Audio

ꓟꓯꓼ ꓢꓷꓸ ꓠꓲꓹ ꓐꓰ ꓶ ꓤ ꓬꓰ ꓙ ꓡ ꓠꓹ ꓟ ꓠꓴꓖ ꓗꓴꓷꓼ ꓪꓴꓸ ꓓꓵ ꓡꓰꓽ ꓟꓲ ꓠꓯ ꓗꓴꓷꓼ ꓐꓴ ꓔꓯ ꓓꓰꓽ ꓩꓴ ꓡꓻꓳ

TheLisuTimes

ꓑ ꓫꓬ ꓙꓵꓽ ꓪ ꓑ ꓫꓬ ꓡꓲꓸ ꓪ ꓠꓹ ꓟ ꓢꓯꓼ ꓟꓬ ꓑ ꓢꓲꓸ ꓟꓬ-ꓟ ꓟꓯꓼ ꓔꓯ ꓔꓳꓹ ꓡꓯ ꓘꓳ ꓔꓬ ꓟ ꓑ ꓫꓬ ꓟꓯꓼ ꓐꓴ ꓐꓱ ꓶ ꓟꓯꓼ ꓢꓷꓸ ꓠꓲꓹ ꓐꓰ ꓟꓯꓼ ꓓꓶꓽ ꓶ ꓤ ꓬꓰ ꓙ ꓡꓯ ꓐꓰ ꓠꓴꓖ ꓗꓴꓷꓼ ꓪꓴꓸ ꓓꓵ ꓓꓴ-ꓪ ꓡ-ꓫꓲꓸ-ꓡꓼ ꓡꓰꓽ ꓟꓲ ꓠꓯ ꓗꓴꓷꓼ ꓐꓴ ꓔꓯ 2022 ꓘꓳꓼ 7 ꓦ 28 ꓠꓬꓲ ꓕꓯꓽ ꓘꓴ ꓓꓰꓽ ꓩꓴ ꓡ ꓡꓳ꓿

ꓮ-ꓢꓰ-ꓬ ꓡꓰ ꓟꓬ-ꓟ ꓐꓱ ꓶ ꓖꓪ ꓙꓱ ꓙ ꓔꓬ ꓟ ꓟꓬꓱꓽ ꓚꓱꓹ (5) ꓟ ꓠꓬ ꓮ ꓫꓵꓽ ꓡꓲꓸ ꓬꓲꓸ ꓑꓶꓸ ꓟꓽ ꓛꓶꓺ ꓡ ꓠꓬꓲ ꓓꓵꓽ ꓙ ꓫꓬꓹ ꓡꓶꓸ ꓠ ꓔꓸꓳ ꓐꓰ ꓐꓯ ꓩꓴ ꓡ ꓡꓳ꓿

ꓟꓯꓼ ꓠꓰ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓐꓱ ꓶ ꓢꓯꓼ ꓕꓵꓼ ꓢꓴ ꓐꓴ ꓔꓯ ꓐꓱ ꓓꓴꓽ ꓗꓪ ꓢꓰꓼ ꓩꓴ ꓡ ꓟ ꓗꓪ ꓐꓰ ꓟꓬꓽ ꓠꓬꓲ ꓠꓲꓹ ꓟ ꓞꓰꓸ ꓞꓰꓸ ꓢꓯꓼ ꓕꓵꓼ ꓓꓴ ꓗ ꓬꓰꓳ ꓐꓰ ꓐꓯ ꓡꓳ꓿ 

ꓟꓬ-ꓟ ꓟꓯꓼ ꓗꓳ-ꓢꓰ ꓒꓴ ꓪ ꓚꓱꓹ ꓮ ꓙꓵꓽ ꓓꓶꓺ ꓞꓷꓹ ꓩꓴ ꓠꓹ ꓟ꓾ ꓬꓲꓸ ꓔꓯ ꓗꓴꓷꓼ ꓙꓵꓽ ꓜꓴ ꓟꓽ ꓢꓪꓼ ꓖꓶ ꓠꓹ ꓟ ꓥ ꓟꓲ ꓓꓰꓽ ꓔꓸ ꓡꓳ꓿

ꓑ ꓫꓬ ꓮ ꓘꓶꓸ ꓟꓽ ꓫꓸ ꓡꓰ ꓠꓹ ꓟ ꓠꓲꓹ ꓞ ꓬꓰ ꓙ ꓡꓯ ꓐꓰ ꓓꓰꓽ ꓔꓸ ꓡꓳ꓿

ꓡꓳꓸ ꓗꓽ ꓙ ꓗꓳ-ꓢꓰ (15) ꓗꓴꓷꓼ ꓡꓰ ꓞꓳ ꓤ ꓢꓰꓼ ꓢꓴ ꓟꓬ-ꓟ ꓟꓯꓼ ꓗꓳ-ꓢꓰ ꓔꓯ ꓕꓼ ꓩꓴ ꓡ

TheLisuTimes

ꓧꓶꓽ ꓗꓴꓷꓼ ꓐꓰ ꓣ-ꓫꓸ ꓗꓴꓷꓼ ꓐꓴ ꓔꓺ ꓔꓬ ꓟ ꓟꓲ ꓠꓯ ꓗꓴꓷꓼ ꓜꓴ ꓗꓪ ꓐꓰ ꓡꓳꓸ ꓗꓽ ꓙ ꓗꓳ-ꓢꓰ (15) ꓗꓴꓷꓼ ꓠꓲꓹ ꓧꓳꓹ ꓢꓲꓸ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓑꓶꓸ ꓓꓴ ꓐꓱ ꓓꓴꓽ ꓗꓪ ꓡꓴꓽ ꓔꓸ ꓢꓴ ꓔꓯ ꓢꓰꓼ ꓢꓴ ꓟꓬ-ꓟ ꓟꓯꓼ ꓗꓳ-ꓢꓰ ꓔꓯ 2022 ꓘꓳꓼ 7 ꓦ 28 ꓠꓬꓲ ꓕꓯꓽ ꓕꓼ ꓩꓴ ꓡ ꓡꓳ꓿

ꓫꓵꓻ ꓝꓴꓲꓸ ꓖꓶ ꓔꓸ ꓢꓴ ꓐꓴ ꓔꓯ ꓕꓽ ꓢꓰꓼ ꓠꓹ ꓟ ꓮ-ꓢꓰ-ꓬ ꓜꓴ ꓐꓰ ꓠꓱꓸ ꓐꓯꓼ ꓗꓴꓷꓼ ꓮ ꓟꓬꓹ ꓡꓰ ꓓꓰꓽ ꓔꓬꓹ ꓜꓽ ꓟꓶꓽ ꓠꓬꓲꓽ ꓗꓪ ꓢꓰꓼ ꓩꓴ ꓡ ꓟ ꓥ ꓡꓳ꓿

ꓝꓮꓲ ꓮ ꓟꓲ ꓟꓳꓼ ꓡꓳ ꓗꓪ ꓢꓰꓼ ꓪ ꓡꓰ ꓢꓴ ꓜꓯ-ꓬ-ꓔꓳ ꓐꓰ ꓙꓲ-ꓟꓲ ꓐꓴ ꓦꓲ ꓗꓪ ꓙꓰ ꓢꓲꓸ ꓠꓲꓹ ꓫꓸ ꓟꓬ ꓫꓸ ꓔꓬ ꓟ ꓦꓲ ꓘꓴ ꓡ ꓞꓳ ꓔꓯ ꓗꓹ ꓫꓵꓸ ꓠꓰ꓾ ꓡꓳ ꓓꓲ ꓡꓳꓺ ꓠꓰ ꓬꓰ ꓡꓳ꓿ ꓕꓱ ꓟ ꓟꓬ ꓟꓬ-ꓟ ꓟꓯꓼ ꓔꓯ ꓔꓺ ꓢꓴ ꓐꓴ ꓥ ꓟ ꓐꓰ꓾ ꓕꓲ ꓠꓬꓲ 5000 ꓒꓯꓼ ꓣꓴ ꓢꓲꓸ ꓞꓳ ꓘꓹ ꓗꓪ ꓐꓰ ꓪꓽ ꓟꓴ ꓡ ꓢꓴ꓾ ꓞꓳ ꓟꓶꓽ ꓛꓸ ꓡꓸ ꓥ ꓟ Myanmar Now ꓡꓰ ꓚꓲꓸ ꓚ ꓟꓶ ꓔꓸ ꓡꓳ꓿ ꓟꓬ-ꓟ ꓟꓯꓼ ꓔꓯ ꓔꓳꓹ ꓢꓴ ꓔꓯ ꓠꓬ ꓟꓳ ꓓꓳ ꓫꓵꓸ ꓕꓯꓼ ꓢꓰꓼ ꓗꓪ ꓛꓲ ꓬꓰˍ ꓥ ꓟꓲ꓾ ꓟꓯꓼ ꓡꓰ ꓐꓯ ꓟꓴ ꓘꓶꓽ ꓢꓲꓸ ꓫꓵꓻ ꓝꓴꓲꓸ ꓖꓶꓽ ꓗꓷ ꓢꓴ ꓐꓴ ꓬꓲꓸ ꓪ ꓦꓲ ꓘꓴ ꓗꓪ ꓘꓶꓻ ꓡꓶꓽ ꓡ ꓢꓴ ꓔꓯ ꓟꓯꓼ ꓡꓰ ꓮ ꓔꓲꓸˍ ꓟꓲ ꓟꓽ ꓗꓽ ꓙ꓿ 

ꓕꓱ ꓟ ꓑꓶꓸ ꓓꓴ ꓟꓬ-ꓟ ꓟꓯꓼ ꓗꓳ-ꓢꓰ ꓠꓬ ꓑ ꓫꓬ ꓔꓯ ꓛꓴꓽ ꓙꓳ ꓢꓴ ꓢꓪꓼ꓾ ꓟꓲ ꓠꓯ ꓗꓴꓷꓼ ꓐꓴ ꓗꓪ ꓐꓰ ꓖꓪ ꓙꓱ ꓘꓶꓽ ꓔꓯ ꓠ ꓠꓹ ꓟꓽ ꓗꓴꓸ ꓟ ꓡꓳꓸ ꓓꓳ ꓡ ꓡꓳ꓿

Video