ꓟꓬꓱ ꓓꓳꓽ ꓙꓳˍ ꓟ ꓢꓯꓸ ꓐꓬꓱꓽ ꓔꓶꓹ ꓒꓽ꓾ ꓗꓴ-ꓒꓴꓸ ꓚꓴꓹ ꓓꓶꓽ ꓡꓯ ꓘꓳ ꓒꓽ ꓐ-ꓣꓴ-ꓢꓲ-ꓡꓲ ꓫꓵꓻ ꓗꓷ ꓟ ꓠꓬ ꓞꓲ ꓠꓲꓹ 2023 ꓘꓳꓼ 7 ꓦ 20 ꓠꓬꓲ ꓕꓯꓽ (50) ꓘꓳꓼ ꓐꓲ ꓡꓰꓳ꓿
ꓬꓲꓸ ꓞꓲꓼ (32) ꓘꓳꓼ ꓕꓯꓽ ꓫꓵꓻ ꓢꓲ꓾ ꓬꓲꓸ ꓫꓵꓻ ꓟ ꓙ ꓖꓴ ꓔꓯ ꓬꓲ ꓞꓲ ꓬꓲꓸ ꓦ ꓫꓵꓽ ꓓꓵꓽ ꓙ ꓟꓬꓽ ꓓꓴ ꓚꓺ ꓟꓲꓽ ꓚ ꓔꓬ ꓟ ꓠꓬꓲꓸ ꓠꓬꓲ ꓗꓪ ꓛꓲ ꓥ ꓡꓳ꓿
1973 ꓘꓳꓼ 7 ꓦ 20 ꓕꓯ ꓬꓲꓸ ꓪꓴꓸ ꓓꓵ ꓘꓳꓼ ꓠꓻ ꓟ ꓑꓶꓸ ꓓꓴ Equagesic ꓠꓯꓺ ꓞꓲꓼ ꓜꓽ ꓢꓲꓸ ꓬꓲꓼ ꓟꓶ ꓔꓬ ꓟ ꓗꓪ ꓐꓰ ꓟꓽ ꓧꓪꓸ ꓛꓲ ꓡ ꓡ꓾ ꓫꓵꓻꓳ꓿
ꓖꓳ ꓕꓲ ꓘꓳꓼ 5 ꓦ 10 ꓠꓬꓲ ꓕꓯꓽ ꓥ ꓟꓲ ꓢꓯꓸ ꓐꓬꓱꓽ ꓓꓱꓽ ꓔꓬ ꓜꓽ ꓥꓰꓽ ꓗꓪ ꓟꓽ ꓢꓲꓽ ꓖꓽ ꓓꓳꓽ ꓡ ꓢꓲ꓾ ꓠꓯ ꓞꓲꓼ ꓦꓲ ꓗꓪ ꓚꓹ ꓠꓬꓲ ꓠꓬ ꓪꓴꓸ ꓠꓷꓸ 13% ꓳ’ ꓠꓬꓹ ꓟ ꓡꓳꓸ ꓟꓳˍ ꓡꓳ꓿
ꓬꓲꓻ ꓙꓬ ꓓꓳ ꓠꓬꓽ ꓜꓲ ꓢꓲ ꓪꓴꓸ ꓠꓷꓸ ꓳ’ ꓟ ꓑꓶꓸ ꓓꓴ ꓫꓵꓻ ꓡꓳ꓾ ꓛꓴꓽ ꓙꓳ ꓢꓴ ꓠꓰ ꓠꓲꓹ ꓖꓳꓼ ꓢꓲꓸ ꓢꓰꓼ ꓗꓷꓳ꓾ ꓠꓲꓽ ꓒꓽ ꓠꓰ ꓟꓯꓽ ꓢꓲꓸ ꓫꓵꓻꓳ꓾ ꓐꓯ ꓠꓰ ꓬꓲꓸ ꓫꓵꓻ ꓙ ꓖꓴ ꓔꓯ ꓮ ꓟꓯꓹ ꓫꓵꓽ ꓚꓺ ꓔꓬ ꓡꓳ꓿
ꓬꓲꓸ ꓫꓵꓻ ꓟꓳ ꓔꓯ ꓬꓲꓸ ꓦꓲ ꓢꓲ ꓟ ꓡꓰ ꓧꓳ-ꓗꓳ ꓗꓪ ꓐꓰ ꓴꓢꓮ ꓗꓴꓷꓼ Seattle ꓡꓳ ꓒꓱ꓾ Lake View Cemetery ꓡꓱ ꓜꓳ ꓓꓰ ꓗꓪ ꓔꓵꓸ ꓔꓸ ꓡꓳ꓿
1973 ꓘꓳꓼ 7 ꓦ 2 0ꓠꓬꓲ ꓕꓯꓽ ꓬꓲꓸ ꓟꓽ ꓫꓵꓻ ꓢꓰꓽ ꓕꓯꓽ ꓬꓲꓸ ꓟꓶꓽ ꓓꓱꓽ ꓔꓸ ꓟ꓾ ꓖꓳ ꓕꓲꓽ ꓦꓬꓼ ꓠꓬꓲ ꓓꓳ ꓡ 8 ꓢꓯꓹ ꓐꓶꓽ ꓖꓴ ꓢꓲꓸ ꓓꓱꓽ ꓔꓸ ꓟ꓾ Enter the Dragon ꓢꓯꓸ ꓐꓬꓱꓽ ꓠꓬ ꓖꓳ ꓕꓲꓽ ꓘꓳꓼ ꓙꓲ ꓡꓳꓹ ꓬꓰ ꓟ ꓢꓯꓸ ꓐꓬꓱꓽ ꓒꓬꓱꓼ ꓡ ꓢꓲ꓾ ꓢꓯꓸ ꓐꓬꓱꓽ ꓛꓳꓽ ꓒꓵꓽ 400 ꓢꓯꓹ ꓪ ꓬꓰꓳ꓿
ꓟꓲꓸ ꓟꓲ ꓗꓪ ꓛꓲ ꓔꓲꓸ ꓢꓯꓸ ꓠꓬꓹ ꓚꓰꓼ ꓥꓳ ꓐꓯ ꓠꓽ ꓐꓶ-ꓬꓴ-ꓢꓲ-ꓡꓲ ꓠꓬ 82 ꓘꓳꓼ ꓡꓳꓼˍ ꓟ ꓞꓳ ꓟꓳꓽ ꓒꓽ ꓕꓲꓽ ꓣꓳ ꓗ ꓠꓬꓹ ꓥꓳ꓿
