ꓬꓲꓸ ꓢꓯꓸ ꓠ ꓠꓹ ꓓꓴ(Audio)
ꓟꓴ ꓖꓪ ꓖꓪ ꓟ ꓒꓬꓴ-ꓒꓬꓴ-ꓚꓳ-ꓔꓲꓸ ꓟꓯꓼ ꓘꓰꓹ ꓔꓬ ꓟ 1 ꓘꓳꓼ ꓐꓲ ꓡ ꓟ ꓢꓷ ꓙ ꓟꓴ ꓙ
ꓟꓬꓱ ꓓꓳꓽ ꓙꓳˍ ꓟ ꓟꓴ ꓖꓪ ꓖꓪ ꓟ ꓒꓬꓴ-ꓒꓬꓴ-ꓚꓳ-ꓔꓲꓸ (Phyu Phyu Kyaw Thein) ꓠꓬ ꓟꓬ-ꓟ ꓟꓯꓼ ꓡꓰ ꓣꓴ ꓡ ꓟ ꓔꓯ ꓤ ꓟꓳ ꓢꓲꓸ ꓘꓰꓹ ꓚꓳ ꓔꓬ ꓟ 1 ꓘꓳꓼ ꓐꓲ ꓡꓰꓳ꓾ ꓐꓰ Facebook ꓗꓪ ꓐꓳ ꓩꓴ ꓡ ꓡꓳ꓿
“ꓥꓪ ꓠꓴꓽ ꓠꓽ ꓙꓵꓽ ꓪ ꓙꓳ ꓢꓴ ꓔꓯ ꓟꓽ ꓢꓷꓸ ꓠꓬꓲ꓾ ꓑ ꓑ ꓑꓶꓺ ꓖꓶ ꓡ ꓕꓯꓽ ꓟꓽ ꓪ ꓖꓶ꓾ ꓢꓲꓹ ꓗꓸ ꓑꓶ ꓖꓶ ꓡ ꓕꓯꓽ ꓦꓲ ꓗꓪ ꓔꓳꓼ ꓦ ꓛꓲ ꓡ ꓟ ꓔꓯ ꓙ ꓫꓸ ꓢꓲꓸ ꓦꓲ ꓗꓪ ꓐꓰ ꓓꓳ ꓡꓻꓳ” ꓐꓰ ꓬꓲꓸ ꓬꓲꓸ ꓪꓴꓸ ꓦꓲ ꓗꓪ ꓐꓰ ꓓꓳ ꓡ ꓟ ꓕꓲ ꓠꓬꓲ ꓟꓸ ꓟꓲꓽ ꓐꓳ ꓔ ꓡꓳ꓿
ꓒꓳꓹ ꓔꓳꓹ ꓘꓴ ꓔꓴ ꓟ ꓗꓪ ꓟꓯꓼ ꓠꓰ ꓣꓴ ꓡ ꓟ ꓔꓯ ꓙ ꓫꓸ ꓠꓬꓲ꓾ ꓬꓲꓸ ꓦꓲ ꓗꓪ ꓐꓰ ꓓꓳ ꓡ ꓟ ꓠꓬ 2021 ꓘꓳꓼ 4 ꓦ 13 ꓠꓬꓲ ꓥ ꓠꓬꓲ꓾ ꓟꓲꓸ ꓟꓲ ꓕꓲ ꓘꓳꓼ ꓐꓲ ꓡꓰꓳ ꓐꓯ ꓡꓳ꓿
ꓬꓲꓸ ꓘꓰꓹ ꓑꓬ ꓚꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓟꓯꓼ ꓡꓰꓽ ꓧꓳꓽ ꓪꓴꓸ ꓟꓴˍ ꓟ ꓟꓴ ꓖꓪ ꓖꓪ ꓑꓮꓲ ꓗꓪ ꓟꓴ ꓖꓪ ꓖꓪ ꓔꓬ ꓡꓳ꓾ ꓐꓰ ꓟꓽ ꓔꓱꓹ ꓟ ꓓꓳꓽ ꓑꓶꓸ ꓓꓴ ꓠꓲꓹ ꓟ ꓠꓻ ꓬꓰꓳ꓾ ꓐꓯ ꓡꓳ꓿
“ꓥ ꓟꓽ ꓥ ꓚꓲꓸ ꓚ ꓠꓬꓲ ꓓꓴ ꓮ ꓫꓵꓽ ꓡꓲꓸ ꓟꓽ ꓫꓸ ꓔꓸ ꓥ ꓟꓲ꓾ ꓖꓳ ꓡꓱ ꓟꓽ ꓬꓰ ꓬꓰ ꓢꓴ ꓮ ꓡꓲ ꓐꓯ ꓖꓳ ꓡꓱ ꓠ ꓠꓹ ꓢꓲꓸ ꓶꓽ ꓤ ꓔꓬ (way way nay) ꓐꓯˍ ꓟ ꓟꓯꓼ ꓔꓯ ꓔꓺ ꓢꓴ ꓟꓬꓱꓺ ꓐꓰ ꓶ ꓡꓯꓼ ꓜꓴ ꓟꓬꓱꓺ ꓗꓪ ꓖꓶ ꓥꓪ ꓟꓬꓱꓺ ꓗꓶ ꓩꓴ ꓡ ꓐꓶ꓿ ꓠꓲꓹ ꓟ ꓠꓻ ꓬꓰꓳ꓿ ꓥꓪ ꓔꓬ ꓟ ꓟꓵꓽ ꓗꓪ ꓟ ꓡ ꓞꓳ ꓐꓴ ꓠꓽ ꓮ ꓫꓵꓽ ꓡꓲꓸ ꓧꓪ ꓟꓰꓹ ꓠꓬꓲ ꓢꓴ (clarify) ꓟꓽ ꓙꓳ ꓐꓶ” ꓐꓯ ꓔꓸ ꓡꓳ꓿
ꓬꓲꓸ ꓘꓰꓹ ꓑꓬ ꓔꓬ ꓟ ꓦꓬꓼ ꓠꓬꓲ ꓗꓪ ꓬꓰ ꓙ ꓡ ꓢꓴ꓾ ꓢꓷꓸ ꓢꓴ ꓟꓽ ꓢꓷꓸ ꓢꓴ ꓮ ꓙꓵꓽ ꓔꓯ ꓫꓸ ꓟꓳ꓾ ꓐꓯ ꓔꓸ ꓡꓳ꓿ ꓬꓲꓸ ꓐꓹ ꓐ ꓟꓹ ꓟ ꓐꓴ ꓠꓬꓲꓽ ꓫꓵꓸ ꓥ ꓟꓲ ꓟꓳꓽ ꓠꓰ꓾ ꓠꓻ ꓠꓰ ꓮ ꓘꓶꓸ ꓫꓸ ꓟ ꓦꓬꓼ ꓠꓬꓲ ꓗꓳꓸ ꓔꓬ ꓟ ꓗꓪ꓾ ꓟꓯꓼ ꓘꓰꓹ ꓚꓳ ꓠ ꓗ ꓬꓰꓳ ꓐꓯ ꓡꓳ꓿
ꓮ ꓟꓶ ꓠꓬ “ꓧꓶꓸ ꓕꓯꓽˍ ꓡꓰ ꓐꓰ ꓥꓪ ꓮ ꓡꓲ ꓡꓲꓸ ꓟꓽ ꓗ ꓡꓻꓳ” ꓐꓯ ꓢꓲꓸ ꓬꓲꓸ ꓢꓷ ꓙ ꓟꓴ ꓙ ꓕꓳ ꓶ ꓐꓳ ꓠꓽ ꓔꓸ ꓡꓳ꓿ꓟꓬ-ꓟ ꓟꓯꓼ ꓡꓰ ꓗꓴꓷꓼ ꓙꓵꓽ ꓪ ꓦꓴ ꓙꓰ ꓕ ꓑꓳꓸ ꓐꓲ ꓜꓳꓽ ꓠꓴꓽ ꓢꓯꓼ ꓢꓷꓸ ꓠꓲꓹ ꓙꓳ ꓢꓴ ꓮ ꓟꓬꓹ ꓠꓬ ꓐꓱ ꓓꓴꓽ ꓗꓪ ꓡꓴꓽ ꓢꓴ ꓡꓴꓽ꓾ ꓟꓵꓽ ꓘꓶꓽ ꓗꓪ ꓡꓽ ꓛꓴꓸ ꓔꓯꓹ ꓙꓰ ꓢꓴ ꓔꓯꓹ ꓙꓰ꓾ ꓢꓯꓼ ꓟꓬ ꓔꓯ ꓤ ꓟꓳ ꓢꓲꓸ ꓛꓰꓹ ꓑꓬ ꓔꓬ ꓢꓴ ꓐꓯ ꓖꓴ ꓟꓽ ꓓ ꓗꓷ ꓡꓰꓳ꓿
Video
ꓟꓯꓼ ꓗꓳ-ꓢꓰ ꓡꓰ ꓧꓳꓽ ꓪꓴꓸ ꓟꓴˍ ꓟ ꓟꓬ-ꓟ ꓘꓳꓼ ꓫꓵꓼ ꓬꓲ ꓙꓬ ꓕꓲꓽ ꓑꓮꓲ ꓗꓪ ꓑ ꓫꓬ ꓐꓴ ꓟꓽ ꓔꓺ ꓔꓬ
ꓬꓥ-ꓖꓳꓥ ꓐꓰ ꓟ-ꓓꓲ-ꓡꓲ ꓡꓳ ꓒꓱ ꓓꓽ ꓟ ꓗꓪ꓾ ꓟꓯꓼ ꓗꓳ-ꓢꓰ ꓡꓰ ꓧꓳꓽ ꓪꓴꓸ ꓟꓴˍ ꓟ ꓟꓬ-ꓟ ꓘꓳꓼ ꓫꓵꓼ ꓬꓲ ꓙꓬ ꓕꓲꓽ ꓑꓮꓲ ꓗꓪ ꓬꓲꓸ ꓪ ꓞꓳ ꓤꓽ ꓡꓰꓽ ꓟꓽ ꓥ ꓠꓬ꓾ ꓑ ꓫꓬ ꓐꓴ ꓟꓽ ꓔꓺ ꓔꓬ ꓟ ꓡꓳꓸ ꓓꓳ ꓡ ꓡꓳ꓿
ꓑ ꓫꓬ ꓐꓴ ꓠꓬ ꓧꓶꓸ ꓕꓯꓽ ꓧꓶꓸ ꓟꓲ ꓡꓰ ꓐꓰ ꓗꓽ ꓡꓲꓸ ꓗꓽ ꓟꓽ ꓓ ꓠꓲꓹ ꓛꓲ ꓗꓹ ꓛꓲ ꓢꓴ ꓟꓽ ꓙꓳ꓿
“ꓮ ꓐꓶ ꓟꓯꓼ ꓗꓳ-ꓢꓰ ꓡꓯꓼ ꓛꓲ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓙꓳꓸ ꓙꓳꓽ ꓐꓱ ꓶꓽ ꓬꓲ ꓙꓬ ꓕꓲꓽ ꓑꓮꓲ ꓥ ꓢꓶ?” ꓐꓰ ꓐꓯ ꓡꓯ ꓘꓳ ꓔꓬ ꓡꓳ꓿ꓟꓯꓼ ꓗꓳ-ꓢꓰ ꓡꓰ ꓟꓽ ꓓ ꓟꓽ ꓢ ꓟꓬꓱꓽ ꓟꓯꓻ ꓢꓴ ꓐꓴ ꓔꓯ ꓝꓲꓺ ꓔꓸ ꓟ ꓟꓽ ꓥ ꓠꓬ꓾ ꓑ ꓫꓬ ꓐꓴ ꓗꓹ ꓛꓲ ꓗꓹ ꓓ ꓬꓲꓻ ꓙꓬ ꓡꓳ ꓖꓪ ꓢꓴ ꓟꓽ ꓙꓳ ꓟ ꓡꓳꓸ ꓓꓳ ꓡ ꓡꓳ꓿
ꓠꓬꓲꓸ ꓠꓬꓲ 2022 ꓘꓳꓼ 4 ꓦ 13 ꓠꓬꓲ ꓠꓬ ꓟꓬ-ꓟ ꓘꓳꓼ ꓫꓵꓼ ꓬꓲ ꓙꓬ ꓕꓲꓽ ꓑꓮꓲ ꓪꓴꓸ ꓔꓴ ꓕꓲ ꓠꓬꓲ ꓥ ꓡꓳ꓿
ꓫꓲ ꓠꓲꓹ 2020 ꓗꓪ ꓥ ꓟꓲ ꓗꓳ-ꓪꓰꓼ ꓑꓶꓸ ꓓꓴ ꓬꓲ ꓙꓬ ꓕꓲꓽ ꓑꓮꓲ ꓟꓽ ꓬꓰ꓿ ꓮ ꓠꓲꓹ ꓥ ꓟꓲ ꓟꓯꓼ ꓡꓰ ꓙꓵꓽ ꓪ ꓦꓴ ꓙꓰˍ ꓠꓬꓲ ꓑ ꓫꓬ ꓐꓴ ꓠꓲꓹ ꓢꓲꓼ ꓢꓲꓸ ꓬꓲ ꓙꓬ ꓕꓲꓽ ꓑꓮꓲ ꓟꓽ ꓬꓰ꓿ ꓞꓲ ꓠꓲꓹ ꓥ ꓟꓲ ꓑ ꓫꓬ ꓐꓴ ꓠꓬ ꓐꓱ ꓓꓴꓽ ꓗꓪ ꓡꓴꓽ ꓔꓸ ꓢꓴ꓾ ꓦꓲ ꓛꓴ ꓐꓬ ꓡꓰ ꓢꓴ꓾ ꓟꓯꓼ ꓘꓰꓹ ꓢꓴ꓾ ꓫꓵꓻ ꓢꓴ ꓐꓴ ꓐꓱ ꓶ ꓠꓲꓹ ꓥꓴ ꓟꓬ ꓥꓴ ꓢꓲ꓾ ꓬꓲ ꓙꓬ ꓕꓲꓽ ꓑꓮꓲ ꓘꓳꓼ ꓫꓵꓼ ꓦꓬꓼ ꓠꓬꓲ ꓔꓯ ꓧꓶꓸ ꓕꓯꓽˍ ꓡꓰ ꓐꓰ ꓗꓹ ꓛꓲ ꓛꓲ ꓟꓽ ꓬꓰ ꓔꓬ꓿
