ꓗꓳꓸ ꓗꓷ ꓟ 45 ꓘꓳꓼ꓾ ꓟꓲꓸ ꓟꓲ ꓠꓬ꓾ ꓢꓳ ꓤ ꓢꓳ ꓟ ꓧꓳꓽ ꓢꓴ ꓢ-ꓡꓮꓲꓹ-ꓔꓲ-ꓟꓮꓳ-ꓳꓸ ꓔꓯ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓐꓴ ꓡꓰ ꓖꓽ ꓟꓶ ꓫꓵꓸ ꓫꓵꓸ ꓝꓴꓲꓸ ꓧꓪ ꓢꓲ꓾ ꓡꓯ ꓐꓲ ꓚꓳꓹ ꓛꓲꓽ ꓢꓰꓼ ꓩꓴ ꓗꓷ ꓟ ꓥ ꓡꓳ=
1976 ꓘꓳꓼ 6 ꓦ 26 ꓠꓬꓲ ꓠꓯꓼ ꓠꓬꓲ ꓟꓳ ꓓꓴ ꓟꓽ ꓓꓳ ꓡ ꓢꓰꓽ ꓕꓯ꓾ ꓢ-ꓡꓮꓲꓹ-ꓔꓲ-ꓟꓮꓳ-ꓳꓸ ꓠꓬ꓾ “ꓧꓪ ꓖꓳ ꓓꓱꓽ ꓔꓯ ꓢꓰꓼ ꓐ ꓡ ꓥ ꓟꓲ꓾ ꓥꓪ ꓠꓴ ꓙꓵ ꓠꓲꓹ ꓐꓰ꓾ ꓓꓵꓽ ꓙ ꓟꓳꓸ ꓙ ꓔꓸ ꓟ ꓔꓯ ꓠꓴ ꓪ ꓢꓰꓼ ꓟꓽ ꓐ ꓡ= ꓟꓯꓼ ꓛꓲ ꓔꓴꓸ ꓠꓯꓸ ꓘꓪ ꓥꓪ ꓠꓴ ꓛꓲ ꓝꓲꓸ ꓟꓽ ꓖꓶꓽ” ꓐꓰ ꓘꓴ ꓢꓯꓼ ꓬꓰ ꓢꓲꓸ ꓡꓯ ꓐꓲ ꓚꓳꓹ ꓛꓲꓽ ꓢꓰꓼ ꓖꓴ ꓗꓪ ꓑꓶꓸ ꓑꓶꓸ ꓡꓰ ꓙꓰ ꓗꓷꓳ=
ꓟꓬ-ꓟ ꓗꓴꓷꓼ ꓚ ꓟꓲꓽ ꓗꓪ ꓚꓲꓸ ꓛꓬ ꓙꓲ ꓖꓴ ꓐꓱ ꓶ ꓗꓴꓷꓼ ꓑ ꓫꓬ ꓐꓴ ꓔꓯ ꓜꓲ ꓜꓲ ꓑꓰꓹ ꓑꓰꓹ ꓠꓬꓲꓸ ꓤꓲ ꓢꓴ ꓔꓬ ꓟ ꓡꓰ ꓐꓰ꓾ ꓚꓲꓸ ꓛꓬ ꓔꓬ ꓢ ꓙꓳ ꓢ ꓚꓱꓹ ꓐꓱ ꓶ ꓟꓽ ꓓꓵ ꓙ ꓙ ꓠꓬꓲꓸ ꓤꓲ ꓟꓶ ꓢꓴ ꓑ ꓫꓬ ꓐꓴ ꓕꓲ ꓒꓳꓹ ꓗꓪ ꓐꓰ ꓠꓬꓲꓸ ꓤꓲ ꓢꓴ ꓔꓯ ꓢꓯꓼ ꓟꓬ ꓑ ꓢꓲꓸ ꓔꓳꓹ ꓗꓷ ꓢꓴ ꓮ ꓟꓬꓹ ꓙꓳ ꓡꓳ= ꓬꓲꓸ ꓪ ꓑꓶꓸ ꓠꓲꓹ ꓮ ꓗꓪ ꓡ ꓡ? ꓓꓰ-ꓟꓳ-ꓗꓯ-ꓢꓰ ꓐꓯ ꓟ ꓑ ꓫꓬ ꓙꓵꓽ ꓪ ꓔꓯ ꓦ ꓡꓱ ꓐꓳ ꓟ ꓗꓪ ꓐꓰ ꓥ ꓡꓳ= ꓔꓱꓹ ꓜꓳ ꓟ ꓐꓰ꓾ ꓡꓲꓹ ꓙꓰ ꓟꓶ ꓟ ꓔꓯ ꓠꓲꓹ ꓫꓵ ꓟ ꓗꓪ ꓐꓰ ꓥ ꓡꓳ=
ꓠꓬꓲꓸ ꓠꓬꓲ ꓗꓪ ꓐꓰ ꓠꓬꓲꓸ ꓤꓲ ꓐꓴ (ꓑ ꓫꓬ ꓙꓵꓽ ꓪ ꓦꓴ ꓢꓴ ꓢꓯꓼ ꓙꓳ ꓔꓬ ꓢꓰꓽ ꓡꓳ)= ꓠꓬꓲꓸ ꓤꓲ ꓢꓴ ꓐꓰ ꓕꓲ ꓛꓳ ꓜꓽ ꓛꓳ ꓒꓯꓹ꓾ ꓓꓳ ꓛꓳ ꓒꓯꓹ ꓐꓰ꓾ ꓟꓽ ꓔꓱꓹ ꓟꓽ ꓜꓳ ꓟ ꓐꓰ ꓜꓲ ꓜꓲ ꓑꓰꓹ ꓑꓰꓹ ꓬꓰ ꓢꓴ ꓛꓳ ꓒꓯꓹ ꓬꓰ ꓢꓴ ꓮ ꓟꓬꓹ ꓙꓳ ꓡꓳ= ꓖꓳ ꓡꓱ ꓥ ꓟꓲ ꓔꓱꓹ ꓟ ꓐꓰ꓾ ꓡ ꓞꓳ ꓔꓯ ꓒꓵꓽ ꓟ ꓠꓲꓹ ꓟ ꓙꓳ ꓢꓴ ꓮ ꓙꓵꓽ ꓠꓽ ꓜꓲ ꓜꓲ ꓑꓰꓹ ꓑꓰꓹ ꓬꓰ ꓢꓴ꓾ ꓢꓴ ꓔꓯ ꓝꓴꓲꓸ ꓧꓪ ꓢꓲꓸ ꓠꓬꓲꓸ ꓤꓲ ꓢꓴ ꓔꓯ ꓠꓵ ꓟꓽ ꓐ ꓡ=
ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓟꓶ ꓡꓰ ꓠꓬ ꓙꓵꓽ ꓢꓴ ꓐꓰ꓾ ꓑ ꓫꓬ ꓮ ꓙꓵꓽ ꓐꓱ ꓶ ꓙꓲ ꓖꓴ ꓥ ꓢꓲ꓾ ꓜꓲ ꓜꓲ ꓑꓰꓹ ꓑꓰꓹ ꓬꓰ ꓢꓴ ꓐꓴ ꓙꓵꓽ ꓪ ꓟꓶ ꓡꓰ ꓠꓬ ꓑ ꓫꓬ ꓐꓴ ꓠꓽ ꓫꓸ ꓓꓴ ꓪꓴꓽ ꓔꓯ ꓕꓲꓺ ꓡꓰ ꓥꓳ= ꓬꓲꓸ ꓪ ꓠꓽ ꓑ ꓫꓬ ꓫꓵꓽ ꓛꓲꓼ ꓜꓽ ꓢꓴ ꓥꓳ=
ꓙꓳꓥꓽ ꓟ ꓧꓳꓽ ꓢꓴ ꓐꓰ꓾ ꓑ ꓫꓬ ꓐꓱ ꓡ ꓦꓰꓼ ꓢꓴ꓾ ꓓꓰ-ꓟꓳ-ꓗꓯ-ꓢꓰ (ꓑ ꓫꓬ ꓡꓰ ꓙꓵꓽˍ ꓟ ꓚꓱꓹ) ꓐꓱ ꓶ ꓢꓯꓼ ꓟꓬ ꓖꓶꓽ ꓗꓷ ꓢꓴ ꓢ-ꓡꓮꓲꓹ-ꓔꓲ-ꓟꓮꓳ-ꓳꓸ ꓔꓯ ꓒꓵꓽ ꓢꓲ꓾ ꓮ ꓟꓶ ꓓꓰ-ꓟꓳ-ꓗꓯ-ꓢꓰ ꓐꓱ ꓶ ꓢꓯꓼ ꓩꓴ ꓔꓬ ꓟ꓾ ꓢꓯꓼ ꓟꓬ ꓑ ꓔꓬ ꓟ ꓡ ꓞꓳ ꓮ ꓙꓵꓽ ꓔꓯ ꓫꓸ ꓟꓳ ꓟ ꓐꓰ꓾ ꓞꓳ ꓒꓵꓽ ꓟ ꓠꓲꓹ ꓟ ꓗꓪ ꓐꓰ ꓸꓸꓸꓸ
