓷ ꓡꓰ ꓔꓬ ꓡꓳ꓿
ꓗ-ꓛꓲ ꓕꓲ ꓟꓵꓽ ꓡꓱꓸꓼ ꓗꓪ ꓗꓳ-ꓪꓰꓼ ꓧꓪ ꓟꓶ ꓢꓴ 111 ꓣꓳ ꓙꓳ ꓢꓲ꓾ ꓑꓴ-ꓔ-ꓳ ꓗꓪ ꓠꓬ 54 ꓣꓳ ꓙꓳ ꓡꓳ꓿
Video News
“ꓚꓹ ꓟꓶ ꓢꓴ ꓵꓺ ꓟꓬꓱꓺ ꓟ ꓠꓯꓸ꓿ ꓞꓳ ꓘꓹ ꓗꓪ ꓠꓽ ꓮ ꓗꓪ ꓛꓲ ꓛꓲ ꓠꓻ ꓢꓴ ꓐꓲ ꓓꓳꓹ ꓟꓽ” ꓐꓰ ꓬꓰ ꓙ ꓜꓴ ꓗꓪ ꓟ ꓕꓲ ꓣꓳ ꓡꓰ ꓐꓯ ꓡꓳ꓿
ꓗꓴꓷꓼ ꓙꓵ ꓪ ꓣꓴ ꓔꓸ ꓟ ꓟꓯꓼ ꓐꓴ ꓡꓰ ꓪ ꓘꓴ ꓦꓲ꓾ ꓑꓲꓹ ꓡꓴꓸ ꓡꓳ ꓖꓪ ꓑꓮꓲ ꓒꓴ ꓙꓵꓽ ꓪ ꓖꓶ ꓗꓷ ꓟ ꓗꓪ ꓐꓰ ꓚꓹ ꓠ ꓠ ꓠꓻ ꓢꓴ ꓟꓬꓽ ꓡ ꓔꓬ ꓟ ꓥ ꓡꓳ꓿
ꓠꓻ ꓘꓵ ꓟ ꓮ ꓫꓵ ꓡꓰꓸ ꓟꓽ ꓞꓴꓽ ꓠꓴ ꓬꓰꓳ ꓐꓯ ꓢꓴ ꓮ ꓟꓬꓹ ꓙꓳ ꓔꓬ ꓥ ꓟꓲ ꓘꓹ ꓞꓳ ꓤ ꓐꓴ ꓠꓽ ꓮ ꓡꓲ ꓠꓻ ꓫꓬꓹ ꓚꓱꓹ ꓚꓹ ꓪ ꓢꓴ ꓟꓽ ꓙꓳ ꓐꓯ ꓡꓳ꓿
“ꓜꓻ ꓓꓶꓽ ꓕꓽ ꓜꓻ ꓒꓶꓽ ꓦ ꓪ ꓬꓰ ꓓꓴ ꓟ ꓠꓰ ꓔꓸ ꓥ꓿ ꓙꓳꓺ ꓟꓽ ꓛꓲ꓿ ꓙꓯꓽ ꓫꓸ ꓟꓽ ꓛꓲ ꓐꓯ ꓢꓲ ꓢꓯꓼ ꓖꓶ ꓢꓴ ꓡꓲꓸ ꓠꓬꓹ ꓓꓴ ꓟ” ꓐꓯ ꓢꓲ ꓑ-ꓘꓰꓸ ꓒꓽ ꓕꓲ ꓣꓳ ꓡꓰ ꓐꓯ ꓟꓸ ꓖꓶ ꓡ ꓡꓳ꓿
ꓟꓶ-ꓡ-ꓫꓵ-ꓓꓰ ꓗꓪ ꓳ-ꓢꓲ-ꓙꓲ ꓞꓰ ꓡꓰ ꓢꓲꓸ ꓢꓯꓼ ꓟꓬ ꓖꓴ ꓡꓰ ꓢꓴ ꓕꓲ ꓣꓳ ꓙꓳ ꓡꓰꓳ꓿ ꓬꓲ ꓔꓯ ꓧꓳꓑꓰ ꓡꓠꓖꓳ ꓡꓰ ꓙꓽ ꓖꓶ ꓔꓸ ꓟ ꓳ-ꓢꓲ-ꓙꓲ ꓦ ꓔꓶꓸ ꓗꓪ ꓢꓯꓼ ꓦ ꓝꓲ ꓥ ꓟꓲ ꓟꓽ ꓢꓯꓸ ꓡꓻꓳ꓿
“ꓬꓲꓸ ꓟꓬꓱꓺ ꓟ ꓠꓽ ꓞꓳ ꓔꓲ ꓟ ꓬꓳ-ꓟ-ꓙ꓾ 61 ꓘꓳꓼ ꓥꓳ꓿ ꓥꓪ ꓠꓴ ꓘꓴ ꓜꓲꓼ ꓞꓳ ꓗꓪ ꓗꓳ-ꓪꓰꓼ ꓚꓹ ꓟꓶ ꓢꓲꓸ ꓬꓲꓸ ꓪꓴꓸ ꓢꓲꓺ ꓒ ꓠꓯꓸꓼ ꓗꓪ ꓬꓲꓼ ꓟꓶ ꓡꓰ ꓢꓴ ꓟ ꓥꓳ꓿” ꓐꓰ ꓟꓸ ꓒ ꓙꓬ-ꓒꓴ-ꓢꓯꓸ ꓡꓰ ꓐꓯ ꓟꓸ ꓖꓶ ꓡ ꓡꓳ꓿
“ꓢꓴ ꓚꓸ ꓠꓻ ꓕꓽ ꓑꓴ-ꓔ-ꓳ ꓗꓪ ꓠꓻ ꓢꓴ ꓟꓽ ꓙꓳ ꓢꓰ꓿ ꓙ ꓖꓶꓽ ꓙꓵꓹ ꓠꓽ ꓮ ꓘꓶꓸ ꓪ ꓬꓰꓳ ꓫꓵꓽ ꓧꓳꓽ ꓪꓴꓸ ꓟꓴ ꓢꓴ ꓐꓰ꓾ ꓑ ꓫꓬ ꓐꓴ ꓮ ꓘꓶꓸ ꓟꓽ ꓢꓯꓼ ꓕꓵꓼ ꓪ ꓡꓰꓳ꓿ ꓮ ꓟꓶ ꓠꓽ ꓠꓲꓹ ꓞ ꓫꓬ ꓡ ꓝꓲ ꓐꓰ ꓪꓽ ꓘꓴ ꓠꓬꓹ ꓥꓳ꓿ ꓥꓪ ꓠꓴ ꓖꓶ ꓮ ꓡꓲ ꓬꓰ ꓟꓽ ꓗꓴꓸꓳ꓿ ꓮ ꓡꓲ ꓐ ꓡ ꓖꓳ ꓡꓱ ꓠꓽ ꓬꓰ ꓙ ꓔꓬ ꓥꓳ꓿ ꓞꓳ ꓘꓹ ꓮ ꓙꓵꓽ ꓗꓪ ꓠꓻ ꓚꓲꓸ ꓙꓰ ꓖꓴꓳ ꓫꓵꓽ ꓐꓯ ꓓ ꓥꓳ꓿” ꓐꓰ ꓬꓰ ꓙ ꓜꓴ ꓗꓪ ꓟ ꓕꓲ ꓣꓳ ꓡꓰ ꓐꓯ ꓡꓳ꓿
