ꓲ-ꓓꓲ-ꓬ ꓟꓵꓽ ꓐꓱ ꓓꓴꓽ ꓗꓪ ꓡꓴꓽ ꓔꓸ ꓟꓶ ꓡꓰ ꓢꓴ ꓡꓲ-ꓢꓴ ꓞꓳ ꓡꓱ 5 ꓣꓳ ꓠꓬ ꓠꓬꓲꓸ ꓠꓬꓲ ꓗꓪ ꓛꓲ ꓟꓽ ꓡꓲꓹ ꓖꓶ ꓡ ꓢꓰ=
ꓮ ꓟꓶ ꓡꓴꓽ ꓔꓸ ꓢꓴ (5) ꓣꓳ ꓔꓯ ꓙꓴ-ꓡꓲ ꓐꓱ ꓓꓴꓽ ꓗꓪ 107 ꓠꓬꓲ꓾ ꓛ-ꓡꓸ ꓐꓱ ꓓꓴꓽ ꓗꓪ ꓦ ꓐ 3 ꓟ ꓡꓴꓽ ꓓꓳ ꓡꓰ ꓗꓸ ꓠꓯꓸ 7 ꓦ 7 ꓠꓬꓲ ꓐꓯ ꓟꓴ ꓘꓶꓽ ꓒꓽ ꓕꓳ ꓶ ꓓꓳ ꓡ ꓟ ꓗꓪ ꓝꓮꓲ ꓦ ꓐ 3 ꓟ ꓡꓴꓽ ꓠꓹ ꓟ ꓕꓵꓼ ꓪ ꓓꓳ ꓡ ꓟ ꓥ ꓡꓳ=
ꓬꓲꓸ ꓪ ꓠꓬ ꓮ-ꓣꓴ-ꓠ-ꓛꓬ ꓟꓵꓽ ꓫꓴ ꓗꓪ ꓠꓱꓸ ꓐꓯꓼ ꓞꓳ ꓫꓵꓽ ꓓꓵꓽ ꓡ ꓢꓲꓸ ꓙꓵꓽ ꓡ ꓟ ꓔꓯ ꓟꓽ ꓠꓲꓹ ꓒꓴ ꓢꓲ꓾ ꓘꓴ ꓔꓴ ꓟ ꓮ ꓟꓬꓹ ꓬꓰ ꓓꓳ ꓡꓰ ꓗꓸ ꓠꓯꓸ 2020 ꓘꓳꓼ 12 ꓦ 11 ꓠꓬꓲ ꓕꓯ ꓠꓲꓹ ꓢꓲꓼ ꓠꓲꓹ ꓞꓲꓹ ꓟ ꓪꓴꓽ ꓟꓬꓽ ꓡ ꓢꓲ꓾ ꓐꓬꓱ ꓦꓲ ꓠꓽ ꓔꓶꓸ ꓦꓲ ꓔꓯ ꓮ ꓔꓳꓸ ꓛꓴ ꓩꓴ ꓗꓷ ꓡ ꓟ ꓥ ꓡꓳ= ꓖꓳ ꓗꓪ ꓐꓰ ꓲ-ꓓꓲ-ꓬ ꓟꓯꓼ ꓐꓰ ꓗꓴꓷꓼ ꓙꓵꓽ ꓢꓴ ꓜꓴ ꓐꓴ ꓡꓰ ꓮ ꓟꓬꓹ ꓣꓳ ꓔꓯ ꓞꓳꓹ ꓧꓳꓽ ꓙꓰ ꓢꓲ꓾ ꓕꓲ ꓐꓱ ꓠꓬ ꓡꓲꓹ ꓩꓴ ꓡ ꓟ ꓥꓳ=
ꓬꓲꓸ ꓪ ꓐꓱ ꓶ ꓡꓲ-ꓢꓴ (ꓲ-ꓓꓲ-ꓬ ꓟꓵꓽ ꓗꓪ ꓠꓬ ꓣꓳ-ꓐꓰ ꓐꓰ ꓘꓴ ꓡꓳ) ꓞꓳ ꓪꓴꓽ ꓞꓳ ꓟ ꓐꓴ ꓐꓰ꓾ ꓖꓳ ꓕꓲ ꓚꓳ ꓡꓳ ꓗꓪ ꓔꓬ ꓟ ꓠꓱꓸ ꓐꓯꓼ ꓫꓵꓽ ꓐꓴ ꓐꓰ ꓬꓲꓸ ꓜꓴ ꓬꓲꓸ ꓒꓳ ꓮ ꓟꓬꓹ ꓡꓰ ꓔꓳꓹ ꓙ ꓘꓶꓽ ꓕꓱ ꓥ ꓟꓲ ꓮ ꓟꓶ ꓗꓪ ꓐꓰ ꓟꓽ ꓡꓲꓹ ꓩꓴ ꓡ ꓟ ꓥ ꓡꓳ=
ꓗꓴꓷꓼ ꓙꓵꓽ ꓢꓴ ꓐꓴ ꓐꓯ ꓘꓶꓽ ꓓꓽ ꓟ ꓠꓬ ” 2020 ꓘꓳꓼ 12 ꓦ 11 ꓠꓬꓲ ꓟ ꓡꓰꓳ ꓫꓵꓽ ꓝꓮꓲ ꓟꓽ ꓒꓬꓱꓼ ꓡ ꓠꓹ ꓟ” ꓐꓯ ꓡꓳ= ꓡꓲ-ꓢꓴ ꓞꓳ ꓪꓴꓽ ꓐꓴ ꓥ ꓟꓲ ꓮ ꓘꓶꓸ ꓠꓲꓹ ꓟ ꓙꓬ ꓡꓰ ꓔꓬ ꓡꓳ= ꓮ ꓖ ꓟꓵꓽ ꓗꓳ ꓟꓵꓽ ꓗꓪ ꓮ ꓟꓶ ꓗꓪ ꓛꓲ ꓙ ꓖꓴ ꓙꓲ ꓙꓲ ꓟꓽ ꓙꓳ ꓟ ꓐꓰ꓾ ꓫꓸ ꓟꓵꓽ ꓥ ꓟꓲ ꓑꓶꓸ ꓓꓴ ꓡꓳꓸ ꓙ ꓔ ꓙ ꓟ ꓙꓲ ꓙꓲ ꓟꓽ ꓬꓰ ꓟ ꓕꓯ ꓢꓲ꓾ ꓕꓱ ꓟ ꓔꓯ ꓠꓲꓹ ꓘꓪ ꓟꓽ ꓫꓵꓺ ꓢꓲꓸ ꓢꓴꓺ ꓔꓴ ꓡ ꓟ ꓗꓪ ꓠꓬꓲꓸ ꓤꓲ ꓟ ꓥ ꓡꓳ꓾ ꓐꓰ ꓓꓵꓽ ꓙ ꓔꓬ ꓡꓳ=
