40 ꓘꓳꓼ ꓖꓳ ꓑꓳꓸ ꓠꓬ ꓟꓳꓽ ꓫꓵꓸ ꓜꓳ ꓡ ꓟ ꓦꓬꓼ ꓠꓬꓲ ꓥ ꓠꓬꓲ꓾ ꓧꓪ ꓖꓳ ꓓꓱꓽ ꓔꓬ ꓢ ꓚꓱꓹ ꓢꓷꓸ ꓠꓲꓹ ꓢꓳ ꓢꓲꓸ ꓖꓼ ꓛꓳ ꓠꓬ 90-100 ꓘꓳꓼ ꓗꓪ ꓛꓲ ꓟꓶ ꓤ ꓢꓯꓸ ꓔꓬ ꓪ ꓥꓳ= 40 ꓘꓳꓼ ꓖꓳ ꓑꓳꓸ ꓟ ꓡ ꓞꓳ ꓤꓶ ꓠꓬ ꓡꓯꓸ ꓟ ꓦꓬꓼ ꓠꓬꓲ ꓖꓴ ꓡꓰ ꓢꓲ꓾ ꓟꓳꓽ ꓫꓵꓸ ꓜꓳ ꓡ ꓟ ꓦꓬꓼ ꓠꓬꓲ ꓥ ꓠꓬꓲ꓾ ꓧꓶꓸ ꓕꓯ ꓡꓰ ꓐꓰ ꓔꓬ ꓟꓽ ꓓ= ꓜꓽ ꓟꓽ ꓓ= ꓬꓰ ꓟꓽ ꓓ= ꓧꓪ ꓖꓳ ꓓꓱ ꓔꓬ ꓢ ꓚꓱꓹ ꓟꓽ ꓛꓳ ꓠꓬ ꓠꓲꓹ ꓞ ꓫꓵꓻ ꓡ ꓓꓴ ꓥꓳ= ꓮ ꓡꓲ ꓞꓳ ꓙꓳ ꓙꓲꓽ ꓙꓳ ꓟ ꓢꓳ ꓠꓬꓲ ꓡꓯ=
01ꓸ ꓧꓪ ꓖꓳ ꓓꓱꓽ ꓘꓪꓽ ꓡ꓾ ꓚꓱꓺ ꓡ ꓟ ꓔꓯ ꓢꓪꓼ ꓠꓬꓲ= (ꓡꓲꓽ ꓢꓯꓼ ꓚꓹ ꓠꓬꓲ ꓓꓴ ꓗꓪ ꓞꓰ ꓠꓬꓲ ꓓꓴ ꓬꓰ= ꓮ ꓫꓵꓽ ꓑꓶꓸ ꓓꓴ ꓘꓪꓽ ꓡ ꓟ ꓐꓰ꓾ ꓚꓱꓺ ꓡ ꓟ ꓔꓯ ꓞꓽ ꓞꓽ ꓢꓷꓸ ꓪ ꓠꓬ ꓤ ꓟꓳ ꓙꓲꓽ ꓙꓳ ꓟ ꓤ ꓟꓳ ꓐ ꓡ ꓥꓳ=)
02ꓸ ꓒ ꓐꓳ ꓬꓲꓼ ꓟꓶ ꓪ ꓝꓲ= (ꓬꓲꓼ ꓟꓶ ꓟꓽ ꓡꓳꓼ ꓠꓬ ꓪꓴꓸ ꓠꓷꓸ ꓟꓽ ꓙꓲ ꓡ꓾ ꓖꓳ ꓓꓱ ꓔꓬ ꓟꓽ ꓢ ꓡ)
03ꓸ ꓦꓰꓼ ꓟ꓾ ꓪꓵ ꓑꓳ ꓠꓻ ꓟꓽ ꓙꓳ ꓡ ꓠꓹ ꓟ ꓤ ꓟꓳ= (ꓜꓽ ꓓꓴ ꓔꓯ ꓦꓰꓼ ꓒꓴ ꓦꓰꓼ ꓐꓯꓽ ꓗꓷ ꓡꓰ ꓗꓪ ꓛꓲ ꓜꓽ ꓟ ꓓ= ꓡ ꓜꓶꓼ꓾ ꓞꓼ ꓐꓳ꓾ ꓧꓪ ꓞꓶ ꓮ ꓟꓬꓹ ꓜꓽ ꓟꓽ ꓓ= ꓢꓲꓹ ꓢꓶꓽ ꓡꓳ ꓢꓶꓽ ꓐꓰ꓾ ꓪꓳ ꓒꓬꓽ ꓜꓽ ꓠ ꓗ ꓡꓳ= ꓮ ꓠꓳꓸ ꓐꓰ ꓥꓪꓸ ꓜꓽ ꓪ ꓝꓲ= ꓬꓲ ꓙꓬ ꓮ ꓟꓬꓹ ꓓꓳ ꓠ ꓗ ꓡꓳ= )
04ꓸ ꓬꓲꓸ ꓝꓲꓸ ꓬꓲ ꓟꓲ ꓠꓻ ꓡꓰ꓾ ꓫꓺ ꓡꓰ ꓠ ꓬꓰ ꓟꓽ ꓓ= (ꓞꓳ ꓡꓯꓸ ꓦꓬꓼ ꓠꓬꓲ ꓡꓰ ꓐꓰ ꓠꓻ ꓓ ꓡꓰ ꓟꓽ ꓢ ꓟ ꓔꓯ ꓢꓷꓸ ꓔꓸ) ꓖꓳ ꓡꓱ ꓥ ꓟꓲ ꓧꓪ ꓖꓳ ꓓꓱꓽ ꓠꓵꓹ ꓓꓴ ꓬꓰ= ꓧꓪ ꓠꓯꓼ ꓧꓪ ꓙꓴꓽ꓾ ꓬꓲꓸ ꓝꓲꓸ ꓬꓲ ꓟꓲ ꓔꓯ ꓮ ꓤ ꓤ ꓠꓵꓹ ꓠ ꓗ ꓡꓳ= ꓚꓲꓸ ꓬꓲ ꓓꓳ ꓡ ꓗꓪ ꓛꓲ ꓙ ꓫꓱꓽ ꓟ ꓐꓰ꓾ ꓮ ꓤ ꓤ ꓔꓷꓹ ꓚꓳ ꓟ꓾ ꓡꓳ ꓡꓳ ꓤꓼ ꓗꓹ ꓟ ꓧꓪ ꓖꓳ ꓓꓱꓽ ꓠꓵꓹ ꓚꓱꓹ ꓔꓯ ꓬꓰ= ꓛꓬꓸ ꓥꓳꓽ ꓛꓬꓸ꓾ ꓪ ꓘꓰꓹ ꓘꓰꓹ ꓟ ꓠꓬ ꓮ ꓘꓶꓸ ꓙꓲ= ꓡꓯ ꓒꓯꓹ ꓓꓶꓽ=
05ꓸ ꓟꓴ ꓖꓪ ꓖꓪ= ꓬꓲ ꓙꓬ ꓢꓸ= (ꓐꓵꓼ ꓟꓵ ꓢꓯꓼ ꓙꓳ ꓡ ꓠꓹ ꓟ ꓟꓴ ꓖꓪ ꓖꓪ꓾ ꓬꓲ ꓙꓬ ꓢꓸ ꓓꓴ ꓬꓰ)
06ꓸ ꓠꓲꓹ ꓟ ꓗꓪ ꓠꓬꓲꓸ ꓞ ꓓꓴ ꓟꓽ ꓙꓳ ꓠꓹ ꓟ ꓢꓯꓼ ꓕꓵꓼ= (ꓠꓲꓹ ꓘꓪ ꓟꓽ ꓫꓵ ꓓꓴ ꓔꓯ ꓡꓰꓼ ꓡꓰꓼ ꓕꓽ ꓓꓵ ꓙ= ꓣꓳ ꓬꓰ ꓟꓽ ꓐ ꓡ ꓟ ꓔꓯ ꓓꓵ ꓙ ꓢꓲꓸ ꓠꓲꓹ ꓟ ꓕꓽ ꓣꓳ= ꓫꓵꓽ ꓪꓴ ꓓꓽ ꓟ ꓔꓯ ꓣꓳ ꓡꓰ ꓝꓲ꓾ ꓫꓵꓽ ꓪꓴ ꓤꓹ ꓤꓼ ꓔꓯ ꓢꓱ ꓡꓰ ꓝꓲ= ꓦ ꓡꓱ ꓚꓱꓹ ꓡꓳ ꓚ ꓠꓲꓹ ꓟ ꓢꓲ ꓡꓲꓹ ꓡꓰ ꓠꓹ ꓟ ꓢꓯꓼ ꓕꓵꓼ=)
07ꓸ ꓢꓲꓽ ꓢꓲꓽ ꓫꓬ ꓫꓬ ꓔꓬ= (ꓦꓲ ꓗꓪ ꓥ ꓟꓲ꓾ ꓟꓬꓱꓽ ꓬꓰ ꓔꓶꓸ ꓗꓪ ꓥ ꓟꓲ ꓢꓲꓽ ꓢꓲꓽ ꓫꓬ ꓫꓬ ꓔꓬ ꓠꓬ ꓠꓲꓹ ꓟ ꓢ ꓟ ꓡꓰꓽ ꓟꓽ ꓞꓲ꓾ ꓠꓻ ꓐꓶ ꓓꓲ ꓥ ꓟꓲ ꓟꓽ ꓜꓳ ꓡ= ꓦꓲ ꓗꓪ ꓮ ꓪꓯꓼ꓾ ꓮ ꓭꓸ ꓘꓰꓽ ꓕꓽ ꓞꓵ ꓠꓵ ꓝꓲ= ꓦꓯꓹ ꓑꓶꓼ꓾ ꓐꓶꓽ ꓢꓸ ꓮ ꓙꓵꓽ ꓢꓰꓼ ꓩꓴ= ꓫꓬ ꓫꓬ ꓖꓪ ꓖꓪꓽ ꓔꓬ ꓓꓴ ꓬꓰ=)
08ꓸ ꓙꓲˍ ꓟ ꓬꓲ ꓙꓬ ꓮ ꓟꓬꓹ ꓓꓳ= ꓐ ꓡ ꓕ ꓑꓳꓸ ꓬꓲ ꓞ ꓓꓳ ꓪ ꓝꓲ= ꓕꓲ ꓠꓬꓲ ꓡꓲꓸ ꓕꓲ ꓠꓬꓲ ꓠꓯꓼ ꓝꓲꓸ ꓗꓪ ꓟꓲ ꓛꓬ ꓙꓰ ꓐ ꓡ ꓠꓬ ꓖꓳ ꓓꓱꓽ ꓔꓬ ꓢ ꓥꓳ= ꓦꓰꓼ ꓝꓲ ꓡ ꓟ ꓜꓽ ꓓꓴ ꓜꓽ ꓟꓽ ꓓ=
09ꓸ ꓬꓲꓸ ꓫꓵꓼ ꓕꓲ ꓫꓵ ꓫꓵ ꓢꓳ ꓣꓴ= ꓓꓵꓽ ꓙ ꓢꓷꓸ ꓠꓲꓹ ꓧꓪ ꓢꓲꓸ ꓟꓬꓱꓽ ꓬꓰ= (ꓕꓱ ꓟ ꓠꓬ ꓪꓴꓸ ꓠꓷꓸ ꓔꓯ ꓢꓰ ꓡ ꓝꓲ ꓡꓳ= ꓥꓳꓽ ꓫꓵꓽ ꓬꓲꓸ ꓫꓵꓼ ꓢꓳ ꓟ꓾ ꓟꓬꓱꓽ ꓬꓰ ꓚꓱꓹ ꓬꓲꓸ ꓫꓵꓼ ꓢꓳ ꓠꓬꓲ ꓟ꓾ ꓟꓶ ꓢꓯꓼ ꓢꓳ ꓟ꓾ ꓓꓵꓽ ꓙ ꓚꓱꓹ ꓬꓲꓸ ꓫꓵꓼ ꓢꓳ ꓟ ꓕꓲ ꓫꓵ ꓫꓵ ꓬꓰ ꓠꓯ ꓡꓳ)
ꓞꓲꓼ ꓟꓳꓽ ꓡ ꓗꓪ ꓛꓲ ꓧꓪ ꓖꓳ ꓓꓱꓽ ꓔꓬ ꓢ ꓠꓹ ꓟ ꓠꓬꓲꓸ ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓕꓲ ꓠꓬꓲ ꓡꓲꓸ ꓕꓲ ꓠꓬꓲ ꓛꓳ ꓙꓰ ꓡꓯ= ꓕꓲ ꓠꓬꓲ ꓡꓲ ꓕꓲ ꓠꓬꓲ ꓕꓱ ꓡꓱ ꓬꓰ ꓠꓬ꓾ ꓡ ꓞꓳ ꓬꓲꓸ ꓫꓱꓹ ꓒꓬꓱꓼ ꓡ ꓥꓳ= ꓙꓲ ꓟ ꓬꓲꓸ ꓫꓱꓹ ꓙꓳ ꓡꓰ ꓠꓬ ꓙꓲ ꓟ ꓤꓶ ꓘꓳ ꓣꓴ ꓟꓶ ꓥꓳ= ꓞꓳ ꓐꓳ ꓗꓴꓷꓼ꓾ ꓞꓳ ꓫꓸ ꓗꓴꓷꓼ ꓮ ꓡꓲ ꓕꓲ ꓟꓵꓽ ꓗꓪ ꓞꓳ ꓙꓳ ꓢꓯꓸ ꓔꓬ ꓪ ꓥ ꓟꓲ꓾ ꓚꓲ ꓛꓬ ꓧꓪ ꓖꓳ ꓓꓱꓽ ꓔꓬ ꓢ ꓚꓱꓹ ꓔꓯ ꓖꓼ ꓛꓳ ꓢꓴ ꓠꓬ꓾ ꓤꓶ ꓙꓳ ꓟꓬ ꓙꓳ ꓥꓳ=
