Video News

ꓟꓶ-ꓚꓲ-ꓠ ~ ꓑꓴ-ꓔ-ꓳ ꓙ ꓖꓴ ꓑꓲꓸ ꓩꓴ ꓡ꓾ ꓟꓳ ꓓꓳ ꓝꓲꓺ ꓔꓬ

June 8, 2022TheLisuTimes

2022 ꓘꓳꓼ 6 ꓦ 8 ꓠꓬꓲ ꓠꓯꓼ 11 ꓙꓵꓹ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓟꓶ-ꓚꓲ-ꓠ ~ ꓑꓴ-ꓔ-ꓳ ꓙ ꓖꓴ ꓑꓲꓸ ꓩꓴ ꓡ ꓡꓳ꓾ ꓐꓰ ꓟꓳ ꓓꓳ ꓫꓵꓸ ꓢꓴ ꓐꓴ ꓡꓰꓽ ꓐꓯˍ ꓡꓳ꓿

“ꓐꓶ ꓡꓯ ꓘꓳ ꓓꓴ ꓟ ꓠꓽ ꓠꓰ ꓢꓲꓽ-ꓑ-ꓐꓳꓽ ꓢꓲꓸ ꓟꓶ-ꓚꓲ-ꓠ ꓠꓬꓲꓽ ꓗꓴꓸ ꓚꓸ ꓗꓪ ꓥꓳ꓿ ꓢꓲꓽ-ꓑ-ꓐꓳꓽ ꓗꓪ ꓚꓳꓸ ꓟꓳ ꓓꓳ ꓕꓲꓽ ꓟ ꓡꓰꓸ ꓟꓽ ꓙꓻ ꓙꓰ ꓝꓲ ꓡ꓿ ꓟꓳ ꓓꓳ ꓮ ꓡꓻ 40-50 ꓦꓲ ꓛꓲ ꓝꓲꓺ ꓓꓳꓹꓮ ꓥ” ꓐꓰ ꓟꓳ ꓓꓳ ꓫꓵꓸ ꓢꓴ ꓕꓲ ꓣꓳ ꓡꓰꓽ ꓐꓯ ꓡꓳ꓿ 

ꓢꓲꓽ-ꓑ-ꓐꓳꓽ ꓗꓪ ꓐꓰ ꓟꓶ-ꓚꓲ-ꓠ ꓔꓯꓸ ꓢꓲꓺ ꓙ ꓖꓴ ꓫꓱꓽ ꓡ ꓟ ꓟꓬ-ꓟ ꓟꓯꓼ ꓐꓰ ꓐꓲ-ꓓꓴ-ꓢꓰꓸ ꓟꓯꓼ ꓐꓴ ꓔꓯ ꓗꓲꓮ ꓡꓰ ꓗꓽ ꓐꓶꓺ ꓩꓴ ꓡ ꓠꓬꓲ ꓠꓬꓲꓽ ꓛꓱꓽ ꓔꓳꓼ ꓡꓯ ꓘꓳˍ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ꓿

ꓟꓵ ꓘꓶꓽ ꓟꓵꓽ ꓡꓯꓼ ꓑꓴ-ꓔ-ꓳ ꓗꓪ ꓠꓬ ꓙ ꓖꓴ ꓕꓱ ꓡꓱ ꓞꓲꓽ ꓡꓰˍ ꓕꓯꓽ ꓶ ꓤ ꓶ ꓟꓲ ꓒꓵꓽ ꓠꓯꓸ ꓡ ꓚꓰꓼ ꓡꓳ꓿

ꓴꓢ ꓲ-ꓓꓳ ~ ꓑ-ꓢꓲꓼ-ꓩꓰꓼ ꓟꓯꓼ ꓟꓵꓽ ꓙꓵꓽ ꓢꓴ ꓕꓮꓲꓹ ꓗꓪ ꓗꓹ ꓚꓳ ꓔꓬ

June 8, 2022TheLisuTimes

ꓴꓢ ꓲ-ꓓꓳ ~ ꓑ-ꓢꓲꓼ-ꓩꓰꓼ ꓟꓯꓼ ꓟꓵꓽ ꓙꓵꓽ ꓢꓴ ꓟꓯꓼ ꓜꓲꓽ ꓗꓽ Admiral John Aquilino ꓠꓬ ꓕꓮꓲꓹ ꓗꓴꓷꓼ ꓗꓪ 2022 ꓘꓳꓼ 6 ꓦ 7-9 ꓠꓬꓲ ꓗꓪ ꓛꓲ ꓗꓹ ꓚꓳ ꓔꓬ ꓡꓳ꓿ꓒꓴ ꓒꓴ ꓡꓯꓽ ꓡꓯꓽ ꓐꓯ ꓒꓬꓱꓻ ꓔꓸ ꓟ ꓬꓲꓸ ꓑꓶꓸ ꓠꓬ ꓕꓮꓲꓹ ꓗꓴꓷꓼ ꓟꓯꓼ ꓔꓯ ꓪꓴꓽ ꓟꓴ ꓡ ꓝꓲ ꓚꓱꓹ ꓖꓪ ꓙꓱ ꓠꓹ ꓟ ꓐꓯ ꓔꓸ ꓡꓳ꓿ꓓꓳꓽ ꓕꓱ ꓟ ꓔꓯ ꓠꓬ ꓕꓮꓲꓹ ꓗꓴꓷꓼ ꓗꓪ ꓟ ꓴꓢ ꓙ ꓡꓯ ꓘꓳ ꓦꓲ ꓙꓵꓽ ꓪꓽ ꓙꓳ ꓢꓴ ꓐꓴ ꓠꓰ ꓢꓷ ꓙ ꓟꓴ ꓙ ꓔꓸ ꓟ ꓥ ꓡꓳ꓿

Lisu Times App ꓬꓲꓸ ꓫꓵꓼ ꓓꓳ ꓡꓻꓳ

June 7, 2022TheLisuTimes

ꓓꓳꓽ ꓬꓲ ꓫꓵ ꓬꓲ ꓙꓰꓽ ꓛꓳꓽ ꓠꓹ ꓟ Lisu Times Android App ꓬꓲꓸ ꓫꓵꓼ ꓕꓲꓽ ꓟ ꓫꓬꓹ ꓓꓳ ꓩꓴ ꓡ ꓡꓳ꓿

ꓧꓶꓸ ꓕꓯ ꓬꓲꓸ ꓡꓵ ꓕꓲꓽ ꓟ ꓔꓯ ꓟꓬ Jetsi ꓡꓰ ꓜꓯꓻ ꓙ ꓔꓸ ꓟ ꓥ ꓢꓲ꓾ ꓟꓶ ꓤ ꓜꓱꓽ ꓪ ꓡꓰˍ ꓟ ꓥ ꓡꓳ꓿ ꓮ ꓟꓶ ꓬꓲꓸ ꓫꓵꓼ ꓔꓯ ꓠꓬ ꓡꓯ-ꓟꓯ-ꓢꓶꓸ ꓡꓰ ꓜꓯꓻ ꓔꓸ ꓟ ꓥ ꓢꓲ꓾ 6 ꓦ 7 ꓠꓬꓲ ꓕꓯꓽ Playstore ꓗꓪ ꓓꓳ ꓡ ꓟ ꓥ ꓡꓳ꓿

ꓓꓳꓽ ꓵꓺ ꓠꓲꓹ ꓫꓵ ꓢꓴ ꓐꓴ Playstore ꓗꓪ ꓙꓰ ꓢꓲꓸ Lisu Times ꓐꓳ ꓧꓪ ꓢꓲꓸ Install ꓬꓰ ꓪ ꓓ ꓡꓳ꓿

Lisu Times ꓠꓬ ꓡꓲ-ꓢꓴ ꓐꓴ ꓟꓬ ꓢꓶꓽ꓾ ꓠꓸ ꓑꓳꓺ ꓐꓰ꓾ ꓟꓷ ꓠꓷꓹ ꓒꓬꓱꓼ ꓡ ꓠꓹ ꓟ ꓠꓲꓹ ꓡꓱ ꓢꓴ ꓐꓴ ꓡꓰ ꓢꓯꓼ ꓕꓵꓼ ꓔꓬ ꓟ ꓓꓳꓽ ꓐꓯ ꓑꓶꓺ ꓜꓴ ꓕꓲꓽ ꓟ ꓥ ꓡꓳ꓿

Download Free:https://play.google.com/store/apps/details?id=com.lisutimes.the_lisu_times