2022 ꓘꓳꓼ 10 ꓦ 8 ꓠꓬꓲ 8:39 – 12:30 ꓗꓪ ꓛꓲ꓾ ꓟꓲ-ꓠꓲ-ꓢꓳ-ꓔ ꓗꓪ Lisu American Association Directors Meeting ꓕꓲꓽ ꓟ ꓣꓱꓽ ꓬꓰ ꓗꓷꓳ꓿
ꓖꓪ ꓙꓱ ꓜꓲꓼ ꓓꓴ ꓬꓰ ꓔꓬ ꓟ
“ꓢꓷꓸ ꓙꓲꓽ ꓙꓳˍ ꓟ ꓕꓲꓽ ꓫꓵꓽ ꓠꓬ꓾ 2023 ꓘꓳꓼ ꓡꓮꓮ ꓡꓳꓽ ꓑꓮꓲꓽ ꓔꓯ ꓗ-ꓡ-ꓩꓴ-ꓠꓲ-ꓬ ꓡꓳ ꓒꓱ ꓗꓪ꓾ 6 ꓦ 30 ꓠꓬꓲ ꓗꓪ ꓐꓰ 7 ꓦ 2 ꓠꓬꓲ ꓗꓪ ꓛꓲ ꓬꓰ ꓠꓹ ꓖꓪ ꓙꓱ ꓪꓽ ꓗꓷꓳ” ꓐꓰ ꓡꓮꓮ ꓟꓬꓱꓽ ꓢꓲꓺ ꓮ-ꓓꓶꓸ ꓙꓬ ꓡꓰ ꓐꓯ ꓟꓸ ꓖꓶ ꓡ ꓡꓳ꓿
ꓜꓲꓼ ꓓꓴ ꓑꓮꓲꓽ ꓖꓳ ꓟ ꓗꓪ ꓠꓬ ꓟꓬꓱꓽ ꓟꓯꓻ ꓢꓴ ꓬꓲꓸ ꓫꓵꓼ ꓢꓲꓻ ꓣꓴˍ ꓟ꓾ ꓝꓮꓲ ꓜꓲꓼ ꓓꓴ ꓖꓳ ꓟ ꓗꓪ ꓔꓺ ꓡ ꓠꓹ ꓫꓵ ꓢꓴ ꓟꓵꓽ ꓗꓳ ꓓꓵ ꓓꓵ ꓗꓪ ꓟ ꓡꓲ-ꓢꓴ ꓫꓵꓽ ꓐꓴ ꓔꓯ ꓴꓢꓮ ꓗꓪ ꓡ ꓠꓹ ꓟ ꓘꓴ ꓕꓳ ꓶ ꓥ ꓟꓲ ꓖꓶꓽ ꓓꓴ ꓖꓪ ꓙꓱ ꓪꓽ ꓔꓸ ꓡꓳ꓾ ꓐꓯˍ ꓡꓳ꓿
“ꓡ ꓠꓲꓹ ꓫꓵ ꓢꓴ ꓐꓴ ꓔꓯ ꓘꓴ ꓕꓳ ꓶ ꓐꓳ ꓖꓶꓽ ꓓꓴ ꓥꓳ꓿ ꓕꓱ ꓡꓱ ꓖꓪ ꓙꓱ ꓪꓽ ꓔꓸꓳ꓿ ꓖꓳ ꓗꓪ ꓟꓬꓱꓽ ꓟꓯꓻ ꓢꓴ ꓜꓴ ꓥ ꓟꓲ ꓬꓲꓸ ꓫꓵꓼ ꓢꓲꓻ ꓣꓴ ꓓꓴ ꓥꓳ꓿ ꓝꓮꓲ ꓖꓪ ꓙꓱ ꓪꓽ ꓔꓸꓳ ꓫꓵꓽ ꓮ ꓟꓬꓹ ꓙꓳˍ ꓥ ꓟꓲ ꓬꓲꓸ ꓝꓲꓸ ꓛꓲˍ ꓕꓯꓽ ꓡꓯ ꓫꓵ ꓢꓷꓸ ꓡ ꓝꓲ ꓓꓴ ꓥꓳ꓿” ꓐꓰ ꓡꓮꓮ ꓟꓬꓱꓽ ꓢꓲꓺ ꓡꓰ ꓐꓯ ꓡꓳ꓿
ꓴꓢꓮ ꓗꓪ ꓛꓲ ꓔꓬ ꓟ ꓡꓲ-ꓢꓴ ꓐꓴ ꓕꓲ ꓠꓲꓹ ꓕꓲ ꓪ ꓧꓶꓹ ꓠꓹ ꓟ꓾ ꓕꓲ ꓣꓳ ꓛꓳ ꓕꓲ ꓣꓳ ꓣꓱꓽ ꓬꓯꓼ ꓡ ꓟ ꓗꓪ ꓬꓰ ꓙ ꓔꓺ ꓙ ꓡꓯ ꓘꓳ ꓠꓹ ꓟ꓾ ꓪꓴꓽ ꓟꓴ ꓡ ꓚꓱꓹ ꓐꓱ ꓶ ꓟꓵ ꓗꓳ ꓓꓵ ꓓꓵ ꓗꓪ ꓟ ꓡꓲ-ꓢꓴ ꓬꓲꓸ ꓣꓳ꓾ ꓬꓲꓸ ꓜꓴ ꓔꓯ ꓙ ꓡꓯ ꓘꓳ꓾ ꓢꓯꓼ ꓖꓶ ꓡꓯ ꓘꓳ ꓠꓹ ꓟ ꓓꓵꓽ ꓙ ꓟꓳꓸ ꓙ ꓢꓲꓸ Lisu American Association (ꓡꓮꓮ) ꓔꓯ 2013 ꓘꓳꓼ ꓕꓯꓽ ꓒꓴ ꓪꓴꓸꓔꓴ ꓔꓸ ꓟ ꓥ ꓡꓳ꓿
