2022 ꓘꓳꓼ 6 ꓦ 30 ꓠꓬꓲ ꓕꓯꓽ ꓔꓮꓳ-ꓙꓲꓸ ꓡꓳ ꓒꓱ ꓗꓪ ꓟꓬ-ꓟ ꓗꓴꓷꓼ ꓟꓵꓽ ꓫꓴ ꓮ ꓙꓵꓽ ꓡꓳ ꓖꓪ ꓔꓯꓺ ꓡꓯ ꓘꓳˍ ꓟ ꓗꓪ ꓗ-ꓛꓲ ꓟꓵꓽ ꓤ ꓟꓶꓼ ꓤ ꓐꓳ-ꓡꓲ-ꓐꓳꓹ (volleyball) ꓜꓴ ꓠꓬ ꓫꓵꓺ ꓘꓴꓸ ꓣꓴ ꓪ ꓡꓰꓳ꓿
25 ꓘꓳꓼ ꓙꓱ ꓘꓪ ꓗꓪ ꓟ ꓤ ꓟꓶꓼ ꓡꓯꓸ ꓐꓴ ꓔꓯꓺ ꓡꓯ ꓘꓳˍ ꓟ ꓥ ꓢꓲꓸ ꓫꓵꓺ ꓘꓪꓸ ꓐꓱ ꓶ ꓗ-ꓛꓲ ꓟꓵꓽ ꓫꓴ ꓐꓰ ꓬꓥ-ꓖꓳꓥ ꓟꓵꓽ ꓫꓴ ꓢꓴ ꓐꓴ ꓔꓯꓺ ꓡꓯ ꓘꓳ ꓕꓯꓽ 3-1 ꓡꓰ ꓗ-ꓛꓲ ꓟꓵꓽ ꓤ ꓟꓶꓼ ꓤ ꓜꓴ ꓧꓪꓸ ꓡꓰ ꓟ ꓥ ꓡꓳ꓿
3 ꓫꓵꓽ ꓠꓽ ꓢꓯꓼ ꓠꓵꓹ ꓢꓲꓸ ꓔꓯꓺ ꓡꓯ ꓘꓳ ꓡ ꓟ ꓥ ꓢꓲ꓾ ꓗ-ꓛꓲ ꓟꓵꓽ ꓤ ꓟꓶꓼ ꓤ ꓐꓳ-ꓡꓲ-ꓐꓳꓹ ꓜꓴ ꓗꓪ ꓡꓲ-ꓢꓴ ꓤ ꓟꓶꓼ ꓡꓯꓸ ꓐꓴ ꓮ ꓟꓬꓹ ꓐ ꓞ ꓡꓳ꓿ ꓬꓲꓸ ꓪ ꓠꓬ ꓫꓵꓺ ꓘꓪꓸ ꓡꓰꓽ ꓟꓽ ꓞꓲ꓾ ꓬꓲꓸ ꓪꓴꓸ ꓖꓶꓽˍ ꓟ ꓗꓪ ꓙꓲ ꓡꓳꓹ ꓬꓰ ꓟ ꓡꓯꓼ ꓫꓴ (ꓠꓳ. 7) ꓐꓰ꓾ ꓔꓯꓺ ꓡꓯ ꓘꓳ ꓑꓮꓲ ꓕꓲꓽ ꓟ ꓡꓱꓸꓼ ꓗꓪ ꓓ ꓡꓳꓹ ꓙꓲ ꓡꓳꓹ ꓬꓰ ꓢꓴ ꓔꓯ ꓖꓶˍ ꓟ ꓡꓯꓼ ꓫꓴ (ꓠꓳ. 14) ꓘꓳ ꓣꓴ ꓟꓶ ꓡꓳ꓿
“40 ꓘꓳꓼ ꓛꓲ ꓟꓬꓱ ꓓꓳꓽ ꓟꓽ ꓙꓳ ꓡꓷ ꓡꓰˍ ꓟ ꓗ-ꓛꓲ ꓟꓵꓽ ꓤ ꓟꓶꓼ ꓤ ꓐꓳ-ꓡꓲ-ꓐꓳꓹ ꓜꓴ ꓠꓬ ꓮ ꓟꓶ ꓟꓬꓱꓺ ꓓꓳꓽ ꓚꓺ ꓟꓲꓽ ꓓꓽ ꓟ ꓬꓰ ꓓꓳ ꓡꓻꓳ꓿ ꓒꓴ ꓫꓵꓺ ꓟꓽ ꓡꓳꓼ ꓟ ꓛꓲ ꓠꓬꓲ ꓢꓯꓼ ꓠꓵꓹ ꓟ ꓠꓬ 3 ꓫꓵꓽ ꓠꓽ ꓡꓰ ꓬꓰ ꓪ ꓟ ꓥꓳ꓿ ꓢꓲꓻ ꓔꓸ ꓢꓴ ꓤ ꓟꓶꓼ ꓡꓯꓸ ꓐꓴ ꓔꓯ ꓮ ꓘꓶꓸ ꓫꓸ ꓟꓳ ꓪ꓿” ꓐꓰ ꓧꓳꓽ ꓪꓴꓸ ꓟꓴ ꓢꓴ Kyaw Thu ꓡꓰ ꓐꓳ ꓔ ꓡꓳ꓿
ꓬꓲꓸ ꓪ ꓠꓬ ꓦ ꓡꓱ ꓢꓴ ꓥˍ ꓟ ꓡꓰ ꓐꓰ ꓪꓴ-ꓢ ꓔꓯ ꓦ ꓡꓱ ꓟꓴ ꓖꓪꓽ ꓖꓪ ꓢꓲꓸ ꓗꓹ ꓛꓲ ꓟꓬ ꓐꓲ ꓓꓳˍ ꓟ ꓢꓯꓸ ꓐꓬꓱꓽ ꓡꓳꓸ ꓟꓳˍ ꓪ ꓡꓳ꓿
ꓬꓲꓸ ꓚꓰ꓾ Kyawthu
