2022 ꓘꓳꓼ 5 ꓦ 24 ꓠꓬꓲ ꓕꓯꓽ Uvalde, Texas ꓗꓪ ꓙꓳˍ ꓟ ꓢꓳ ꓦꓲ Robb Elementary School ꓗꓪ 18 ꓘꓳꓼ ꓡꓳꓼ ꓢꓴ ꓕꓲ ꓣꓳ ꓠꓰ ꓡ ꓛꓴꓸ ꓐꓶ ꓡ ꓢꓲꓸ ꓙꓳꓥ ꓟꓽ 14 ꓣꓳ꓾ ꓟꓸ ꓢꓴ 1 ꓣꓳ ꓐꓰ ꓡ ꓛꓴꓸ ꓐꓶ ꓒꓽ ꓬꓲꓸ ꓚꓲꓸ ꓛꓬ ꓥ ꓟꓲ ꓫꓵꓻꓳ꓿
“ꓬꓲꓸ ꓠꓰ ꓡ ꓛꓴꓸ ꓐꓶ ꓡ ꓢꓲꓸ ꓟꓶꓽ ꓙꓴ ꓟꓶꓸ ꓙꓴ ꓙꓳꓥ ꓟꓽ 14 ꓣꓳ꓾ ꓟꓸ ꓢꓴ 1 ꓣꓳ ꓢꓰꓼ ꓩꓴ ꓡ ꓪ” ꓐꓰ ꓟꓵꓽ ꓫꓴ ꓙꓵꓽ ꓢꓲꓽ ꓒꓽ Abbott ꓡꓰ ꓐꓯ ꓡꓳ꓿
ꓡ ꓛꓴꓸ ꓐꓶ ꓒꓽ ꓬꓲꓸ ꓟꓬꓱꓺ ꓠꓬ Salvador Ramos ꓥ ꓢꓲ꓾ ꓙꓳꓥꓽ ꓦꓲ ꓗꓪ ꓟꓽ ꓡ ꓢꓰꓽ ꓕꓯꓽ ꓬꓲꓸ ꓮꓸ ꓬꓽ ꓔꓯˍ ꓟꓲ ꓐꓶ ꓢꓰꓼ ꓗꓷ ꓐꓶ ꓐꓯˍ ꓡꓳ꓿
“ꓠꓯꓼ ꓝꓲꓸ ꓗꓪ ꓤ ꓠꓱ ꓔꓯ ꓢꓳ ꓦꓲ ꓗꓪ ꓧꓳꓽ ꓦ ꓡ ꓢꓴ ꓮ ꓐꓽ ꓮ ꓟ ꓐꓴ ꓠꓽ ꓟꓶ ꓘꓶꓼ ꓗꓪˍ ꓟꓲ ꓧꓪꓸ ꓧꓪꓸ ꓓ ꓓ ꓜꓲ ꓡꓯ ꓘꓳ ꓠꓲꓹ ꓫꓵ ꓟ ꓥꓳ꓿ ꓮ ꓟꓶ ꓠꓽ ꓖꓳ ꓡꓱ ꓟꓽ ꓗ ꓬꓰꓳ” ꓐꓰ ꓢꓲꓽ ꓒꓽ Abbott ꓡꓰ ꓐꓯ ꓡꓳ꓿
ꓙꓳꓥꓽ ꓟ 15 ꓣꓳ꓾ ꓟꓯꓼ ꓑꓳꓡꓲꓚꓰ 2 ꓣꓳ ꓐꓰ ꓠꓱꓸ ꓐꓯꓼ ꓠꓻ ꓓꓴ ꓡꓰ ꓢꓴ ꓮ ꓟꓬꓹ ꓔꓯ ꓠꓯ ꓞꓲꓼ ꓦꓲ ꓗꓪ ꓠꓻ ꓫꓬꓹ ꓖꓶ ꓔꓬ ꓡꓳ꓿
Texas ꓟꓵꓽ ꓗꓪ ꓡꓲ-ꓢꓴ ꓮ ꓟꓬꓹ ꓔꓬ ꓢꓲꓸ ꓠꓬꓲꓸ ꓠꓬꓲ ꓠꓬ ꓟꓵꓽ ꓫꓴ ꓖꓳ ꓟ ꓗꓪ ꓠꓲꓹ ꓥꓴꓻ ꓟꓬ ꓥꓴꓻ ꓓꓴ ꓬꓲꓸ ꓓꓽ ꓟ ꓙꓳˍ ꓟ ꓦꓬꓼ ꓠꓬꓲ ꓥ ꓡꓳ꓿
ꓬꓲꓸ ꓚꓰ꓾ ꓮꓐꓚ ꓠꓰꓪꓢ, ꓚꓠꓠ
