#ꓟꓯꓼ (3) ꓜꓴ ꓠꓬ ꓑ ꓫꓬ ꓕꓲ ꓛꓱꓽ ꓗꓪ ꓦꓰꓼ ꓓꓴ ꓥꓳ
ꓟꓯꓼ ꓐꓴ ꓡꓰ ꓑ ꓫꓬ ꓙꓵꓽ ꓪ ꓦꓴ ꓢꓲ꓾ ꓡ ꓞꓳ ꓢꓰꓼ ꓔꓬ ꓟ ꓟꓽ ꓠ ꓗꓷ ꓡ ꓐꓭ ꓠꓬ꓾ ꓒꓳꓹ ꓔꓳꓹ ꓢꓴ ꓬꓲꓹ ꓬꓲꓼ ꓠꓬꓲ ꓤ ꓟꓯꓼ (3) ꓜꓴ ꓠꓬ ꓑ ꓫꓬ ꓕꓲ ꓛꓱꓽ ꓗꓪ ꓦꓰꓼ ꓢꓲꓸ ꓔꓳꓹ ꓡꓯ ꓘꓳ ꓓꓴ ꓥꓳ ꓐꓰ ꓠꓬꓲꓸ ꓠꓬꓲ 3 ꓦ (30) ꓠꓬꓲ ꓗꓪ ꓐꓯ ꓒꓬꓱ ꓕꓳ ꓶ ꓐꓳ ꓓꓳ ꓡ ꓡꓳ= ꓚꓲ ꓛꓬ ꓔꓱꓹ ꓚꓲ ꓛꓬ ꓙꓵꓽ ꓠꓹ ꓟ ꓙꓵꓽ ꓪ ꓐꓱ ꓶ ꓒꓳꓹ ꓔꓳꓹ ꓔꓬ ꓟ ꓬꓲꓹ ꓬꓲꓼ ꓠꓬꓲ ꓤ (3) ꓜꓴ ꓠꓬ ꓗꓳꓸ-ꓗꓼ꓾ ꓔ-ꓮꓳꓸ ꓐꓰ꓾ ꓬꓲ-ꓘꓮꓲ ꓟꓯꓼ ꓐꓴ ꓥ ꓡꓳ=
#ꓟꓬ-ꓟ ꓗꓷꓼ – ꓴꓢꓮ ꓗꓴꓷꓼ ꓶ ꓡꓯꓼ ꓙ ꓡꓯ ꓘꓳ ꓚꓱꓹ ꓠꓽ ꓩꓴ ꓗꓷꓳ
ꓟꓬ-ꓟ ꓗꓴꓷꓼ ꓗꓪ ꓓꓰ-ꓟꓳ-ꓗ-ꓬꓯ-ꓢꓰ ꓙꓵꓽ ꓚꓱꓹ ꓡꓳ ꓚ ꓚ ꓢꓲꓻ ꓓꓳ ꓡ ꓟ ꓗꓴꓷꓼ ꓙꓵꓽ ꓪ ꓙꓳ ꓢꓴ ꓟꓽ ꓓꓳ ꓡ ꓟꓽ ꓢꓽ ꓟꓬ-ꓟ ꓗꓴꓷꓼ ꓐꓰ ꓶꓼ ꓡꓯꓼ ꓟꓴ ꓚꓱꓹ ꓠꓽ ꓗꓷꓳ ꓐꓰ ꓴꓢꓮ ꓶꓼ ꓡꓯꓼ ꓚꓱꓹ ꓗꓪꓽ ꓫꓵꓽ ꓢꓴ ꓝꓲ ꓓꓴ Katherine Tai ꓡꓰ 3 ꓦ 29 ꓠꓬꓲ ꓕꓯ ꓐꓯ ꓒꓬꓱ ꓕꓳ ꓶ ꓐꓳ ꓓꓳ ꓡ ꓡꓳ= 2020 ꓕꓲ ꓘꓳꓼ ꓡꓱꓸꓼ ꓗꓪ ꓟꓬ-ꓟ ꓐꓰ ꓴꓢꓮ ꓶꓼ ꓡꓯꓼ ꓟꓴ ꓚꓱꓹ ꓮ ꓙꓵꓽ ꓬꓲꓸ ꓒꓵꓽ ꓢꓪꓼ ꓗꓷ ꓠꓬ ꓴꓢꓮ ꓓꓳ-ꓡ 1ꓸ4 ꓐꓲꓡꓡꓲꓳꓠ ꓙꓳ ꓡꓳ=
# ꓚꓣꓑꓧ ꓔꓲꓺ ꓒꓴ ꓖꓳ ꓡꓲꓠꓗ ꓬꓲꓸ ꓚꓬꓼ ꓓꓳ ꓡ ꓡꓳ
ꓚꓣꓑꓧ- ꓗꓴꓷꓼ ꓜꓲꓼ ꓓꓴ ꓝꓲ ꓓꓴ ꓐꓴ ꓬꓲ ꓛꓲ ꓜꓴ ꓡꓰ ꓔꓲꓺ ꓒꓴ ꓖꓳ ꓔꓬ ꓟ ꓗꓪ ꓔꓲ ꓒꓴ ꓖꓳ ꓚꓱꓹ ꓪꓰꓐꓢꓲꓔꓰ ꓬꓲꓸ ꓚꓬꓼ ꓬꓰ ꓢꓴ ꓓꓳ ꓡ ꓡꓳ= ꓬꓲ ꓚꓬꓼ ꓡꓲꓠꓗ = ꓬꓲꓸ ꓚꓵ ꓡꓲꓠꓗ= ꓟꓯꓼ ꓡꓰ ꓙꓵꓽ ꓪ ꓦꓴ ꓔꓯꓹ ꓙꓰ ꓟ ꓑꓶꓸ ꓓꓴ ꓑ ꓫꓬ ꓡꓰ ꓢꓲꓻ ꓣꓴ ꓔꓸ ꓟ ꓗꓴꓷꓼ ꓝꓲ ꓓꓴ ꓐꓴ ꓠꓬ ꓟꓯꓼ ꓔꓯ ꓔꓳꓹ ꓡꓯ ꓘꓳ ꓠꓹ ꓟ ꓐꓱ ꓶ ꓑ ꓫꓬ ꓐꓴ ꓗꓪ ꓐꓰ ꓔꓲꓺ ꓒꓴ ꓧꓪ ꓔꓬ ꓟ ꓥ ꓡꓳ=
#ꓗꓲꓮ ꓔꓯ ꓐꓬꓱ ꓦꓲ ꓐꓳꓽ ꓞꓰ ꓡ ꓡꓳ
ꓗꓲꓮ ꓟꓯꓼ ꓒꓱ (11) ꓔꓯ 3 ꓦ 29 ꓠꓬꓲ ꓠ ꓡꓲ 6ꓽ30 ꓗꓪ ꓗꓷꓴꓼ ꓙꓵꓽ ꓪ ꓦꓴ ꓢꓴ ꓟꓯꓼ ꓐꓴ ꓡꓰ ꓐꓬꓱ ꓦꓲ ꓗꓪ ꓐꓰ ꓐꓳꓽ (4) ꓧꓪꓹ ꓞꓰ ꓢꓲꓸ ꓓꓶꓽ ꓡ ꓡꓳ= ꓐꓳꓽ ꓛꓰꓹ ꓑꓬ ꓖꓴ ꓗꓪ ꓔꓶꓹ ꓡꓱꓸꓼ ꓔꓬ ꓠꓬꓲ ꓮ ꓟ ꓥ ꓟꓲ ꓠꓻ ꓓꓴ ꓡꓰ ꓢꓴ ꓟꓽ ꓙꓳ ꓐꓯ ꓡꓳ= 3 ꓦ 27 ꓠꓬꓲ ꓗꓪ ꓥ ꓟꓲ ꓗꓠꓴ ꓟꓯꓼ ꓒꓱ ꓓꓽ ꓟ (5) ꓔꓯ ꓥ ꓟꓲ ꓗꓴꓷꓼ ꓙꓵꓽ ꓪ ꓦꓴ ꓢꓴ ꓐꓴ ꓡꓰ ꓐꓬꓱ ꓦꓲ ꓗꓪ ꓐꓰ ꓐꓳꓽ ꓞꓰ ꓬꓯꓼ ꓢꓲꓸ ꓓꓶꓽ ꓡ ꓗꓷꓳ=
#ꓕꓮꓲ ꓗꓪ ꓟꓯꓼ ꓛꓰꓹ ꓙꓰ ꓢꓴ ꓔꓯ ꓗꓽ ꓩꓴ ꓡ ꓡꓳ
ꓗꓠꓴ ꓟꓯꓼ ꓒꓱ (5) ꓗꓪꓽ ꓫꓵꓽ ꓟ ꓟꓵꓽ ꓗꓪ ꓗꓴꓷꓼ ꓙꓵꓽ ꓪ ꓦꓴ ꓢꓴ ꓟꓯꓼ ꓐꓴ ꓡꓰ ꓐꓬꓱ ꓦꓲ ꓗꓪ ꓐꓰ ꓐꓳꓽ ꓟꓽ ꓠꓽ ꓠꓽ ꓞꓰ ꓡ ꓔꓬ ꓠꓬꓲ꓾ ꓢꓰꓼ ꓡꓯ ꓘꓳ ꓟ ꓟꓯꓼ ꓘꓰꓹ ꓢꓴ ꓮ ꓟꓬꓹ ꓓꓳ ꓡ ꓡꓳ= ꓕꓮꓲ ꓟꓵꓽ ꓗꓪ ꓟꓯꓼ ꓘꓰꓹ ꓙꓰ ꓢꓴ ꓐꓴ ꓔꓯ ꓠꓬ 3 ꓦ 29 ꓠꓬꓲ ꓕꓯ꓾ ꓕꓮꓲ ꓟꓯꓼ ꓐꓴ ꓡꓰ ꓗꓽ ꓡꓽ ꓩꓴ ꓡ ꓡꓳ=
#ꓟꓯꓼ ꓟꓳ-ꓓꓳ ꓮ ꓔꓳꓸ ꓬꓲ ꓘꓴ ꓔꓯ ꓕꓯꓼ ꓡꓰꓳ
3 ꓦ 29 ꓠꓬꓲ꓾ ꓟꓶꓼ ꓘꓶꓼ 5 ꓙꓵꓹ ꓛꓲ ꓗꓪ ꓔꓮꓳ-ꓥꓳ ꓡꓳ ꓒꓱ ꓗꓪ ꓟꓳ-ꓓꓳ ꓑꓴꓹ ꓜꓶꓽ ꓢꓲ ꓗꓴꓷꓼ ꓙꓵꓽ ꓪ ꓦꓬ ꓢꓴ ꓟꓯꓼ ꓐꓴ ꓔꓯ ꓒꓳꓹ ꓔꓳꓹ ꓘꓴ ꓔꓴ ꓔꓬ ꓕꓯ꓾ ꓟꓯꓼ ꓟꓳ ꓓꓳ ꓕꓲ ꓦꓲ ꓠꓬ ꓘꓴ ꓔꓴ ꓢꓴ ꓔꓯ ꓕꓯꓼ ꓢꓰꓼ ꓠꓹ ꓟ ꓕꓶꓸ ꓕꓶꓸ ꓫꓵꓸ ꓡ ꓠꓬ ꓙ ꓖꓴ ꓘꓶꓽ ꓗꓪ ꓞꓳꓹ ꓔꓸ ꓟ ꓮꓸ ꓔꓳꓸ ꓙꓼ ꓜꓲ ꓘꓴ ꓔꓯ ꓕꓯꓼ ꓡꓰꓳ=
#ꓪꓐ ꓐꓰ ꓮꓓꓐ ꓒꓴ ꓞꓳꓽ ꓦꓲ ꓗꓪ ꓐꓰ ꓟꓬ-ꓟ ꓔꓯ ꓬꓰ ꓙ ꓚꓱꓹ ꓠꓽ ꓗꓷꓳ
ꓪꓳꓣꓡꓓ ꓐꓮꓠꓗ ꓐꓰ꓾ ꓮꓢꓲꓮꓠ ꓓꓰꓦꓰꓡꓳꓑꓟꓰꓠꓔ ꓐꓮꓠꓗ ꓐꓴ ꓡꓰ ꓟꓬ-ꓟ ꓗꓴꓷꓼ ꓗꓪ ꓔꓳꓹ ꓙ ꓟ ꓟꓬꓱꓽ ꓬꓰ ꓚꓱꓹ ꓮ ꓙꓵꓽ ꓠꓽ ꓗꓷꓳ= ꓪꓳꓣꓡꓓ ꓐꓮꓠꓗ ꓠꓬ 2 ꓦ 19 ꓠꓬꓲ꓾ ꓮꓓꓐ ꓠꓬ 3 ꓦ 10 ꓠꓬꓲ ꓗꓪ ꓬꓰ ꓙ ꓔꓳꓹ ꓙ ꓚꓱꓹ ꓮ ꓙꓵꓽ ꓠꓽ ꓩꓴ ꓗꓷ ꓟ ꓥ ꓡꓳ=
#ꓑ ꓫꓬ ꓔꓯ ꓣꓑꓖ ꓡꓰ ꓐꓶ ꓔꓬ ꓡꓳ
ꓓ-ꓖꓳ 56 ꓚꓱꓹ꓾ ꓬꓥ-ꓖꓳ ꓟꓵꓽ ꓗꓪ꓾ 3 ꓦ 29 ꓠꓬꓲ ꓕꓯ ꓗꓴꓷꓼ ꓙꓵꓽ ꓪ ꓦꓴ ꓢꓴ ꓟꓯꓼ ꓐꓴ ꓡꓰ ꓣꓑꓖ ꓐꓯˍ ꓟ ꓟꓯꓼ ꓢꓰꓼ ꓐꓳꓽ ꓡꓰ ꓑ ꓫꓬ ꓐꓴ ꓔꓯ ꓐꓶ ꓡꓳ=
#ꓗꓳꓸ ꓘꓶꓽ ꓦ ꓖꓶ ꓩꓴ ꓓ ꓡꓳ
ꓑ ꓫꓬ ꓝꓲ ꓓꓴ ꓓꓰꓮꓠ ꓢꓟꓲꓔꓧ ꓡꓰ꓾ ꓮꓴꓢꓔꓣꓮꓡꓲꓮ ꓗꓪ ꓓꓰ-ꓟꓳ-ꓗ-ꓬꓯ-ꓢꓰ ꓙꓵꓽ ꓚꓱꓹ ꓡꓳ ꓚ ꓗꓹ ꓛꓲ ꓛꓲ ꓙꓳ ꓢ ꓔꓬ ꓢ ꓔꓬ ꓟ ꓟꓬ-ꓟ ꓟꓯꓼ ꓜꓲꓽ ꓐꓴ ꓤ ꓠꓱ ꓐꓴ ꓐꓰ ꓫꓵꓽ ꓤ ꓧꓪ ꓤ ꓐꓴ ꓔꓯ ꓮ ꓟ ꓮ ꓡꓲ ꓢꓷꓸ ꓠꓬ ꓖꓳ ꓡꓱ ꓟꓸ ꓖꓶ ꓡꓯ= ꓬꓲ ꓪ ꓔꓯ ꓚꓲꓸ ꓚ ꓓꓴ ꓥꓳ ꓐꓯ ꓡꓳ= ꓓꓰꓮꓠ ꓢꓟꓲꓔꓧ ꓔꓯ ꓙ ꓡꓯ ꓘꓳ ꓓꓴ꓾
Email: [email protected]
Phone 08 9481 0349
Address 48 Ventnor Avenue,
West Perth WA 6005
Address PO Box 930
West Perth, WA 6872
[email protected]
#ꓟꓯꓼ ꓙꓵꓽ ꓪ ꓔꓯ ꓒꓳꓹ ꓔꓳꓹ ꓟ ꓮꓴꓢꓔꓣꓮꓡꓲꓮ ꓗꓪ ꓟ ꓡꓲ-ꓢꓴ ꓐꓴ
3 ꓦ 27 ꓠꓬꓲ ꓕꓯ ꓙꓵꓽ ꓪ ꓦꓴ ꓢꓴ ꓟꓯꓼ ꓐꓴ ꓔꓯ ꓒꓳꓹ ꓔꓳꓹ ꓟ ꓜꓲꓼ ꓓꓴ ꓔꓯ waltzing Matilda Hotel in Springvale South, Melbourne ꓗꓪ ꓣꓱꓽ ꓬꓰ ꓔꓯ ꓖꓳ ꓗꓪ ꓔꓬ ꓟ ꓡꓲ-ꓢꓴ ꓐꓴ ꓥ ꓟꓲ ꓔꓺ ꓗꓷꓳ= ꓖꓳ ꓕꓲ ꓠꓬꓲ ꓜꓲꓼ ꓓꓴ ꓗꓪ ꓮꓴꓢꓔꓣꓮꓡꓲꓮ ꓑ ꓫꓬ ꓝꓲ ꓓꓴ ꓐꓴ ꓥ ꓟꓲ ꓜꓲꓼ ꓡ ꓢꓲ ꓫꓸ ꓕꓱ ꓢꓯꓼ ꓖꓶ ꓡ ꓡꓳ= ꓡ ꓞꓳ 200 ꓣꓳ ꓟꓽ ꓞꓲ ꓜꓲꓼ ꓛꓲ ꓡ ꓡꓳ=
#ꓟꓯꓼ ꓙꓵꓽ ꓪ ꓔꓯ ꓒꓳꓹ ꓔꓳꓹ ꓟ ꓴꓢꓮ ꓗꓪ ꓟ ꓡꓲ-ꓢꓴ ꓐꓴ
3 ꓦ 28 ꓠꓬꓲ ꓕꓯ꓾ ꓔꓮꓫꓮꓢꓹ ꓝꓳꓣꓔꓧꓪꓳꓣꓔꓧ ꓚꓳꓠꓦꓰꓠꓔꓲꓳꓠ ꓚꓰꓠꓔꓰꓣ ꓗꓪ ꓣꓱꓽ ꓬꓰ ꓗꓷ ꓟ ꓙꓵꓽ ꓪ ꓦꓴ ꓢꓴ ꓟꓬ-ꓟ ꓟꓯꓼ ꓐꓴ ꓔꓯ ꓒꓳꓹ ꓔꓳꓹ ꓜꓲꓼ ꓓꓴ ꓗꓪ ꓡꓲ-ꓢꓴ ꓐꓴ ꓥ ꓟꓲ ꓔꓺ ꓪ ꓡꓰꓳ= ꓖꓳ ꓕꓲ ꓠꓬꓲ ꓟꓶ ꓘꓶꓼ 3-5 ꓙꓵꓹ ꓗꓪ ꓛꓲ ꓣꓱꓽ ꓬꓰ ꓢꓲ ꓡ ꓞꓳ 300 ꓣꓳ ꓟꓽ ꓞꓲ ꓜꓲꓼ ꓛꓲ ꓡ ꓡꓳ=
#ꓚꓰꓸ ꓟꓵꓽ ꓗꓪ ꓟꓯꓼ ꓡꓰ ꓡ ꓛꓴꓸ ꓐꓶ ꓡ ꓠꓬꓲ ꓡꓲ-ꓢꓴ ꓟ ꓕꓲ ꓣꓳ ꓫꓵꓻꓳ
3 ꓦ 28 ꓠꓬꓲ꓾ ꓚꓧꓲꓠ ꓟꓵꓽ꓾ ꓗꓮꓡꓮꓬ ꓡꓳ ꓒꓱ ꓗꓪ ꓗꓴꓷꓼ ꓙꓵꓽ ꓪ ꓦꓴ ꓢꓴ ꓟꓯꓼ ꓐꓴ ꓔꓯ ꓔꓳꓹ ꓢꓲꓸ ꓘꓴ ꓔꓴ ꓟ ꓗꓪ ꓡꓲ-ꓢꓴ ꓟ ꓮ-ꓘꓴ ꓠꓬ ꓟꓯꓼ ꓡꓰ ꓐꓶ ꓢꓰꓼ ꓗꓷꓳ= ꓬꓲ ꓠꓬ Women for Justice Organization ꓢꓽ ꓡ ꓙꓵꓽ ꓪꓴꓸ ꓓꓵ ꓣꓱꓽ ꓢꓴꓕꓲ ꓣꓳ ꓥ ꓡꓳ=
#ꓟꓶ-ꓚꓲ-ꓠ ꓗꓪ ꓔꓬ ꓟ ꓡꓲ-ꓢꓴ ꓟ ꓕꓲ ꓣꓳ ꓟꓯꓼ ꓡꓰ ꓣꓴ ꓔꓯꓹ ꓙꓰꓳ
3 ꓦ 27 ꓠꓬꓲ꓾ ꓟꓶ-ꓚꓲ-ꓠ ꓗꓪ ꓚꓰ-ꓚꓰ ꓐꓲ ꓫꓬꓹ ꓔꓶꓸ ꓗꓪ ꓐꓰ ꓣꓴ ꓔꓯꓹ ꓙꓰ ꓢꓴ ꓐꓴ ꓠꓯꓸꓼ ꓗꓪ ꓟ-ꓘꓰꓹ ꓘꓹ ꓢꓴ ꓡꓲ-ꓢꓴ ꓮ ꓟꓲꓽ ꓡꓯꓸ ꓠꓲꓹ-ꓠ ꓥ ꓟꓲ ꓕꓱꓹ ꓙꓰꓳ= ꓡꓲꓹ ꓖꓶ ꓡ ꓠꓹ ꓟ ꓐꓱ ꓶ ꓮ ꓙꓵꓽ ꓢꓴ ꓥꓳ ꓡꓳꓸ ꓔꓬ ꓡꓳ=
#ꓬꓳ-ꓔꓲ-ꓩ ꓐꓬꓱꓽ ꓔꓯ ꓟꓬꓱ ꓓꓳꓽ ꓖꓶ ꓔ ꓡꓳ
3 ꓦ 27 ꓠꓬꓲ ꓕꓯ ꓫꓬꓹ ꓓꓳ ꓩꓴ ꓡ ꓟ ꓟꓯꓼ ꓙꓵꓽ ꓪ ꓔꓯ ꓒꓳꓹ ꓔꓳꓹ ꓟ ꓕꓳ ꓶ ꓑꓷꓠ ꓗꓪ ꓮ ꓟꓶ ꓕꓳ ꓦꓲ ꓗꓪ ꓡꓴꓽ ꓔꓬ ꓟ ꓡꓲ-ꓢꓴ ꓐꓲ ꓜꓳꓽ ꓖꓪ ꓠꓴꓽ ꓒꓽ ꓬꓳ-ꓔꓲ-ꓩ ꓐꓬꓱꓽ ꓔꓯ ꓟꓬꓱ ꓓꓳ ꓖꓶ ꓢꓲꓸ ꓔꓳꓹ ꓠꓷꓼ ꓖꓶ ꓔ ꓡꓳ= ꓬꓳ-ꓔꓲ-ꓩ ꓠꓬ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓐꓱ ꓶ ꓑꓶꓸ ꓑꓶꓸ ꓡꓰ ꓫꓸ ꓕꓱ ꓢꓴ ꓕꓲ ꓣꓳ ꓥ ꓡꓳ=
