ꓡꓲ-ꓢꓴ ꓐꓴ ꓠꓬ ꓧꓶꓸ ꓕꓯ ꓮ ꓠꓱ ꓦꓬꓼ ꓠꓬꓲ ꓗꓪ ꓮ ꓡꓲ ꓔꓬ ꓗꓳꓸ ꓡ ꓟ ꓔꓯ ꓚ ꓟꓲ ꓜꓲ ꓜꓲ ꓟꓴ ꓟꓴ ꓟꓽ ꓙꓳ= ꓖꓳ ꓡꓱ ꓥ ꓟꓲ ꓡꓲ-ꓢꓴ ꓞꓳ ꓫꓵꓽ ꓟꓬꓱꓺ ꓔꓯ ꓚ ꓟꓲꓽ ꓕꓳ ꓶ ꓗꓪ ꓬꓲꓸ ꓪꓴꓸ ꓐꓳ ꓔꓸ ꓟ ꓧꓪ ꓟꓳ ꓟ ꓠꓬ꓾ ꓮꓸꓓ 685 ꓘꓳꓼ ꓥ ꓡꓳ= ꓖꓳ ꓕꓲ ꓠꓬꓲ ꓗꓪ ꓐꓰ ꓡꓲ-ꓢꓴ ꓙꓳ ꓡ ꓡꓳ ꓐꓯ ꓟ ꓟꓽ ꓥ= ꓖꓳ ꓕꓯ ꓚ ꓟꓲꓽ ꓐꓳ ꓢꓴ ꓐꓴ ꓡꓰ ꓧꓶꓽ ꓒ ꓟꓵꓽ ꓐꓶꓽ ꓓꓵꓽ ꓕꓲ ꓚꓳ ꓡꓳ ꓗꓪ ꓔꓬ ꓟ ꓞꓳ ꓫꓵꓽ ꓐꓴ ꓟꓬꓱꓺ ꓐꓳ ꓜꓲꓼ ꓕꓯ ꓡꓲ-ꓢꓴ ꓐꓯ ꓟ ꓞꓳ ꓫꓵꓽ ꓟꓬꓱꓺ ꓥ ꓟꓲ ꓕꓱꓹ ꓞꓹ ꓡꓳ ꓐꓯ ꓟ ꓥ ꓡꓳ= ꓧꓶꓸ ꓕꓯ ꓮ ꓠꓱ ꓦꓬꓼ ꓠꓬꓲ ꓗꓪ ꓟ ꓡꓲ-ꓢꓴ ꓐꓴ ꓚ ꓟꓲ ꓜꓲ ꓜꓲ ꓟꓴ ꓟꓴ ꓟꓽ ꓢꓷꓸ ꓥ ꓟꓲ꓾ 20 ꓦ ꓜꓴ ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓐꓶꓽ ꓗꓴꓷꓼ ꓗꓪ ꓐꓰ ꓶꓼ ꓓꓳ ꓫꓱꓸ ꓓꓳ ꓚ ꓢꓴ ꓐꓴ ꓡꓰ ꓡꓲ-ꓢꓴ ꓔꓯ ꓧꓪ ꓟꓳ ꓡꓳ= ꓬꓲ ꓪ ꓡꓰ ꓡꓲ-ꓢꓴ ꓟꓸ ꓟꓲ ꓮ ꓟꓬꓹ ꓧꓪ ꓜꓲꓼ ꓐꓳ ꓔꓸ ꓡꓳ= ꓖꓳ ꓟ ꓗꓪ ꓐꓰ 19 ꓦ ꓜꓴ ꓘꓳꓼ ꓐꓰ 20 ꓦ ꓜꓴ ꓘꓳꓼ꓾ ꓮ ꓟꓶ 21 ꓦ ꓜꓴ ꓘꓳꓼ ꓗꓪ ꓛꓲ ꓡꓲ-ꓢꓴ ꓟꓸ ꓟꓲꓽ ꓧꓪ ꓟꓰꓹ ꓢꓳ ꓟꓶ ꓓ ꓡꓳ=
21 ꓦ ꓜꓴ ꓘꓳꓼ ꓗꓪ ꓛꓲ ꓡ ꓕꓯ꓾ ꓡꓲ-ꓢꓴ ꓟꓸ ꓟꓲꓽ ꓐꓳ ꓢꓴ ꓡꓰ ꓬꓲꓸ ꓟꓶꓽ ꓢꓰꓼ ꓔꓸ ꓟ ꓠꓬ꓾ ꓡꓲ-ꓢꓴ ꓠꓬ ꓙꓵꓽ ꓢꓴ ꓐꓰ ꓐꓰ ꓶꓽ ꓤ ꓔꓬ ꓟꓽ ꓙꓲ ꓡꓰꓳ꓾ ꓐꓯ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓧꓶꓸ ꓕꓯ ꓡꓲ-ꓢꓴ ꓐꓴ ꓟꓽ ꓢꓳ ꓠꓬꓲ ꓟ ꓙꓵꓽ ꓚꓱꓹ ꓟꓴ ꓚꓱꓹ ꓔꓯ ꓢꓳ ꓠꓹ ꓟ꓾ ꓙꓵꓽ ꓢꓴ ꓟꓴ ꓢꓴ ꓬꓰ ꓠꓹ ꓟ ꓐꓰ꓾ ꓙꓵ ꓚꓱꓹ ꓟꓴ ꓚꓱꓹ ꓔꓯ ꓖꓼ ꓛꓳ ꓗꓴꓸ ꓢꓴ ꓬꓰ ꓠꓹ ꓟ ꓦꓬꓼ ꓠꓬꓲ ꓛꓲ ꓡ ꓡꓳ ꓐꓯ ꓗꓷꓳ= ꓮ ꓟꓶ ꓠꓬ ꓙꓵꓽ ꓚꓱꓹ ꓟꓴꓽ ꓚꓱꓹ ꓙꓵꓽ ꓪ ꓬꓲ ꓫꓵ ꓬꓲ ꓙꓰ ꓟꓸ ꓟꓲꓽ ꓡꓯ ꓫꓵ ꓢꓳ ꓙꓰ ꓓꓴ ꓥꓳ= ꓡꓲ-ꓢꓴ ꓐꓴ ꓙ ꓜꓲꓼ ꓢ ꓠꓹ ꓟ ꓓꓴꓸ ꓓꓴꓸ ꓤꓼ ꓐꓰ꓾ ꓬꓲ ꓟꓳ ꓡꓱ ꓢꓳ ꓓꓴ ꓥꓳ= ꓒ ꓐꓲ ꓜꓲꓼ ꓜꓲꓼ ꓢꓳ ꓟ ꓐꓰ꓾ ꓮ ꓒꓳ ꓒꓳ ꓗꓪ ꓐꓰ ꓓꓵꓽ ꓙ ꓖꓪꓽ ꓓꓰꓼ ꓠꓬꓲ ꓟ ꓟꓽ ꓥ ꓢꓰ= ꓟꓽ ꓢꓷꓸ ꓟꓽ ꓓ ꓟ ꓙꓵꓽ ꓚꓱꓹ ꓗꓪꓼ ꓚꓱꓹ ꓬꓲ ꓟꓳ ꓡꓱꓽ ꓥ ꓡꓳ=
ꓙꓵꓽ ꓚꓱꓹ ꓟꓴ ꓚꓱꓹ ꓗꓪ ꓬꓲꓸ ꓟꓳ ꓡꓱꓽ ꓐꓯ ꓠꓬ ꓮ ꓡꓲ ꓕꓲ ꓙꓵꓹ ꓗꓪ ꓥ ꓟꓲ ꓗꓴꓷꓼ꓾ ꓙꓵꓽ ꓢꓴ (ꓢꓲꓽ ꓒ ꓣꓱꓽ ꓢꓴ ꓐꓴ)꓾ ꓛꓳ ꓢꓴ ( ꓑ ꓫꓬ ꓐꓴ) ꓐꓰ꓾ ꓕꓱ ꓠꓬꓲꓽ ꓧꓳꓽ ꓠꓬꓲꓽ ꓗꓳꓸ ꓚꓸ ꓗꓪ ꓠꓬꓲꓽ ꓛꓱꓽ ꓡꓱꓸꓼ ꓖꓼ ꓛꓳ ꓓꓴ ꓛꓳ ꓚꓱꓹ ꓘꓶ ꓫꓵꓽ (ꓙꓵꓽ ꓗ) ꓙꓳ ꓚꓰꓼ ꓡꓳ= ꓗꓴꓷꓼ ꓙꓵꓽ ꓚꓱꓹ ꓟꓴ ꓚꓱꓹ ꓮ ꓡꓲ ꓕꓲ ꓟ ꓥ ꓟꓲ ꓡ ꓞꓳ ꓡꓰ ꓙꓲˍ ꓡꓳ ꓐꓯ ꓢꓲ ꓓꓵꓽ ꓙ ꓓꓳ ꓡ ꓟ ꓥ ꓠꓬꓲ꓾ ꓐꓲ ꓜꓲꓼ ꓟ ꓠꓬ ꓟꓽ ꓙꓳ= ꓕꓲ ꓟ ꓕꓯ ꓢꓲ ꓕꓲ ꓟ ꓠꓬ ꓟꓬ ꓠꓬꓲ ꓠꓵ ꓓ ꓟ ꓙꓳ ꓡꓳ= ꓝꓮꓲ ꓗꓴꓷꓼ ꓙꓵꓽ ꓚꓱꓹ ꓟꓴ ꓚꓱꓹ ꓠꓬ ꓕꓲ ꓤꓶ ꓡꓲꓸ ꓕꓲ ꓤꓶ ꓗꓪ ꓮ ꓕꓯ ꓟꓲ ꓡꓶꓸ ꓑ ꓔꓬ ꓟ꓾ ꓫꓬꓹ ꓑꓱ ꓔꓬ ꓟ ꓐꓰ꓾ ꓢꓯꓸ ꓔꓬ ꓟ ꓥ ꓡꓳ= ꓧꓶꓸ ꓕꓯ ꓮ ꓡꓲ ꓥ ꓠꓬ ꓮ ꓟꓶ ꓥ ꓟꓲ ꓬꓲꓸ ꓖꓳ ꓡꓱ ꓥꓳ ꓐꓰ ꓢꓪꓼ ꓟꓽ ꓙꓲ= ꓡ ꓞꓳ ꓪꓴꓸ ꓠꓷꓸ ꓮ ꓡꓲ ꓕꓯꓹ ꓡ ꓠꓬ ꓖꓳ ꓡꓱ ꓫꓬꓹ ꓑꓱ ꓢꓲꓸ ꓟꓬꓽ ꓠꓬꓲ ꓙꓲ ꓡꓳ ꓐꓯ ꓟ ꓚꓱꓹ ꓔꓯ ꓚꓰꓼ ꓓꓳ ꓡ ꓔꓬ ꓟ ꓥ ꓡꓳ= ꓟꓬ-ꓟ ꓗꓴꓷꓼ ꓗꓪ ꓐꓯ ꓠꓬ ꓮ ꓟꓶ ꓠꓬ Federal Democracy ꓙꓵꓽ ꓚꓱꓹ ꓔꓯ ꓑ ꓫꓬꓼ ꓐꓴ ꓠꓲꓹ ꓫꓵ ꓔꓬ ꓢꓲ꓾ ꓟꓯꓼ ꓜꓲꓽ ꓓꓽ ꓟ ꓐꓴ ꓠꓬ ꓟꓯꓼ ꓙꓵꓽ ꓚꓱꓹ ꓗꓪ ꓐꓰ ꓗꓴꓷꓼ ꓔꓯ ꓙꓵꓽ ꓠꓲꓹ ꓫꓵ ꓔꓬ ꓟ ꓕꓲ ꓙꓵꓹ ꓥ ꓡꓳ= ꓮ ꓟꓶ ꓕꓱ ꓕꓲ ꓧꓪꓹ ꓠꓬ ꓡꓲ-ꓢꓴ ꓐꓴ ꓢꓷꓸ ꓟ ꓞꓳ ꓙꓳ ꓚꓱꓹ ꓕꓲ ꓟ ꓢꓳ ꓠꓬꓲ ꓓꓴ ꓥꓳ=
Anarchism ꓙꓵꓽ ꓢꓴ ꓟꓽ ꓙꓳ ꓟ ꓞꓳ ꓙꓳ ꓚꓱꓹ
ꓮ ꓟ ꓥ ꓟꓲ ꓙꓵꓽ ꓢꓴ ꓟꓽ ꓥ= ꓮ ꓟ ꓥ ꓟꓲ ꓑ ꓫꓬ ꓟꓽ ꓥ= ꓮ ꓙꓵꓽ ꓠꓬ ꓩꓴ ꓗꓷ ꓟ ꓙꓵꓽ ꓪ ꓙꓳ ꓢꓴ꓾ ꓟꓲ ꓓ ꓟꓲ ꓢꓯꓸ ꓔꓬ ꓢꓴ ꓡꓰ ꓥ ꓡꓳ= ꓕꓲ ꓜꓴ꓾ ꓕꓲ ꓒꓳ ꓡꓰ ꓙꓵꓽ ꓡ ꓟ ꓔꓯ ꓟꓽ ꓠꓲꓹ ꓫꓵ ꓟ ꓓꓵꓽ ꓙ ꓚꓱꓹ ꓥ ꓡꓳ= ꓙꓵꓽ ꓗ ꓐꓰ ꓙꓵꓽ ꓢꓴ ꓠꓬ ꓶ ꓡꓲꓽ ꓓꓽ ꓟ ꓥ ꓡꓳ ꓐꓰ ꓢꓪꓼ ꓡꓳ= ꓓꓵꓽ ꓙ ꓚꓱꓹ ꓕꓱ ꓟ ꓪꓴꓸ ꓔꓴ ꓢꓴ ꓠꓬ꓾ 1793 ꓘꓳꓼ ꓕꓯ ꓖꓳ-ꓓꓪꓰ ꓡꓰ ꓪꓴꓸ ꓔꓴ ꓡꓳ= ꓗꓸ ꓠꓯꓸ ꓓꓵꓽ ꓙ ꓚꓱꓹ ꓕꓱ ꓟ ꓔꓯ ꓮ ꓟꓬꓹ ꓒꓳꓹ ꓗꓪ ꓐꓰ ꓧꓪ ꓟꓰꓹ ꓢꓲ꓾ ꓙꓵꓽ ꓢꓴ ꓟꓴ ꓢꓴ ꓔꓯ ꓔꓳꓹ ꓟ ꓕꓲ ꓒꓳꓹ ꓗꓪ ꓥ ꓟꓲ꓾ ꓝꓮꓲ ꓚꓲ ꓛꓬ ꓔꓱꓹ ꓚꓲ ꓔꓬ ꓮ ꓡꓲ ꓓ ꓖꓳ ꓡꓱ ꓞꓳ ꓙꓳ ꓟ ꓕꓲ ꓒꓳꓹ ꓗꓪ ꓥ ꓟꓲ꓾ ꓙꓵꓽ ꓗ ꓐꓰ ꓙꓵꓽ ꓢꓴ ꓟꓽ ꓙꓳ ꓟ ꓞꓳ ꓙꓳ ꓚꓱꓹ ꓗꓪ ꓛꓲ ꓓꓵꓽ ꓙ ꓓꓳ ꓡ ꓡꓳ=
ꓖꓳ ꓡꓱꓳ ꓫꓵꓽ ꓞꓳ ꓜꓴ ꓐꓱ ꓶ ꓙꓵꓽ ꓚꓱꓹ ꓟꓴ ꓚꓱꓹ ꓠꓬ ꓕꓲ ꓦꓲ ꓘꓴ ꓡ ꓞꓳ ꓙꓵꓽ ꓚꓱꓹ ꓟꓴ ꓚꓱꓹ ꓫꓱꓸ ꓫꓱꓸꓼ ꓗ ꓡꓳ= ꓡ ꓞꓳ ꓐꓴ ꓐꓱ ꓶ ꓠꓬ꓾ ꓙꓵꓽ ꓗ ꓔꓶ ꓟꓽ ꓛꓲ꓾ ꓙꓵꓽ ꓗ ꓣꓱꓽ ꓢꓴ ꓙꓳ ꓟꓽ ꓛꓲ ꓐꓰ ꓓꓵꓽ ꓙ ꓡꓳ= ꓓꓵꓽ ꓙ ꓚꓱꓹ ꓕꓱ ꓟ ꓡꓳ ꓚ ꓐꓯ ꓠꓬ꓾ ꓡ ꓞꓳ ꓐꓴ ꓔꓯ ꓟꓽ ꓓ ꓟꓽ ꓢ ꓥꓰꓸ ꓤꓲ ꓢꓴ꓾ ꓟꓽ ꓓ ꓟꓽ ꓢ ꓙꓵꓽ ꓗ ꓛꓳ ꓝꓲ ꓟ ꓟꓽ ꓙꓳ= ꓙꓲ ꓡꓳ ꓓꓵꓽ ꓙ ꓟ ꓗꓪ ꓔꓺ ꓡꓯ ꓘꓳ ꓟˍ ꓡꓰ ꓙꓳ ꓡꓳ= ꓮ ꓟ ꓔꓯ ꓟꓲ ꓟꓽ ꓓ ꓟꓽ ꓢ ꓞꓳ ꓒꓵꓽ ꓝꓲ ꓟ ꓟꓽ ꓙꓳ= ꓞꓳ ꓤ ꓙ ꓡꓯ ꓘꓳ ꓟ ꓞꓳ ꓚꓱꓹ ꓪ ꓚꓱꓹ ꓡꓳ ꓚ ꓡꓰ ꓞꓳ ꓙꓳ ꓔꓬ ꓟ ꓥ ꓡꓳ=
ꓙꓵꓽ ꓚꓱꓹ ꓟꓴ ꓚꓱꓹ ꓐꓰ꓾ ꓙꓵꓽ ꓢꓴ ꓟꓴ ꓢꓴ ꓔꓯ ꓟꓽ ꓠꓲꓹ ꓫꓵ ꓟ ꓑꓶꓸ ꓓꓴ ꓖꓳ ꓡꓱꓳ ꓫꓵꓽ ꓔꓯ ꓒꓳꓹ ꓔꓳꓹ ꓟ ꓗꓪ ꓥ ꓟꓲ ꓓꓵꓽ ꓙ ꓚꓱꓹ ꓕꓱ ꓟ ꓔꓯ ꓣꓱꓽ ꓢꓴ ꓙꓳ ꓡꓳ= Chaos ꓛꓽ ꓐꓲ ꓛꓽ ꓗꓪ ꓮ ꓙꓵꓽ ꓐꓬ ꓡꓰ ꓠ ꓬꓰ ꓩꓴ ꓠꓹ ꓟ ꓢꓯꓼ ꓖꓶ ꓡꓳ= ꓖꓳ ꓡꓱ ꓥ ꓟꓲ Anarchism ꓬꓲꓸ ꓟꓳ ꓡꓱꓽ ꓠꓬ ꓙꓵꓽ ꓢꓴ ꓐꓰ꓾ ꓙꓵꓽ ꓚꓱꓹ ꓟꓽ ꓙꓳ ꓙꓳ ꓡ ꓞꓳ ꓠꓬ ꓚꓲ ꓛꓬ ꓔꓱꓹ ꓚꓲ ꓛꓬ ꓬꓲꓸ ꓜꓲꓽ ꓬꓲ ꓟꓴ ꓢꓯꓸ ꓔꓬ ꓙꓲ ꓡꓳ ꓐꓰ ꓓꓵꓽ ꓙ ꓟ ꓥ ꓡꓳ= ꓐꓬ ꓡꓰ ꓓꓴ ꓚꓱꓹ ꓔꓯ ꓧꓪ ꓟꓽ ꓥ= ꓙꓵꓽ ꓚꓱꓹ ꓐꓰ꓾ ꓙꓵꓽ ꓢꓴ ꓠꓬ ꓑ ꓫꓬ ꓐꓴ ꓐꓱ ꓶ ꓶ ꓡꓲꓽ ꓓꓽ ꓟ ꓥ ꓡꓳ꓾ ꓐꓰ ꓘꓳ ꓣꓴ ꓓꓵꓽ ꓙ ꓟ ꓥ ꓡꓳ=
ꓕꓱ ꓡꓱꓳ ꓫꓵꓽ ꓙꓵꓽ ꓚꓱꓹ ꓟꓴ ꓚꓱꓹ ꓠꓬ ꓮ ꓡꓲ ꓗꓪ ꓡꓳꓸ ꓟꓳ ꓓ ꓡ? ꓠꓱꓸ ꓐꓯꓼ ꓢꓴ ꓐꓰ ꓟꓽ ꓗꓪ ꓫꓵ ꓫꓵꓽ ꓬꓲꓸ ꓓ ꓬꓲ ꓔꓬ ꓟ ꓞꓳ ꓫꓵꓽ ꓐꓴ ꓗꓳ ꓡꓳ ꓗꓪ ꓡꓳꓸ ꓟꓳ ꓓ ꓡꓳ= ꓝꓮꓲ ꓗꓴꓷꓼ ꓐꓬ ꓡꓰ ꓢꓲ꓾ ꓙꓵꓽ ꓗ ꓔꓶ ꓢꓲ ꓕꓶ ꓕꓶ ꓙꓵꓽ ꓢꓴ ꓟꓽ ꓓꓳ ꓡ ꓟ ꓕꓲ ꓝꓲꓸ ꓗꓪ ꓡꓳꓸ ꓟꓳ ꓓ ꓡꓳ= ꓝꓮꓲ ꓟꓯꓼ ꓘꓰꓹ ꓟꓯꓼ ꓑꓬ ꓢꓴ ꓐꓴ ꓠꓯꓸꓼ ꓗꓪ ꓡꓳꓸ ꓟꓳ ꓓ ꓡꓳ= ꓮ ꓙꓵꓽ ꓢꓴ ꓠꓬ ꓕꓲ ꓟꓳꓹ ꓤꓼ ꓡꓰ ꓥ ꓢꓲ꓾ ꓙꓵꓽ ꓢꓴ ꓟꓽ ꓥ꓾ ꓛꓳ ꓢꓴ ꓟꓽ ꓥ= ꓔꓬ ꓢ ꓙꓳ ꓢ ꓚꓱꓹ ꓗꓪ ꓔꓺ ꓡꓯ ꓘꓳ ꓢꓲꓸ ꓔꓬ ꓟ ꓦꓬꓼ ꓠꓬꓲ ꓗꓪ ꓡꓳꓸ ꓟꓳ ꓓ ꓡꓳ= ꓠꓴ ꓜꓲꓽ ꓠꓴ ꓟꓴ꓾ ꓥꓪ ꓜꓲꓽ ꓥꓪ ꓟꓴ ꓦꓬꓼ ꓠꓬꓲ ꓗꓳꓸ ꓟ ꓥ ꓡꓳ=
ꓮ-ꓠ-ꓘꓰ-ꓢꓲ ꓐꓰ ꓡꓲ-ꓢꓴ
(ꓡꓲ-ꓢꓴ ꓐꓴ ꓠꓬ ꓕꓱ ꓡꓱꓳ ꓫꓵꓽ ꓦꓬꓼ ꓠꓬꓲ ꓗꓳꓸ ꓠꓬꓲ ꓔꓬ ꓡꓳ ꓐꓰ꓾ ꓓꓵ ꓙ ꓛꓲ ꓡ ꓡꓳ= ꓗꓴꓷꓼ ꓙꓵꓽ ꓚꓱꓹ ꓐꓰ꓾ ꓗꓴꓷꓼ ꓙꓵꓽ ꓢꓴ ꓐꓴ ꓐꓰ ꓶꓽ ꓤ ꓗꓪ ꓔꓬ ꓢꓲ꓾ ꓟꓯꓼ ꓛꓰꓹ ꓔꓬ ꓟ ꓡꓰ ꓐꓰ ꓗꓹ ꓟ ꓦꓬꓼ ꓠꓬꓲ ꓗꓳꓸ ꓔꓬ ꓟꓶꓳ= ꓡꓲ-ꓢꓴ ꓐꓴ ꓔꓬ ꓟ ꓟꓵꓽ ꓗꓪ ꓚꓲ ꓛꓬ ꓢꓯꓼ ꓟꓬ ꓐꓰ ꓖꓴ ꓙꓴꓽ ꓔꓯ ꓚꓲꓸ ꓛꓬ ꓫ ꓑꓬ ꓠ ꓗꓹ ꓟ ꓥꓳ= ꓟꓯꓼ ꓛꓰꓹ ꓟꓯꓼ ꓑꓬ ꓟ ꓡꓰ ꓐꓰ ꓞꓳ ꓙꓳ ꓔꓬ ꓢꓲ꓾ ꓙꓵꓽ ꓢꓴ ꓜꓲ ꓜꓲ ꓟꓴ ꓟꓴ ꓟꓽ ꓙꓳ꓾ ꓙꓵꓽ ꓚꓱꓹ ꓜꓲ ꓜꓲ ꓟꓴ ꓟꓴ ꓟꓽ ꓙꓳ= ꓡꓲ-ꓢꓴ ꓐꓴ ꓠꓯꓸꓼ ꓗꓪ ꓧꓳꓽ ꓢꓴ ꓟꓴ ꓢꓴ ꓜꓲ ꓜꓲ ꓟꓴ ꓟꓴ ꓟꓽ ꓓꓳ ꓡ= ꓮ ꓟ ꓮ ꓡꓲ ꓓ ꓠꓬ ꓖꓳ ꓡꓱ ꓢꓯꓸ ꓔꓬ ꓗꓳꓸ ꓡ ꓟ ꓦꓬꓼ ꓠꓬꓲ ꓥ ꓡꓳ= ꓗꓹ ꓛꓲ ꓛꓲ ꓬꓲꓸ ꓜꓴ ꓬꓲ ꓜꓴ ꓔꓬ ꓟ꓾ ꓧꓳꓽ ꓢꓴ ꓟꓽ ꓙꓳ ꓙꓳ ꓟꓲ ꓓ ꓟꓲ ꓔꓬ ꓟ ꓥ ꓡꓳ= ꓡꓲ-ꓢꓴ ꓐꓴ ꓕꓱ ꓡꓱ ꓢꓯꓸ ꓔꓬ ꓗꓳꓸ ꓡ ꓟ ꓠꓬ 20 ꓦ ꓜꓴ ꓘꓳꓼ ꓗꓪ ꓛꓲ ꓥ ꓡꓳ=
ꓟꓬ-ꓟ ꓗꓴꓷꓼ ꓗꓪ ꓟ ꓡꓲ-ꓢꓴ ꓐꓴ ꓠꓬ ꓮ ꓟꓶ ꓗꓪ ꓛꓲ ꓧꓳꓽ ꓪꓴꓸ ꓟꓴ ꓢꓴ ꓜꓲ ꓜꓲ ꓟꓴ ꓟꓴ ꓙꓳ ꓟ ꓟꓽ ꓥ= ꓙꓵꓽ ꓚꓱꓹ ꓟꓴ ꓚꓱꓹ ꓮ ꓫꓵꓽ ꓔꓯ ꓟꓲ ꓟꓽ ꓓꓵ ꓙ ꓙ ꓔꓬ ꓡꓳ= ꓬꓲ ꓜꓴ ꓬꓲ ꓒꓳ ꓗꓪ ꓔꓺ ꓠꓲꓹ ꓟꓽ ꓡꓱ= ꓙꓵꓽ ꓗ ꓬꓲ ꓡꓲꓽ ꓮ ꓘꓶꓸ ꓛꓳ ꓠꓲꓹ ꓟꓽ ꓫꓵ= ꓔꓶ ꓙꓱꓼ ꓗꓶ ꓔꓸ ꓢꓲ ꓖꓼ ꓛꓳ ꓠꓲꓹ ꓟꓽ ꓫꓵ= ꓠꓲꓹ ꓟ ꓥ ꓟꓲ ꓫꓵꓺ ꓟꓽ ꓐ ꓡ= ꓗꓪꓼ ꓢꓴ ꓙꓵꓽ ꓢꓴ ꓔꓯ ꓟꓽ ꓠꓲꓹ ꓫꓵ= ꓮ ꓟ ꓡꓰ ꓗꓪꓼ ꓡ ꓟ ꓔꓯ ꓟꓲ ꓟꓽ ꓠꓵ= ꓪꓽ ꓡꓯ ꓘꓳ ꓙꓲ ꓟ ꓗꓪ ꓪꓽ ꓡꓯ ꓘꓳ ꓢꓲ ꓔꓬ ꓡꓳ= ꓕꓲ ꓣꓳ ꓡꓲ ꓕꓲ ꓣꓳ ꓠꓬ ꓬꓲꓸ ꓓ ꓬꓲꓸ ꓬꓲꓸ ꓜꓲꓽ ꓬꓲ ꓟꓴ ꓔꓬ ꓠꓲꓹ ꓫꓵ ꓢꓴ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓡꓲ-ꓢꓴ ꓐꓴ ꓞꓳ ꓙꓳ ꓓꓵꓽ ꓙ ꓚꓱꓹ ꓠꓬ ꓮ-ꓠ-ꓘꓰ-ꓢꓲ (Anarchism) ꓔꓯ ꓫꓱꓸ ꓡꓳ ꓐꓰ ꓢꓪꓼ ꓓ ꓡꓳ=
ꓜꓲꓽ ꓜꓲꓽ ꓬꓰ ꓡ ꓟ ꓮ ꓫꓵꓽ ꓔꓯ ꓟꓲ ꓟꓽ ꓠꓲꓹ ꓒꓴ ꓗꓴꓸ= ꓪꓽ ꓓ ꓠꓬ ꓪꓽ ꓥꓳ= ꓙꓵꓽ ꓢꓴ ꓡꓰ ꓟꓽ ꓓ ꓟꓽ ꓢ ꓬꓰ ꓖꓶ ꓡ ꓠꓬ꓾ ꓔꓬ ꓟꓵꓽ ꓮ ꓙꓵꓽ ꓡꓳ ꓗꓷ ꓢꓲꓸ ꓬꓲ ꓓ ꓬꓲꓸ ꓔꓬ ꓪ ꓟ ꓟꓵꓽ ꓔꓯ ꓧꓪ ꓙꓰ ꓗꓴꓸ ꓟ ꓡ ꓞꓳ ꓥ ꓡꓳ= Anarchism ꓓꓵꓽ ꓙ ꓚꓱꓹ ꓠꓬ ꓟꓽ ꓙꓲ ꓐꓰ ꓟꓽ ꓐꓯ= ꓖꓳ ꓡꓱ ꓥ ꓟꓲ ꓮ ꓟꓶ ꓠꓬ ꓗꓴꓷꓼ ꓙꓵꓽ ꓚꓱꓹ ꓐꓰ꓾ ꓗꓴꓷꓼ ꓙꓵꓽ ꓢꓴ ꓟꓽ ꓙꓳ ꓟ ꓟꓵꓽ ꓧꓪ ꓟꓶ ꓟꓽ ꓓꓻꓳ= ꓡꓯꓼ ꓕꓲ ꓬꓰ ꓙꓲ ꓟ ꓓꓵꓽ ꓙ ꓚꓱꓹ ꓕꓲ ꓟ ꓟꓽ ꓥꓻꓳ= ꓡꓯꓼ ꓕꓲ ꓟꓬꓱꓽ ꓬꓰ ꓙꓲ ꓟ ꓗꓴꓷꓼ ꓙꓵꓽ ꓚꓱꓹ ꓐꓰ꓾ ꓙꓵꓽ ꓢꓴ ꓬꓰ ꓟꓬꓱꓽ ꓔꓯ ꓢꓳ ꓢꓲꓸ ꓡꓲ-ꓢꓴ ꓐꓴ ꓥ ꓟꓲ꓾ ꓔꓬ ꓖꓴ ꓕꓲ ꓟ ꓗꓪ ꓕꓶ ꓕꓶ ꓦꓰꓼ ꓐ ꓡ ꓠꓹ ꓟ ꓢꓯꓼ ꓕꓵꓼ ꓙꓵꓹ ꓛꓲꓳ= ꓢꓷꓸ ꓠꓲꓹ ꓐꓰ꓾ ꓑꓶꓸ ꓠꓲꓹ ꓣꓱꓽ ꓢꓲ꓾ ꓠꓲꓹ ꓟ ꓫꓵ ꓢꓲ ꓦꓰꓼ ꓕꓶ ꓡꓰ ꓓꓴ ꓚꓱꓹ ꓔꓯ ꓧꓪ ꓙꓵꓹ ꓛꓲꓳ ꓐꓰ ꓢꓪꓼ ꓟꓶ ꓡꓳ=)
(ꓝꓸ ꓢꓲꓸ ꓐꓳ ꓓꓴ ꓥꓳ)
