1997 ꓘꓳꓼ ꓕꓯ 2 ꓘꓳꓼ ꓐꓶꓽ ꓙꓳ ꓟ ꓞꓳ ꓑꓸ ꓤꓼ ꓔꓯ ꓢꓴ ꓡꓰ ꓘꓴꓽ ꓔꓯꓹ ꓙꓰ ꓟ ꓑꓶꓸ ꓓꓴ ꓬꓲꓸ ꓐꓹ ꓐ ꓠꓬ ꓧꓶꓽ ꓒꓽ ꓟꓵꓽ ꓗꓪ 24 ꓘꓳꓼ ꓧꓪ ꓚꓳ ꓗꓷ ꓢꓲ꓾ ꓮ ꓟꓶ ꓠꓬ ꓧꓪ ꓟꓳ ꓡꓰꓳ=
ꓐꓹ ꓐ ꓟꓬꓱꓺ ꓠꓬ ꓖꓴ-ꓖ-ꓔ (Guo Gangtang) ꓥ ꓢꓲ꓾ ꓬꓲꓸ ꓤꓽ ꓟꓬꓱꓺ ꓠꓬ ꓖꓴ-ꓫꓵ-ꓜꓯ (Guo Xinzhen) ꓥ ꓡꓳ= ꓤ ꓠꓱ ꓐꓬꓱꓽ ꓒꓯꓽ ꓧꓶꓹ ꓛꓲꓼ ꓔꓸ ꓟꓳ ꓓꓳ ꓑꓵꓹ ꓜꓶꓽ ꓢꓲ꓾ ꓐꓹ ꓐ ꓖꓴ-ꓖ-ꓔ ꓤ ꓠꓱ ꓧꓪ ꓙ ꓖꓴ ꓠꓬ 500000 ꓗꓟ ꓛꓲ ꓚꓳ ꓓꓳ ꓡꓰꓳ= ꓙ ꓖꓴ ꓗꓪ ꓒꓴ ꓞꓰꓹ ꓡꓰ ꓠꓬꓲ ꓓꓰꓽ ꓜꓽ ꓠ ꓗꓷ ꓡꓰ ꓟ ꓟꓲ ꓔꓳꓹ ꓜꓳ꓾ ꓘꓴ ꓒꓽ ꓠꓯ ꓒꓽ ꓔꓯ ꓟꓲ ꓔꓳꓹ ꓜꓳ ꓗꓷꓳ ꓐꓯ ꓡꓳ=
ꓤ ꓠꓱ ꓖꓳ ꓕꓲ ꓣꓳ ꓫ-ꓓꓮꓳ ꓟꓵꓽ ꓦꓲ ꓡꓽ ꓙꓳ ꓓꓰ ꓗꓪ ꓗꓹ ꓔꓬ ꓕꓯ ꓤ ꓠꓱ ꓘꓴꓽ ꓢꓴ ꓐꓴ ꓡꓰ ꓧꓳꓽ ꓔꓯꓹ ꓙꓰ ꓟ ꓥ ꓡꓳ= ꓤ ꓠꓱ ꓘꓴ ꓢꓴ ꓡꓰ ꓤ ꓠꓱ ꓖꓳ ꓟ ꓔꓯ ꓧꓶꓽ ꓒ ꓟꓵꓽ ꓔꓱꓹ ꓫꓵ ꓗꓪ ꓔꓬ ꓢꓴ ꓦꓲ ꓘꓴ ꓕꓲ ꓟ ꓗꓪ ꓪꓴꓽ ꓜ ꓗꓷ ꓟ ꓥ ꓡꓳ=
ꓗꓸ ꓠꓯꓸ ꓤ ꓠꓱ ꓪꓴꓽ ꓡ ꓢꓲ꓾ ꓬꓲꓸ ꓞꓲꓼ 26 ꓘꓳꓼ ꓙꓳ ꓟ ꓙꓳꓥꓽ ꓟꓸ ꓒ ꓕꓲ ꓣꓳ ꓒꓬꓱꓼ ꓡ ꓗꓸ ꓠꓯꓸ ꓬꓲꓸ ꓓꓠꓮ ꓔꓯ ꓚꓹ ꓗꓷ ꓠꓬ꓾ ꓧꓶꓸ ꓕꓯ ꓫ-ꓓꓮꓳ ꓟꓵꓽ ꓗꓪ ꓤ ꓠꓱ ꓟꓶꓽ ꓬꓰ ꓢꓴ ꓬꓲꓸ ꓐꓹ ꓐ ꓓꓠꓮ ꓔꓯ ꓜꓯ ꓜꓳꓽ ꓡꓰ ꓠꓬꓲ꓾ ꓧꓶꓽ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓕꓱ ꓠꓬꓲꓽ ꓑꓸ ꓡꓼ ꓔꓯ ꓧꓪ ꓟꓳ ꓡꓰ ꓟ ꓥ ꓡꓳ ꓐꓰ꓾ 7 ꓦ 13 ꓠꓬꓲ ꓕꓯ ꓐꓯ ꓒꓬꓱꓺ ꓩꓴ ꓡ ꓡꓳ= ꓤ ꓠꓱ ꓘꓴꓽ ꓢꓴ꓾ ꓐꓰ ꓪꓴ ꓜ ꓢꓴ ꓐꓴ ꓔꓯ ꓐꓯ ꓟꓴ ꓩꓴ ꓔꓸ ꓡꓳ=
ꓧꓶꓽ ꓒ ꓟꓵꓽ ꓗꓪ 1980 ꓘꓳꓼ ꓗꓪ ꓐꓰ ꓕ ꓑꓳꓸ ꓦꓲ ꓘꓴ ꓕꓲ ꓟ ꓕꓲ ꓣꓳ ꓡꓰ ꓦꓵ ꓠꓹ ꓟ ꓙꓵꓽ ꓗ ꓔꓶ ꓗꓷ ꓟ ꓗꓪ ꓐꓰ꓾ ꓧꓶꓽ ꓒ ꓠꓬ ꓮ ꓐꓲ ꓤꓼ ꓔꓯ ꓟꓬ ꓠꓬꓲ ꓠꓲꓹ ꓫꓵ ꓠꓬꓲ꓾ ꓮ ꓐꓲ ꓤꓼ ꓘꓴꓽ ꓢꓲꓸ ꓪꓴꓽ ꓜꓽ ꓢꓴ ꓮ ꓟꓬꓹ ꓓꓳ ꓡ ꓟ ꓥ ꓡꓳ=
