ꓠꓬꓲꓸ ꓠꓬꓲ 2021 ꓘꓳꓼ 9 ꓦ 27 ꓠꓬꓲ ꓕꓯ ꓥꓳ ꓡꓳꓸ ꓓꓴ ꓬꓰ ꓙ ꓜꓴ (HOPE Local NGO) ꓗꓪ ꓐꓰ ꓑꓴ-ꓔ-ꓳ ꓟꓵꓽ꓾ ꓟꓶ-ꓡ-ꓫꓵ-ꓓꓰ ꓘꓹ ꓗꓪ ꓚꓳꓦꓲꓓ-19 ꓠꓻ ꓜꓳꓻ ꓡꓰ ꓢꓴ 2 ꓦꓲ ꓔꓯ ꓜꓽ ꓓꓴ ꓔꓳꓹ ꓙ ꓬꓰ ꓙ ꓟ ꓐꓰ꓾ ꓦꓲ ꓘꓴꓽ ꓐꓰ ꓦꓲ ꓖꓼ ꓦꓲ ꓙꓲ ꓗꓪ ꓠꓻ ꓐꓶꓽ ꓓꓲ ꓢꓰꓼ ꓠꓯ ꓞꓲꓼ ꓒꓶꓸ ꓙ ꓟ ꓟꓬꓱꓽ ꓬꓰ ꓗꓷ ꓟ ꓓꓳꓽ ꓜꓳ ꓡ ꓡꓳ꓿
” ꓟꓲꓸ ꓟꓲ ꓠꓽ ꓥꓪ ꓠꓴ ꓕꓲ ꓜꓴ ꓠꓰ 3 ꓔꓶꓸ ꓗꓪ ꓐꓶ ꓓꓲ ꓢꓰꓼ ꓠꓯ ꓞꓲꓼ ꓒꓶꓸ ꓩꓴꓳ꓿ ꓟꓶ-ꓡ-ꓫꓲ-ꓓꓰ ꓗꓪ 2 ꓦꓲ꓾ꓟꓶꓸ-ꓚꓳꓸ-ꓪ ꓗꓪ 1 ꓦꓲ ꓥꓳ꓿ ꓠꓻ ꓡ ꓢꓴ ꓙꓳ ꓠꓬ ꓥꓪ ꓠꓴ ꓔꓯ ꓢꓷꓸ ꓡ ꓝꓲ ꓐꓯ ꓓꓴ ꓟ ꓞꓳ ꓘꓹ ꓗꓪ ꓓꓳꓽ ꓐꓯ ꓒꓬꓱ ꓖꓶ ꓔꓸꓳ꓿ ꓥꓪ ꓠꓴ ꓮ ꓡꓲ ꓐ ꓡ ꓖꓳ ꓡꓱ ꓬꓰ ꓙ ꓓꓴ ꓥꓳ” ꓐꓰ ꓧꓳꓑꓰ ꓜꓴ ꓗꓪ ꓟꓬꓱꓽ ꓬꓰ ꓔꓬ ꓟ ꓙꓬ-ꓪꓴꓽ ꓡꓰ ꓐꓯ ꓡꓳ꓿
ꓑꓴ-ꓔ-ꓳ ꓟꓵꓽ ꓗꓪ ꓚꓳꓦꓲꓓ-19 ꓠꓻ ꓢꓴ ꓡꓯꓽ ꓫꓵ ꓧꓪ ꓟꓳ ꓔꓬ ꓢꓲ꓾ ꓟꓬꓽ ꓠꓬꓲ ꓠꓬ ꓠꓯ ꓞꓲꓼ ꓦꓲ ꓗꓪ ꓙꓰ ꓢꓲꓸ ꓟꓽ ꓚꓹ ꓬꓰ ꓟ ꓑꓶꓸ ꓓꓴ ꓞꓳ ꓘꓹ ꓗꓪ ꓠꓻ ꓫꓵꓽ ꓟꓽ ꓢꓷꓸ ꓢꓷꓸ ꓠꓻ ꓫꓵꓻ ꓢꓴ ꓮ ꓟꓬꓹ ꓙꓳ ꓔꓬ ꓡꓳ ꓐꓰ ꓞꓳ ꓘꓹ ꓢꓴ ꓐꓴ ꓡꓰ ꓐꓯ ꓟꓳꓸ ꓖꓶ ꓡ ꓡꓳ꓿
“ꓠꓯ ꓞꓲꓼ ꓦꓲ ꓗꓪ ꓚꓹ ꓟꓶˍ ꓓꓴ ꓟ ꓠꓽ ꓬꓲꓸ ꓫꓳꓽ ꓥ ꓠꓯꓸ꓿ ꓠꓯ ꓞꓲꓼ ꓦꓲ ꓗꓪ ꓟꓽ ꓙꓰ ꓙꓰ ꓞꓳ ꓘꓹ ꓗꓪ ꓠꓻ ꓫꓵꓻ ꓢꓴ ꓙꓳ ꓥ꓿ ꓚꓳꓦꓲꓓ-19 ꓥ ꓟꓽ ꓥ ꓖꓶ ꓐꓯ ꓟꓽ ꓗꓴ꓿ ꓡꓯ ꓒꓯꓹ ꓝꓸ ꓑꓮꓲ ꓬꓰ ꓢꓲ꓾ ꓬꓰ ꓓꓳ ꓕꓯ ꓢꓲ ꓚꓳꓦꓲꓓ-19 ꓙꓳˍ ꓓꓴ ꓟ ꓧꓪ ꓟꓳꓻ ꓢꓴ ꓡꓲꓸ ꓙꓳ ꓥ꓿ ꓕꓱ ꓡꓱꓳ ꓫꓵꓽ ꓦꓬꓼ ꓠꓬꓲ ꓗꓪ ꓠꓽ ꓟꓲ ꓦꓲ ꓟꓲ ꓗꓪ ꓠꓬꓹ ꓢꓲꓸ ꓤ ꓟꓳ ꓓꓴ ꓟ ꓔꓲꓸ ꓜꓳꓽ ꓥ” ꓐꓰ ꓟꓶ-ꓡ-ꓫꓵ-ꓓꓰ ꓘꓹ ꓖꓴꓽ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿
ꓧꓳꓑꓰ ꓡꓠꓖꓳ ꓡꓰ ꓐꓰ ꓑꓴ-ꓔ-ꓳ ꓟꓵꓽ ꓗꓪ ꓣꓱꓽ ꓬꓯꓼ ꓢꓴ ꓔꓯ ꓬꓰ ꓙ ꓜꓴ (8) ꓜꓴ ꓛꓲ ꓙꓳ ꓢꓲ꓾ ꓮ ꓡꓲ ꓐ ꓡ ꓖꓳ ꓡꓱ ꓞꓳ ꓤ ꓫꓸ ꓚꓱꓹ꓾ ꓟꓳꓽ ꓚꓱꓹ ꓫꓵꓻ ꓚꓱꓹ ꓗꓪ ꓬꓰ ꓙ ꓔꓬ ꓡꓳ꓿
ꓐꓬꓱꓽ꓾ ꓧꓳꓑꓰ ꓡꓠꓖꓳ ꓝꓐ ꓑꓮꓖꓰ
