Category: International

ꓜ-ꓡꓯ-ꓢꓲ-ꓗꓲ (Volodymyr Zelenskyy) ꓠꓬ ꓬꓴ-ꓗ-ꓣꓲꓸ ꓗꓪ ꓐꓰ ꓧꓹ ꓙꓰ ꓢꓲꓸ ꓣ-ꓫꓸ ꓔꓯ ꓔꓺ ꓙꓰ ꓠꓲꓹ ꓫꓵ ꓟ ꓑꓶꓸ ꓓꓴ ꓮ ꓕꓯꓽ ꓕꓯꓽ ꓟꓯꓼ ꓢꓰꓼ ꓡꓯ ꓘꓳꓔꓬ ꓟ ꓬꓴ-ꓗ-ꓣꓲꓸ ꓐꓶꓽ ꓓꓳ ꓕꓲ ꓟꓵꓽ ꓗꓪ ꓢꓲ ꓡꓲꓹ ꓟ ꓙꓳ ꓡ ꓝꓲ ꓓꓴ ꓥꓳ ꓐꓰ ꓙ ꓟꓳ ꓘꓶꓽ ꓖꓶꓽ ꓢꓲꓸ ꓢꓲꓽ ꓒꓽ ꓢꓲꓻ ꓣꓴ ꓑꓮꓲ ꓗꓪ ꓧꓪꓸ ꓡꓰ ꓢꓴ꓾ 2019 ꓘꓳꓼ 5 ꓦ ꓕꓯꓽ ꓬꓴ-ꓗ-ꓣꓲꓸ ꓗꓴꓷꓼ ꓙꓵꓽ ꓢꓴ ꓒꓬꓱꓼ ꓡ ꓢꓴ ꓥ ꓡꓳ꓿ ꓬꓲꓸ ꓢꓯ ꓠ ꓠꓹ ꓓꓴ(ꓮꓴꓓꓲꓳ) Video ꓧꓶꓸ ꓕꓯ ꓬꓲꓸ ꓠꓬ ꓐꓬꓱꓽ ꓢꓯꓸ ꓗꓪ ꓪꓽ ꓢꓯ ꓡꓲꓹ ꓥꓳꓽ ꓓꓶꓼ ꓒꓽ (comedian) ꓕꓲ ꓣꓳ ꓥꓳ꓿  ꓬꓲ ꓔꓯ ꓑ ꓫꓬ ꓐꓴ ꓮ ꓟꓬꓹ ꓢꓷꓸ ꓡ ꓟ ꓠꓬ ꓢꓯꓸ ꓐꓬꓱꓽ ꓕꓲ ꓟ ꓑꓶꓸ ꓓꓴ ꓥꓳ꓿ ꓢꓯꓸ ꓐꓬꓱꓽ ꓖꓳ ꓟ ꓗꓪ ꓬꓲꓸ ꓠꓬ ꓙꓳꓥꓽ ꓟꓸ ꓒꓽ ꓕꓲ ꓣꓳ ꓥ ꓢꓲꓸ ꓟꓽ ꓥꓳꓡꓳꓸ ꓔꓸ ꓟ ꓗꓪ ꓗꓴꓷꓼ ꓙꓵꓽ ꓢꓲꓽ ꓒꓽ ꓒꓬꓱꓼ ꓡ ꓟ ꓚ ꓟꓲꓽ ꓬꓰ ꓔꓸ ꓡꓳ꓿  ꓗꓴꓷꓼ ꓢꓲꓽ ꓒ ꓢꓲꓻ ꓣꓴ ꓑꓮꓲ ꓗꓪ ꓥ ꓟꓲ ꓬꓲꓸ ꓠꓬ ꓬꓲꓸ ꓢꓯꓸ ꓐꓬꓱꓽ ꓗꓪ ꓟ ꓤꓹ ꓡꓯꓼ ꓡꓰ ꓐꓰ꓾ ꓗꓴꓷꓼ ꓗꓪ ꓘꓶꓽ ꓕꓴꓸ ꓜꓽ ꓢꓴ ꓔꓯ ꓠꓲꓹ ꓜꓳ ꓢꓴ ꓕꓲ ꓣꓳ ꓡꓰꓐꓰ ꓫꓸ ꓕꓱ꓾ ꓬꓰ ꓟꓸ ꓖꓶˍ ꓡꓳ꓿ ꓖꓳ ꓟ ꓑꓶꓸ ꓓꓴ ꓑ ꓫꓬ ꓐꓴ ꓬꓲ ꓔꓯ ꓠꓲꓹ ꓠꓵ ꓟꓬꓱ ꓓꓳꓽ ꓖꓶ ꓢꓲꓸ ꓢꓲꓻ ꓣꓴ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓴ-ꓗ-ꓣꓲ ꓐꓱ ꓶ ꓣ-ꓫꓸ ꓠꓬ ꓛꓴꓽ ꓙꓳ ꓢꓴ ꓗꓴꓷꓼ ꓥ ꓡꓳ꓿ 2014 ꓘꓳꓼ ꓕꓯ ꓬꓴ-ꓗ-ꓣꓲꓸ ꓟꓵꓽ ꓘ-ꓣ-ꓟꓲ-ꓬ ꓔꓯ ꓣ-ꓫꓸ ꓡꓰ ꓦꓴ ꓔꓯꓹ ꓙꓰˍꓡꓳ꓿ ꓜ-ꓡꓯ ꓢꓲ-ꓗꓲ ꓐꓰ ꓑꓴ-ꓔꓲ ꓠꓬ 2019 ꓘꓳꓼ 9 ꓦ ꓕꓯꓽ ꓜꓲ ꓡꓯ ꓘꓳ ꓢꓲꓸ ꓬꓴ-ꓗ-ꓣꓲꓸ ꓐꓶꓽ ꓓꓳ ꓟꓯꓼ ꓘꓶꓽ ꓗꓪ ꓠꓬꓲꓽ ꓛꓱꓽ ꓡꓰ ꓣꓴ ꓟꓶ ꓔꓸ ꓟ ꓟꓯꓼ ꓐꓴꓔꓯ ꓑꓺ ꓡꓯ ꓘꓳ ꓗꓷꓳ꓿ ꓕꓱ ꓡꓱ ꓜꓲ ꓡꓯ ꓘꓳ ꓠꓹ ꓟ ꓠꓬ France ꓐꓰ Germany ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓖꓪ ꓙꓱ ꓙ ꓢꓲꓸ ꓒꓬꓱꓼ ꓡ ꓟ ꓥꓳ꓿ ꓖꓳ ꓡꓱ ꓥꓟꓲ ꓖꓪ ꓙꓱ ꓜꓲꓼ ꓓꓴ 9 ꓙꓵꓹ ꓬꓰˍ ꓟ ꓘꓴꓽ ꓗꓪ ꓜ-ꓡꓯ ꓢꓲ-ꓗꓲ ꓐꓰ ꓑꓴ-ꓔꓲ ꓠꓬ ꓒꓴ ꓒꓴ ꓡꓯꓽ ꓡꓯꓽ꓾ ꓗꓴ ꓗꓴ ꓓꓲ ꓓꓲ ꓟꓽ ꓕꓱ ꓡꓯ ꓘꓳ꓿ 2022 ꓘꓳꓼ 1 ꓦ ꓗꓪ ꓜ-ꓡꓯ ꓢꓲ-ꓗꓲ ꓠꓬ ꓴꓢꓮ ꓐꓶꓽ ꓗꓴꓷꓼ ꓔꓯ ꓟꓳꓸ ꓢꓲꓽ ꓒꓽ ꓐꓶ-ꓡꓲ-ꓗꓲ ꓔꓯ ꓜꓲ ꓡꓯ ꓘꓳ ꓡꓳ꓿ ꓣ-ꓫ ꓠꓬ ꓬꓴ-ꓗ-ꓣꓲꓸ ꓔꓯ ꓓꓶꓽ ꓡ ꓔꓳꓼꓟ ꓴꓢꓮ ꓛꓽ ꓒꓽ ꓐꓴ ꓚꓹ ꓪ ꓔꓸ ꓠꓬꓲ ꓖꓪ ꓙꓱ ꓡ ꓟ ꓥ ꓡꓳ꓿ ꓝꓮꓲ ꓠꓮꓔꓳ ꓗꓪ ꓓꓵꓽ ꓠꓹ ꓟ ꓢꓯꓼ ꓕꓵꓼ ꓡ ꓔꓬ ꓟ ꓬꓴ-ꓗ-ꓣꓲꓸ ꓔꓯ ꓣ-ꓫꓸ ꓠꓲꓹ ꓟ ꓧꓶ ꓔꓬꓡꓳ꓿ ꓴꓢꓮ ꓛꓽ ꓒꓽ ꓐꓴ ꓡꓰ ꓢꓪꓼ ꓔꓸ ꓟ ꓡꓰ ꓐꓰ 2022 ꓘꓳꓼ 2 ꓦ 24 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓣ-ꓫ ꓟꓯꓼ ꓐꓴ ꓣꓴ-ꓗ-ꓣꓲꓸ ꓗꓴꓷꓼ ꓔꓯ ꓓꓶꓽ ꓩꓴ ꓡ ꓡꓳ꓿ ꓴꓢꓮ ꓡꓰ ꓜ-ꓡꓯ ꓢꓲ-ꓗꓲ ꓐꓰ ꓬꓲꓸ ꓕꓲ ꓦꓲ ꓢꓴ ꓔꓯ ꓚꓬꓴꓹ ꓙ ꓠꓹ ꓟ ꓢꓯꓼ ꓕꓵꓼ ꓙ ꓥ ꓟꓲ꓾ ꓜ-ꓡꓯ ꓢꓲ-ꓗꓲ ꓟꓽ ꓘꓳ ꓣꓴ꓿ ꓬꓲ ꓠꓬ ꓟꓯꓼ ꓐꓵ ꓞꓲꓽ ꓖꓪ ꓔꓸ ꓢꓲꓸꓟꓵꓽ ꓦꓴ ꓡ ꓢꓴ ꓣ-ꓫꓸ ꓔꓯ ꓔꓳꓼ ꓡꓯ ꓘꓳ ꓔꓬ ꓟ ꓬꓴ-ꓗ-ꓣꓲꓸ ꓟꓯꓼ ꓐꓴ ꓔꓯ ꓟꓯꓼ ꓘꓶꓽ ꓗꓪ ꓢꓯꓼ ꓖꓶ ꓔꓬ ꓡꓳ꓿ ꓚꓲ ꓛꓬ ꓢꓯꓼ ꓟꓬ ꓖꓶꓽ ꓢꓲꓸ ꓧꓳꓽ ꓪꓴꓸꓟꓴ ꓔꓬ ꓟ ꓜ-ꓡꓯ ꓢꓲ-ꓗꓲ ꓔꓯ ꓟꓬꓱ ꓓꓳꓽ ꓖꓶ ꓢꓴ ꓙꓳˍ ꓟ ꓰ ꓐꓰ꓾ ꓕꓼ ꓢꓴˍ ꓟꓲ ꓙꓳ ꓡꓳ꓿…