ꓟꓴ ꓖꓪ ꓐꓳ/ꓖꓪ ꓒꓽ ꓟꓸ ꓒ ꓮ-ꓞꓲ ꓐꓰ Joy Digital Sound Studio ꓐꓴ ꓔꓺ ꓡꓯ ꓘꓳ ꓢꓲꓸ ꓬꓰ ꓩꓴ ꓡ ꓟ ꓡꓲ-ꓢꓴ ꓟꓴ ꓖꓪ ꓖꓪ ꓔꓯꓺ ꓡꓯ ꓘꓳ ꓑꓮꓲꓽ ꓗꓪ ꓬꓲꓸ ꓪꓴꓸ ꓕꓲꓽ ꓕꓳꓼ ꓗꓪ ꓤ (5) ꓣꓳ꓾ ꓤ ꓟꓶꓼ (5) ꓮ ꓙꓵꓽ ꓠꓬ (10) ꓣꓳ ꓢꓲꓻ ꓓꓳ ꓩꓴ ꓡ ꓡꓳ꓿
ꓑꓮꓲ ꓕꓱ ꓟ ꓗꓪ ꓔꓯꓺ ꓡꓯ ꓘꓳ ꓡ ꓢꓴ (31) ꓣꓳ ꓙꓳ ꓢꓲ꓾ ꓢꓲꓻ ꓣꓴ ꓪ ꓢꓴ ꓐꓴ ꓔꓬ ꓖꓴ ꓠꓬ ꓟ-ꓪꓰꓹ-ꓙꓲꓸ꓾ ꓑꓴ-ꓔ-ꓳ꓾ ꓪꓮꓲ-ꓟꓳ꓾ ꓟꓶ-ꓚꓲ-ꓠ꓾ ꓠ-ꓒꓼ-ꓗ꓾ ꓔꓲ-ꓐꓳꓹ ꓐꓰ ꓔꓲ-ꓠ ꓟꓵꓽ ꓗꓪ ꓐꓰ ꓥ ꓡꓳ꓿
ꓮ ꓟꓶ ꓬꓲꓸ ꓟꓶꓽ ꓕꓲ ꓕꓳꓼ ꓗꓪ ꓠꓬ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓡꓰ ꓢꓲꓻ ꓔꓸ ꓟ ꓟꓴ ꓖꓪ ꓔꓯ ꓖꓪ ꓔꓯꓺ ꓡꓯ ꓘꓳ ꓢꓲ꓾ ꓤ (1) ꓣꓳ꓾ ꓟꓶꓼ (1) ꓣꓳ ꓢꓲꓻ ꓓꓴ ꓥ ꓡꓳ꓿ ꓢꓲꓻ ꓪ ꓡꓰ ꓢꓴ ꓐꓴ ꓔꓯ ꓕꓲ ꓣꓳ 500ꓹ000 ꓒꓯꓼ ꓡꓯꓼ ꓫꓴ ꓖꓶ ꓓꓴ ꓥ ꓡꓳ꓿
ꓬꓲꓸ ꓧꓶ ꓢꓪꓼ ꓖꓶ ꓢꓴ ꓐꓴ
“ꓕꓱ ꓡꓱ ꓟꓴꓽ ꓖꓪꓽ ꓖꓪꓸꓹ ꓔꓯꓺ ꓡꓯ ꓘꓳ ꓑꓮꓲꓽ ꓣꓱꓽ ꓬꓰˍ ꓔꓬ ꓟ ꓬꓲꓸ ꓔꓶꓻ ꓙꓱꓼ ꓠꓬ꓾ ꓤꓶꓻ ꓫꓵꓼ ꓡꓲ-ꓢꓴ ꓐꓴ ꓗꓳ ꓡꓳ ꓗꓪ ꓟꓴꓽ ꓖꓪꓽ ꓔꓯꓸ ꓟꓳꓸ ꓓꓸꓹ ꓢꓴ꓾ ꓪꓽ ꓠꓬꓲ ꓢꓴ꓾ ꓢꓯꓼ ꓠꓸꓹ ꓢꓴ꓾ ꓮ ꓟꓬꓹ ꓙꓳ ꓡ꓾ ꓓꓳꓸꓹ ꓡ ꓝꓲ ꓠꓲꓹ ꓫꓵˍ ꓠꓬꓲ ꓥꓳ ꓿ ꓧꓶꓸ ꓕꓯꓽ ꓟ ꓦꓬꓼ ꓠꓬꓲ ꓗꓪ ꓕꓱ ꓡꓱ ꓫꓵꓽ ꓮ ꓟꓬꓹ ꓟꓽ ꓬꓰ ꓖꓶꓽ ꓪ ꓠꓬꓲ ꓡꓲ-ꓢꓴ ꓐꓴ ꓗꓳ ꓡꓳ ꓗꓪ ꓟꓴꓽ ꓖꓪꓽ ꓕꓲꓽ ꓒꓳꓹ ꓗꓪ ꓪꓴꓽ ꓟꓴꓸꓹ ꓡ ꓚꓱꓹ ꓗꓪꓐꓢꓯꓼ ꓐꓽ ꓓꓴ ꓮ ꓟꓬ ꓗꓷ ꓡꓰꓳ꓿ ꓮ ꓟꓶ ꓗꓪ ꓐꓰ ꓠꓬ ꓖꓳ ꓡꓱ ꓟꓽ ꓒꓬꓱꓼ ꓡꓰ ꓝꓲ ꓠꓲꓹ ꓫꓵˍ ꓠꓬꓲ ꓒꓴ ꓫꓵꓻ ꓢꓯꓼ ꓐꓽˍ ꓥ ꓟꓲ ꓚꓲꓸ ꓛꓬꓽ ꓐꓸꓹ ꓡˍ ꓟ ꓕꓲꓽ ꓒꓳꓹ ꓗꓪ ꓐꓰ ꓕꓱ ꓡꓱ ꓛꓲ ꓤꓼ ꓣꓱꓼ ꓬꓰ ꓖꓶꓽ ꓔꓬ ꓟ ꓥꓳ ꓿ ꓢꓯꓼ ꓖꓶꓽ ꓙ ꓓꓴ ꓬꓰ ꓡꓯ ꓿ ꓧꓪꓸ ꓧꓪꓸ꓿” ꓐꓰ ꓧꓳꓽ ꓪꓴꓸ ꓟꓴ ꓢꓴ ꓟꓴ ꓖꓪ ꓐꓳ/ꓖꓪ ꓒꓽ ꓟꓸ ꓒ ꓮ-ꓞꓲ ꓡꓰ ꓐꓯ ꓟꓸ ꓖꓶ ꓡ ꓡꓳ꓿
ꓧꓶꓸ ꓕꓯ ꓥ ꓟꓲ ꓡꓲ-ꓢꓴ ꓟꓴ ꓖꓪ ꓜꓯꓻ ꓔꓯꓺ ꓡꓯ ꓘꓳ ꓑꓮꓲ ꓕꓲꓽ ꓟ ꓬꓰ ꓗꓷ ꓢꓲ꓾ “ꓥꓪ ꓫꓺ ꓔꓵꓸ ꓗꓷꓳ” ꓐꓯˍ ꓟ ꓟꓴ ꓖꓪ ꓡꓰ ꓠꓳꓸ (1) ꓧꓪꓸ ꓡꓰ ꓢꓴ ꓡꓯ-ꓟꓯ ꓮ-ꓡꓰ-ꓟꓬꓽ ꓔꓯ ꓡꓯꓼ ꓫꓴ 5 ꓢꓯꓹ ꓒꓯꓼ꓾ “ꓪ ꓔꓲꓸ ꓬꓰ-ꓢꓴ” ꓐꓯˍ ꓟ ꓟꓴ ꓖꓪ ꓗꓪ ꓐꓰ ꓠꓳꓸ (2) ꓧꓪꓸ ꓡꓰ ꓢꓴ ꓥꓪ-ꓒꓴ-ꓔ ꓔꓯ ꓡꓯꓼ ꓫꓴ 3 ꓢꓯꓹ ꓖꓶ ꓗꓷ ꓡꓳ꓿
ꓟꓴ ꓖꓪ ꓖꓪ ꓔꓯꓺ ꓡꓯ ꓘꓳ ꓔꓸ ꓟ ꓔꓯ Joy Digital Sound Facebook ꓗꓪ ꓛꓳ ꓠꓲꓹ ꓫꓵ ꓠꓬ ꓕꓱ ꓗꓪ ꓥꓰꓸ ꓡꓲꓠꓗ
#ꓓꓳꓽ ꓐꓰ ꓐꓬꓱꓽ ꓬꓲꓸ ꓚꓰ꓾ အားဆီ၊ Joy Digital Sound Studio
