ꓗꓳꓸ ꓗꓷ ꓟ 1999 ꓘꓳꓼ ꓕꓯꓽ ꓲ-ꓓꓲ-ꓬ ꓟꓵꓽ ꓗꓪ꓾ ꓟꓯꓹ-ꓕꓸ ꓜꓶꓽ ꓕꓳ ꓶ ꓪꓴꓻˍ ꓟ ꓗꓪ ꓟꓬꓱꓽ ꓬꓰ ꓢꓴ ꓡꓰꓽ ꓣꓴ-ꓑꓲ 20 ꓬꓲꓸ ꓐꓶꓹ ꓣꓴ ꓜꓽ ꓙꓰˍ ꓠꓬꓲ ꓐꓯ ꓟꓴ ꓩꓴ ꓡꓯ ꓘꓳ ꓡ ꓟ 22 ꓘꓳꓼ ꓙꓳ ꓡ ꓕꓯꓽ ꓐꓯ ꓟꓴ ꓕꓱ ꓧꓪꓸ ꓡꓰꓳ꓿
1999 ꓘꓳꓼ ꓕꓯꓽ ꓐꓯ ꓟꓴ ꓕꓱ ꓒꓽ (advocate) ꓔꓳ-ꓠ-ꓛ-ꓔ-ꓪ-ꓓꓰ (Tungnath Chaturvedi) ꓟꓬꓱꓺ ꓔꓸ ꓢꓴ ꓕꓲ ꓣꓳ ꓠꓬ ꓟ-ꓔꓴ-ꓣ ꓡꓳ ꓒꓱ ꓗꓪ ꓐꓰ ꓟ-ꓣ-ꓓ-ꓐ ꓡꓳ ꓒꓱ (from Mathura to Moradabad) ꓗꓪ ꓙꓰ ꓠꓹ ꓟ ꓟꓯꓹ-ꓕꓸ ꓜꓶꓽ ꓕꓳ ꓶ (2) ꓛꓬꓽ ꓪꓴˍ ꓡꓳ꓿ ꓣꓴ-ꓑꓲ 70 ꓜꓯꓼ ꓥ ꓟꓲ ꓖꓳ ꓗꓪ ꓟꓬꓱꓽ ꓬꓰ ꓢꓴ ꓡꓰꓽ 90 ꓣꓴ-ꓑꓲꓸ ꓣꓴ ꓜꓽ ꓙꓰˍ ꓡꓳ꓿ ꓟꓯꓹ ꓕꓸ ꓜꓶꓽ ꓕꓳ ꓶ ꓕꓲꓽ ꓛꓬ 35 ꓣꓴ-ꓑꓲꓸ ꓡꓰ ꓥ ꓠꓬꓲ꓾ 2 ꓛꓬꓽ ꓠꓬ 70 ꓜꓯꓼ ꓡꓳ꓿ ꓖꓳ ꓟ ꓑꓶꓸ ꓓꓴ 90 ꓣꓴ ꓑꓲꓸ ꓣꓴ ꓜꓽ ꓟꓽ ꓓ ꓐꓯˍ ꓟꓲ ꓟꓽ ꓡꓲꓸ ꓖꓶꓽ ꓡ ꓫꓳ꓾ ꓐꓯ ꓡꓳ꓿
ꓖꓳ ꓕꓲ ꓠꓬꓲ ꓗꓪ ꓐꓰ ꓫꓶꓹ ꓟꓽ ꓙꓲ ꓢꓴ ꓟꓬꓱꓽ ꓬꓰ ꓢꓴ ꓔꓯ ꓐꓯ ꓟꓴ ꓕꓱ ꓒꓽ ꓡꓰ ꓐꓯ ꓟꓴ ꓗꓳꓹ ꓡꓯ ꓘꓳ ꓩꓴ ꓡ ꓟ (22) ꓘꓳꓼ ꓟ ꓘꓴꓽ ꓗꓪ꓾ ꓫꓵꓽ ꓘꓶꓽ ꓒꓽ (5) ꓣꓳ ꓑꓺ ꓖꓰ꓾ ꓫꓵꓽ ꓪꓴꓽ ꓚꓲꓸ ꓚ ꓔꓶꓸ ꓗꓪ (120) ꓧꓪꓹ ꓚꓲꓸ ꓚ ꓓꓳ ꓡꓰ ꓗꓸ ꓠꓯꓸ 2022 ꓘꓳꓼ 8 ꓦ 12 ꓠꓬꓲ ꓕꓯꓽ ꓫꓵꓽ ꓪꓴ ꓘꓶꓽ ꓞꓰꓹ ꓩꓴ ꓡ ꓟ ꓥ ꓡꓳ꓿
ꓮ ꓟꓶ ꓠꓬ ꓫꓵꓽ ꓪꓴ ꓖꓳ ꓟ ꓘꓶꓽ ꓩꓴ ꓡ ꓢꓲ꓾ ꓐꓯ ꓟꓴ ꓕꓱ ꓒꓽ ꓛ-ꓔ-ꓪ-ꓓꓰ ꓧꓪꓸ ꓡꓰꓳ꓿ ꓣꓴ-ꓑꓲ 20 ꓐꓱ ꓶ ꓕꓲ ꓘꓳꓼ 12% ꓬꓲꓸ ꓐꓵꓽ ꓢꓪꓼ ꓢꓲꓸ 15000 ꓣꓴ-ꓑꓲꓸ ꓬꓲꓸ ꓔꓯ ꓡꓲꓸ ꓖꓶ ꓗꓷꓳ꓿
ꓖꓳ ꓡꓱ ꓥ ꓟꓲ 22 ꓘꓳꓼ ꓟ ꓘꓴꓽ ꓗꓪ ꓖꓳ ꓑꓳꓸ ꓕ ꓑꓳꓸ ꓣꓱꓽ ꓟ ꓗꓪ 20000 ꓣꓴ-ꓑꓲꓸ ꓟꓽ ꓞꓲ ꓖꓴ ꓡꓰ ꓢꓲ꓾ ꓬꓲꓸ ꓙꓵꓹ ꓥ ꓟꓲ ꓮ ꓟꓬꓹ ꓖꓴ ꓡꓰꓳ꓿ ꓬꓲꓸ ꓚꓲ ꓛꓬ ꓠꓬ ꓐꓯ ꓟꓴ ꓕꓱ ꓢꓴ (advocate) ꓥˍ ꓠꓬꓲ꓾ ꓐꓯ ꓟꓴ ꓕꓱ ꓙ ꓢꓴ ꓠꓬ ꓥꓪꓸ ꓟꓽ ꓛꓲ ꓠꓬꓲ ꓮ ꓔꓲꓸ ꓜꓳꓽ ꓢꓲꓽ ꓟ ꓥꓳ꓿
ꓣꓴ-ꓑꓲꓸ 20 ꓠꓬ ꓟꓬ-ꓟ ꓒꓴ 500 ꓒꓯꓼ ꓖꓼ ꓡꓯꓼ ꓖꓼ ꓙꓲ ꓥ ꓡꓳ꓿ ꓖꓳ ꓟ ꓑꓶꓸ ꓓꓴ “ꓳꓸ ꓫꓵꓽ ꓔꓯ ꓠꓽ ꓮ ꓫꓵꓽ ꓕꓽ ꓗꓹ꓾ ꓠꓽ ꓩꓴ꓾” ꓐꓰ ꓬꓲꓸ ꓛꓳ ꓒꓯꓹ ꓐꓴ ꓠꓰ ꓐꓯ ꓡ ꓥ ꓟꓲ꓾ ꓟꓽ ꓠꓽ ꓗꓷ꓿ ꓠꓲꓹ ꓡꓱ ꓡꓱ 22 ꓘꓳꓼ ꓔꓳꓼ ꓡꓯ ꓘꓳ ꓩꓴ ꓡ ꓟ ꓥ ꓡꓳ꓿
“ꓕꓱ ꓟ ꓠꓬ ꓒꓴ ꓑꓶꓸ ꓓꓴ ꓟꓽ ꓥ꓿ ꓥ ꓪ ꓙꓲꓽ ꓙꓳˍ ꓟ ꓶꓽ ꓐꓱ ꓶ ꓥ ꓡꓳ꓿ ꓗꓴꓷꓼ ꓙꓵꓽ ꓜꓴ (ꓥ ꓠꓬ) ꓬꓲꓸ ꓡꓯꓼ ꓛꓲ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓟꓽ ꓔꓱꓹ ꓟꓽ ꓜꓳꓽ ꓬꓰˍ ꓟ ꓔꓯ ꓡꓳꓸ ꓓꓳ ꓡ ꓝꓲ ꓠꓹ ꓟ ꓥ ꓡꓳ” ꓐꓰ ꓐꓯ ꓟꓴ ꓕꓱ ꓒꓽ ꓛ-ꓔ-ꓪ-ꓓꓰ ꓡꓰ ꓮꓝꓑ ꓓꓳꓽ ꓗꓪ ꓐꓯ ꓩꓴ ꓡˍ ꓡꓳ꓿
ꓬꓲꓸ ꓟꓶꓽ ꓗꓪ ꓛꓲ ꓔꓳꓼ ꓡꓯ ꓘꓳ ꓓꓴ ꓓꓵꓽ ꓙ ꓞꓷꓹ ꓢꓲꓸ ꓬꓰ ꓩꓴ ꓡ ꓟ ꓥ ꓢꓲ꓾ ꓜꓳꓽˍ ꓟ ꓔꓯ ꓜꓳꓽ꓾ ꓟꓽ ꓜꓳꓽ ꓢꓴ ꓔꓯ ꓟꓽ ꓜꓳꓽ꓾ ꓫꓬꓽ ꓫꓬꓽ ꓡꓳꓸ ꓓꓳ ꓡ ꓝꓲ ꓠꓹ ꓟ ꓥꓳ꓾ ꓐꓯ ꓢꓰꓽ ꓡꓳ꓿
22 ꓘꓳꓼ ꓡꓳꓼ ꓬꓰˍ ꓟ ꓫꓵꓽ ꓪꓴ ꓕꓱ ꓟ ꓑꓶꓸ ꓓꓴ ꓲ-ꓓꓲ-ꓬ ꓗꓴꓷꓼ ꓗꓪ ꓟꓽ ꓔꓱꓹ ꓟꓽ ꓜꓳꓽ ꓒꓴ ꓒꓯꓸ ꓢꓴ ꓙꓳˍ ꓟ ꓡꓰꓽ ꓟꓽ ꓞꓲ꓾ ꓫꓵꓽ ꓘꓶꓽ ꓚꓱꓹ ꓔꓯ ꓞꓽ ꓞꓽ ꓟꓬꓱꓽ ꓟꓽ ꓬꓰˍ ꓟ ꓥ ꓟꓲ ꓟꓳꓸ ꓖꓶꓽ ꓓꓳ ꓡ ꓡꓳ꓿
ꓬꓲꓸ ꓚꓰ꓾ Bangkok Post
