2021 ꓘꓳꓼ 10 ꓦ 29 ꓠꓬꓲ꓾ 76 ꓧꓪꓹ ꓟ ꓟꓲ ꓠꓯ ꓗꓴꓷꓼ ꓜꓴ ꓜꓲꓼ ꓓꓴ꓾ ꓞꓳ ꓤ ꓶꓽ ꓜꓴ (Human Rights Committee) ꓡꓰ ꓧꓪ ꓟꓰꓹ ꓔꓸ ꓟ ꓕꓳ ꓶ ꓠꓬ ꓜꓲ ꓜꓲ ꓑꓰꓹ ꓑꓰꓹ ꓬꓰ ꓢꓴ ꓐꓴ ꓔꓯ ꓔꓺ ꓢꓲꓸ ꓬꓲ-ꓢꓷ-ꓡꓰ ꓔꓯ ꓠꓲꓹ ꓜꓳ ꓟ ꓐꓰ꓾ ꓫꓵꓽ ꓒꓯꓽ ꓩꓴ ꓟ ꓕꓳ ꓶ ꓥ ꓡꓳ ꓐꓰ꓾ ꓬꓲ-ꓢꓷ-ꓡꓰ ꓗꓴꓷꓼ ꓝꓲ ꓓꓴ ꓮ-ꓓ (Erdan) ꓡꓰ ꓐꓯ ꓓꓳ ꓡꓰ ꓠꓬ꓾ ꓕꓳ ꓶ ꓔꓯ ꓚꓲꓹ ꓧꓽ ꓩꓴꓳ꓿
ꓕꓳ ꓶ ꓖꓳ ꓟ ꓗꓪ ꓬꓲ-ꓢꓷ-ꓡꓰ ꓬꓰˍ ꓟ ꓔꓯ ꓠꓬ ꓝꓴꓲꓸ ꓓꓰꓺ ꓔꓸ ꓢꓲ꓾ ꓧꓸ-ꓟꓼ ꓜꓴ ꓡꓰ ꓬꓲ-ꓢꓷ-ꓡꓰ ꓔꓯ ꓢꓰꓼ ꓡ ꓟ ꓔꓯ ꓠꓬ ꓟꓽ ꓐꓳ ꓔꓸ ꓐꓯ ꓡꓳ꓿
“1975 ꓘꓳꓼ ꓗꓪ ꓥ ꓟꓲ ꓗꓴꓷꓼ ꓜꓴ ꓕꓱ ꓟ ꓗꓪ ꓥꓪ ꓠꓴ ꓬꓲ-ꓢꓷ-ꓡꓰ ꓜꓲ-ꓬꓴ ꓪ ꓚꓲ ꓜꓴ ꓔꓯ ꓫꓵꓽ ꓒꓯꓽ ꓜꓴ ꓐꓯ ꓖꓶ ꓡ ꓟ ꓠꓬ꓾ ꓠꓴ ꓪ ꓥꓪ ꓠꓴ ꓔꓯ ꓠꓲꓹ ꓜꓳ ꓟ ꓢꓷꓸ ꓡꓰ ꓓꓴ ꓥ ꓡꓳ꓿ ꓠꓬꓲꓸ ꓠꓬꓲ ꓥ ꓟꓲ ꓟꓽ ꓜꓳ ꓟꓽ ꓔꓱꓹ꓾ ꓕꓲ ꓛꓱꓽ ꓗꓪ ꓡꓰꓽ ꓦꓰꓼ ꓐꓳ ꓔꓸ ꓟ ꓕꓳ ꓶ ꓕꓱ ꓟ ꓠꓬ ꓟꓲ ꓠꓯ ꓗꓴꓷꓼ ꓜꓴ ꓕꓱ ꓟ ꓗꓪ ꓙꓳ ꓙꓲꓽ ꓟꓽ ꓙꓳ꓿ ꓕꓳ ꓶ ꓕꓱ ꓟ ꓟꓲ ꓠꓯ ꓞꓳ ꓤ ꓶꓽ ꓐꓱ ꓶ꓾ ꓟꓲ ꓠꓯ ꓢꓲ ꓡꓲꓹ ꓟ ꓐꓱ ꓶ ꓮ ꓫꓵꓽ ꓙꓲ ꓖꓴ ꓟꓽ ꓙꓳ” ꓐꓯ ꓢꓲ ꓕꓳ ꓶ ꓔꓯ ꓡꓲꓸ ꓫꓴ ꓚꓲꓹ ꓧꓽ ꓩꓴ ꓗꓷꓳ꓿
ꓮꓓ 70 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓮ ꓡꓻ 1900 ꓘꓳꓼ ꓛꓲ ꓗꓴꓷꓼ ꓟꓽ ꓙꓳ ꓡꓰ ꓟ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ꓾ 1948 ꓘꓳꓼ ꓕꓯ ꓝꓮꓲ ꓕꓲ ꓧꓪꓹ ꓗꓴꓷꓼ ꓔꓶ ꓪꓴꓸ ꓔꓴ ꓩꓴ ꓡ ꓢꓲ꓾ ꓠꓬꓲꓸ ꓠꓬꓲ ꓗꓪ ꓛꓲ ꓬꓲ ꓔꓯ ꓠꓲꓹ ꓜꓳ ꓔꓬ ꓟ ꓟꓲ ꓠꓯ ꓗꓴꓷꓼ ꓮ ꓟꓬꓹ ꓙꓳ ꓥ ꓟꓲ꓾ ꓤ ꓘꓹ ꓘꓹ ꓑꓶꓸ ꓑꓶꓸ ꓡꓰ ꓦꓰꓼ ꓕꓶ ꓔꓬ ꓡꓳ꓿
