ꓟꓬ-ꓟ ꓗꓴꓷꓼ ꓫꓵꓽ ꓪꓴ ꓔꓯ ꓡꓯꓽ ꓔꓯꓽ ꓟ ꓗꓪ ꓙ-ꓑ ꓐꓰ ꓲ-ꓓꓳ-ꓠꓰ-ꓫꓸ ꓗꓴꓷꓼ ꓐꓴ ꓕꓲ ꓡꓰꓹꓼ ꓟꓬꓱꓽ ꓬꓰ ꓠꓹ ꓟ ꓖꓪ ꓙꓱ ꓪ ꓡꓰꓳ=
ꓮ-ꓢꓲ-ꓬ ꓗꓴꓷꓼ ꓜꓴ ꓗꓪ ꓐꓰ ꓖꓪ ꓙꓱ ꓙ ꓡ ꓟ ꓡꓳ ꓚ ꓟꓬ-ꓟ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓢꓲꓽ ꓒꓽ ꓐꓴ ꓒꓵꓽ ꓛꓳ ꓠꓹ ꓟ ꓟꓲ ꓠꓯ ꓗꓴꓷꓼ ꓜꓴ ꓜꓲꓼ ꓚꓰꓺ ꓗꓪ ꓟ ꓞꓳ ꓤ ꓙꓵꓽ ꓪ (Human Right) ꓐꓱ ꓶ ꓫꓸ ꓕꓱ ꓟꓬꓱꓽ ꓬꓰ ꓙ ꓢꓴ ꓢꓲꓽ ꓒꓽ Michelle Bachelet ꓡꓰ ꓫꓸ ꓕꓱ ꓩꓴ ꓡ ꓡꓳ=
ꓟꓬ-ꓟ ꓟꓯꓼ ꓢꓲꓽ ꓒ ꓐꓴ ꓔꓯ ꓟꓵ ꓗꓳ ꓓꓵ ꓓꓵ ꓗꓪ ꓟ ꓗꓴꓷꓼ ꓮ ꓙꓵꓽ ꓕꓲ ꓠꓲꓹ ꓕꓲ ꓪ ꓒꓳꓹ ꓔꓳꓹ ꓠꓹ ꓟ ꓮ-ꓟꓯ-ꓣꓲ-ꓗ ꓡꓰ ꓬꓲꓸ ꓠꓬꓲꓸ ꓖꓶ ꓩꓴ ꓡ ꓢꓰꓽ ꓡꓳ=
ꓮ-ꓟꓯ-ꓣꓲ-ꓗ ꓐꓰ ꓡꓳ ꓟꓶꓸ ꓗꓳ-ꓣꓲ-ꓬ ꓗꓴꓷꓼ ꓐꓴ ꓟꓬ-ꓟ ꓗꓴꓷꓼ ꓐꓱ ꓶ ꓕꓲ ꓠꓲꓹ ꓕꓲ ꓪ ꓟꓬꓱꓽ ꓬꓰ ꓠꓹ ꓟ ꓖꓪ ꓙꓱ ꓪꓽ ꓡꓰꓳ=
ꓕꓱ ꓟ ꓠꓬ ꓠꓬꓲꓸ ꓠꓬꓲ 2021 ꓘꓳꓼ 6 ꓦ 12 ꓠꓬꓲ ꓕꓯ ꓥꓪ ꓵꓺ ꓟꓶˍ ꓟ ꓟꓬ-ꓟ ꓗꓴꓷꓼ ꓐꓰ ꓗꓴꓸ ꓙꓲꓽ ꓙꓳ ꓟ ꓫꓵꓽ ꓓꓳꓽ ꓪꓴꓸ ꓓꓵ ꓐꓴ ꓥ ꓡꓳ= ꓫꓵꓽ ꓓꓳꓽ ꓕꓱ ꓟ ꓵꓺ ꓟꓶ ꓡꓰ ꓗꓸ ꓠꓯꓸ ꓠꓬ ꓓꓵꓽ ꓙ ꓓꓴ ꓮ ꓟꓬꓹ ꓓꓳ ꓡ ꓡꓳ=
2021 ꓘꓳꓼ 2 ꓦ ꓟ 1 ꓠꓬꓲ ꓗꓪ ꓟꓬ-ꓟ ꓗꓴꓷꓼ ꓑ ꓫꓬ ꓡꓰ ꓢꓲꓻ ꓣꓴ ꓔꓸ ꓟ ꓑ ꓫꓬ ꓝꓲ ꓓꓴ ꓐꓴ ꓠꓬ ꓗꓴꓷꓼ ꓖꓪ ꓙꓱ ꓜꓲꓼ ꓓꓴ ꓪꓴꓸ ꓔꓴ ꓠꓹ ꓟ ꓠꓯ-ꓑꓲ-ꓓꓳ ꓡꓳ ꓒꓱ ꓗꓪ ꓮ ꓙꓵꓽ ꓜꓲꓼ ꓛꓲ ꓔꓸꓳ= ꓖꓪ ꓙꓱ ꓜꓲꓼ ꓓꓴ ꓪꓴꓸ ꓔꓴ ꓓꓴ ꓙ ꓖꓶꓽ ꓙꓲꓽ ꓙꓳ ꓟ ꓮ ꓙꓵꓽ ꓕꓵꓼ ꓡꓵꓸ ꓙ ꓖꓶꓽ ꓖꓴ ꓡꓰꓳ= ꓟꓬ-ꓟ ꓗꓴꓷꓼ ꓠꓬ 1962 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓑ ꓫꓬ ꓙꓵꓽ ꓪ ꓟꓽ ꓙꓳ ꓐꓰ ꓗꓷ ꓡꓰꓳ= ꓖꓳ ꓕꓲ ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓟꓯꓼ ꓢꓲꓽ ꓒꓽ ꓐꓴ ꓡꓰ ꓬꓲꓸ ꓪ ꓮ ꓡꓲ ꓠꓲꓹ ꓫꓵ ꓠꓬ ꓬꓲꓸ ꓖꓳ ꓡꓱ ꓕꓲ ꓝꓸ ꓗꓸ ꓠꓯꓸ ꓕꓲ ꓝꓸ ꓗꓶꓸ ꓢꓲꓸ ꓙꓵꓽ ꓡ ꓗꓷ ꓟ 2010 ꓘꓳꓼ ꓗꓪ ꓛꓲ ꓥ ꓡꓳ= ꓬꓲꓸ ꓓꓽ ꓟ ꓙꓵꓽ ꓪ ꓙꓳ ꓢꓴ ꓠꓬ 1962 ꓘꓳꓼ ꓗꓪ ꓐꓰ 1988 ꓘꓳꓼ ꓗꓪ ꓛꓲ ꓟꓯꓼ ꓢꓲꓽ ꓒꓽ ꓓꓽ ꓟ ꓠꓯ-ꓪꓰꓸ ꓥ ꓡꓳ= 1988 ꓘꓳꓼ ꓗꓪ ꓐꓰ 1992 ꓘꓳꓼ ꓗꓪ ꓛꓲ ꓠꓬ ꓟꓯꓼ ꓢꓲꓽ ꓒ ꓓꓽ ꓟ ꓢꓳꓸ-ꓟꓮꓳ ꓥ ꓡꓳ= ꓖꓳ ꓗꓸ ꓠꓯꓸ 1992 ꓘꓳꓼ ꓗꓪ ꓐꓰ 2010 ꓘꓳꓼ ꓗꓪ ꓛꓲ ꓠꓬ ꓟꓯꓼ ꓢꓲꓽ ꓒꓽ ꓓꓽ ꓟ ꓔꓸ-ꓫꓱꓽ ꓥ ꓡꓳ= ꓬꓲꓸ ꓪ ꓮ ꓙꓵꓽ ꓠꓬ ꓟꓯꓼ ꓙꓵꓽ ꓡꓲꓽ ꓙꓵꓽ ꓚꓱꓹ ꓗꓪ ꓐꓰ ꓟꓬ-ꓟ ꓗꓴꓷꓼ ꓔꓯ ꓙꓵꓽ ꓩꓴ ꓡ ꓢꓲꓸ ꓟꓬ-ꓟ ꓗꓴꓷꓼ ꓗꓪ ꓢꓲ ꓡꓲꓹ ꓟ ꓟꓽ ꓙꓳ= ꓑ ꓫꓬ ꓐꓴ ꓠꓲꓹ ꓟ ꓟꓽ ꓢ=
2010 ꓘꓳꓼ ꓗꓪ ꓛꓲ ꓡ ꓠꓬ ꓟꓯꓼ ꓢꓲꓽ ꓒꓽ ꓐꓴ ꓡꓰ ꓙ ꓖꓶ ꓔꓸ ꓢꓲꓸ 2008 ꓘꓳꓼ ꓕꓯ ꓗꓴꓷꓼ ꓑ ꓫꓬꓼ ꓐꓴ ꓡꓰ ꓘꓳ ꓣꓴ ꓔꓸ ꓡꓳ ꓐꓯ ꓟ (ꓚꓵ ꓚꓵ ꓠꓬ ꓬꓲꓸ ꓪ ꓮ ꓡꓲ ꓠꓲꓹ ꓫꓵ ꓖꓳ ꓡꓱ ꓬꓰ ꓔꓸ ꓢꓲꓸ ꓑ ꓫꓬ ꓐꓴ ꓔꓯ ꓜꓲꓽ ꓜꓲꓽ ꓑꓰꓹ ꓑꓰꓹ ꓘꓳ ꓣꓴ ꓝꓲ ꓟ ꓥ ꓡꓳ) 2008 ꓘꓳꓼ ꓟꓬ-ꓟ ꓗꓴꓷꓼ ꓙꓵꓽ ꓚꓱꓹ ꓬꓲꓸ ꓟꓳ ꓡꓱꓽ ꓡꓳ ꓚ ꓟꓯꓹ ꓘꓳ ꓡꓯ ꓔꓯꓺ ꓗꓷ ꓠꓬ ꓴꓢꓓꓑ ꓐꓯ ꓟ ꓜ ꓠꓱ ꓐꓰ ꓢꓲ-ꓝꓱꓼ ꓐꓬꓱꓽ ꓔꓳꓹ ꓠꓷꓼ ꓔꓸ ꓟ ꓑ-ꓔꓲ ꓡꓰ ꓧꓪꓸ ꓡꓰꓳ= ꓕꓱ ꓟ ꓠꓬ ꓮ ꓫꓵꓽ ꓓꓵꓽ ꓙ ꓟꓶ ꓓꓴ ꓟꓽ ꓙꓳ= ꓮꓳ-ꓢꓸ-ꓢꓴꓸ-ꓚꓰꓽ ꓡꓰ ꓧꓳꓽ ꓪꓴꓸ ꓟꓴ ꓔꓬ ꓟ ꓠꓡꓓ ꓠꓬ ꓟꓯꓹ ꓔꓯꓺ ꓡꓯ ꓘꓳ ꓟꓽ ꓪ ꓟ ꓡꓰꓽ ꓟꓽ ꓞꓲ꓾ ꓮꓳ-ꓢ-ꓢꓴꓸ-ꓚꓰ ꓔꓯ ꓦꓲ ꓗꓪ ꓡꓴꓽ ꓔꓸ ꓢꓰꓽ ꓡꓳ= ꓖꓳ ꓟ ꓑꓶꓸ ꓓꓴ ꓟꓯꓼ ꓢꓲꓽ ꓒ ꓐꓴ ꓙ ꓖꓶꓽ ꓔꓸ ꓟ ꓡꓰ ꓐꓰ ꓴꓢꓓꓑ ꓑ-ꓔ ꓟꓯꓹ ꓧꓪꓸ ꓡꓰ ꓟ ꓥ ꓡꓳ=
2013 ꓘꓳꓼ ꓗꓪ ꓠꓬ ꓥꓪ ꓘꓳꓼ ꓟ ꓔꓱꓹ ꓫꓵ ꓗꓪ ꓟꓯꓹ ꓘꓳ ꓔꓯ ꓓꓴ ꓕꓲ ꓟ ꓬꓰ ꓡ ꓢꓲ꓾ ꓖꓳ ꓗꓪ ꓠꓬ ꓮꓳ-ꓢ-ꓢꓴ-ꓚꓰꓽ ꓧꓳꓽ ꓪꓴꓸ ꓟꓴ ꓟ ꓠꓡꓓ ꓑ-ꓔꓲ ꓥ ꓟꓲ ꓔꓯꓺ ꓡꓯ ꓘꓳ ꓗꓷ ꓠꓬ ꓧꓪꓸ ꓡꓰꓳ= ꓝꓮꓲ 2015 ꓘꓳꓼ ꓗꓪ ꓬꓲꓸ ꓓꓽ ꓟ ꓟꓯꓹ ꓘꓳ ꓡꓯ ꓔꓯꓺ ꓑꓮꓲ ꓗꓪ ꓠꓡꓓ ꓠꓬ 90% ꓕꓯ ꓢꓲ ꓧꓪꓸ ꓡꓰꓳ= ꓖꓳ ꓟ ꓑꓶꓸ ꓓꓴ ꓠꓡꓓ ꓗꓴꓷꓼ ꓟꓬꓱꓽ ꓬꓰ ꓜꓴ ꓠꓬ 2015-2021 ꓗꓪ ꓛꓲ 5 ꓘꓳꓼ ꓑ ꓫꓬ ꓔꓯ ꓙꓵꓽ ꓗꓷꓳ= ꓖꓳ ꓡꓱ ꓥ ꓟꓲ ꓟꓯꓼ ꓢꓲꓽ ꓒ ꓐꓴ ꓠꓬ ꓗꓴꓷꓼ ꓖꓪ ꓙꓱ ꓜꓲꓼ ꓓꓴ ꓗꓪ ꓥ ꓟꓲ 25% ꓔꓺ ꓔꓬ ꓟ ꓡꓰ ꓟꓽ ꓞꓲ꓾ ꓙꓵꓽ ꓚꓱꓹ ꓟꓴ ꓚꓱꓹ ꓦꓲ ꓕꓷꓹ ꓓꓽ ꓟ (ꓗꓴꓷꓼ ꓘꓴ ꓗꓪ ꓟꓬꓱꓽ ꓬꓰ ꓚꓱꓹ꓾ ꓗꓴꓷꓼ ꓟꓵ ꓘꓶꓽ ꓟꓵꓽ ꓡꓯꓼ ꓗꓪ ꓙꓵꓽ ꓚꓱꓹ) ꓗꓪ ꓥ ꓟꓲ ꓔꓺ ꓔꓬ ꓢꓲ꓾ ꓠꓡꓓ ꓗꓴꓷꓼ ꓟꓬꓱꓽ ꓬꓰ ꓜꓴ ꓔꓯ ꓮ ꓟꓬꓹ ꓫꓵꓽ ꓘꓶ ꓡꓶꓽ ꓗꓷ ꓡꓳ=
2020 ꓘꓳꓼ 11 ꓦ 8 ꓠꓬꓲ ꓗꓪ ꓟꓯꓹ ꓕꓲ ꓧꓪꓹ ꓘꓳ ꓡꓯ ꓔꓯꓺ ꓗꓪ ꓥ ꓟꓲ ꓗꓴꓷꓼ ꓟꓬꓱꓽ ꓬꓰ ꓜꓴ ꓠꓡꓓ ꓧꓪꓸ ꓡꓰꓳ= ꓖꓳ ꓟ ꓑꓶꓸ ꓓꓴ 2021 ꓘꓳꓼ 2 ꓦ 1 ꓠꓬꓲ ꓗꓪ ꓠꓬ ꓮ ꓢꓳ ꓐꓯ ꓔꓸ ꓟ ꓡꓰ ꓐꓰ ꓑ ꓫꓬ ꓐꓴ ꓡꓰ ꓢꓲꓻ ꓩꓴ ꓡ ꓟ ꓑ ꓫꓬ ꓝꓲ ꓓꓴ ꓐꓴ ꓠꓬ ꓠꓯ-ꓑꓲ-ꓓꓳ ꓡꓳ ꓒꓱ ꓗꓪ ꓜꓲꓼ ꓛꓲ ꓡ ꓢꓲꓸ ꓬꓲꓸ ꓪꓴꓸ ꓕꓲ ꓠꓬꓲ ꓟ ꓗꓴꓷꓼ ꓜꓲꓼ ꓓꓴ ꓣꓱꓽ ꓬꓰ ꓠꓹ ꓟ ꓡꓳꓸ ꓔꓬ ꓟ ꓥꓳ=
ꓖꓳ ꓕꓲ ꓠꓬꓲ ꓠꓯꓼ 5 ꓙꓵꓹ ꓗꓪ ꓠꓬ ꓪ ꓔꓲꓸ ꓗꓪ ꓐꓰ꓾ ꓟꓵꓽ ꓫꓴ ꓙꓵꓽ ꓢꓴ ꓟꓴ ꓢꓴ ꓮ ꓙꓵꓽ꓾ ꓠꓡꓓ ꓗꓴꓷꓼ ꓟꓬꓱ ꓬꓰ ꓜꓴ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓮ ꓙꓵꓽ ꓔꓯ ꓟꓯꓼ ꓢꓲꓽ ꓒꓽ ꓓꓽ ꓟ ꓟꓰꓹ-ꓮꓳ-ꓡꓮꓲ ꓕꓵꓼ ꓪ ꓗꓪ ꓐꓰ ꓣꓴ ꓗꓷꓳ= ꓖꓳ ꓡꓱ ꓢꓲꓸ ꓜꓰ ꓞꓹ ꓢꓰꓽ ꓢꓴ ꓑ ꓫꓬ ꓝꓲ ꓓꓴ ꓐꓴ ꓔꓯ ꓠꓬ ꓕꓲ ꓟꓵꓽ ꓕꓲ ꓟꓵꓽ ꓗꓪ ꓡ ꓙꓰ ꓝꓲ ꓡꓳ= ꓝꓮꓲ ꓕꓲ ꓠꓬꓲ ꓗꓪ ꓠꓬ ꓟꓯꓼ ꓢꓲꓽ ꓒ ꓓꓽ ꓟ ꓟꓰꓹ-ꓮꓳ-ꓡꓮꓲ ꓡꓰ ꓧꓳꓽ ꓪꓴꓸ ꓟꓴ ꓢꓲ꓾ ꓢꓮꓚ ꓐꓯ ꓟ ꓗꓴꓷꓼ ꓙꓵꓽ ꓜꓴ ꓕꓲ ꓟ ꓒꓳ ꓓꓳ ꓡ ꓡꓳ=
ꓖꓳ ꓕꓲ ꓜꓴ ꓡꓰ ꓧꓳꓽ ꓪꓴꓸ ꓟꓴ ꓢꓲꓸ ꓑ ꓫꓬ ꓐꓴ ꓠꓲꓹ ꓡꓶꓽ ꓮ ꓙꓵꓽ ꓒꓬꓹ ꓩꓴ ꓗꓷ ꓡꓳ= ꓑ ꓫꓬ ꓐꓴ ꓠꓲꓹ ꓡꓶꓽ ꓟꓳꓸ ꓖꓶ ꓟ ꓜꓲꓼ ꓓꓴ ꓮ ꓙꓵꓽ ꓗꓪ ꓡꓽ ꓛꓴꓸ ꓑꓳ ꓗꓪ ꓐꓰ ꓡ ꓞꓳ ꓮ ꓟꓬꓹ ꓐꓶ ꓢꓰꓼ ꓗꓷꓳ= ꓖꓳ ꓟ ꓡꓰ ꓟꓽ ꓞꓲ꓾ ꓦꓲ ꓗꓪ ꓛꓲ ꓧꓪ ꓢꓲꓸ ꓤ ꓠꓱ ꓤ ꓮ ꓙꓵꓽ ꓐꓶ ꓢꓰꓼ ꓢꓴ ꓙꓳ ꓡꓳ= ꓟꓯꓼ ꓒꓽ ꓐꓴ ꓠꓬ ꓘꓴ ꓒꓽ ꓠꓯꓺ ꓒ ꓦꓴ ꓤ ꓒꓽ ꓒꓬꓱꓼ ꓡꓻꓳ= ꓑ ꓫꓬ ꓐꓴ ꓠꓬ ꓢꓲꓽ ꓢꓲꓽ ꓫꓬ ꓫꓬ ꓠꓲꓹ ꓡꓶꓽ ꓟꓳꓸ ꓖꓶ ꓟ ꓜꓲꓼ ꓓꓴ ꓣꓱꓽ ꓬꓰ ꓡꓳ= ꓮ ꓫꓵꓽ ꓟꓯꓼ ꓬꓰ ꓶ ꓤꓼ ꓟꓽ ꓙꓳ= ꓟꓯꓼ ꓒ ꓐꓴ ꓔꓯ ꓪꓴꓸ ꓓꓵ ꓕꓱꓼ ꓢꓴ ꓟꓲ ꓙꓳ ꓡꓳ= ꓮ ꓡꓲꓳ ꓐꓯ ꓠꓬ ꓟꓯꓼ ꓢꓲꓽ ꓒ ꓐꓴ ꓬꓰ ꓔꓬ ꓟ ꓠꓬ ꓗꓴꓷꓼ ꓐꓬ ꓡꓰ ꓚꓱꓹ꓾ ꓑ ꓫꓬ ꓐꓴ ꓠꓲꓹ ꓡꓶꓽ ꓡꓳ ꓚ ꓟꓯꓹ ꓖꓶ ꓔꓸ ꓟ ꓡ ꓞꓳ ꓔꓯ ꓣꓴ ꓞꓳꓹ ꓗꓷ ꓟ ꓑꓶꓸ ꓓꓴ ꓑ ꓫꓬ ꓐꓴ ꓟꓽ ꓠꓲꓹ ꓒꓴ=
2020 ꓘꓳꓼ 11 ꓦ 8 ꓠꓬꓲ ꓕꓯ ꓥꓪ ꓠꓴ ꓡꓰ ꓟꓯꓹ ꓗꓶ ꓔꓸ ꓟ ꓮ ꓡꓲ ꓗꓷ ꓡꓰ ꓪ? ꓐꓰ ꓵꓺ ꓠꓱ ꓔꓴ ꓡ ꓡꓳ= ꓕꓱ ꓟ ꓔꓯ ꓟꓯꓼ ꓒ ꓐꓴ ꓠꓬ ꓙꓲ ꓙꓲ ꓜꓳ ꓜꓳ ꓫꓸ ꓕꓱ ꓓꓴ ꓟꓽ ꓬꓰ= ꓡ ꓛꓴꓸ ꓗꓪ ꓐꓰ ꓫꓸ ꓕꓱ ꓡ ꓡꓳ= ꓐꓶ ꓢꓰꓼ ꓢꓴ 700 ꓣꓳ ꓟꓽ ꓞꓲ ꓙꓳ ꓡ ꓕꓯ꓾ ꓑ ꓫꓬ ꓐꓴ ꓠꓬ ꓡ ꓞꓳ ꓥꓳꓽ ꓟꓽ ꓢꓷꓸ ꓢꓴ ꓔꓯ ꓫꓸ ꓪ ꓕꓱ ꓟꓽ ꓓ ꓠ ꓔꓸ ꓐꓶ= ꓬꓲꓸ ꓪ ꓢꓷꓸ ꓟ ꓡ ꓛꓴꓸ ꓗꓪ ꓐꓰ ꓔꓳꓼ ꓡꓯ ꓘꓳ ꓓꓴ ꓥꓳ ꓐꓯ ꓢꓲꓸ ꓟꓵꓽ ꓘꓶꓽ ꓟꓵꓽ ꓡꓯꓼ ꓗꓪ ꓔꓬ ꓟ ꓗꓴꓷꓼ ꓒꓳꓹ ꓔꓳꓹ ꓢꓴ ꓜꓴ ꓔꓯ ꓔꓺ ꓙꓰꓳ= ꓖꓳ ꓗꓪ ꓟꓯꓼ ꓤꓹ ꓢꓲꓸ ꓮ ꓟꓶ ꓠꓬ ꓡꓳ ꓒꓱ ꓘꓴꓽ ꓗꓪ ꓓꓵꓽ ꓡ ꓢꓲꓸ ꓟꓯꓼ ꓢꓰꓼ ꓡꓯ ꓘꓳ ꓓꓴ ꓕꓵꓼ ꓡꓵꓸ ꓗꓷ ꓡꓰ ꓔꓬ ꓟ ꓕꓲ ꓙꓵꓹ ꓥꓳ= ꓟꓯꓼ ꓒꓽ ꓐꓴ ꓡꓰ ꓫꓸ ꓟꓴ ꓫꓸ ꓚꓬ ꓢꓰꓼ ꓪ ꓡꓰ ꓢꓴ ꓠꓬ ꓮ ꓟꓶ ꓗꓪ ꓛꓲ 800 ꓣꓳ ꓟꓽ ꓞꓲ ꓙꓳ ꓡ ꓔꓬ ꓡꓳ= ꓐꓱ ꓓꓴꓽ ꓗꓪ ꓞꓳꓹ ꓡꓴꓽ ꓔꓸ ꓢꓴ 3000 ꓣꓳ ꓟꓽ ꓞꓲ ꓙꓳ ꓡꓳ=
ꓬꓲꓸ ꓪꓴꓸ ꓕꓯ ꓗꓴꓷꓼ ꓜꓴ ꓐꓴ ꓐꓰ꓾ ꓮ-ꓢꓲ-ꓬ ꓗꓴꓷꓼ ꓐꓴ ꓥ ꓟꓲ ꓮ ꓡꓲ ꓒꓬꓱꓼ ꓡ ꓟ ꓔꓯ ꓡꓳꓸ ꓠꓬꓹ ꓔꓬ ꓟ ꓡꓰ ꓐꓰ ꓗꓹ ꓡꓳ= ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓢꓲꓽ ꓒꓽ ꓐꓴ ꓠꓬ ꓕꓲ ꓝꓸ ꓗꓸ ꓠꓯꓸ ꓕꓲ ꓝꓸ ꓑ ꓫꓬ ꓐꓴ ꓔꓯ ꓫꓸ ꓟꓴ ꓫꓸ ꓚꓬ ꓬꓰ ꓟ꓾ ꓢꓰꓼ ꓟ ꓬꓰ ꓡ ꓔꓬ ꓟ ꓗꓪ ꓐꓰ ꓗꓴꓷꓼ ꓜꓴ ꓢꓲꓽ ꓒ ꓢꓲꓽ ꓟ ꓐꓴ ꓥ ꓟꓲ ꓔꓬꓹ ꓟ ꓽ ꓙꓻꓳ= ꓕꓱ ꓗꓪ ꓣꓴꓢꓢꓲꓮ ꓐꓰ ꓚꓧꓲꓠꓮ (ꓧꓶꓽ ꓒꓽ ꓗꓴꓷꓼ) ꓠꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓜꓲꓽ ꓓꓽ ꓟ ꓐꓴ ꓔꓯ ꓗꓴ ꓗꓴ ꓢꓲ ꓥ ꓟꓲ꓾ ꓒꓴ ꓒꓴ ꓡꓯꓽ ꓡꓯꓽ ꓥ ꓟꓲ ꓢꓯꓼ ꓖꓶ ꓢꓴ ꓗꓴꓷꓼ ꓓꓽ ꓟ ꓠꓬꓲꓽ ꓗꓴꓷꓼ ꓥ ꓡꓳ=
ꓖꓳ ꓟ ꓑꓶꓸ ꓓꓴ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓢꓲꓽ ꓒꓽ ꓐꓴ ꓠꓬ ꓧꓶꓸ ꓕꓯ ꓥ ꓟꓲ ꓥꓪ ꓠꓴ ꓠꓬ ꓗꓴꓷꓼ ꓜꓴ ꓐꓰ꓾ ꓠꓱꓸ ꓐꓯꓼ ꓗꓴꓷꓼ ꓓꓽ ꓟ ꓗꓪ ꓐꓰ ꓙ ꓡꓯ ꓘꓳ ꓟ ꓚꓰꓹ ꓓꓶ ꓞꓷꓹ ꓩꓴ ꓡ ꓟ ꓔꓯ ꓔꓳꓹ ꓜꓳꓽ ꓠꓬꓲꓳ= ꓖꓳ ꓡꓱ ꓥ ꓟꓲ ꓥꓪ ꓠꓴ ꓮ ꓫꓵꓽ ꓟꓽ ꓙꓳꓺ= ꓥꓪ ꓠꓴ ꓔꓯ ꓔꓺ ꓙ ꓔꓬ ꓟ ꓗꓴꓷꓼ ꓮ ꓔꓲꓸ ꓤꓼ ꓔꓯ ꓙ ꓡꓯ ꓘꓳ ꓢꓲꓸ ꓗꓴꓷꓼ ꓔꓯ ꓙꓵꓽ ꓙꓰ ꓓꓴ ꓥꓳ ꓐꓯ ꓓꓳ ꓡ ꓡꓳ= ꓕꓱ ꓟ ꓗꓪ ꓣꓴꓢꓢꓲꓮ ꓐꓰ ꓚꓧꓲꓠꓮ ꓠꓬ ꓟꓯꓼ ꓜꓲꓽ ꓓꓴ ꓦ ꓡꓱ ꓐꓳ ꓓꓴ ꓓꓽ ꓟ ꓗꓴꓷꓼ ꓓꓽ ꓟ ꓠꓬꓲꓽ ꓟ ꓥ ꓡꓳ= ꓝꓮꓲ ꓮ-ꓢꓲ-ꓬ ꓟꓵꓽ ꓗꓪ ꓐꓰ ꓥ ꓟꓲ ꓟꓯꓼ ꓐꓴ ꓔꓯ ꓗꓴ ꓗꓴ ꓢꓲ ꓢꓯꓼ ꓖꓶ ꓔꓬ ꓟ ꓗꓴꓷꓼ ꓙꓳ ꓢꓰꓽ ꓡꓳ= ꓖꓳ ꓟ ꓠꓬ ꓚꓧꓲꓠꓮ ꓑꓶꓸ ꓓꓴ ꓥ ꓟꓲ꓾ ꓝꓮꓲ ꓟꓬ-ꓟ ꓗꓴꓷꓼ ꓓꓰ-ꓟꓳ-ꓗꓯ-ꓢꓰ ꓪꓴꓽ ꓟꓴ ꓡ ꓠꓬ ꓬꓲꓸ ꓪ ꓗꓴꓷꓼ ꓔꓯ ꓮ ꓒꓳ ꓒꓳ ꓗꓪ ꓧꓪꓸ ꓡꓰ ꓡ ꓟ ꓔꓯ ꓗꓳ ꓚꓱꓺ ꓟ ꓑꓶꓸ ꓓꓴ ꓥ ꓟꓲ ꓥ ꓠꓳꓹ= ꓖꓳ ꓡꓱ ꓥ ꓟꓲ ꓲ-ꓓꓳ-ꓠꓰ-ꓫꓸ꓾ ꓙ-ꓑ ꓐꓰ꓾ ꓖꓳ ꓪꓴꓸ ꓗꓳ-ꓣꓲ-ꓬ ꓗ ꓗꓴꓷꓼ ꓠꓬ ꓟꓬ-ꓟ ꓗꓴꓷꓼ ꓗꓪ ꓓꓰ-ꓟꓳ-ꓗꓯ-ꓢꓰ ꓢꓯꓼ ꓙꓳ ꓡ ꓠꓹ ꓟ ꓔꓳꓹ ꓙ ꓬꓰ ꓙ ꓠꓲꓹ ꓫꓵ ꓢꓴ ꓐꓴ ꓥ ꓟ ꓡꓳꓸ ꓢꓷꓸ ꓡꓰ ꓓ ꓡꓳ=
ꓗꓳꓸ ꓗꓷ ꓟ 3 ꓦ ꓘꓴ ꓗꓪ ꓙꓵꓽ ꓪ ꓦꓴ ꓢꓴ ꓟꓯꓼ ꓜꓴ ꓔꓯ ꓓꓶꓽ ꓡꓯ ꓘꓳ ꓠꓹ ꓟ ꓑ ꓫꓬ ꓐꓴ ꓮ ꓟꓬꓹ ꓟꓯꓼ ꓤꓹ ꓙꓰꓳ= ꓮ ꓟꓶ ꓠꓬ ꓦ ꓐ ꓠꓬꓲꓽ ꓟ ꓙ ꓡ ꓪ= ꓟꓶ ꓤ ꓟꓽ ꓥ ꓕꓯ ꓡꓳ ꓒꓱ ꓗꓪ ꓓꓵꓽ ꓡ ꓢꓲ ꓙꓵꓽ ꓪ ꓦꓴ ꓢꓴ ꓐꓴ ꓔꓯ ꓟꓯꓼ ꓢꓰꓼ ꓡꓯ ꓘꓳ ꓓꓴ ꓒꓬꓱꓼ ꓡ ꓥꓳ= ꓟꓵꓽ ꓗꓳꓹ ꓓꓵ ꓓꓵ ꓗꓪ ꓐꓰ ꓥ ꓟꓲ ꓙꓵꓽ ꓪ ꓦꓴ ꓢꓴ ꓐꓴ ꓔꓯ ꓔꓺ ꓙ ꓟꓽ ꓙꓲ ꓗꓪ ꓛꓲ ꓝꓴꓲ ꓮ ꓟꓬꓹ ꓬꓰ ꓓꓳ ꓡ ꓟ ꓑꓶꓸ ꓓꓴ꓾ ꓮ ꓟꓶ ꓠꓬ ꓬꓲ ꓙꓬ ꓚꓱꓹ ꓕꓴꓸ ꓙꓰꓳ= ꓟꓲꓼ ꓪꓳꓼ ꓒꓳꓹ ꓙꓰꓳ= ꓟꓴ ꓘꓳꓼ ꓒꓳꓹ ꓙꓰꓳ= ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓢꓲꓽ ꓒ ꓐꓴ ꓦꓬꓼ ꓠꓬꓲ ꓠꓬ ꓟꓶ ꓘꓶꓸ ꓝꓲꓸ ꓠꓶꓽ ꓡꓻꓳ= ꓬꓲꓸ ꓪ ꓪꓽ ꓠꓬꓲˍ ꓟ ꓟꓲ ꓟꓲ ꓡꓬꓽ ꓔꓬ ꓟ ꓦꓬꓼ ꓠꓬꓲ ꓠꓬ ꓖꓴ ꓡꓰ ꓐꓰ ꓗꓹ ꓡꓳ=
ꓮ ꓟꓶ ꓠꓬ ꓟꓲꓼ ꓪꓳꓼ ꓒꓳꓹ ꓙꓰꓳ ꓐꓯ ꓟ ꓔꓯ ꓟꓬ ꓠꓬꓲ ꓕꓶ ꓡꓰ ꓝꓲ ꓟ ꓕꓲ ꓘꓶꓽ ꓙꓳ ꓢꓰꓽ ꓡꓳ= 2021 ꓘꓳꓼ 6 ꓦ 10 ꓠꓬꓲ ꓕꓯ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓢꓲꓽ ꓒꓽ ꓓꓽ ꓟ ꓐꓴ ꓦ ꓡꓱ ꓐꓳ ꓔꓬ ꓟ ꓡ-ꓟ ꓒꓽ ꓕꓲ ꓣꓳ ꓐꓰ꓾ ꓓꓽ ꓫꓵ ꓒꓽ ꓕꓲ ꓣꓳ ꓠꓬ ꓐꓬꓱꓽ ꓦꓲ ꓞꓰ ꓡꓰ ꓗꓪ ꓫꓵꓻꓳ= ꓕꓱ ꓟ ꓠꓬ ꓬꓲꓸ ꓪꓴ ꓦ ꓡꓱ ꓐꓳ ꓔꓬ ꓟ ꓐꓬ ꓡꓰ ꓟ ꓬꓲꓸ ꓪꓴꓸ ꓕꓲ ꓕꓳꓼ ꓥ ꓡꓳ= ꓟꓲꓼ ꓪꓳꓼ ꓥ ꓟꓲ ꓑ ꓫꓬ ꓔꓯ ꓔ ꓙ ꓡ ꓔꓬ ꓟ ꓢꓷꓸ ꓡꓰ ꓓꓴ ꓥ ꓡꓳ=
ꓟꓬ-ꓟ ꓗꓴꓷꓼ ꓐꓰ ꓮ-ꓢꓲ-ꓬ ꓟꓵꓽ ꓗꓴꓷꓼ ꓮ ꓙꓵꓽ ꓟꓸ ꓟꓲꓽ ꓮ ꓘꓶꓸ ꓢꓷꓸ ꓢꓴ꓾ ꓫꓵꓽ ꓓꓳꓽ ꓕꓳ ꓶ ꓐꓳ ꓒꓽ ꓓꓽ ꓟ ꓐ-ꓔꓯ-ꓡꓲ-ꓠ ꓡꓰ꓾ “ꓤꓶ ꓫꓵꓼ ꓮ-ꓢꓲ-ꓬ ꓟꓵꓽ ꓚ ꓟꓲꓽ ꓗꓪ ꓗꓴꓷꓼ ꓙꓵꓽ ꓪ ꓦꓴ ꓢꓲꓸ ꓞꓳꓸ ꓡꓰ ꓢꓴ ꓟꓯꓼ ꓢꓲꓽ ꓒ ꓕꓲ ꓜꓴ ꓠꓬ ꓟꓬ-ꓟ ꓗꓴꓷꓼ ꓟꓯꓼ ꓢꓲꓽ ꓒ ꓐꓴ ꓒꓬꓱꓼ ꓡ ꓡꓲꓸ ꓟꓽ ꓢꓷꓸ” ꓐꓰ ꓧꓶꓸ ꓕꓯ ꓦ ꓐ ꓠꓬꓲꓽ ꓟ ꓕꓯ ꓐꓳ ꓓꓳ ꓩꓴ ꓡ ꓗꓷꓳ=
ꓟꓬ-ꓟ ꓑ ꓫꓬ ꓐꓴ ꓗꓪ ꓕꓲ ꓐꓱ ꓠꓬ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓜꓴ ꓔꓯ ꓮ ꓘꓶꓸ ꓦ ꓡꓱ ꓐꓳ ꓔꓬ ꓢꓴ ꓙꓳ ꓡꓳ= ꓬꓲꓸ ꓪ ꓐꓱ ꓶ ꓟꓬꓱꓽ ꓬꓰ ꓫꓸ ꓕꓱ ꓙ ꓔꓬ ꓢꓴ ꓙꓳ ꓡꓳ= ꓖꓳ ꓡꓱ ꓥ ꓟꓲ ꓦ ꓐ 5 ꓟ ꓘꓴ ꓗꓪ ꓗꓴꓷꓼ ꓮ ꓡꓲ ꓫꓸ ꓡꓰ ꓡ ꓔꓬ ꓟ ꓔꓯ ꓮ ꓙꓵꓽ ꓢꓴ ꓔꓳꓹ ꓜꓳ ꓟꓶ ꓡꓰꓳ= ꓟꓯꓼ ꓢꓲꓽ ꓒ ꓓꓽ ꓟ ꓐꓴ ꓠꓬ ꓗꓴꓷꓼ ꓑ ꓫꓬ ꓔꓯ ꓠꓵ ꓠꓬꓲ ꓙꓵꓽ ꓪ ꓦꓴ ꓟ ꓟꓽ ꓥ= ꓗꓴꓷꓼ ꓑ ꓫꓬ ꓐꓱ ꓶ ꓟꓬꓱꓽ ꓬꓰ ꓙ ꓠꓹ ꓟ ꓙꓵꓽ ꓪ ꓦꓴ ꓟ ꓟꓽ ꓥ ꓐꓰ ꓡꓳꓸ ꓢꓷꓸ ꓡꓰ ꓓ ꓟ ꓦꓬꓼ ꓠꓬꓲ ꓥ ꓡꓳ= ꓮ ꓟꓶ ꓠꓽ ꓗꓴꓷꓼ ꓫꓵꓽ ꓪꓴ ꓠꓬ ꓥꓪ ꓠꓴ ꓧꓪ ꓜ ꓧꓪ ꓓꓳ ꓚꓱꓹ ꓔꓯ ꓮ ꓫꓵꓽ ꓟꓽ ꓗꓪ’ ꓫꓵꓽ ꓐꓯ ꓟꓽ ꓙꓲ ꓡꓰꓳ= ꓑ ꓫꓬ ꓐꓴ ꓔꓯ ꓕꓲ ꓝꓸ ꓗꓸ ꓠꓯꓸ ꓕꓲ ꓝꓸ ꓥꓰꓸ ꓜꓲ ꓡ ꓔꓬ ꓡꓳ=
ꓑ ꓫꓬ ꓔꓬ ꓕ ꓑꓳꓸ ꓑ ꓫꓬ ꓠꓬ ꓙꓵꓽ ꓪ ꓬꓲꓸ ꓚꓰ ꓥ ꓡꓳ ꓐꓰ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓗꓪ ꓡꓳꓸ ꓓꓳ ꓡ ꓡꓳ= ꓑ ꓫꓬ ꓟꓽ ꓠꓲꓹ ꓫꓵ ꓟ ꓔꓯ ꓜꓲ ꓜꓲ ꓑꓰꓹ ꓑꓰꓹ ꓞꓳ ꓢꓰꓼ ꓪ ꓢꓰꓼ ꓢꓲꓸ ꓬꓰ ꓔꓬ ꓟ ꓟꓯꓼ ꓐꓴ ꓠꓬ ꓑ ꓫꓬ ꓐꓱ ꓶ ꓟꓯꓼ ꓟꓽ ꓥꓻꓳ= ꓖꓳ ꓟ ꓑꓶꓸ ꓓꓴ ꓑ ꓫꓬ ꓔꓯ ꓬꓰ ꓙ ꓔ ꓙ ꓠꓹ ꓟ ꓟꓯꓼ ꓓꓳ ꓡ ꓠ ꓗꓷ ꓡꓰ ꓟ ꓥꓳ= ꓟꓽ ꓟꓶ ꓫꓵ ꓠꓬ ꓑ ꓫꓬ ꓟꓯꓼ ꓐꓴ ꓦꓰꓼ ꓔꓴ ꓡ ꓢꓲ꓾ ꓑ ꓫꓬ ꓙꓵꓽ ꓪ ꓡꓲꓸ ꓓꓴ ꓥ ꓡꓳ= ꓕꓱ ꓟ ꓗꓪ ꓟꓲꓼ ꓪꓳꓼ ꓗꓪ ꓐꓰ ꓥ ꓟꓲ꓾ ꓗꓴꓷꓼ ꓜꓴ/ ꓕꓲ ꓗꓴꓷꓼ ꓗꓴꓷꓼ ꓗꓪ ꓐꓰ ꓥ ꓟꓲ ꓠꓲꓹ ꓟ ꓢꓯꓼ ꓪ꓾ ꓒꓴ ꓫꓵ ꓢꓯꓼ ꓪ꓾ ꓟꓯꓼ ꓶ ꓤ ꓢꓯꓼ ꓪ ꓔꓳꓹ ꓙ ꓡ ꓓꓴ ꓥꓳ= ꓟꓬꓽ ꓠꓬꓲ ꓠꓬ ꓑ ꓫꓬ ꓟꓯꓼ ꓐꓴ ꓔꓯ ꓑ ꓫꓬ ꓡꓰ ꓬꓰ ꓙ ꓢꓲꓸ ꓑ ꓫꓬ ꓙꓵꓽ ꓪ ꓦꓴ ꓢꓴ꓾ ꓜꓲ ꓜꓲ ꓑꓰꓹ ꓑꓰꓹ ꓬꓰ ꓢꓴ ꓟꓯꓼ ꓐꓴ ꓔꓯ ꓓꓶꓽ ꓧꓪꓸ ꓡꓰ ꓝꓲ ꓓꓴ ꓥ ꓡꓳ= ꓟꓲꓼ ꓪꓳꓼ ꓒꓳꓹ ꓙꓰ ꓟ ꓔꓯ ꓛꓳ ꓢꓲꓸ ꓣꓳ ꓮ ꓡꓲ ꓞꓳ ꓙꓳ ꓠꓯ ꓟ ꓠꓬ ꓚꓲ ꓛꓬ ꓔꓱꓹ ꓚꓲ ꓛꓬ ꓙ ꓖꓶꓽ ꓓꓴ ꓬꓰ ꓡꓯ= ꓟꓯꓼ ꓬꓰ ꓐ ꓡ ꓢꓴ ꓠꓬ ꓟꓯꓼ ꓬꓰ ꓝꓲꓸ ꓥꓳ= ꓙ ꓖꓴ ꓖꓴ ꓡꓰ ꓝꓲ ꓓꓴ ꓬꓰ ꓡꓯ=
ꓟꓲꓼ ꓪꓳꓼ ꓒꓳꓹ ꓙꓰꓳ= ꓔꓱꓹ ꓟ ꓐꓰ ꓙꓲ ꓟ ꓧꓪꓸ ꓡꓰ ꓝꓲ ꓔꓯ ꓑ ꓫꓬ ꓐꓴ ꓥꓳ ꓡꓳ ꓔꓬ ꓡꓳ=
