//ꓓꓵꓽ ꓙ ꓫꓵꓽ ꓠꓬꓲ ꓗꓹ ꓓꓴ ꓧꓪ ꓟꓰꓹ ꓕꓳ ꓶ ꓕꓱ ꓟ ꓗꓪ ꓡꓲ-ꓢꓴ ꓘꓳꓼ ꓫꓵꓼ ꓙꓳ_ ꓡ? ꓮ ꓡꓲ ꓕꓲ ꓠꓬꓲ ꓥ_ ꓡ? ꓟꓲꓸ ꓕꓯ ꓗꓪ ꓣꓳ ꓮ ꓡꓲ ꓬꓰ ꓙꓰ ꓠ ꓗꓹ ꓡ? ꓐꓯ_ ꓟ ꓟꓸ ꓟꓲꓽ ꓐꓳ ꓔꓸ ꓡꓳ= ꓮ ꓟ ꓡꓰ ꓐꓯ_ ꓟ ꓜꓳꓽ_ ꓡꓳ ꓐꓯ_ ꓟ ꓕꓯꓽ ꓢꓲ꓾ ꓡꓲ-ꓢꓴ ꓘꓳꓼ ꓫꓵꓼ ꓔꓯꓸ ꓟꓳꓸ ꓠꓻ ꓠꓬꓲ ꓔꓸ ꓟ ꓐꓰ꓾ ꓕꓳ ꓶ ꓵꓺ ꓔꓸ ꓟ ꓔꓯ ꓐꓳ ꓔꓸ ꓖꓶ ꓩꓴ ꓡ ꓟ ꓥ ꓡꓳ= ꓕꓳ ꓶ ꓵꓺ ꓢꓴ ꓐꓴ ꓥ ꓟꓲ ꓚꓲ ꓛꓬ ꓔꓱꓹ ꓚꓲ ꓛꓬ ꓢꓲꓻ ꓣꓴ ꓠꓹ ꓟ ꓥ ꓡꓳ= //
ꓘꓶꓽ ꓒꓴ ꓪꓴꓸ ꓔꓴ ꓟ
ꓗꓳꓸ ꓡꓳꓹ ꓡ ꓟ 20 ꓘꓳꓼ ꓖꓼ ꓡꓯꓼ ꓖꓼ ꓙꓲ ꓗꓪ ꓐꓰ ꓟꓬ-ꓟ ꓗꓴꓷꓼ ꓗꓪ ꓡꓲ-ꓢꓴ ꓘꓳꓼ ꓫꓵꓼ ꓔꓯ ꓑꓴ-ꓔ-ꓳ꓾ ꓟꓳ-ꓖꓳꓼ꓾ ꓐꓶ-ꓬꓲ ꓟꓵꓽ꓾ ꓬꓥ-ꓖꓳꓥ꓾ ꓕꓮꓲ ꓟꓵꓽ꓾ ꓝꓮꓲ ꓟꓶ-ꓡꓯ-ꓫꓸ ꓗꓴꓷꓼ꓾ ꓮ-ꓟꓯ-ꓣꓲ-ꓗ꓾ ꓳ-ꓢꓲ-ꓔꓯ-ꓡꓲ-ꓬ ꓗꓪ ꓛꓲ ꓟꓬꓱ ꓓꓳꓽ ꓙꓳ ꓙꓳ ꓮ ꓘꓶꓸ ꓬꓰ ꓓꓳ ꓩꓴ ꓡ ꓠꓬꓲꓳ= ꓡꓲ-ꓢꓴ ꓐꓴ ꓜꓲ ꓡꓯ ꓘꓳ ꓗꓹ ꓓꓴ꓾ ꓗꓹ ꓛꓲ ꓠꓲꓹ ꓟ ꓢ ꓓꓴ ꓐꓰ꓾ ꓪꓽ ꓡꓯ ꓘꓳ ꓟ ꓟꓳꓸ ꓖꓶ ꓓꓴ ꓒꓬꓱꓼ ꓡ ꓡꓳ= ꓕꓱ ꓟ ꓠꓬ ꓙꓲ_ ꓟ ꓕꓲ ꓒꓳꓹ ꓥ ꓡꓳ=
ꓖꓳ ꓡꓱ ꓥ ꓟꓲ꓾ ꓕꓲ ꓟꓵꓽ ꓕꓲ ꓟꓵꓽ ꓡꓲ-ꓢꓴ ꓘꓳꓼ ꓫꓵꓼ ꓬꓰ ꓓꓳ ꓩꓴ ꓡ ꓟ ꓗꓪ ꓠꓻ ꓠꓬꓲ ꓓꓴ ꓙꓳ ꓡ ꓟ ꓠꓬ꓾ ꓡꓲ-ꓢꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓔꓯꓸ ꓟꓳꓸ ꓥ ꓡꓳ= ꓑꓮꓲ ꓬꓰ ꓓꓳ ꓩꓴ ꓡ ꓟ ꓔꓯ ꓡꓳꓸ ꓠꓬꓲ ꓠꓬ꓾ ꓡꓲ-ꓢꓴ ꓘꓳ ꓫꓵꓼ ꓦꓬꓼ ꓠꓬꓲ ꓟꓽ ꓫꓱꓸ ꓡꓯ ꓘꓳ ꓘꓳ ꓬꓰ ꓔꓬ ꓟ ꓡꓳꓸ ꓓꓳ ꓡ ꓡꓳ=
ꓖꓳ ꓟ ꓗꓪ ꓐꓰ ꓠꓻ ꓠꓬꓲ ꓘꓶꓽ ꓓꓳ ꓡ ꓟ ꓠꓬ꓾ (1) ꓡꓲ-ꓢꓴ ꓘꓳꓼ ꓫꓵꓼ ꓙꓳ_ ꓡ? (2) ꓙꓳ_ ꓠꓬ ꓮ ꓡꓲ ꓕꓲ ꓠꓬꓲ ꓥ ꓡ? (3) ꓘꓳꓼ ꓫꓵꓼ ꓗꓪ ꓡꓲ-ꓢꓴ ꓐꓴ ꓮ ꓡꓲ ꓣꓱꓽ ꓬꓰ ꓚꓰꓼ ꓡ? (4) ꓡ ꓠꓹ ꓟ ꓦꓬꓼ ꓠꓬꓲ ꓗꓪ ꓡꓲ-ꓢꓴ ꓐꓴ ꓘꓳꓼ ꓫꓵꓼ ꓮ ꓡꓲ ꓬꓰ ꓙꓰ ꓠꓯ_ ꓡ?
ꓕꓳ ꓶ ꓐꓳ ꓢꓴ ꓡꓰ ꓡꓲ-ꓢꓴ ꓘꓳꓼ ꓫꓵꓼ ꓔꓯꓸ ꓟꓳꓸ ꓧꓪ ꓟꓰꓹ ꓗꓷ ꓠꓬ꓾ ꓓꓵꓽ ꓙ ꓚꓱꓹ ꓓꓽ ꓟ (3) ꓫꓵꓽ ꓚꓴꓸ ꓟꓳ_ ꓡꓳ= ꓖꓳ (3) ꓫꓵꓽ ꓔꓯ ꓧꓶꓸ ꓕꓯꓽ ꓡꓳꓸ ꓠꓬꓲ ꓡꓯ= ꓞꓳ ꓟꓳꓽ ꓞꓳ ꓔꓲꓺ ꓐꓴ ꓔꓯ ꓠꓻ ꓠꓬꓲ_ ꓟ (Interview) ꓐꓰ꓾ ꓕꓳ ꓶ ꓕꓳ ꓟꓲ ꓵꓺ_ ꓟ (Literature Review) ꓬꓰ ꓗꓷ ꓟ ꓗꓪ ꓐꓰ ꓧꓪ ꓟꓳ_ ꓟ ꓥ ꓡꓳ=
ꓡꓲ-ꓢꓴ ꓘꓳꓼ ꓫꓵꓼ ꓔꓯꓸ ꓟꓳꓸ ꓡꓲ-ꓢꓴ ꓐꓴ ꓘꓴꓽ ꓗꓪ ꓓꓵꓽ ꓙ ꓚꓱꓹ ꓓꓽ ꓟ (3) ꓫꓵꓽ ꓠꓬ꓾
(1) ꓡꓲ-ꓢꓴ ꓘꓳꓼ ꓫꓵꓼ ꓬꓲꓸ ꓫꓳꓽ ꓟꓽ ꓙꓳ= ꓡꓲ-ꓢꓴ ꓠꓬ ꓐꓶꓽ ꓓꓵꓽ ꓗꓴꓷꓼ ꓐꓴ ꓦ ꓐ ꓡꓳꓸ ꓕꓳ ꓶ ꓔꓯ ꓛꓳ ꓢꓲꓸ ꓘꓳꓼ ꓫꓵꓼ ꓬꓰ_ ꓡꓳ= ꓘꓳꓼ ꓫꓵꓼ ꓬꓰ ꓗꓴꓸ ꓡ ꓟ ꓠꓬ ꓐꓶꓽ ꓓꓳ ꓗꓪ ꓐꓰ ꓡ_ ꓟ ꓙꓲ-ꓢꓴ ꓢꓲ ꓤ ꓦ ꓡꓱ ꓚꓱꓹ ꓟꓸ ꓖꓶ ꓡ ꓢꓴ ꓪꓴ-ꓢ ꓟꓬꓱꓽ ꓬꓰ ꓢꓴ ꓟꓲ-ꓫꓲ-ꓠ-ꓬꓲ ꓐꓴ ꓑꓶꓸ ꓓꓴ ꓥ ꓡꓳ= ꓕꓱ ꓡꓱ ꓙꓵꓻ ꓚꓱꓹ ꓐꓰ ꓓꓵꓽ ꓙ ꓚꓱꓹ ꓔꓯ ꓟꓬ-ꓟ ꓗꓴꓷꓼ꓾ ꓟꓶ-ꓚꓲ-ꓠꓽ ꓡꓳ ꓒꓱ ꓗꓪ ꓔꓬ ꓟ ꓟꓸ ꓒ ꓓꓽ ꓡꓲ-ꓫꓲ-ꓬ ꓡꓰ ꓓꓽ ꓔꓳꓹ ꓡꓳ=
(2) ꓡꓲ-ꓢꓴ ꓘꓳꓼ ꓫꓵꓼ ꓬꓲꓸ ꓫꓳꓽ ꓟꓽ ꓙꓳ= ꓡꓲ-ꓢꓴ ꓐꓴ ꓠꓬ ꓧꓶꓽ ꓒꓽ ꓦ ꓐ ꓡꓳꓸ ꓕꓳ ꓶ ꓔꓯ ꓛꓳ_ ꓡꓳ= ꓖꓳ ꓟ ꓑꓶꓸ ꓓꓴ ꓡꓲ-ꓢꓴ ꓘꓳꓼ ꓫꓵꓼ ꓟꓽ ꓥ= ꓧꓶꓽ ꓒꓽ ꓫꓵꓽ ꓘꓳꓼ ꓫꓵꓼ ꓔꓯ ꓖꓼ ꓛꓳ ꓔꓬ ꓟ ꓥ ꓡꓳ= ꓕꓱ ꓡꓱ ꓙꓵꓻ ꓚꓱꓹ ꓐꓰ ꓓꓵꓽ ꓙ ꓚꓱꓹ ꓔꓯ ꓴꓢꓮ ꓗꓪ ꓔꓬ ꓟ ꓟꓸ ꓒ ꓓꓽ ꓡ-ꓪꓴꓽ ꓡꓰ ꓓꓽ ꓔꓳꓹ ꓡꓳ=
(3) ꓡꓲ-ꓢꓴ ꓘꓳꓼ ꓫꓵꓼ ꓬꓲꓸ ꓫꓳꓹ ꓫꓳꓽ ꓙꓳ ꓡꓳ= 12 ꓦ ꓟꓴ ꓗꓪ ꓦ ꓐ ꓞꓰꓹ ꓡꓰ ꓗꓸ ꓠꓯꓸ ꓕꓲ ꓠꓬꓲ ꓠꓬ꓾ ꓡꓲ-ꓢꓴ ꓘꓳꓼ ꓫꓵꓼ ꓥꓳ= ꓡꓲ-ꓢꓴ ꓘꓳꓼ ꓫꓵꓼ ꓡꓲꓽ ꓒꓰꓼ ꓡꓲꓽ ꓚꓱꓹ ꓚ ꓟꓲꓽ ꓕꓱ ꓟ ꓔꓯ ꓠꓬ ꓟꓬ-ꓟ ꓗꓴꓷꓼ꓾ ꓑꓴ-ꓔ-ꓳ ꓡꓳ ꓒꓱ꓾ ꓟꓶ-ꓡ-ꓫꓵ-ꓓꓰ ꓘꓹ ꓗꓪ ꓔꓬ ꓟ ꓟꓸ ꓒ ꓓꓽ ꓖꓷ-ꓓꓲ-ꓬꓴ ꓡꓰ ꓚ ꓟꓸ ꓖꓶ ꓡ ꓡꓳ=
“ꓧꓶꓽ ꓒ ꓘꓳꓼ ꓫꓵꓼ ꓟꓽ ꓛꓲ ꓡ ꓢꓰ ꓕꓯ ꓡꓲ-ꓢꓴ ꓘꓳꓼ ꓫꓵꓼ ꓛꓲ ꓡ ꓚꓰꓼ ꓥ= ꓬꓲꓸ ꓠꓬꓲ ꓔꓳꓼ ꓠꓬ ꓟꓽ ꓙꓳ= ꓦ ꓐ ꓞꓰꓹ ꓡ ꓝꓲꓸ ꓔꓯ ꓖꓼ ꓢꓲꓸ ꓐꓯ ꓙꓲ ꓡꓳ= ꓕꓲ ꓧꓪꓹ ꓧꓪꓹ ꓠꓬ 12 ꓦ ꓘꓴꓽ ꓗꓪ ꓦ ꓐ ꓬꓲꓸ ꓫꓵꓼ 2 ꓧꓪꓹ ꓓꓳ ꓡ ꓚꓰꓼ= ꓖꓳ ꓡꓱ ꓥ ꓠꓬ꓾ 12 ꓦ ꓡꓳꓹ ꓬꓰ ꓕꓲ ꓒꓳꓹ ꓔꓯꓸ ꓢꓲꓸ ꓦ ꓞꓰꓹ ꓗꓷ ꓡꓰ ꓢꓲꓸ ꓦ ꓐ ꓫꓵꓼ ꓪꓴꓸ ꓔꓴ_ ꓟ ꓦꓬꓼ ꓠꓬꓲ ꓠꓬ ꓡꓲ-ꓢꓴ ꓘꓳꓼ ꓫꓵꓼ ꓥꓳ= ꓐꓶꓽ ꓓꓵ ꓦ ꓐ ꓡꓳꓸ ꓕꓳ ꓶ ꓔꓯ ꓡꓳꓸ ꓠꓬꓲ ꓠꓬ꓾ (ꓮ ꓡꓻ 12 ꓦ 20 ꓠꓬꓲ ꓗꓪ ꓐꓰ 30 ꓠꓬꓲ) ꓕꓲ ꓙꓶ ꓗꓪ ꓡꓲ-ꓢꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓥ ꓡꓳ=” ꓐꓰ ꓟꓸ ꓒ ꓓꓽ ꓖꓷ-ꓓꓲ-ꓬꓴ ꓡꓰ ꓚ ꓟꓸ ꓖꓶ ꓡ ꓡꓳ=
ꓡꓲ-ꓢꓴ ꓘꓳꓼ ꓫꓵꓼ ꓠꓬ 3 ꓠꓬꓲ ꓬꓰ ꓚꓰꓼ ꓟ ꓐꓰ꓾ ꓮ ꓡꓲ ꓣꓱꓽ ꓬꓰ ꓚꓰꓼ ꓟ ꓔꓯꓸ ꓟꓳꓸ ꓬꓲꓸ ꓡꓰ ꓕꓱ ꓡꓱ ꓚ ꓟꓸ ꓖꓶ ꓡ ꓢꓰꓽ ꓡꓳ= “ꓡꓲ-ꓢꓴ ꓘꓳꓼ ꓫꓵꓼ ꓠꓽ ꓠꓰ 3 ꓠꓬꓲ ꓬꓰ ꓚꓰꓼ ꓥ= ꓬꓲꓸ ꓪꓴꓸ ꓕꓲ ꓠꓬꓲ ꓠꓽ ꓠꓰ ꓦꓲ ꓖ ꓦꓲ ꓙꓲ ꓮ ꓙꓵꓽ ꓢꓲꓹ ꓚꓰꓼ꓾ ꓖꓪ ꓓꓴ ꓐꓵ ꓞꓲꓽ ꓐꓰ ꓖꓳ ꓓꓱꓽ ꓞꓲꓽ ꓚꓰꓼ ꓥ= ꓜꓽ ꓓꓴ ꓠꓸ ꓒꓵꓼ ꓐꓰ ꓙꓲ ꓒꓶꓻ ꓙ ꓖꓶ ꓚꓰꓼ ꓥ= ꓕꓱ ꓟ ꓠꓬ 12 ꓦ ꓦ ꓞꓰꓹ ꓖꓳ ꓕꓲ ꓠꓬꓲ ꓥꓳ= ꓘꓳꓼ ꓫꓵꓼ ꓐꓱ ꓶ ꓙ ꓖꓶ ꓟ꓾ ꓢꓲꓽ ꓫꓬ ꓟꓬꓱꓽ ꓬꓰ_ ꓟ ꓮ ꓙꓵꓽ ꓖꓳ ꓕꓲ ꓠꓬꓲ ꓬꓰ ꓓꓳ ꓡꓰ ꓝꓲ ꓠ ꓗꓹ ꓡꓳ= ꓖꓳ ꓕꓲ ꓠꓬꓲ ꓟꓶ ꓘꓶꓼ ꓠꓬ ꓕꓲ ꓘꓳꓼ ꓡꓱꓸꓼ ꓗꓪ ꓒꓬꓱꓼ ꓗꓷ ꓟ ꓐꓰ꓾ ꓚ ꓟꓲꓽ ꓗꓪ ꓟ ꓟꓽ ꓢꓷ ꓟꓽ ꓓ ꓟ ꓟꓸ ꓟꓲꓽ ꓔꓯ ꓪꓴꓽ ꓢꓴ ꓡꓰ ꓚ ꓟꓸ ꓖꓶꓽ ꓚꓰꓼ ꓥ= 12 ꓦ ꓦ ꓞꓰꓹ ꓗꓳꓸ ꓙꓰ ꓕꓲ ꓠꓬꓲ ꓠꓬ ꓡꓲ-ꓢꓴ ꓘꓳꓼ ꓫꓵꓼ ꓥꓳ= ꓖꓳ ꓗꓪ ꓠꓬ ꓠꓯꓼ ꓠꓯꓼ ꓔꓴ ꓢꓲꓸ ꓮꓸ ꓙꓬ ꓘꓳꓼ ꓚꓰꓼ= ꓜꓽ ꓓꓴ ꓙꓲ ꓙꓲ ꓚꓸ ꓜꓽ ꓚꓰꓼ= ꓦꓲ ꓗꓪ ꓐꓰ ꓟꓬꓱꓽ ꓟꓽ ꓓꓳ꓾ ꓦ ꓟꓲ ꓗꓪ ꓟꓽ ꓙꓰ ꓚꓰꓼ= ꓤ ꓟꓸ ꓠꓱ ꓑꓱ ꓡꓯ ꓘꓳ ꓚꓰꓼ ꓥ= ꓗꓹ ꓛꓲ ꓛꓲ ꓔꓬ ꓚꓰꓼ ꓥ= ꓝꓮꓲ ꓕꓲ ꓠꓬꓲ ꓗꓪ ꓠꓬ ꓟꓬꓱꓽ ꓬꓰ ꓡꓳꓸ ꓬꓰ ꓚꓱꓹ ꓖꓪ ꓙꓱ ꓚꓰꓼ ꓥ= ꓦ ꓟꓲ ꓮ ꓡꓲ ꓕꓲ ꓒꓳꓹ ꓗꓪ ꓛꓬꓽ ꓓꓴ꓾ ꓫꓵꓺ ꓮ ꓗꓪ ꓚꓴꓸ ꓙꓰ ꓓꓴ꓾ ꓧꓪ ꓮ ꓗꓪ ꓖꓼ ꓙꓰ ꓓꓴ ꓔꓯ ꓟꓳꓸ ꓖꓪ ꓙꓱ ꓖꓪ ꓟꓴ ꓡꓯ ꓘꓳ ꓚꓰꓼ ꓥ=”
ꓕꓱ ꓟ ꓡꓳꓺ ꓚ ꓐꓯ_ ꓠꓬ꓾ ꓡꓲ-ꓢꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓕꓱ ꓟ ꓔꓯ ꓧꓪꓺ ꓢꓷꓸ ꓡꓰ ꓠꓹ ꓟ ꓠꓬ꓾ ꓮ ꓟꓶ “new moon day in December 2022” ꓐꓯ ꓢꓲꓸ google ꓧꓪ ꓓꓴ ꓗꓪ ꓧꓪ ꓪ ꓓ ꓡꓳ= ꓔꓯꓺ ꓥꓳꓽ꓾ 2022 ꓘꓳꓼ ꓐꓱ ꓶ ꓡꓲ-ꓢꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓔꓯ ꓧꓪꓺ ꓠꓬꓲ ꓠꓬ꓾ ꓐꓶꓽ ꓓꓵꓽ ꓦ ꓐ ꓡꓳꓸ ꓕꓳ ꓶ ꓡꓳ ꓚ ꓐꓯ_ ꓕꓯ꓾ 2022 ꓘꓳꓼ 12 ꓦ 23 ꓠꓬꓲ ꓠꓯꓼ 5ꓽ17 ꓙꓵꓹ ꓠꓬ ꓡꓲ-ꓢꓴ ꓘꓳꓼ ꓫꓵꓼ ꓥ ꓡꓳ=
ꓘꓳꓼ ꓫꓵꓼ ꓟꓽ ꓛꓲ ꓢꓰꓽ ꓕꓯ ꓕꓻ ꓑꓳꓸ ꓕꓲ ꓠꓬꓲ꓾ ꓘꓳꓼ ꓫꓵꓼ ꓕꓲ ꓠꓬꓲ꓾ ꓝꓮꓲ ꓘꓳꓼ ꓫꓵꓼ ꓓꓵꓽ ꓡꓰ ꓗꓸ ꓠꓯꓸ ꓖꓳ ꓑꓳꓸ ꓕꓲ ꓠꓬꓲ꓾ ꓮ ꓙꓵꓽ ꓠꓬ 3 ꓠꓬꓲ ꓠꓽ ꓚꓰꓼ꓾ ꓚ ꓟꓲꓽ ꓚ ꓚꓰꓼ꓾ ꓤ ꓟꓸ ꓠꓱ ꓑꓱ ꓚꓰꓼ꓾ ꓟꓬꓱꓽ ꓬꓰ ꓡꓳꓸ ꓬꓰ ꓚꓱꓹ ꓖꓴ ꓟꓳꓸ ꓡꓯ ꓘꓳ ꓚꓰꓼ꓾ ꓜꓽ ꓬꓲꓼ ꓓꓳ ꓬꓲꓼ ꓔꓬ ꓚꓰꓼ ꓟ ꓠꓬ ꓡꓲ-ꓢꓴ ꓒꓵꓽ ꓒꓽ ꓡꓲꓽ ꓒꓰꓼ ꓥ ꓡꓳ ꓐꓰ ꓢꓳ ꓟꓶ ꓡꓳ=
=====
ꓮ ꓠꓱ ꓠꓱ ꓡꓲ-ꓢꓴ ꓒꓵꓽ ꓒ ꓐꓴ ꓫꓶꓸ ꓡ ꓖꓴ ꓬꓲꓸ ꓚꓰꓺ꓾ ꓧꓶꓽ ꓒꓽ ꓟꓵꓽ ꓗꓪ ꓟ ꓡꓲ-ꓢꓴ ꓐꓴ ꓚ ꓟꓲꓽ ꓐꓰ꓾ ꓬꓲꓸ ꓪ ꓘꓳꓼ ꓫꓵꓼ ꓬꓰ ꓚꓱꓹ ꓡꓲ ꓒꓰꓼ ꓡꓲꓽ ꓚꓱꓹ꓾ ꓔꓯ ꓟꓳꓸ ꓕꓳ ꓶ ꓵꓺ ꓢꓲꓸ ꓮ ꓔꓲꓸ ꓧꓪ ꓟꓰꓹ ꓠꓬꓲ ꓗꓷ ꓟ ꓐꓳ ꓟꓸ ꓖꓶ ꓠꓲꓹ ꓫꓵ ꓢꓰꓽ ꓡꓳ= ꓕꓱ ꓟ ꓠꓬ ꓕꓳ ꓶ ꓵꓺ ꓢꓲꓸ ꓧꓪ ꓟꓰꓹ ꓔꓸ ꓟ ꓥ ꓡꓳ=
“ꓡꓲ-ꓢꓴ ꓘꓳꓼ ꓫꓵꓼ ꓔꓯ ꓧꓶꓽ ꓫꓵꓽ ꓘꓳꓼ ꓫꓵꓼ ꓥ ꓟꓲ ꓐꓯ_ ꓡꓳ= ꓡꓲ-ꓢꓴ ꓥꓳꓽ ꓗꓪ ‘ꓘꓳꓼ ꓫꓵꓼ’ ꓐꓯ_ ꓟ ꓠꓬ ꓟꓳ ꓘꓳꓼ ꓬꓲꓸ ꓫꓵꓼ ꓥꓳ= ꓕꓱ ꓟ ꓠꓬ ꓡꓲ-ꓢꓴ ꓐꓴ ꓐꓱ ꓶ ꓟꓬꓱꓺ ꓓꓳꓽ ꓙꓳ ꓡꓳꓹ ꓬꓰ_ ꓟ ꓟ ꓑꓮꓲ ꓓꓽ ꓟ ꓥ ꓡꓳ= ꓘꓳꓼ ꓫꓵꓼ ꓦꓬꓼ ꓠꓬꓲ ꓠꓬ꓾ ꓬꓲꓸ ꓠꓬꓲ ꓕꓲ ꓠꓬꓲ ꓔꓳꓼ ꓐꓯ ꓟꓽ ꓙꓲ= ꓟꓴ ꓗꓪ ꓗꓪ ꓟ ꓦ ꓐ ꓔꓯ ꓛꓳ ꓢꓲꓸ ꓢꓪꓼ ꓟ ꓑꓶꓸ ꓓꓴ ꓟꓬꓽ ꓠꓬꓲ ꓠꓬ꓾ ꓧꓪ ꓒꓴ ꓦ ꓐ ꓡꓳꓸ ꓕꓳ ꓶ 12 ꓦ ꓬꓲꓸ ꓟꓶꓽ 10 ꓠꓬꓲ ꓘꓴꓽ ꓗꓪ ꓜꓯꓼ ꓡꓳ= ꓡꓲ-ꓢꓴ ꓐꓴ ꓮ ꓙꓵꓽ ꓕꓲ ꓠꓲꓹ ꓕꓲ ꓪ ꓬꓰ ꓪ ꓡꓰ ꓠꓹ ꓟ꓾ 1993 ꓘꓳꓼ ꓗꓪ ꓠꓬ ꓠꓳꓸ ꓟꓲꓽ ꓡꓲ-ꓢꓴ ꓙꓵꓽ_ ꓟ ꓟꓵꓽ ꓙꓵꓽ ꓢꓲꓽ ꓒ ꓐꓴ ꓡꓰ ꓡꓲ-ꓢꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓔꓯ ꓕꓲ ꓘꓳꓼ ꓡꓲꓸ ꓕꓲ ꓘꓳꓼ 12 ꓦ 20-22 ꓠꓬꓲ ꓗꓪ ꓬꓰ ꓠꓹ ꓟ ꓐꓯ ꓞꓷꓹ ꓗꓷꓳ” “Kuoshi Festival” is also called ” Heshi Festival”. “Kuoshi” is transliteration of Lisu language, which means ” the beginning of new year” or ” the new year”. It is the grandest traditional festival for the Lisus. People used to decide the day of celebration by observing natural phenomenon, so they didn’t have the same fixed New Year’s Day in different places. Usually it’s between the last ten-day period of December and January of the next year in accordance to the Gregorian calendar. In December 1993, the government of the Nujiang Lisu Autonomous Prefecture decided that the “Kuoshi Festival” would be celebrated from 20th to 22nd in December, so that Lisu people can welcome the New Year and celebrate the festival at the same time.” link
ꓝꓮꓲ ꓕꓲ ꓣꓳ ꓡꓰ ꓕꓱ ꓡꓱ ꓐꓳ ꓔꓸ ꓢꓰꓽ ꓡꓳ꓾ “ꓡꓲ-ꓢꓴ ꓘꓳꓼ ꓫꓵꓼ ꓠꓬ ꓧꓶꓽ ꓒꓽ ꓘꓳꓼ ꓫꓵꓼ ꓐꓰ ꓕꓲ ꓡꓲꓹ ꓪ_ ꓡꓳ= ꓦꓬꓼ ꓠꓬꓲ ꓗꓼ ꓐꓯ ꓞꓷꓹ ꓟꓽ ꓙꓲ= 12 ꓦ ꓬꓲꓸ ꓟꓶꓽ 10 ꓠꓬꓲ ꓐꓰ 1 ꓦ ꓟ ꓘꓴꓽ ꓗꓪ ꓜꓯꓼ ꓡꓳ= “For the Lisu, the festival is equivalent to Spring Festival celebrated by China’s majority group. The date for the festival is not fixed. It usually falls between the last ten-day period of December and January of the next year.” link
ꓕꓱ ꓟ ꓔꓯ ꓡꓳꓸ ꓠꓬꓲ ꓠꓬ ꓡꓲ-ꓢꓴ ꓘꓳꓼ ꓫꓵꓼ ꓔꓯ ꓧꓶꓽ ꓒꓽ ꓐꓰ ꓠꓱꓸ ꓐꓯꓼ ꓟꓵꓽ ꓚꓳ ꓒꓽ ꓐꓴ ꓡꓰ 12 ꓦ ꓬꓲꓸ ꓟꓶꓽ 10 ꓠꓬꓲ ꓘꓴꓽ ꓗꓪ ꓬꓰ ꓚꓽ ꓡꓳ ꓐꓰ ꓐꓯ ꓡꓳ= ꓕꓱ ꓗꓪ ꓡꓲ-ꓢꓴ ꓘꓳꓼ ꓫꓵꓼ ꓠꓬ ꓧꓶꓽ ꓒ ꓘꓳꓼ ꓫꓵꓼ ꓐꓰ ꓫꓱꓸ ꓫꓱꓸꓼ ꓥ ꓡꓳ ꓐꓯ_ ꓟ ꓥ ꓟꓲ ꓡꓳꓸ ꓓꓳ ꓡ ꓢꓰꓽ ꓡꓳ= ꓖꓳ ꓡꓱ ꓥ ꓟꓲ ꓧꓶꓽ ꓒꓽ ꓘꓳꓼ ꓫꓵꓼ ꓠꓬ 1- 2 ꓦ ꓟ ꓘꓴꓽ ꓗꓪ ꓬꓰ ꓚꓰꓼ ꓟ ꓑꓶꓸ ꓓꓴ ꓮ ꓔꓲꓸ ꓟꓽ ꓫꓱꓸ ꓡꓯ ꓘꓳ ꓟ ꓓꓵꓽ ꓙ ꓚꓱꓹ ꓡꓳꓸ ꓓꓳ ꓡ ꓡꓳ=
ꓝꓮꓲ ꓧꓶꓽ ꓗꓴꓷꓼ ꓙꓵꓽ ꓜꓴ ꓗꓪ ꓐꓰ ꓡꓲ-ꓢꓴ ꓐꓴ ꓟꓸ ꓟꓲꓽ ꓧꓪ ꓟꓰꓹ ꓔꓸ ꓟ ꓕꓳ ꓶ ꓕꓲ ꓑꓷꓠ ꓗꓪ ꓐꓳ ꓔꓸ ꓟ ꓡꓲ-ꓢꓴ ꓘꓳꓼ ꓫꓵꓼ ꓟꓸ ꓟꓲꓽ ꓢꓳ ꓠꓬꓲ ꓢꓰꓽ ꓡꓯ=
“ꓡꓲ-ꓢꓴ ꓞꓳ ꓫꓵꓽ ꓐꓴ ꓐꓱ ꓶ ꓑꓮꓲ ꓬꓲ ꓫꓵꓽ ꓬꓲꓸ ꓙꓰ ꓫꓳꓹ ꓫꓳꓽ ꓙꓳ ꓡꓳ= ꓔꓯ ꓥꓳꓽ ꓐꓯ ꓠꓬ꓾ ꓘꓳꓼ ꓫꓵꓼ ꓦꓬꓼ ꓠꓬꓲ꓾ ꓮ ꓕꓽ ꓓꓯ ꓦꓬꓼ ꓠꓬꓲ꓾ ꓬꓲꓻ ꓞ ꓓꓵꓽ ꓔꓲꓹ ꓦꓬꓼ ꓠꓬꓲ꓾ ꓠꓲꓹ ꓙ ꓦꓬꓼ ꓠꓬꓲ꓾ ꓜꓻ ꓫꓵꓼ ꓑꓮꓲ꓾ ꓪꓽ ꓚꓲ ꓠꓲꓽ ꓖꓴ ꓠꓲ ꓔꓲꓺ ꓦꓬꓼ ꓠꓬꓲ ꓕꓱ ꓡꓱꓳ ꓫꓵꓽ ꓙꓳ ꓡꓳ= ꓘꓳꓼ ꓫꓵꓼ ꓦꓬꓼ ꓠꓬꓲ ꓐꓯ_ ꓟ ꓠꓬ ꓟꓳ ꓘꓳꓼ ꓬꓲꓸ ꓫꓵꓼ ꓑꓮꓲ ꓥ ꓡꓳ= ꓕꓱ ꓟ ꓠꓬ ꓡꓲ-ꓢꓴ ꓞꓳ ꓫꓵꓽ ꓐꓴ ꓗ ꓟꓲꓽ ꓡꓲ ꓒꓰꓼ ꓡꓳ ꓚ ꓬꓰ ꓩꓴ ꓡ ꓟ ꓑꓮꓲ ꓥ ꓡꓳ= 1988 ꓘꓳꓼ ꓕꓯ ꓠꓳꓸ ꓟꓲꓽ ꓟꓵꓽ ꓡꓲ-ꓢꓴ ꓚꓲ ꓛꓬ ꓙꓵꓽ ꓟ ꓟꓵꓽ ꓗꓪ ꓟ ꓑ ꓫꓬ ꓝꓲ ꓓꓴ ꓐꓴ ꓜꓲꓼ ꓡꓯ ꓘꓳ ꓢꓲꓸ ꓕꓲ ꓘꓳꓼ ꓡꓲꓸ ꓕꓲ ꓘꓳꓼ 12 ꓦ 20 ꓠꓬꓲ ꓠꓬ ꓙꓵꓽ ꓗ ꓡꓳ ꓚ ꓡꓲ-ꓢꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓬꓰ ꓗꓷ ꓡꓳ= 1993 ꓘꓳꓼ ꓗꓪ ꓛꓲ ꓡ ꓠꓬ ꓕꓲ ꓘꓳꓼ ꓡꓲꓸ ꓕꓲ ꓘꓳꓼ 12 ꓦ 20 ꓠꓬꓲ ꓗꓪ ꓐꓰ 22 ꓠꓬꓲ ꓗꓪ ꓛꓲ ꓡꓲ-ꓢꓴ ꓘꓳꓼ ꓫꓵꓼ ꓐꓯ ꓢꓲꓸ ꓙꓵꓽ ꓗ ꓙꓳ ꓡꓰꓳ= ꓗꓴꓷꓼ ꓙꓵꓽ ꓦꓲ ꓐꓴ 3 ꓠꓬꓲ ꓟꓬꓱꓽ ꓟꓽ ꓬꓰ ꓬꓰ ꓠꓽ ꓠꓹ ꓟ ꓥ ꓡꓳ= The Lisu minority has its own festivals such as Kuo Shi Day, Knife Pole Day, Spring Bathing Day, Valentine’s Day, New Rise Day, Sacrificial Mountain Deity Day, etc. the People who believe in Christ have Easter, Thanksgiving, Christmas Day, etc.
“Kuo Shi Day”- it means New Year or celebrating New Year. it is the Lisu minority’s traditional festival. In December, 1988, the People’s Representative Conference of Nujiang Lisu Nationality Autonomous Prefecture resolved that it is legal festival and decided that 20th of December every year is the legal date of teh Lisu minority’s yearly traditional “Kuo Shi Day”. … In December of 1993, the Prefecture People’s Representative Conference again promulgated documents to make the yearly 20th – 22th of December be the legal festival of “Kuo Shi Day” and during the festival, government offices have a three-day holiday.” (The Lisu National Living in the Middle Reaches of the Nujian River, 2003, P-454).
ꓘꓶꓽ ꓧꓶꓹ
ꓕꓯꓽ ꓢꓲ ꓗꓪ ꓐꓳ ꓗꓷ ꓟ ꓡꓰ ꓐꓰ ꓡꓲ-ꓢꓴ ꓘꓳꓼ ꓫꓵꓼ ꓟꓽ ꓙꓳ꓾ ꓙꓲ-ꓢꓴ ꓢꓲ ꓤ ꓟꓲ-ꓫꓲ-ꓠ-ꓬꓰ ꓐꓴ ꓡꓰ ꓟꓸ ꓖꓶ ꓡ ꓟ ꓐꓶ ꓓꓳ ꓦ ꓐ ꓡꓳꓸ ꓕꓳ ꓶ (Gregorian Calendar) ꓔꓯ ꓛꓳ ꓢꓲꓸ ꓘꓳꓼ ꓫꓵꓼ ꓢꓴ ꓥꓳ ꓐꓯ_ ꓟ ꓕꓲ ꓜꓴ꓾ ꓝꓮꓲ ꓡꓲ ꓢꓴ ꓘꓳꓼ ꓫꓵꓼ ꓟꓽ ꓙꓳ꓾ ꓡꓲ-ꓢꓴ ꓐꓴ ꓠꓬ ꓧꓶꓽ ꓒꓽ ꓫꓵꓽ ꓘꓳꓼ ꓫꓵꓼ ꓔꓯ ꓖꓼ ꓛꓳ ꓔꓬ ꓡꓳ ꓐꓯ_ ꓟ ꓕꓲ ꓜꓴ꓾ ꓝꓮꓲ ꓡꓲ-ꓢꓴ ꓠꓬ ꓬꓲꓸ ꓫꓳꓽ ꓘꓳꓼ ꓫꓵꓼ ꓙꓳ_ ꓡꓳ= ꓖꓳ ꓟ ꓠꓬ 12 ꓦ ꓬꓲꓸ ꓟꓶꓽ ꓦ ꓞꓰꓹ ꓡꓰ ꓗꓸ ꓠꓯꓸ ꓕꓲ ꓠꓬꓲ ꓥ ꓡꓳ꓾ ꓐꓯ_ ꓟ ꓕꓲ ꓜꓴ ꓕꓱ ꓡꓱ ꓙꓳ_ ꓟ ꓔꓯ ꓡꓳꓸ ꓓꓳ ꓡ ꓡꓳ= ꓕꓱ ꓟ ꓠꓬ ꓕꓲ ꓦ ꓫꓵꓽ ꓢꓴꓺ ꓔꓬ ꓟ ꓡꓲ-ꓢꓴ ꓘꓳꓼ ꓫꓵꓼ ꓔꓯꓸ ꓟꓳꓸ ꓬꓲꓸ ꓓꓽ ꓟ ꓓꓵꓽ ꓙ ꓚꓱꓹ (3) ꓚꓱꓹ ꓥ ꓡꓳ=
ꓡꓲ-ꓢꓴ ꓘꓳꓼ ꓫꓵꓼ ꓔꓯꓸ ꓟꓳꓸ ꓬꓲꓸ ꓓꓽ ꓟ ꓓꓵꓽ ꓙ ꓚꓱꓹ ꓟꓽ ꓪꓽ ꓢꓴ ꓕꓱ 3 ꓜꓴ ꓗꓪ ꓥ ꓟꓲ꓾ ꓡꓲ-ꓢꓴ ꓡꓲ ꓒꓰꓼ ꓚꓱꓹ ꓧꓳꓽ ꓢꓴ ꓟꓸ ꓒꓽ ꓟꓸ ꓟ ꓐꓴ꓾ ꓢꓷꓸ ꓠꓲꓹ ꓙꓳ ꓢꓴ ꓟꓸ ꓒ ꓓꓽ ꓟ ꓐꓴ ꓐꓴ ꓕꓱꓹ ꓞ ꓡꓳ= ꓚ ꓟꓲꓽ ꓕꓳ ꓶ ꓐꓳ ꓢꓴ ꓐꓴ ꓐꓰ꓾ ꓟꓵꓽ ꓚꓳ ꓢꓴ ꓐꓴ ꓡꓰ ꓐꓳ ꓔꓸ ꓟ ꓕꓳ ꓶ ꓗꓪ ꓥ ꓟꓲ ꓕꓱ (3) ꓜꓴ ꓡꓰ ꓐꓯ_ ꓟ ꓐꓯ ꓘꓶꓽ ꓔꓯ ꓕꓲ ꓖ ꓕꓲ ꓔꓳꓸ ꓐꓳ ꓜꓯꓼ ꓔꓸ ꓡꓳ= ꓖꓳ ꓟ ꓑꓶꓸ ꓓꓴ ꓡꓲ-ꓢꓴ ꓐꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓠꓬ ꓕꓲ ꓖ ꓕꓲ ꓟꓵꓽ꓾ ꓬꓲꓸ ꓦꓬꓼ ꓬꓲꓸ ꓠꓬꓲ ꓟꓽ ꓪꓽ ꓪꓽ ꓬꓰ ꓔꓬ ꓟ ꓥ ꓡꓳ ꓐꓰ ꓢꓳ ꓟꓶ ꓡꓳ=
ꓮ ꓟꓶ ꓗꓪ ꓛꓲ ꓧꓪ ꓟꓰꓹ ꓪ_ ꓟ ꓗꓪ꓾ ꓓꓵꓽ ꓙ ꓓꓴ ꓬꓲꓸ ꓝꓻ ꓓꓽ ꓟ ꓕꓲ ꓘꓶꓽ ꓙꓳ ꓡꓳ= ꓖꓳ ꓟ ꓠꓬ꓾ ꓧꓶꓽ ꓒꓽ ꓫꓵꓽ ꓘꓳꓼ ꓫꓵꓼ ꓦꓬꓼ ꓠꓬꓲ ꓔꓯ ꓠꓱꓸ ꓐꓯꓼ ꓮ-ꓢꓲ-ꓬ ꓟꓵꓽ ꓢꓴ ꓮ ꓙꓵꓽ ꓖꓼ ꓛꓳ ꓔꓬ ꓡꓳ ꓐꓰ ꓐꓯ_ ꓠꓬ꓾ ꓠꓳꓸ ꓟꓲꓽ ꓟꓵꓽ ꓗꓪ ꓟ ꓙꓵꓽ ꓢꓲꓽ ꓒꓽ ꓐꓴ ꓮ ꓫꓵꓽ ꓑꓶꓸ ꓓꓴ 12 ꓦ ꓬꓲꓸ ꓟꓶꓽ 10 ꓠꓬꓲ ꓘꓴꓽ ꓗꓪ ꓡꓲ-ꓢꓴ ꓘꓳꓼ ꓫꓵꓼ ꓬꓰ ꓩꓴ ꓡ_ ꓡ? (1988 ꓘꓳꓼ ꓕꓯ 12 ꓦ 20 ꓠꓬꓲ ꓠꓬ ꓡꓲ-ꓢꓴ ꓘꓳꓼ ꓫꓵꓼ ꓥꓳ ꓐꓰ ꓐꓯ ꓗꓷꓳ) ꓧꓶꓽ ꓗꓴꓷꓼ ꓙꓵꓽ ꓢꓴ ꓐꓴ ꓮ ꓫꓵ ꓑꓶꓸ ꓓꓴ ꓡꓲ-ꓢꓴ ꓘꓳꓼ ꓫꓵꓼ ꓔꓯ ꓬꓲꓸ ꓫꓳꓹ ꓫꓳꓽ ꓕꓲ ꓘꓳꓼ ꓡꓲꓸ ꓕꓲ ꓘꓳꓼ 12 ꓦ 20-22 ꓠꓬꓲ ꓗꓪ ꓬꓰ ꓠꓹ ꓟ ꓕꓵꓼ ꓪ ꓓꓳ ꓔꓸ ꓡ? (1993 ꓘꓳꓼ ꓗꓪ ꓐꓰ ꓕ ꓑꓳꓸ 12 ꓦ 20-22 ꓠꓬꓲ ꓠꓬ ꓡꓲ-ꓢꓴ ꓘꓳꓼ ꓫꓵꓼ ꓥꓳ ꓐꓰ ꓐꓯ ꓗꓷꓳ) ꓕꓱ ꓟ ꓠꓬ ꓡꓲ-ꓢꓴ ꓘꓳꓼ ꓫꓵꓼ ꓠꓬ ꓧꓶꓽ ꓒꓽ ꓘꓳꓼ ꓫꓵꓼ ꓔꓯ ꓟꓽ ꓫꓱꓹ꓾ ꓬꓲꓸ ꓫꓳꓹ ꓫꓳꓽ ꓥ ꓡꓳ ꓐꓯ_ ꓟ ꓢꓷꓸ ꓡꓰ ꓓꓴ ꓡꓰ ꓐꓰ ꓗꓹ ꓡꓳ= ꓡꓯ ꓫꓵ ꓧꓪ ꓟꓰꓹ ꓙꓲꓽ ꓙꓳ_ ꓟ ꓕꓲ ꓔꓳꓸ꓾ ꓕꓲ ꓝꓲꓸ ꓥ ꓡꓳ=
ꓟꓲꓸ ꓕꓯ ꓢꓲ ꓗꓪ ꓕꓱ ꓡꓱ ꓓꓵꓽ ꓙ ꓚꓱꓹ (3) ꓟ ꓗꓪ ꓐꓰ ꓮ ꓡꓲ ꓙꓰ ꓡꓯ ꓐꓯ?
ꓡꓲ-ꓢꓴ ꓘꓳꓼ ꓫꓵꓼ ꓠꓬ ꓡꓲ-ꓢꓴ ꓐꓴ ꓕꓲ ꓠꓲꓹ ꓕꓲ ꓪ ꓓꓵꓽ ꓙ ꓚꓱꓹ ꓟꓽ ꓙꓳ_ ꓢꓰꓽ ꓟ꓾ ꓖꓪ ꓙꓱ ꓡꓯ ꓘꓳ ꓟꓽ ꓗꓴꓸ ꓢꓰꓽ ꓟ ꓔꓯ ꓟꓳꓸ ꓖꓶ ꓔꓬ ꓟ ꓕꓲ ꓫꓵꓽ ꓥ ꓡ?
ꓡꓲ-ꓢꓴ ꓘꓳꓼ ꓫꓵꓼ ꓗꓪ ꓡꓲ-ꓢꓴ ꓐꓴ ꓐꓱ ꓶ ꓚ ꓟꓲꓽ ꓚ ꓚꓱꓹ꓾ ꓟꓸ ꓖꓶ ꓑꓱ ꓖꓶ ꓚꓱꓹ꓾ ꓬꓰ ꓜꓽ ꓬꓰ ꓓꓳ ꓚꓱꓹ ꓖꓴ ꓟꓳꓸ ꓖꓶ_ ꓟ ꓮ ꓡꓲꓳ ꓫꓵꓽ ꓬꓰ ꓠꓯ_ ꓟ ꓓꓵꓽ ꓙ ꓛꓲ ꓡ ꓡ?
ꓑꓮꓲ ꓬꓰ ꓡꓯ ꓐꓯ_ ꓠꓬ ꓒꓴ ꓟꓶꓽ ꓒꓰꓼ ꓙꓳꓸ ꓙꓳꓽ ꓓꓵꓽ ꓙ ꓚꓰꓼ ꓟ ꓗꓪ ꓐꓰ꓾ ꓒꓴ ꓮ ꓘꓶꓸ ꓟꓽ ꓟꓶꓽ ꓟꓶꓽ ꓙꓲ ꓖꓴ ꓮ ꓘꓶꓸ ꓙꓳ ꓡꓰ ꓠ ꓮ ꓡꓲ ꓬꓰ ꓠꓹ ꓟ ꓥ ꓟꓲ ꓡꓯ ꓫꓵ ꓓꓵꓽ ꓙ ꓓꓳ ꓡ ꓡ?
ꓕꓳ ꓶ ꓵꓺ ꓢꓴ ꓐꓴ ꓓꓵꓽ ꓙ ꓖꓪ ꓠꓬꓲ ꓢꓲ꓾ ꓡꓯ ꓫꓵ ꓖꓪ ꓙꓱ ꓡꓯ ꓘꓳ ꓙꓰ ꓓꓴ ꓬꓰ ꓡꓯ= ꓡꓯ ꓫꓵ ꓢꓳ ꓟꓰꓹ ꓙꓰ ꓡꓯ= ꓠꓴ ꓪ ꓓꓵꓽ ꓙ ꓛꓲ ꓡ_ ꓟ ꓥ ꓟꓲ ꓕꓱ ꓗꓪ ꓐꓳ ꓖꓶ ꓡꓯ= ꓫꓸ ꓟꓳ ꓪ=
KJ, the Lisu Times
