ꓟꓬꓱ ꓓꓳꓽ ꓙꓳˍ ꓟ ꓟꓴ ꓖꓪ ꓐꓳ/ꓖꓪ ꓢꓴ Coco Lee ꓠꓬ 2023 ꓘꓳꓼ 7 ꓦ 5 ꓠꓬꓲ ꓕꓯꓽ ꓠꓲꓹ ꓟ ꓙꓬ ꓠꓻ ꓫꓵꓽ ꓑꓶꓸ ꓓꓴ ꓬꓲꓸ ꓬꓱꓹ ꓬꓲꓸ ꓢꓰꓼ ꓫꓵꓻꓳ꓿
ꓚꓳꓚꓳ ꓡꓰꓰ
ꓞꓲ ꓠꓲꓹ 2023 ꓘꓳꓼ ꓠꓬ ꓬꓲꓸ ꓞꓲꓼ 48 ꓘꓳꓼ꓾ ꓬꓲꓸ ꓟꓴ ꓖꓪ ꓐꓳ/ꓖꓪ ꓡ ꓟ 30 ꓘꓳꓼ ꓐꓲˍ ꓟ ꓕꓲꓽ ꓘꓳꓼ ꓥ ꓡꓳ꓿
ꓬꓲꓸ ꓠꓬꓲ ꓟ Carol ꓐꓰ Nancy ꓠꓬꓲꓽ ꓣꓳ ꓙꓳ ꓢꓲ꓾ ꓬꓲꓸ ꓪ ꓡꓰ꓾ “ꓥ ꓠꓴ ꓮ ꓙꓲꓸ ꓠꓽ ꓠꓻ ꓫꓵꓽ ꓔꓯ ꓟꓳꓸ ꓓꓻ ꓒꓽ ꓥꓪꓸ ꓢꓲꓸ ꓫꓬꓹ ꓔꓬ ꓥ ꓟꓲ꓾ ꓬꓲꓸ ꓠꓲꓹ ꓟ ꓠꓯꓸꓼ ꓗꓪ ꓟ ꓥꓶꓸˍ ꓟ ꓠꓲꓽ ꓡꓰ ꓬꓲꓸ ꓔꓯ ꓓꓶꓽ ꓧꓪꓸ ꓡꓰꓳ” ꓐꓰ ꓐꓯ ꓡꓳ꓿
ꓬꓲꓸ ꓠꓬ ꓧꓳ-ꓗꓳ ꓗꓪ ꓙꓳˍ ꓟ Queen Mary Hospital ꓗꓪ ꓫꓵꓻ ꓟ ꓥ ꓡꓳ꓿ 7 ꓦ 2 ꓠꓬꓲ ꓗꓪ ꓐꓰ ꓟꓽ ꓢꓷꓸ ꓡ ꓬꓲꓼ ꓓꓳꓽ ꓔꓬ ꓢꓲ꓾ 7 ꓦ 5 ꓠꓬꓲ ꓕꓯꓽ ꓢꓯꓼ ꓟ ꓖꓴ ꓬꓰ ꓡꓳ꓿
ꓬꓲꓸ ꓔꓯ 1975 ꓘꓳꓼ ꓕꓯ ꓬꓲꓸ ꓟꓹ ꓟ ꓧꓶꓽ ꓟ꓾ ꓐꓹ ꓐ ꓟꓶ-ꓡꓯ-ꓫ ꓒꓽ ꓐꓴ ꓗꓪ ꓐꓰ ꓧꓳ-ꓗꓳ ꓗꓪ ꓦꓵꓻ ꓗꓷꓳ꓿ ꓬꓲꓸ ꓞꓲꓼ 9 ꓘꓳꓼ ꓙꓳ ꓕꓯ ꓬꓲꓸ ꓐꓹ ꓐ ꓫꓵꓻ ꓢꓲ꓾ ꓬꓲꓸ ꓟꓹ ꓟ ꓐꓰ ꓬꓲꓸ ꓠꓬꓲ ꓟ 2 ꓫꓵꓸ ꓔ ꓔꓲꓺ ꓴꓢꓮ ꓗꓴꓷꓼ꓾ ꓢ-ꓩ-ꓣ-ꓢꓰ-ꓢ-ꓚꓳ ꓗꓪ ꓚꓲꓸ ꓡ ꓡꓳ꓿ ꓬꓲꓸ ꓠꓬ University of California, Irvine ꓗꓪ ꓢꓷꓸ ꓠꓲꓹ ꓕꓳ ꓶ ꓢꓳ ꓗꓷꓳ꓿
1996 ꓘꓳꓼ ꓕꓯ Sony Music Entertainment ꓗꓪ ꓐꓰ ꓫꓬꓹ ꓓꓳ ꓩꓴ ꓡ ꓟ ꓬꓲꓸ ꓟꓴ ꓖꓪ ꓘꓪꓸ ꓠꓬ ꓖꓳ ꓕꓲ ꓘꓳꓼ ꓮ-ꓢꓲ-ꓬ ꓟꓵꓽ ꓗꓪ ꓮ ꓘꓶꓸ ꓪꓴꓽ ꓙꓲˍ ꓟ ꓟꓴ ꓖꓪ ꓘꓪꓸ (best-selling album) ꓥ ꓡꓳ꓿
2011 ꓘꓳꓼ ꓕꓯ ꓗ-ꓠꓯ-ꓓ ꓗꓪ ꓐꓰ ꓞꓳ ꓐꓳ ꓒꓽ ꓕꓲ ꓣꓳ ꓔꓯ ꓡꓯ ꓒꓯꓹ ꓝꓸ ꓗꓷꓳ꓿
ꓬꓲꓸ ꓕꓲ ꓤꓶ ꓡꓱꓸꓼ ꓗꓪ ꓡꓯꓼ ꓫꓴ ꓮ ꓟꓬꓹ ꓘꓳ ꓣꓴ ꓟꓶ ꓢꓴ꓾ ꓬꓲꓸ ꓟꓴ ꓖꓪ ꓮ ꓟꓬꓹ ꓪꓴꓽ ꓪ ꓢꓴ꓾ ꓔꓬ ꓢ ꓙꓳ ꓢ ꓢꓴ ꓔꓯ ꓡꓯ ꓒꓯꓹ ꓝꓸ ꓪ ꓢꓴ ꓥ ꓡꓳ ꓐꓯ ꓥ ꓟꓲ꓾ ꓠꓲꓹ ꓟ ꓙꓬꓻ ꓠꓻ ꓫꓵꓽ ꓔꓯ ꓔꓳꓹ ꓧꓪꓸ ꓟꓽ ꓘꓴ ꓠꓬꓲ ꓬꓲꓸ ꓔꓱꓹ ꓬꓲꓸ ꓢꓰꓼ ꓫꓵꓻ ꓟ ꓥꓳ꓿
ꓕꓲꓽ ꓟꓲ ꓠꓯ ꓗꓪ ꓠꓲꓹ ꓟ ꓙꓬ ꓠꓻ ꓫꓵꓽ ꓔꓳꓹ ꓜꓳꓽ ꓔꓬ ꓢꓴ꓾ ꓞꓲꓼ ꓔꓯ ꓠꓲꓹ ꓘꓪ ꓫꓵꓻ ꓟꓽ ꓐ ꓡ ꓢꓴ꓾ ꓚꓲꓸ ꓛꓬ ꓔꓱꓹ ꓚꓲꓸ ꓛꓬ ꓢꓰꓼ ꓠꓹ ꓟ ꓚꓴ ꓬꓲꓹ ꓓꓶꓽ ꓔꓬ ꓢꓴ ꓐꓯ ꓖꓴ ꓟꓽ ꓓ ꓙꓳ ꓡ ꓡꓳ꓿
