ꓕꓮꓲꓹ ꓗꓴꓷꓼ ꓝꓲ ꓓꓴ ꓙꓱ ꓘꓪ ꓔꓲꓽ ꓕꓲꓸ ꓗꓪ ꓢꓽ ꓡ ꓙꓵꓽ ꓢꓴ Wan Muhamad Noor Matha ꓔꓯ 2023 ꓘꓳꓼ 7 ꓦ 4 ꓠꓬꓲ ꓕꓯꓽ ꓢꓲꓻ ꓪ ꓡꓰꓳ꓿
ꓬꓲꓸ ꓠꓬ ꓗꓴꓷꓼ ꓝꓲ ꓓꓴ 10 ꓣꓳˍ ꓡꓰ ꓧꓪꓸ ꓔꓸ ꓟ ꓑ-ꓔꓲ ꓕꓲ ꓟ ꓗꓪ ꓐꓰ ꓡ ꓢꓴ꓾ 79 ꓘꓳꓼ ꓡꓳꓼ ꓟ ꓗꓴꓷꓼ ꓟꓬꓱꓽ ꓬꓰ ꓢꓴ ꓬꓲꓸ ꓡꓵ ꓬꓲꓸ ꓔꓲꓺ ꓕꓲꓽ ꓣꓳ ꓥ ꓡꓳ꓿
“ꓕꓮꓲ ꓗꓴꓷꓼ ꓡ ꓞꓳ ꓐꓴ ꓤꓶ ꓟꓴ ꓡ ꓠꓹ ꓟ ꓐꓱ ꓶ ꓙꓵꓽ ꓗ ꓫꓬꓹ ꓚꓱꓹ ꓐꓰ꓾ ꓓꓵꓽ ꓙ ꓙ ꓡ ꓠꓹ ꓟ ꓓꓰꓽ ꓘꓶꓽ ꓮ ꓙꓵꓽ ꓔꓯ ꓒꓴ ꓒꓴ ꓡꓯ ꓡꓯꓽ ꓙꓲ ꓙꓲ ꓜꓳꓽ ꓜꓳꓽ ꓬꓰ ꓙꓰ ꓓꓴ ꓥꓳ” ꓐꓰ Wan Muhamad Noor Matha ꓡꓰ ꓐꓯ ꓡꓳ꓿
ꓕꓱ ꓠꓬ Move Forward ꓑ-ꓔꓲ ꓐꓰ Pheu Thai ꓑ-ꓔꓲ ꓠꓬꓲꓽ ꓗꓳꓸ ꓚꓸ ꓗꓪ ꓙ ꓡꓯ ꓘꓳ ꓚꓱꓹ ꓙꓲˍ ꓟ ꓢꓷꓸ ꓡꓰ ꓓꓴ ꓥꓳ꓾ ꓐꓰ ꓚꓹ ꓠꓬꓲ ꓢꓴ ꓐꓴ ꓡꓰ ꓐꓯ ꓔꓬ ꓡꓳ꓿
ꓗꓳꓸ ꓗꓷ ꓟ 5 ꓦ 14 ꓠꓬꓲ ꓢꓲꓻ ꓣꓴ ꓑꓮꓲ ꓗꓪ Move Forward ꓑ-ꓔꓲ ꓠꓬ ꓗꓴꓷꓼ ꓝꓲ ꓓꓴ ꓠꓬꓲꓺ ꓖꓴ 151꓾ Pheu Thai ꓑ-ꓔꓲ ꓠꓬ 141 ꓪ ꓔˍ ꓡꓳ꓿ ꓑ-ꓔꓲ ꓕꓱ ꓠꓬꓲꓽ ꓜꓴ ꓡꓱꓸꓼ ꓠꓬ ꓟꓯꓼ ꓙꓵꓽ ꓚꓱꓹ ꓔꓯ ꓟꓽ ꓠꓲꓹ ꓫꓵ ꓢꓴ ꓑ-ꓔꓲ ꓐꓴ ꓥ ꓡꓳ꓿
Move Forward ꓑ-ꓔꓲ ꓗꓪ ꓐꓰ ꓡˍ ꓟ ꓑꓲ-ꓔ ꓠꓬ ꓗꓴꓷꓼ ꓙꓵꓽ ꓜꓴ ꓟꓬꓱꓽ ꓢꓲꓺ ꓠꓬꓲ ꓖꓴ ꓪ ꓠꓹ ꓟ ꓢꓯꓼ ꓕꓵꓼ ꓔꓬ ꓢꓰꓽ ꓡꓳ꓿ Pheu Thai ꓑ-ꓔꓲ ꓡꓰ ꓔꓺ ꓙ ꓡ ꓠꓬ ꓒꓬꓱꓼ ꓡ ꓓ ꓟ ꓥ ꓡꓳ꓿
