ꓟꓬ-ꓟ ꓗꓴꓷꓼ ꓑ ꓫꓬ ꓡꓰ ꓢꓲꓻ ꓔꓸ ꓟ ꓗꓴꓷꓼ ꓙꓵꓽ ꓢꓲꓽ ꓒ ꓢꓲꓽ ꓟ ꓐꓴ ꓔꓯ ꓟꓯꓼ ꓡꓰ ꓙꓵꓽ ꓪ ꓦꓴ ꓢꓲ꓾ ꓐꓯ ꓟꓴ ꓮ ꓟꓬꓹ ꓚꓱꓹ ꓩꓴ ꓢꓲ ꓫꓵꓽ ꓘꓶꓽ ꓖꓴ ꓗꓪ ꓚꓲꓸ ꓚ ꓔꓬ ꓟ ꓗꓪ꓾ ꓑ ꓫꓬ ꓐꓴ ꓢꓷꓸ ꓶꓽ (citizens’ right to know) ꓞꓳꓸ ꓡꓰ ꓔꓬ ꓡꓳ꓿
2021 ꓘꓳꓼ 10 ꓦ 26 ꓠꓬꓲ ꓕꓯ ꓑ ꓫꓬ ꓧꓳꓽ ꓢꓴ ꓮꓳ-ꓢ-ꓢꓴ-ꓚꓰꓽ ꓐꓯ ꓟꓴ ꓕꓲ ꓗꓪ ꓫꓸ ꓕꓱ ꓟ ꓓꓳꓽ ꓜꓲ ꓜꓲ ꓟꓴ ꓟꓴ ꓟꓽ ꓢꓷꓸ ꓡꓻꓳ꓿ ꓮ ꓡꓲꓳ ꓐꓯ ꓠꓬ ꓟꓯꓼ ꓡꓰ ꓜꓲꓽ ꓟꓴ ꓒꓽ ꓐꓴ ꓔꓯ ꓙꓵꓽ ꓪ ꓗꓪ ꓐꓰ ꓟꓷ ꓠꓷꓹ ꓑꓲꓸ ꓔꓸ ꓡꓳ꓿
ꓪ ꓔꓲꓸ ꓪꓲꓹ-ꓟꓰꓼ
2021 ꓘꓳꓼ 10 ꓦ 12 ꓕꓯꓽ ꓪ ꓔꓲꓸ ꓪꓰꓹ-ꓟꓰꓼ ꓡꓰ 2021 ꓘꓳꓼ 2 ꓦ 1 ꓠꓬꓲ ꓠꓯꓼ 5 ꓙꓵꓹ ꓗꓪ ꓬꓲꓸ ꓪ ꓔꓲꓸ ꓙꓵꓽ ꓪ ꓔꓯ ꓟꓯꓼ ꓡꓯ ꓒꓯꓹ ꓗꓪ ꓡꓯꓼ ꓙꓱ ꓡ ꓠꓹ ꓟ ꓟꓽ ꓓ ꓟꓽ ꓢ ꓓꓰꓽ ꓡ ꓟ ꓐꓰ꓾ ꓖꓳ ꓡꓱ ꓟꓽ ꓡꓯꓼ ꓙꓱ ꓠꓬ ꓠꓻ ꓓꓴ ꓡ ꓥ ꓐꓰ ꓚꓳꓹ ꓡ ꓟ ꓐꓯ ꓟꓴ ꓕꓲ ꓗꓪ ꓐꓯ ꓓꓳ ꓩꓴ ꓡ ꓡꓳ꓿ ꓬꓲꓸ ꓡꓰ “ꓫꓵꓻ ꓡꓲꓸ ꓫꓵꓻ ꓡ ꓝꓲ꓾ ꓪ ꓔꓲꓸ ꓙꓵꓽ ꓪ ꓠꓴ ꓪ ꓔꓯ ꓟꓽ ꓡꓯꓼ ꓙꓱ” ꓐꓰ ꓡꓯꓽ ꓔꓯꓽ ꓗꓷ ꓟ ꓔꓯ ꓕꓲ ꓟꓲ ꓠꓯ ꓢꓷꓸ ꓡꓰꓳ꓿
ꓖꓳ ꓕꓲ ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓐꓯ ꓟꓴ ꓕꓲ ꓗꓪ ꓮ ꓫꓵꓽ ꓒꓬꓱꓼ ꓗꓷ ꓟ ꓓꓳꓽ ꓔꓯ ꓬꓲꓸ ꓐꓽ ꓢꓲ ꓗꓪ ꓟꓽ ꓐꓯ ꓒꓬꓱꓺ ꓠꓹ ꓟ ꓜꓲꓽ ꓟꓴ ꓒ ꓕꓲ ꓣꓳ ꓑꓶꓸ ꓝꓸ ꓕꓲ ꓣꓳ ꓔꓯ ꓟꓯꓼ ꓡꓰ ꓗꓽ ꓩꓴ ꓡ ꓡꓳ꓿ ꓓꓳꓽ ꓟꓽ ꓐꓯ ꓒꓬꓱꓺ ꓠꓯ ꓢꓲ ꓕꓳ ꓶ ꓗꓪ ꓪꓵꓼ ꓘꓶꓽ ꓐꓳ꓾ ꓡꓯꓼ ꓓꓴ ꓢꓽ ꓝꓲ ꓡꓳ꓿
ꓪ ꓚꓲꓸ ꓚ ꓪ ꓖꓽ ꓟꓶ ꓫꓵꓸ ꓫꓵꓸ ꓬꓰ ꓔꓬ ꓟ ꓕꓲ ꓟꓲ ꓠꓯ ꓡꓳꓸ ꓓꓳ ꓡ ꓔꓬ ꓠꓬꓲ ꓕꓱ ꓡꓱ ꓗꓽ ꓩꓴ ꓡ ꓟ ꓥ ꓡ? ꓐꓰ ꓠꓲꓹ ꓟ ꓗꓪ ꓠ ꓠꓬꓲ ꓓꓴ ꓙꓳ ꓡ ꓡꓳ꓿ ꓮ ꓡꓲ ꓐꓯ ꓡꓲꓸ ꓐꓯ꓾ ꓑ ꓫꓬ ꓐꓴ ꓠꓬ ꓬꓲꓸ ꓪ ꓠꓲꓹ ꓠꓵ ꓟ ꓧꓳꓽ ꓢꓴ ꓐꓴ ꓓꓳꓽ ꓑ ꓙ ꓙꓲꓽ ꓙꓳ ꓟ ꓶꓽ ꓞꓳꓸ ꓡꓰ ꓡ ꓔꓬ ꓟ ꓥ ꓡꓳ꓿
ꓟꓯꓼ ꓡꓰ ꓙꓵꓽ ꓪ ꓦꓴ ꓣꓴ ꓗꓷ ꓗꓸ ꓠꓯꓸ ꓟꓬ-ꓟ ꓗꓴꓷꓼ ꓗꓪ ꓓꓳꓽ ꓐꓳ ꓢꓴ ꓮ ꓟꓬꓹ ꓔꓯ ꓠꓬꓲꓸ ꓤꓲ ꓔꓬ ꓟ ꓐꓰ꓾ ꓑ ꓫꓬ ꓡꓰ ꓢꓲꓻ ꓔꓸ ꓟ ꓗꓴꓷꓼ ꓧꓳꓽ ꓢꓴ ꓐꓴ ꓔꓯ ꓐꓯ ꓟꓴ ꓩꓴ ꓟ ꓓꓳꓽ ꓔꓯ ꓑ ꓫꓬ ꓢꓷꓸ ꓪ ꓟꓽ ꓓ ꓡꓰ ꓥ ꓟꓲ꓾ ꓟꓯꓼ ꓡꓰ ꓬꓲꓸ ꓪ ꓠꓬ ꓬꓲꓸ ꓡꓲꓽ ꓙꓳ ꓙꓳ ꓬꓰ ꓔꓬ ꓟ ꓓꓰ-ꓟꓯ-ꓗꓯ-ꓢꓰ ꓚꓱꓹ ꓥ ꓡꓳ ꓐꓯ ꓔꓬ ꓢꓰꓽ ꓡꓳ꓿
ꓟꓬ-ꓟ ꓗꓴꓷꓼ ꓗꓪ ꓑ ꓫꓬ ꓐꓴ ꓪ ꓙꓲꓽ ꓙꓳ ꓟ ꓶꓽ ꓕꓲ ꓠꓬꓲ ꓗꓳꓸ ꓑꓳꓸ ꓕꓲ ꓠꓬꓲ ꓞꓳꓸ ꓡꓰ ꓡ ꓔꓬ ꓡꓳ꓿ ꓑ ꓫꓬ ꓐꓴ ꓢꓷꓸ ꓶꓽ (citizens’ right to know) ꓞꓳꓸ ꓡꓰ ꓔꓬ ꓡꓳ꓿
