ꓢꓠꓡꓓ ꓑ-ꓔꓲ ꓔꓯ ꓢꓲꓻ ꓣꓴ ꓗꓳ-ꓟꓲ-ꓫꓲ (ꓴꓰꓚ) ꓡꓰꓽ ꓚꓲꓸ ꓚ ꓓꓳ ꓬꓰꓳ ꓐꓰ ꓓꓳꓽ ꓓꓳ ꓡ ꓡꓳ꓿
“ꓫꓵꓽ ꓐꓱ ꓶ ꓟꓬꓱꓽ ꓬꓰ ꓐ ꓡ ꓠꓹ ꓟ ꓢꓲꓻ ꓣꓴ ꓗꓳ-ꓟꓲ-ꓫꓲ ꓡꓰ ꓚꓲꓸ ꓚ ꓟ ꓔꓯ ꓘꓳ ꓣꓴ ꓗꓷꓳ꓾” ꓐꓰ ꓢꓠꓡꓓ ꓟꓬꓱꓽ ꓢꓲ (1) ꓢꓮꓲꓹ-ꓚꓳ-ꓠꓬꓴꓼ ꓡꓰꓽ ꓐꓯ ꓩꓴ ꓡ ꓡꓳ꓿
2022 ꓘꓳꓼ 6 ꓦ 30 ꓠꓬꓲ ꓗꓪ ꓐꓰ 7 ꓦ 2 ꓠꓬꓲ ꓗꓪ ꓛꓲ꓾ ꓔꓮꓳ-ꓙꓲꓸ ꓡꓳ ꓒꓱ ꓗꓪ ꓢꓲꓻ ꓣꓴ ꓗꓳ-ꓟꓲ-ꓫꓲ ꓗꓪ ꓐꓰ 4 ꓣꓳ꓾ ꓢꓠꓡꓓ ꓗꓪ ꓐꓰ 4 ꓣꓳ ꓜꓲ ꓡꓯ ꓘꓳ ꓢꓲꓸ ꓢꓠꓡꓓ ꓑ-ꓔꓲ ꓔꓯ ꓚꓲꓸ ꓚ ꓟꓬꓱꓽ ꓬꓰ ꓓꓳ ꓡꓰˍ ꓥ ꓡꓳ꓿
ꓬꓴꓸ ꓪꓴꓸ ꓕꓯꓽ ꓟꓬ-ꓟ ꓟꓯꓼ ꓗꓳ-ꓢꓰ ꓡꓰ ꓒꓴ ꓔꓸ ꓟ ꓢꓲꓻ ꓣꓴ ꓗꓳ-ꓟꓲ-ꓔꓲ ꓡꓰ ꓬꓲꓸ ꓪ ꓙꓵꓽ ꓦꓲ ꓗꓪ ꓡ ꓢꓲꓸ ꓚꓲꓸ ꓚ ꓟ ꓔꓯ ꓘꓳ ꓣꓴ ꓡꓯ ꓐꓯ ꓩꓴ ꓡ ꓕꓯꓽ ꓠꓡꓓ ꓐꓰ ꓢꓠꓡꓓ ꓠꓬ ꓟꓽ ꓘꓳ ꓣꓴ ꓗꓷ ꓟ ꓥ ꓡꓳ꓿ ꓚꓲꓸ ꓚ ꓠꓲꓹ ꓫꓵ ꓠꓬ ꓢꓠꓡꓓ ꓑ-ꓔꓲ ꓙꓵꓽ ꓦꓲ ꓗꓪ ꓡ ꓓꓴ ꓬꓰ꓾ ꓐꓰ ꓡꓯꓽ ꓔꓯꓽ ꓔꓸ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓮ ꓟꓶ ꓠꓬ ꓠꓬꓲꓽ ꓛꓱꓽ ꓬꓲꓸ ꓔꓱꓹ ꓫꓵ ꓕꓲ ꓖ ꓥˍ ꓟ ꓔꓮꓳ-ꓙꓲꓸ ꓡꓳ ꓒꓱ ꓗꓪ ꓜꓲ ꓡꓯ ꓘꓳ ꓗꓷꓳ ꓐꓯ ꓡꓳ꓿
ꓠꓡꓓ ꓠꓬ ꓟꓬ-ꓟ ꓟꓯꓼ ꓗꓳ-ꓢꓰ ꓡꓰ ꓒꓴ ꓔꓸ ꓟ ꓢꓲꓻ ꓣꓴ ꓜꓴ (Union Election Commission) ꓔꓯ ꓟꓽ ꓘꓳ ꓣꓴ ꓠꓬꓲ꓾ ꓮ ꓟꓶ ꓗꓪ ꓛꓲ ꓚꓲꓸ ꓚ ꓟꓽ ꓪ ꓢꓰꓽ꓿
2023 ꓘꓳꓼ 8 ꓦ ꓗꓪ ꓕꓲ ꓗꓴꓷꓼ ꓡꓱꓸꓼ ꓢꓲꓻ ꓣꓴ ꓑꓮꓲꓽ ꓓꓽ ꓟ ꓬꓰ ꓓꓴ ꓥꓳ ꓐꓰ ꓟꓬ-ꓟ ꓟꓯꓼ ꓗꓳ-ꓢꓰ ꓡꓰ ꓙ ꓟꓳ ꓘꓶꓽ ꓕꓱ ꓔꓸ ꓟ ꓡꓰ ꓐꓰ꓾ ꓴꓰꓚ ꓡꓰꓽ ꓑ-ꓔꓲ ꓐꓴ ꓔꓯ ꓚꓲꓸ ꓚ ꓔꓬ ꓟ ꓥ ꓡꓳ꓿
ꓠꓡꓓ ꓐꓰ ꓢꓠꓡꓓ ꓠꓬ ꓛꓳꓽ ꓒꓯꓹ ꓑ-ꓔꓲ ꓥ ꓟꓲ꓾ ꓠꓡꓓ ꓗꓴꓷꓼ ꓙꓵꓽ ꓢꓴ ꓒꓬꓱꓼ ꓡ ꓟ ꓦꓬꓼ ꓠꓬꓲ ꓗꓪ ꓢꓠꓡꓓ ꓔꓯ ꓙꓲ ꓙꓲ ꓟꓽ ꓞꓳ ꓒꓵꓽ꓾ ꓙꓵꓽ ꓪ ꓟꓽ ꓐꓱꓻ ꓖꓶꓽ ꓟ ꓑꓶꓸ ꓓꓴ ꓠꓲꓹ ꓟ ꓗꓶꓺ ꓓꓴ ꓙꓳ ꓡꓰˍ ꓡꓳ꓾ ꓐꓰ ꓢꓷꓸ ꓪ ꓡꓳ꓿
ꓢꓠꓡꓓ ꓑ-ꓔꓲ ꓔꓯ ꓢꓽ ꓡ ꓙꓵꓽ ꓬꓲꓸ ꓡꓵꓺ ꓘꓳ-ꓕꓴꓸ-ꓳꓸ ꓢꓯꓸ ꓔꓬ ꓕꓯꓽ ꓮ ꓘꓶꓸ ꓑꓶꓸ ꓑꓶꓸ꓾ ꓮ ꓘꓶꓸ ꓔꓱꓹ ꓜꓳꓽ ꓠ ꓧꓳꓽ ꓗꓷ ꓟ꓾ ꓟꓬꓱꓺ ꓓꓳꓽ ꓞꓼ ꓓꓳ ꓙꓳˍ ꓟ ꓑ-ꓔꓲ ꓥ ꓡꓳ꓿ ꓧꓳ ꓡꓱ ꓥ ꓟꓲ ꓬꓲꓸ ꓫꓵꓻ ꓗꓸ ꓠꓯꓸ ꓟꓬ-ꓟ ꓟꓯꓼ ꓡꓯ ꓒꓯꓹ ꓗꓪ ꓮ ꓡꓲ ꓟꓬꓱꓽ ꓬꓰ ꓙꓰ ꓡ ꓟ ꓟꓽ ꓢꓷꓸ ꓐꓰ ꓑ ꓫꓬ ꓐꓴ ꓢꓰꓸ ꓮ ꓢꓸ ꓔꓬ ꓡꓳ꓿
ꓗꓳꓸ ꓗꓷ ꓟ 5 ꓦ 26-27 ꓠꓬꓲ ꓢꓠꓡꓓ ꓜꓲꓼ ꓓꓴ ꓓꓽ ꓟ ꓗꓪ ꓐꓰ꓾ “ꓜꓲ ꓜꓲ ꓑꓰꓹ ꓑꓰꓹ ꓙꓵꓽ ꓢꓴ ꓮ ꓙꓵꓽ ꓔꓯ ꓒꓳꓹ ꓔꓳꓹ ꓢꓲ꓾ ꓔꓱꓹ ꓜꓳꓽˍ ꓟ ꓕꓲ ꓛꓱꓽ ꓗꓪ ꓦꓰꓼ ꓓꓴ ꓥꓳ” ꓐꓯ ꓔꓸ ꓟ ꓙꓳ ꓡꓳ꓿
