ꓮ-ꓡ-ꓐ-ꓟ ꓪ ꓘꓴ ꓦꓲ ꓗꓪ ꓡꓽ ꓛꓴꓸ ꓐꓶ ꓡ꓾ 1 ꓣꓳ ꓫꓵꓻ꓾ 2 ꓣꓳ ꓠꓻ ꓓꓴ ꓡꓰ꓾ ꓡ ꓛꓴꓸ ꓐꓶ ꓒꓽ ꓔꓯ ꓣꓴ ꓟꓶ ꓔꓸ
2022 ꓘꓳꓼ 6 ꓦ 16 ꓠꓬꓲ ꓟꓶ ꓘꓶꓼ 6:20 ꓙꓵꓹ ꓕꓯꓽ ꓴꓢꓮ ꓗꓴꓷꓼ꓾ ꓮ-ꓡ-ꓐ-ꓟ ꓡꓳ ꓒꓱ ꓪ ꓘꓴ ꓦꓲ ꓕꓲ ꓟ ꓗꓪ ꓡꓽ ꓛꓴꓸ ꓐꓶ ꓡ ꓢꓲ꓾ 1 ꓣꓳ ꓫꓵꓻ꓾ 2 ꓣꓳ ꓠꓻ ꓓꓴ ꓡꓰ꓾ ꓡ ꓛꓴꓸ ꓐꓶ ꓒꓽ ꓔꓯ ꓣꓴ ꓟꓶ ꓔꓸ ꓡꓳ꓾ ꓐꓯ ꓡꓳ꓿
ꓬꓲꓸ ꓔꓶꓸ ꓬꓲꓸ ꓙꓵꓹ ꓠꓬ꓾ Vestavia Hills, Alabama ꓗꓪ ꓙꓳˍ ꓟ St. Stephens Episcopal Church ꓪ ꓘꓴ ꓦꓲ ꓜꓲꓼ ꓖꓴ ꓗꓪ ꓟꓶ ꓘꓶꓼ 5-7 ꓙꓵꓹ Boomer Potluck ꓜꓲꓼ ꓓꓴ ꓬꓰ ꓔꓬ ꓕꓯꓽ ꓡꓽ ꓛꓴꓸ ꓐꓶ ꓟ ꓥ ꓡꓳ꓿
ꓴꓢꓮ ꓗꓪ ꓠꓬ ꓕꓱ ꓡꓱ ꓞꓳ ꓢꓰꓼ ꓪ ꓢꓰꓼ ꓡ ꓛꓴꓸ ꓐꓶˍ ꓟ ꓡꓯ ꓫꓵ ꓙꓳ ꓔꓬ ꓠꓬꓲ꓾ ꓡꓽ ꓛꓴꓸ ꓔꓯꓹ ꓕꓵꓼ ꓪ ꓙꓵꓽ ꓗ ꓔꓯ ꓟꓳꓸ ꓡꓯ ꓫꓵ ꓧꓪ ꓙꓱ ꓔꓬ ꓟ ꓥ ꓡꓳ꓿
ꓟꓶ-ꓚꓲ-ꓠ ~ ꓑꓴ-ꓔ-ꓳ ꓟꓯꓼ ꓜꓽ ꓘꓪ ꓚꓰꓹ ꓟꓳ-ꓓꓳ ꓕꓳꓺ ꓔꓯ ꓗꓲꓮ ꓠꓰ 12 ꓧꓪꓹ ꓗꓽ ꓐꓶ꓾ 30 ꓕꓯꓽ ꓢꓲ ꓫꓵꓻ
2022 ꓘꓳꓼ 5 ꓦ 11 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓟꓶ-ꓚꓲ-ꓠ ꓗꓪ ꓐꓰ ꓓꓯꓻ ꓡ ꓟ ꓟꓬ-ꓟ ꓟꓯꓼ ꓜꓽ ꓘꓪ ꓚꓰꓹ ꓟꓳ-ꓓꓳ ꓕꓳꓺ ꓔꓯ ꓗꓲꓮ ꓐꓰ ꓑꓓꓝ ꓡꓰꓽ ꓕꓲꓽ ꓙ ꓖꓴ ꓙꓰ ꓙꓰ ꓡꓽ ꓡꓽ 12 ꓧꓪꓹ ꓗꓽ ꓐꓶ ꓡ ꓢꓲꓸ ꓟꓯꓼ 30 ꓟꓽ ꓞꓲ ꓫꓵꓻꓳ ꓐꓰ ꓦ ꓡꓱ ꓐꓳ ꓓˍ ꓟ ꓓꓳꓽ ꓜꓳ ꓢꓴ ꓐꓴ ꓡꓰ ꓐꓯˍ ꓡꓳ꓿
ꓟꓬ-ꓟ ꓟꓯꓼ ꓜꓽ ꓘꓪ ꓚꓰꓹ ꓟꓳ ꓓꓳ 80 ꓢꓶꓽ ꓔꓯ ꓟꓯꓼ 500 ꓣꓳ ꓛꓲ ꓗꓽ ꓡꓳꓸ ꓙꓰˍ ꓟ ꓥ ꓢꓲ꓾ ꓓꓯꓻ ꓙꓰˍ ꓟ ꓕꓲ ꓙ ꓖꓴ ꓗꓪ 5 ꓧꓪꓹ꓾ ꓫꓶꓸ ꓡ ꓟ ꓕꓲ ꓙ ꓖꓴ ꓗꓪ 7 ꓧꓪꓹ ꓟꓯꓼ ꓢꓰꓼ ꓡꓯ ꓘꓳ ꓠ ꓗꓷ ꓡꓰˍ ꓟ ꓥ ꓡꓳ꓿
ꓗꓲꓮ ꓐꓰ ꓑꓓꓝ ꓐꓴ ꓡꓰꓽ ꓕꓲꓽ ꓙ ꓖꓴ 12 ꓧꓪꓹ ꓗꓽ ꓐꓶꓻ ꓡ ꓟ ꓗꓪ ꓐꓰ ꓘꓰꓽ-ꓓꓴ-ꓬ (Hkin Du Yang) ꓐꓰ ꓒꓳ-ꓚꓸ-ꓬ (Hpung Chyan) ꓘꓹ ꓠꓬꓲꓽ ꓗꓴꓸ ꓚꓸ ꓗꓪ ꓜꓼ-ꓠꓽ-ꓘꓼ (Za Nan Hka) ꓓꓽ ꓖꓴ ꓘꓶꓽ ꓗꓪ 6 ꓦ 10 ꓠꓬꓲ ꓗꓪ ꓐꓶ ꓡꓯ ꓘꓳˍ ꓟ ꓟꓯꓼ ꓘꓶꓽ ꓐꓰ꓾ 6 ꓦ 12 ꓠꓬꓲ ꓟꓮꓲꓽ-ꓕꓮꓳꓽ (Mai Htawng) ꓐꓰ ꓘꓼ-ꓖ-ꓬꓹ (Hka Garan) ꓘꓹ ꓠꓬꓲꓽ ꓗꓴꓸ ꓚꓸ ꓪꓼ-ꓐꓳ (Wa Baw) ꓗꓪ ꓐꓶ ꓡꓯ ꓘꓳˍ ꓟ ꓟꓯꓼ ꓘꓶꓽ ꓗꓪ ꓫꓵꓻ ꓢꓴ꓾ ꓠꓻ ꓓꓴ ꓡꓰ ꓢꓴ ꓮ ꓘꓶꓸ ꓟꓬꓽ ꓡꓳ꓾ ꓐꓯ ꓡꓳ꓿
ꓟꓯꓼ ꓜꓽ ꓘꓪ ꓚꓰꓹ ꓟ ꓗꓪ ꓜꓼ-ꓘꓳ-ꓔꓲꓼ-ꓬꓲꓹ꓾ ꓬꓯ-ꓓꓹ-ꓓ (ꓮ-ꓓ) ꓐꓰ꓾ ꓫꓱ-ꓟꓷ ꓡꓰ ꓢꓯꓼ ꓖꓶꓽ ꓔꓬ ꓟ ꓐꓲ-ꓓꓴ-ꓢꓰꓸ ꓟꓯꓼ ꓐꓴ ꓔꓺ ꓙ ꓔꓬ ꓡꓳ꓾ ꓐꓯ ꓡꓳ꓿
ꓗꓲꓮ ꓕꓲ ꓒꓳꓹ ꓗꓪ ꓐꓰ ꓠꓬ ꓟꓯꓼ ꓒꓱꓻ 7꓾ 10꓾ 22 ꓡꓰꓽ ꓧꓳꓽ ꓪꓴꓸ ꓟꓴ ꓢꓲꓸ ꓑꓓꓝ ꓐꓰ ꓔꓺ ꓡꓯ ꓘꓳ ꓢꓲ꓾ ꓟꓬ-ꓟ ꓟꓯꓼ ꓜꓽ ꓘꓪ ꓦ ꓟꓳꓻ ꓓꓳ ꓕꓳꓺ ꓔꓯ ꓗꓽ ꓐꓶ ꓗꓷ ꓟ ꓥ ꓡꓳ꓿
ꓬꓴ-ꓗ-ꓣꓲꓸ ꓔꓯ ꓢꓯꓼ ꓖꓶ ꓠꓹ ꓟ 3 ꓗꓴꓷꓼ ꓗꓪ ꓟ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓗꓲ-ꓬꓯꓼ ꓗꓪ ꓛꓲ ꓡ
ꓣ-ꓫꓸ ꓔꓯ ꓔꓳꓹ ꓡꓯ ꓘꓳ ꓔꓬ ꓟ ꓬꓴ-ꓗ-ꓣꓲꓸ ꓔꓯ ꓢꓯꓼ ꓖꓶ ꓠꓹ ꓟ ꓩꓽ ꓗꓴꓷꓼ꓾ ꓙ-ꓟꓶ-ꓠꓰ ꓗꓴꓷꓼ ꓐꓰ ꓲ-ꓔ-ꓡꓲ ꓗꓴꓷꓼ ꓧꓳꓽ ꓪꓴꓸ ꓟꓴ ꓢꓴ ꓐꓴ 2022 ꓘꓳꓼ 6 ꓦ 16 ꓠꓬꓲ ꓕꓯꓽ ꓬꓴ-ꓗ-ꓣꓲꓸ ꓗꓴꓷꓼ ꓗꓲ-ꓬꓯꓼ ꓡꓳ ꓒꓱ ꓗꓪ ꓛꓲ ꓡ ꓡꓳ꓿
“ꓕꓱ ꓟ ꓠꓬ ꓮ ꓘꓶꓸ ꓬꓳꓹ ꓚꓲˍ ꓟ ꓬꓲꓸ ꓙꓵꓹ ꓥꓳ꓿ ꓕꓲ ꓠꓲꓹ ꓕꓲ ꓪ ꓥ ꓡꓳ꓾ ꓐꓯˍ ꓟ ꓓꓳꓽ ꓔꓯ ꓥꓪ ꓠꓴ ꓗꓪ ꓐꓰ ꓬꓴ-ꓗ-ꓣꓲꓸ ꓑ ꓫꓬ ꓐꓴ ꓔꓯ ꓢꓷꓸ ꓙ ꓟꓴ ꓙ ꓩꓴ ꓡ ꓟ ꓥꓳ” ꓐꓰ ꓩꓽ ꓗꓴꓷꓼ ꓙꓵꓽ ꓢꓴ ꓟꓯꓼ-ꓘꓳꓸ ꓡꓰ ꓐꓯ ꓡꓳ꓿
