6 ꓦ 18 ꓠꓬꓲ ꓕꓯ꓾ ꓟꓬ-ꓟ ꓗꓴꓷꓼ ꓗꓪ ꓒꓬꓱꓼ ꓔꓬ ꓟ (The Situation in Myanmar) ꓐꓯ ꓟ ꓐꓯ ꓧꓳꓽ ꓘꓶꓽ ꓡꓳ ꓚ ꓓꓳ ꓡ ꓟ ꓖꓪ ꓙꓱ ꓞꓷꓹ ꓘꓶꓽ (3) ꓘꓶꓽ ꓔꓯ ꓗꓴꓷꓼ ꓜꓴ ꓜꓲꓼ ꓓꓴ ꓗꓪ 119 ꓗꓴꓷꓼ ꓠꓲꓹ ꓧꓳꓹ ꓡꓰꓳ=
ꓟꓲ ꓠꓯ ꓗꓴꓷꓼ 193 ꓗꓴꓷꓼ ꓗꓪ ꓐꓰ ꓐꓲ-ꓡ-ꓣꓴ ꓗꓴꓷꓼ ꓠꓬ ꓟꓬ-ꓟ ꓗꓴꓷꓼ ꓐꓱ ꓶ ꓖꓪ ꓙꓱ ꓘꓶꓽ ꓔꓯ ꓔꓳꓹ ꓢꓴ ꓕꓲ ꓗꓴꓷꓼ ꓥ ꓢꓲ꓾ ꓮ-ꓢꓲ-ꓬ ꓟꓵꓽ ꓗꓪ ꓐꓰ ꓕꓮꓲ꓾ ꓡ-ꓳ꓾ ꓗ-ꓐꓳ-ꓓꓲ-ꓬ ꓗꓴꓷꓼ ꓐꓴ 36 ꓗꓴꓷꓼ ꓠꓬ ꓔꓱꓹ ꓫꓵ ꓗꓪ ꓦꓰꓼ ꓗꓷꓳ= ꓠꓱꓸ ꓐꓯꓼ 119 ꓗꓴꓷꓼ ꓠꓬ ꓟꓬ-ꓟ ꓗꓴꓷꓼ ꓐꓱ ꓶ ꓖꓪ ꓙꓱ ꓞꓷꓹ ꓘꓶꓽ (3) ꓘꓶꓽ ꓔꓯ ꓠꓲꓹ ꓧꓳꓹ ꓗꓷ ꓟ ꓥ ꓡꓳ=
ꓕꓱ ꓕꓲ ꓧꓪꓹ ꓗꓴꓷꓼ ꓜꓴ ꓜꓲꓼ ꓓꓴ ꓗꓪ ꓟꓬ-ꓟ ꓗꓴꓷꓼ ꓐꓱ ꓶ ꓖꓪ ꓙꓱ ꓠꓲꓹ ꓧꓳꓹ ꓘꓶꓽ (3) ꓝꓲꓸ ꓠꓬ꓾
(1) ꓟꓬ-ꓟ ꓗꓴꓷꓼ ꓠꓬ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓗꓪ ꓡꓽ ꓛꓲ ꓬꓰ ꓠ ꓗ ꓡꓳ=
(2) ꓣꓴ ꓡꓴꓽ ꓟꓶ ꓢꓴ ꓮ ꓙꓵꓽ ꓡꓲꓹ ꓗꓷ ꓠ ꓗ ꓡꓳ=
(3) ꓟꓬ-ꓟ ꓔꓯ ꓟꓯꓼ ꓶ ꓤ ꓪꓴꓽ ꓖꓶ ꓟꓽ ꓓ=
ꓖꓪ ꓙꓱ ꓘꓶꓽ ꓕꓱ ꓟ ꓔꓯ ꓔꓳꓹ ꓙ ꓗꓷ ꓟ ꓗꓴꓷꓼ 119 ꓗꓴꓷꓼ ꓠꓬ ꓕꓲ ꓠꓲꓹ ꓕꓲ ꓪ ꓢꓯꓼ ꓕꓵꓼ ꓠꓹ ꓟ ꓠꓲꓹ ꓧꓳꓹ ꓡꓰꓳ= ꓖꓳ ꓡꓱ ꓥ ꓟꓲ ꓠꓲꓹ ꓧꓳꓹ ꓘꓶꓽ ꓕꓱ ꓟ ꓠꓬ ꓟꓽ ꓓ ꓟꓽ ꓢ ꓬꓰ ꓠꓹ ꓟ ꓶ ꓟꓽ ꓙꓳ ꓟ ꓠꓲꓹ ꓧꓳꓹ ꓘꓶꓽ ꓥ ꓡꓳ= ꓖꓳ ꓡꓱ ꓥ ꓟꓲ ꓑ ꓫꓬ ꓙꓵꓽ ꓪ ꓦꓴ ꓢꓴ ꓐꓴ ꓔꓯ ꓟꓲ ꓠꓯ ꓗꓴꓷꓼ ꓮ ꓟꓬꓹ ꓡꓰ ꓕꓼ ꓩꓴ ꓡ ꓟ ꓢꓷꓸ ꓡꓰ ꓓꓴ ꓥ ꓡꓳ=
ꓠꓬꓲꓸ ꓠꓬꓲ 6 ꓦ 19 ꓠꓬꓲ ꓕꓯ ꓟꓬ-ꓟ ꓗꓴꓷꓼ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓜꓲꓽ ꓐꓴ ꓡꓰ ꓗꓴꓷꓼ ꓜꓴ ꓗꓪ ꓐꓰ ꓖꓪ ꓙꓱ ꓞꓷꓹ ꓘꓶꓽ ꓔꓯ ꓘꓳ ꓣꓴ ꓟꓽ ꓐ ꓡ= ꓐꓶꓽ ꓗꓴꓷꓼ ꓗꓪ ꓐꓰ ꓟꓬ-ꓟ ꓗꓴꓷꓼ ꓫꓵꓽ ꓪꓴ ꓔꓯ ꓘꓶ ꓡꓶꓽ ꓡ ꓟ ꓔꓯ ꓔꓳꓹ ꓠ ꓗ ꓡꓳ ꓐꓰ ꓡꓯꓽ ꓔꓯꓽ ꓡꓽ ꓩꓴ ꓡ ꓡꓳ=
