(1) ꓬꓲ ꓠꓽ ꓧꓪꓸ ꓧꓪꓸ ꓓ ꓓ ꓔꓸ ꓠꓰ ꓚꓳꓦꓲꓓ-19 ꓠꓻ ꓓꓱꓽ ꓟꓽ ꓙꓳ꓿
ꓕꓱ ꓡꓱ ꓓꓵꓽ ꓙ ꓟ ꓠꓬ ꓟꓽ ꓜꓳ꓿ ꓕꓲ ꓠꓬꓲ ꓗꓪ ꓠꓻ ꓓꓱꓽ ꓙꓳ ꓔꓬ ꓟ ꓚꓲꓸ ꓚ ꓟꓶ ꓡꓰ ꓢꓴ 5000 ꓟꓽ ꓞꓲ ꓟ ꓠꓬ꓾ ꓠꓯ ꓞꓲꓼ ꓦꓲ ꓗꓪ꓾ ꓞꓳ ꓠꓻ ꓔꓬ ꓗꓪ꓾ ꓞꓳ ꓫꓵꓻ ꓫꓺ ꓔꓶꓸ ꓗꓪ ꓙꓰ ꓗꓷ ꓢꓴˍ ꓡꓰꓽ ꓟꓽ ꓥ꓿ ꓬꓲꓸ ꓪ ꓔꓯ ꓮ ꓗꓪ ꓐꓰ ꓚꓲꓸ ꓡ ꓟ ꓬꓲꓸ ꓪ ꓟꓽ ꓢꓷꓸ꓿ ꓐꓯ ꓠꓲꓹ ꓫꓵ ꓟ ꓠꓬ ꓞꓳ ꓠꓻ ꓔꓯ ꓜꓲ ꓡꓯ ꓘꓳ ꓟ ꓟꓽ ꓥ ꓥ꓾ ꓧꓪꓸ ꓧꓪꓸ ꓓ ꓓ ꓔꓬ ꓢꓴ ꓐꓴ ꓔꓯ ꓡꓰꓽ ꓜꓲ ꓡꓯ ꓘꓳ ꓥ ꓟꓲ ꓚꓲꓸ ꓡ ꓡꓳ꓿ ꓖꓳ ꓟ ꓑꓶꓸ ꓓꓴ ꓬꓲꓸ ꓒꓬꓱꓽ ꓔꓯ ꓡꓳꓸ ꓠꓬꓲ ꓢꓲ꓾ ꓚꓳꓦꓲꓓ-19 ꓙꓳ ꓢꓴ ꓟꓽ ꓥ ꓐꓰ ꓢꓪꓼ ꓟ ꓠꓬ꓾ ꓟꓽ ꓜꓳ꓿ ꓚꓲꓸ ꓡ ꓟ ꓟꓬꓽ ꓠꓬꓲ 100 ꓗꓪ ꓐꓰ 90 ꓩꓴꓸ ꓠꓬ ꓧꓪꓸ ꓧꓪꓸ ꓓ ꓓ ꓗꓹ ꓢꓴ ꓗꓪ ꓐꓰ ꓕꓲ ꓝꓸ ꓚꓲꓸ ꓡ ꓟ ꓥꓳ=
ꓖꓳ ꓟ ꓑꓶꓸ ꓓꓴ ꓮ ꓟꓶ ꓜꓲ ꓡꓯ ꓘꓳ ꓡ ꓟ ꓡ ꓞꓳ ꓮ ꓙꓵꓽ ꓠꓬ ꓚꓳꓦꓲꓓ-19 ꓙꓳ ꓢꓴ ꓥꓳ ꓐꓰ ꓢꓪꓼ ꓢꓲꓸ ꓮ ꓙꓵꓽ ꓢꓴ ꓟꓮꓢꓗ ꓑꓲꓸ꓾ ꓡꓯꓽ ꓒꓯꓹ ꓕꓽ ꓧꓪꓸ꓾ ꓶꓽ ꓤ ꓗꓪ ꓐꓰ ꓙ ꓡꓯ ꓘꓳ꓾ ꓡꓯ ꓒꓯꓹ ꓔꓯ ꓢꓸ-ꓑꓲꓸ-ꓬꓸ ꓠꓰ ꓟꓽ ꓠꓽ ꓠꓽ ꓞꓲꓽ ꓠꓯ ꓡꓳ꓿
(2) ꓥꓪ ꓠꓽ ꓢꓯꓼ ꓙꓳ ꓢꓴ ꓥ ꓠꓬꓲ ꓮ ꓫꓵꓽ ꓟꓽ ꓛꓲ꓿
ꓚꓲ ꓛꓬ ꓠꓬ ꓢꓯꓼ ꓙꓳ ꓔꓬ ꓡꓳ ꓓꓵꓽ ꓙ ꓥ ꓟꓲ ꓠꓻ ꓘꓵ ꓠꓬꓲꓽ ꓕꓴꓽ ꓗꓪ ꓐꓰ ꓢꓯꓼ ꓦ ꓢꓴ ꓮ ꓙꓵꓽ ꓢꓯꓼ ꓦ ꓫꓸ ꓡ ꓕꓯ ꓮ ꓫꓵꓽ ꓥꓳ ꓡꓳꓸ ꓓꓴ ꓙꓳ ꓢꓰꓽ ꓡ? ꓠꓻ ꓓꓱꓽ ꓠꓬ ꓐꓵꓼ ꓟꓵ ꓢꓯꓼ ꓐꓽ ꓡꓰ ꓝꓲ꓾ ꓢꓯꓼ ꓦ ꓫꓸ ꓡꓰ ꓝꓲ ꓟ ꓑꓶꓸ ꓓꓴ ꓙꓲ ꓣꓴ ꓓꓴ ꓙꓳ ꓡꓳ꓿ ꓥꓪ ꓠꓴ ꓠꓽ ꓮ ꓫꓵꓽ ꓞꓳ ꓤ ꓥ ꓠꓬꓲ꓾ ꓮ ꓡꓲ ꓢꓯꓼ ꓙꓳ ꓠꓬꓲ ꓚꓳꓦꓲꓓ-19 ꓟꓽ ꓚꓲꓸ ꓡ ꓐꓰ ꓓꓵꓽ ꓙ ꓟ꓾ ꓚꓳꓦꓲꓓ-19 ꓑꓶꓸ ꓓꓴ ꓟꓽ ꓫꓵꓻ ꓡ ꓐꓰ ꓓꓵꓽ ꓙ ꓟ ꓠꓬ ꓟꓽ ꓜꓳ꓿ ꓖꓳ ꓓꓱꓽ ꓠꓵꓹ ꓒꓽ ꓢꓯꓼ ꓙꓳ ꓪꓽ ꓠꓬꓲ ꓢꓴ ꓮ ꓟꓬꓹ ꓫꓵꓻ ꓖꓴꓳ꓿ ꓕꓱ ꓡꓱꓳ ꓫꓵꓽ ꓟꓽ ꓜꓳ ꓟ ꓓꓵꓽ ꓙ ꓚꓱꓹ ꓔꓯ ꓘꓳ ꓣꓴ ꓢꓲꓸ ꓚꓲꓸ ꓛꓬ ꓢꓯꓼ ꓟꓬ ꓔꓯ ꓑꓺ ꓩꓴꓽ ꓟꓽ ꓓ꓿ ꓚꓲ ꓛꓬ ꓢꓯꓼ ꓙꓳ ꓟ ꓔꓯ ꓮ ꓘꓶꓸ ꓦ ꓡꓱ ꓐꓳ ꓢꓲꓸ ꓠꓻ ꓓꓱꓽ ꓔꓯ ꓟꓽ ꓤ ꓟꓳ ꓟꓳ ꓑꓶꓸ ꓟꓽ ꓓ꓿
(3) ꓦ ꓡꓱ ꓢꓴ ꓔꓯ ꓟꓽ ꓠꓻ ꓡ꓿ ꓠꓻ ꓡ ꓖꓶ ꓟꓽ ꓫꓵꓻ ꓡ꓿
ꓕꓯ ꓢꓲ ꓗꓪ ꓟ ꓐꓯ ꓘꓶ ꓠꓬ ꓡ ꓞꓳ ꓮ ꓟꓬꓹ ꓔꓯ ꓧꓶꓸ ꓙꓰ ꓝꓲ ꓟ ꓘꓶꓽ꓾ ꓟꓽ ꓜꓳ ꓟ ꓐꓯ ꓘꓶ꓾ ꓗꓶꓸ ꓘꓶꓽ ꓥ ꓡꓳ꓿ ꓚꓳꓦꓲꓓ-19 ꓠꓬ ꓪꓴ-ꓢ ꓦ ꓡꓱ ꓢꓴ꓾ ꓟꓽ ꓦ ꓡꓱ ꓢꓴ꓾ ꓞꓳ ꓫꓵꓽ ꓒꓯ ꓟꓽ ꓗꓴꓸ ꓟ ꓠꓻ ꓓꓱꓽ ꓥ ꓡꓳ꓿ ꓮ ꓡꓲ ꓟ ꓐꓯ ꓥ ꓟꓲ ꓠꓻ ꓐꓶꓽ ꓓꓲ ꓜꓳꓻ ꓥꓪꓽ ꓡꓰ ꓠꓬ ꓠꓻ ꓡ ꓥꓳ꓿
2 ꓘꓳꓼ ꓟ ꓘꓴꓽ ꓗꓪ ꓦ ꓡꓱ ꓚꓱꓹ ꓗꓪ ꓐꓰ ꓕꓱ ꓡꓱꓳ ꓫꓵꓽ ꓗꓶꓸ ꓘꓶꓽ ꓕꓱ ꓔꓬ ꓢꓴ ꓟꓸ ꓒ ꓟꓸ ꓟ ꓮ ꓟꓬꓹ ꓢꓯꓼ ꓟꓬ ꓖꓴ ꓡꓰꓳ꓿ ꓕꓱ ꓟ ꓔꓯ ꓠꓻ ꓠꓹ ꓟꓽ ꓓ꓿ ꓕꓱ ꓡꓱꓳ ꓫꓵꓽ ꓧꓶꓸ ꓙꓰ ꓟ ꓦ ꓡꓱ ꓚꓱꓹ ꓐꓰ ꓓꓵꓽ ꓙ ꓚꓱꓹ ꓑꓶꓸ ꓓꓴ ꓦ ꓦ ꓟꓳꓽ ꓟꓳ꓾ ꓟꓶ ꓟꓶ ꓙꓲꓽ ꓙꓲꓽ ꓑꓶꓸ ꓟꓽ ꓟꓽ ꓓ꓿ ꓢꓴ ꓔꓯ ꓥ ꓟꓲ ꓫꓴꓸ ꓟꓽ ꓓ꓿
ꓟꓸ ꓟꓲ ꓚ ꓒꓽ ꓐꓴ ꓠꓴ ꓚꓲ ꓛꓬ ꓙꓵꓻ ꓠꓬ ꓚꓲꓸ ꓛꓬ ꓟꓬꓱꓽ ꓬꓰ꓿ ꓠꓻ ꓔꓬ ꓢꓴ ꓐꓴ ꓔꓯ ꓣꓱꓽ ꓙ꓿ ꓑꓑꓰ ꓠꓬ ꓮ ꓔꓳ ꓚꓰꓼ ꓔꓸ ꓟ ꓟꓽ ꓥ꓿ ꓠꓯ ꓞꓲꓼ ꓟꓸ ꓒ ꓟꓸ ꓟ ꓐꓴ ꓠꓬ ꓮ ꓔꓳ ꓔꓳ ꓫꓵꓽ ꓢꓳ ꓔꓸ ꓡꓳ ꓟꓽ ꓥ꓿ ꓬꓲ ꓪ ꓮ ꓘꓶꓸ ꓢꓳ ꓔꓸ ꓢꓴ꓾ ꓮ ꓘꓶꓸ ꓤ ꓟꓳ ꓗꓴꓸ ꓢꓴ ꓡꓲꓸ ꓤ ꓟꓳ ꓟꓽ ꓜꓳ ꓟ ꓕꓲ ꓖ ꓖ ꓗꓷ ꓡꓰ ꓟ ꓑꓶꓸ ꓓꓴ ꓠꓻ ꓚꓲꓸ ꓙꓰ ꓢꓲ꓾ ꓫꓵꓻ ꓖꓴ ꓔꓬ ꓟ ꓥꓳ꓿
ꓟꓸ ꓟꓲꓽ ꓚ ꓢꓴ ꓐꓴꓳ꓾ ꓠꓴ ꓟꓽ ꓔꓱꓹ ꓟ ꓚꓺ ꓘꓶꓽ ꓗꓪ ꓐꓰ ꓢꓴ ꓢꓯꓼ ꓟꓬ ꓟꓶꓽ ꓡꓰ ꓠꓬ ꓠꓴ ꓥ ꓟꓲ ꓝꓴꓲ ꓗꓪ ꓐꓰ ꓟꓽ ꓡꓲꓹ ꓙꓰ ꓡ꓿ ꓞꓳ ꓤ ꓢꓰꓼ ꓢꓴ ꓕꓽ ꓗꓷ ꓡꓰ ꓝꓲ꓿ ꓒꓳ-ꓖꓲ (ꓡ ꓟ ꓒꓽ)꓾ ꓖꓴ-ꓣꓴꓼ ꓬꓳ-ꓖꓲꓽ ꓒ꓾ ꓟꓴ-ꓢꓲ-ꓡꓲ ꓘ-ꓡꓲ ꓒꓽ꓾ ꓣꓳ-ꓟ ꓘ-ꓕꓳ-ꓡꓲꓼ ꓝ-ꓓ ꓒꓽ ꓔꓲꓺ ꓒꓽ ꓐꓴ ꓐꓰ ꓟꓸ ꓟ ꓐꓴ꓾ ꓠꓱꓸ ꓐꓯꓼ ꓬꓰ-ꓢꓴ ꓔꓯ ꓙꓵꓻ ꓚꓱꓹ ꓗꓪ ꓧꓳꓽ ꓢꓴ ꓐꓴ ꓮ ꓟꓬꓹ ꓚꓳꓦꓲꓓ-19 ꓑꓶꓸ ꓓꓴ ꓫꓵꓻ ꓖꓴꓳ꓿ ꓕꓱ ꓡꓱꓳ ꓫꓵꓽ ꓔꓯ ꓡꓳꓸ ꓢꓲ꓾ ꓟꓽ ꓜꓳꓽ ꓟꓽ ꓔꓱꓹ ꓟ ꓟꓸ ꓟꓲꓽ ꓔꓯ ꓤ ꓟꓳ ꓡꓯ꓿
