ꓲ-ꓬ-ꓪꓴ-ꓓꓲ ꓟꓵꓽ ꓫꓴ꓾ ꓟꓬꓮꓳ-ꓟꓬꓮꓼ ꓡꓳ ꓒꓱ ꓗꓪ ꓙꓳꓥꓽ ꓟꓸ ꓟ ꓕꓲ ꓣꓳ ꓚꓳꓦꓲꓓ-19 ꓠꓻ ꓚꓲꓸ ꓡꓰ ꓟ ꓓꓳꓽ ꓔꓯ ꓑ ꓙ ꓡꓰ ꓢꓴ ꓙꓳꓥꓽ ꓟ ꓐꓹ ꓐ ꓟꓹ ꓟ ꓐꓴ ꓠꓬ ꓬꓲꓸ ꓪ ꓤ ꓠꓱ ꓐꓴ ꓔꓯ ꓙꓳꓥꓽ ꓦꓲ ꓗꓪ ꓐꓰ ꓘꓴ ꓧꓳꓽ ꓡ ꓠꓲꓹ ꓫꓵ ꓥ ꓟꓲ꓾ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓜꓲꓽ ꓐꓴ ꓡꓰ ꓕꓱ ꓡꓱ ꓬꓰ ꓟꓽ ꓓ ꓐꓯ ꓢꓲ ꓗꓽ ꓔ ꓡꓳ꓾ ꓐꓰ ꓙꓳꓥꓽ ꓟꓸ ꓟ ꓕꓲ ꓣꓳ ꓡꓰ ꓓꓳꓽ ꓐꓳ ꓢꓴ ꓐꓴ ꓔꓯ ꓐꓯ ꓟꓳꓸ ꓖꓶ ꓡ ꓡꓳ=
“ꓥꓪ ꓖꓶ ꓚꓓꓟ ꓬꓰ ꓗꓷ ꓢꓴ ꓥꓳ= ꓖꓳ ꓡꓱ ꓥ ꓟꓲ ꓟꓯꓼ ꓐꓴ ꓡꓰ ꓟꓽ ꓓ ꓟꓽ ꓢ ꓬꓰ ꓡ ꓠꓬꓲ꓾ ꓮ ꓟꓶ ꓙꓳꓥꓽ ꓟꓸ ꓔꓬ ꓡꓳ= ꓥꓪ ꓠꓴ ꓙꓳꓥꓽ ꓦꓲ ꓗꓪ ꓟꓸ ꓢꓴ 2 ꓣꓳ ꓚꓳꓦꓲꓓ-19 ꓠꓻ ꓜꓳ ꓡꓰ ꓠꓬꓲ꓾ ꓤ ꓠꓱ ꓐꓹ ꓐ ꓟꓹ ꓟ ꓐꓴ ꓠꓬ ꓬꓲꓸ ꓪ ꓤ ꓠꓱ ꓐꓴ ꓔꓯ ꓙꓳꓥꓽ ꓦꓲ ꓗꓪ ꓐꓰ ꓣꓴ ꓡꓽ ꓠꓲꓹ ꓫꓵ ꓡꓳ= ꓖꓳ ꓡꓱ ꓥ ꓟꓲ ꓟꓯꓼ ꓜꓲꓽ ꓐꓴ ꓛꓲ ꓡ ꓢꓲ꓾ ꓖꓳ ꓡꓱ ꓬꓰ ꓟꓽ ꓓ꓾ ꓙꓳꓥꓽ ꓒꓴ ꓟ ꓔꓯ ꓠꓽ ꓗꓷ ꓟꓽ ꓓ” ꓐꓯ ꓡ ꓡꓳ ꓐꓯ ꓡꓳ=
ꓟꓯꓼ ꓢꓰꓼ ꓡꓯ ꓘꓳ ꓟ ꓑꓶꓸ ꓓꓴ ꓐꓰ꓾ ꓚꓳꓦꓲꓓ-19 ꓠꓻ ꓫꓵꓽ ꓑꓶꓸ ꓓꓴ ꓙꓳꓥꓽ ꓟ ꓐꓹ ꓟ ꓐꓴ ꓓꓵꓽ ꓙ ꓫꓸ ꓔꓬ ꓡꓳ= ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓜꓲꓽ ꓐꓴ ꓠꓬ ꓟꓬ-ꓟ ꓗꓴꓷꓼ ꓡ ꓞꓳ ꓞꓳ ꓜꓴ ꓞꓳ ꓟꓯꓼ ꓔꓯ ꓠꓻ ꓓꓱꓽ ꓚꓲꓸ ꓜꓳ ꓡꓰ ꓠꓹ ꓟ ꓗ ꓟꓶꓽ ꓫꓵꓸ ꓫꓵꓸ ꓬꓰ ꓔꓬ ꓟ ꓡꓰ ꓐꓰ ꓗꓹ ꓡꓳ ꓐꓰ ꓢꓪꓼ ꓢꓴ ꓙꓳ ꓡꓳ=
ꓚꓳꓦꓲꓓ-19 ꓠꓻ ꓓꓱꓽ ꓗꓽ ꓠꓯ ꓞꓲꓼ ꓠꓬ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓜꓲꓽ ꓐꓴ ꓐꓰ ꓠꓱꓸ ꓐꓯꓼ ꓮ ꓔꓲꓸ ꓤꓼ ꓡꓰ ꓘꓳ ꓣꓴ ꓟꓶ ꓔꓸ ꓢꓲ꓾ ꓑ ꓫꓬ ꓮ ꓟꓬꓹ ꓠꓬ ꓠꓯ ꓞꓲꓼ ꓟꓽ ꓪ ꓢꓰ= ꓕꓱ ꓡꓱ ꓗꓹ ꓟ ꓦꓬꓼ ꓠꓬꓲ ꓗꓪ ꓙꓳꓥ ꓔꓯ ꓟꓽ ꓓ ꓟꓽ ꓢ ꓫꓵꓸ ꓜ ꓫꓵꓸ ꓒꓴ ꓔꓬ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓕꓲ ꓗꓴꓷꓼ ꓡꓱꓸꓼ ꓗꓪ 80% ꓛꓲ ꓟ ꓙꓳꓥꓽ ꓟꓽ ꓐꓴ ꓠꓬ ꓙꓳꓥ ꓗꓪ ꓟꓽ ꓢꓳ ꓙꓰ ꓙꓰ ꓦꓲ ꓗꓪ ꓔꓬ ꓡꓳ=
