ꓚꓲ ꓛꓬ ꓤ ꓟꓶꓼ ꓔꓯ ꓕꓲ ꓣꓳ ꓣꓳ ꓡꓰꓽ ꓟꓽ ꓓ ꓟꓽ ꓢ꓾ ꓟꓽ ꓫꓬ ꓟꓽ ꓖꓼ ꓬꓰ ꓡ ꓟ (child sexual abuse) ꓙꓳ ꓡꓰ ꓟ ꓢꓷꓸ ꓡꓰ ꓟꓶꓼ ꓕꓱꓼ꓾
(1) ꓮ ꓟꓽˍ ꓟꓲ ꓕꓱ ꓡꓱ ꓗ ꓠꓲꓹ ꓟꓽ ꓫꓵ꓿ ꓗ ꓡ ꓠꓬ꓾ ꓠꓲꓹ ꓟ ꓜꓲꓽ ꓢꓲꓸ ꓬꓰ ꓙꓲꓽ ꓙꓳˍ ꓟ ꓟꓬꓱꓽ ꓠꓲꓹ ꓞ ꓬꓰ ꓪ ꓝꓲ꓿ ꓠꓲꓹ ꓢꓲꓼ ꓠꓲꓹ ꓞꓰꓹ ꓢꓲꓸ ꓬꓲꓸ ꓙꓵꓹ ꓪꓽ ꓐꓶꓽ ꓡꓰ ꓝꓲ ꓟꓽ ꓓ꓿ ꓠꓲꓹ ꓟ ꓜꓲꓽ ꓢꓲ꓾ ꓣꓳ ꓤ ꓟꓶꓼ ꓠꓯ ꓞꓲꓼ ꓫꓬꓹ ꓪ ꓚꓱꓹ꓾ ꓟꓲꓸ ꓕꓯꓽ ꓡ ꓠꓹ ꓟ ꓦꓬꓼ ꓠꓬꓲ ꓗꓪ ꓗꓹ ꓢ ꓗꓹ ꓛꓲꓽ ꓔꓬ ꓐ ꓡ ꓠꓹ ꓟ ꓔꓯ ꓓꓵꓽ ꓙ ꓟꓬꓱꓽ ꓬꓰ꓿ ꓮ ꓘꓶꓸ ꓢꓷꓸ ꓡꓰ꓾ ꓢꓴ ꓡꓰ ꓢꓲꓸ ꓮ ꓘꓶꓸ ꓬꓰ ꓙ ꓐ ꓡ ꓟ ꓟꓽ ꓥ꓿
(2) ꓤ ꓠꓱ ꓐꓰ ꓠꓴ ꓚꓲꓸ ꓛꓬ ꓔꓯ ꓝꓴꓲꓸ ꓕꓽ ꓓꓰ꓿ ꓠꓴ ꓪ ꓝꓴꓲꓸ ꓟꓽ ꓙꓳ꓿ ꓕꓱ ꓡꓱ ꓬꓰ ꓡ ꓢꓴ ꓢꓲꓸ ꓝꓴꓲꓸ ꓙꓳˍ ꓡꓳ꓿ ꓝꓴꓲꓸ ꓟꓽ ꓙꓳ ꓢꓴ ꓔꓯ ꓗꓸ ꓧꓪ ꓠꓲꓹ ꓢꓲꓼ ꓢꓲꓸ ꓝꓴꓲꓸ ꓙꓳ ꓢꓴ ꓡꓲꓹ ꓙꓰ ꓝꓲ ꓟꓽ ꓓ꓿ ꓮ ꓘꓶꓸ ꓤ ꓟꓳ ꓢꓲꓸ ꓝꓴꓲꓸ ꓙꓳ ꓢꓴ ꓝꓴꓲꓸ ꓟꓶ ꓡꓰ ꓠꓹ ꓟ ꓬꓲꓸ ꓚꓱꓹ ꓙꓽ ꓖꓶ꓿
(3) ꓤ ꓠꓱ ꓔꓯ ꓠꓯ ꓞꓲꓼ ꓦꓲ ꓗꓪ ꓠꓲꓹ ꓞ ꓧꓳꓽ ꓙꓰ ꓢꓲꓸ ꓢꓷꓸ ꓢꓴ ꓠꓯ ꓞꓲꓼ ꓟꓸ ꓒ/ꓟꓸ ꓟ ꓓꓽ ꓟ ꓔꓯ ꓡꓯꓼ ꓙꓱ꓿ ꓗꓸ ꓚꓵ ꓕꓳ ꓶ ꓐꓳ ꓔꓸ ꓝꓲ꓿ ꓤ ꓠꓱ ꓔꓯ ꓠꓲꓹ ꓟ ꓢꓯꓼ ꓖꓶꓽ ꓠꓹ ꓟ ꓐꓰ ꓠꓺ ꓓꓴ ꓫꓬꓹ ꓠꓹ ꓟ ꓬꓳꓹ ꓚꓲˍ ꓡꓳ꓿
(4) ꓤ ꓠꓱ ꓦ ꓡꓱ ꓐꓳˍ ꓟ ꓟꓹ ꓟ ꓡꓰ ꓤ ꓠꓱ ꓔꓯ ꓮ ꓡꓲ ꓗꓷ ꓡꓰˍ ꓟ ꓢꓲ ꓡꓲꓹ ꓟ ꓗꓳꓹ ꓗꓪ꓾ ꓠꓴꓽ ꓠꓴꓹ ꓤꓼ ꓫꓸ ꓕꓱ ꓢꓲꓸ ꓠ ꓠꓬꓲ꓿ (ꓬꓲ ꓔꓯ ꓮ ꓕꓯꓽ ꓕꓯꓽ ꓠꓺ ꓠꓬꓲ ꓠꓬ ꓟꓽ ꓙꓲˍ ꓟ ꓑꓶꓸ ꓓꓴ ꓢꓯꓼ ꓡꓴꓽ ꓓꓴ ꓙ ꓖꓶꓽ ꓢꓲꓸ recording ꓡꓴꓽ ꓗꓶ ꓔꓸ꓿ ꓮ ꓟꓶ ꓠꓬ ꓩꓴꓸ ꓗꓪ ꓐꓰ ꓢ ꓢꓹ ꓬꓰ ꓙꓲ ꓡꓳ) ꓤ ꓠꓱ ꓔꓯ ꓢꓯꓼ ꓖꓶꓽ ꓢꓲꓸ ꓮ ꓟ ꓡꓰ ꓮ ꓡꓲ ꓬꓰ ꓡ ꓟ ꓔꓱꓹ ꓔꓱꓹ ꓚ ꓟꓸ ꓡ ꓝꓲ꓿
(5) ꓟꓽ ꓙꓲˍ ꓟ ꓬꓰ ꓢꓴ ꓔꓯ ꓝꓴꓲꓸ ꓖꓶꓽ ꓐ ꓡ ꓟ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓬꓲꓸ ꓝ ꓙꓳ ꓙꓳ ꓗꓳꓹ ꓩꓴ꓿
ꓕꓱ ꓡꓱꓳ ꓫꓵꓽ ꓫꓵꓽ ꓪꓴ ꓗ ꓡ ꓟꓴ ꓟꓽ ꓢꓱ ꓥ ꓟꓲ꓾ ꓚꓲ ꓛꓬ ꓤ ꓠꓱ ꓔꓯ ꓕꓱ ꓡꓱ ꓗ ꓡ ꓠꓬ꓾ ꓠꓻ ꓫꓬꓹ ꓓꓴ꓾ ꓗꓸ ꓚꓲ ꓕꓶ ꓕꓶ ꓠꓯ ꓞꓲꓼ ꓟꓸ ꓒꓽ ꓡꓰ ꓐꓳ ꓖꓶꓽ ꓡ ꓓꓴ꓾ ꓚꓲꓸ ꓛꓬ ꓤ ꓠꓱ ꓢ ꓖꓶ ꓟ ꓦꓬꓼ ꓠꓬꓲ ꓗꓪ ꓠꓲꓹ ꓟ ꓢ ꓢ ꓔꓬ ꓪ ꓓꓴ꓾ ꓝꓴꓲꓸ ꓬꓰ ꓢꓴ ꓔꓯ ꓝꓴꓲꓸ ꓖꓶꓽ ꓓꓴ ꓕꓱ ꓡꓱ ꓟꓳꓸ ꓙ ꓢꓲꓸ ꓟꓬꓱꓽ ꓬꓰ꓿ ꓠꓯ ꓞꓲꓼ ꓦꓲ ꓗꓪ ꓟꓽ ꓙꓰˍ ꓟ꓾ ꓚꓲꓸ ꓛꓬ ꓐꓰ ꓤ ꓠꓱ ꓔꓯ ꓝꓴꓲꓸ ꓓꓰꓺ ꓔꓬ ꓟ ꓬꓰ ꓟꓽ ꓓ꓿
ꓢꓷꓸ ꓔꓸ ꓓꓴ꓿
ꓤ ꓠꓱ ꓔꓯ ꓕꓱ ꓡꓱ ꓜꓲꓽ ꓜꓲꓽ ꓑꓰꓹ ꓑꓰꓹ ꓟꓽ ꓫꓬ ꓟꓽ ꓖꓼ ꓬꓰ ꓢꓴ (Child Molester) ꓐꓴ ꓠꓬ꓾ ꓢꓴ ꓐꓶꓽ ꓒꓽ ꓕꓯꓽ ꓢꓲ꓾ ꓤ ꓠꓱ ꓔꓯ ꓪꓽ ꓔꓬ ꓢꓴ꓾ ꓤ ꓠꓱ ꓒ ꓕꓲ ꓗꓪ ꓔꓬ ꓢꓴ꓾ ꓫꓵꓽ ꓤ ꓪꓳꓼ ꓤ ꓐꓰ꓾ ꓘꓹ ꓗꓪ ꓟ ꓟꓬꓱꓺ ꓓꓳꓽ ꓙꓳ ꓢꓴ ꓒꓬꓱꓼ ꓔꓬ ꓗꓴˍ ꓡꓳ꓿
ꓖꓳ ꓟ ꓑꓶꓸ ꓓꓴ ꓚꓲꓸ ꓛꓬ ꓤ ꓠꓱ ꓔꓯ ꓮ ꓟˍ ꓐꓰ ꓗꓽ ꓠꓬꓹ ꓔꓬ ꓝꓲ ꓓꓴ ꓙꓲ ꓙꓲ ꓓꓵꓽ ꓙ꓿ ꓠꓴ ꓟꓽ ꓟꓳˍ ꓗꓪ ꓮ ꓟꓬ ꓛꓲ ꓦ ꓡꓱ ꓐꓳˍ ꓟ ꓡ ꓞꓳ ꓔꓯˍ ꓟꓲ ꓦ ꓡꓱ ꓐꓳ ꓟꓽ ꓓ꓿ ꓚꓲꓸ ꓛꓬ ꓤ ꓠꓱ ꓐꓰ ꓠꓱꓸ ꓐꓯꓼ ꓕꓲ ꓣꓳ ꓠꓬꓲꓽ ꓣꓳ ꓔꓵꓸꓼ ꓔꓬ ꓝꓲ ꓟꓽ ꓓ꓿ ꓤ ꓟꓳˍ ꓟ ꓠꓬ ꓫꓬꓹ ꓑꓱ ꓟ ꓕꓯꓽ ꓢꓲ ꓙꓲˍ ꓡꓳ꓿
ꓚꓲꓸ ꓛꓬ ꓤ ꓠꓱ ꓔꓯ ꓫꓸ ꓔꓳ ꓓꓴ ꓙꓳˍ ꓟ ꓖꓳ ꓓꓱꓽ ꓡꓯꓼ ꓗꓸ ꓐꓴ꓾ ꓬꓲꓸ ꓔꓶꓸ ꓬꓲꓸ ꓟꓲ (private parts) ꓐꓴ ꓔꓯ ꓢꓴ ꓡꓰꓽ ꓟꓽ ꓠꓶꓽ ꓡ ꓠꓹ ꓟ ꓗꓽ ꓗꓴꓸ ꓠꓹ ꓟ ꓟꓸ ꓖꓶꓽ ꓔꓸ꓿ ꓟꓽ ꓠꓵˍ ꓠꓬ “ꓟꓽ ꓠꓵ꓾ ꓕꓽ ꓜꓱꓽ꓾ ꓕꓽ ꓠꓶꓽ ꓡꓯ” ꓐꓰ ꓐꓯ ꓐ ꓡ ꓠꓹ ꓟ ꓟꓸ ꓖꓶ ꓔꓸ= “say NO”
ꓕꓱ ꓡꓱꓳ ꓫꓵꓽ ꓔꓯ ꓟꓳꓸ ꓤ ꓠꓱ ꓬꓲꓸ ꓦ ꓡꓱ ꓐꓳ ꓢꓴ (ꓟꓬꓽ ꓠꓬꓲ ꓠꓬ ꓟꓹ ꓟ) ꓔꓯ ꓐꓯ ꓟꓸ ꓖꓶ ꓡ ꓠꓹ ꓟ ꓟꓸ ꓖꓶ ꓔꓸ꓿ ꓮ ꓡꓲ ꓟ ꓔꓯ ꓟꓽ ꓐꓯ ꓟꓸ ꓡꓲꓸ ꓟꓹ ꓟ ꓔꓯ ꓐꓯ ꓟꓸ ꓡꓯ꓾ ꓐꓰ ꓙ ꓟꓳ ꓘꓶꓽ ꓓꓰꓽ ꓔꓸ꓿ ꓤ ꓠꓱ ꓐꓰ ꓟꓹ ꓟ ꓠꓬꓲꓽ ꓗꓴꓸ ꓚꓸ ꓗꓪ ꓦ ꓡꓱ ꓐꓳˍ ꓟ ꓙ ꓡꓯ ꓘꓳ ꓚꓱꓹ ꓐꓰ꓾ ꓙ ꓟꓳ ꓘꓶꓽ ꓙꓳ ꓝꓲ꓿
ꓗ ꓬꓰ ꓓꓳ ꓕꓯꓽ ꓢꓲꓸ ꓫꓬꓹ ꓔꓱꓹ ꓟ ꓕꓯꓽ ꓢꓲ ꓤ ꓟꓳ ꓟ ꓙꓲ ꓡꓳ꓿
ꓮ ꓡꓲ ꓬꓰ ꓠꓹ ꓟ ꓙ ꓜꓲꓼ ꓢꓷꓸ ꓠꓲꓹ ꓧꓪ ꓟꓶ ꓝꓲ꓿ ꓫꓸ ꓟꓳ ꓪ꓿
ꓟꓽ ꓒꓬꓱꓼ ꓡ ꓝꓲ ꓠꓲꓹ ꓟꓽ ꓫꓵ ꓖꓶ ꓒꓬꓱꓼ ꓡ ꓠꓬ꓾ ꓠꓲꓹ ꓟ ꓜꓲꓽ ꓢꓲꓸ ꓬꓰ ꓙꓲꓽ ꓙꓳˍ ꓟ ꓬꓰ꓿ ꓕꓽ ꓗꓸ ꓧꓪ꓾ ꓝꓴꓲꓸ ꓟꓽ ꓙꓳ ꓢꓴ ꓔꓯ ꓝꓴꓲꓸ ꓕꓽ ꓓꓰ꓿
ꓟꓲ ꓠꓯ ꓗꓪ ꓤ ꓠꓱ ꓔꓯ ꓜꓲ ꓜꓲꓽ ꓑꓰꓹ ꓑꓰꓹ ꓬꓰ ꓢꓴ ꓐꓴ ꓡꓯꓽ ꓒꓯꓹ ꓗꓪ ꓐꓰ ꓤ ꓠꓱ ꓐꓴ ꓡꓲꓹ ꓙꓰ ꓟꓶ ꓝꓲ꓿ ꓮ ꓟ ꓮ ꓟ ꓣꓱꓽ ꓢꓴ ꓐꓴ ꓥ ꓟꓲ ꓮ ꓘꓶꓸ ꓤ ꓟꓳ ꓙ ꓪ ꓝꓲ꓿
#ChildAbusePrevention
