(Yuval Noah Harrari ꓡꓰ ꓐꓳ ꓔꓸ ꓟ ꓔꓯ ꓡꓲ-ꓢꓴ ꓥꓳꓽ ꓗꓪ ꓡꓶꓸ ꓐꓳ ꓡꓳ=)
ꓢꓳ ꓓꓴ (1)
ꓓꓵꓽ ꓙ ꓔꓸ ꓟ ꓡꓰ ꓐꓰ ꓟꓽ ꓥ ꓐꓶ
ꓚ ꓟꓲꓽ ꓔꓯ ꓬꓲꓸ ꓘꓶꓽ ꓢꓰꓼ ꓟꓽ ꓙꓲ ꓢꓰ
ꓞꓳ ꓤ ꓠꓬ ꓢꓷꓸ ꓓꓴ ꓬꓲꓸ ꓫꓵ ꓬꓲ ꓙꓰ꓾ ꓵꓺ ꓠꓬꓲ ꓓꓴ ꓠ ꓐꓼ ꓝꓳꓹ ꓐꓰ꓾ ꓢꓪꓹ ꓢꓪꓼ ꓕꓯ ꓢꓲ ꓚ ꓟꓲꓽ ꓡꓳ ꓚ ꓓꓵꓽ ꓙ ꓚꓽ ꓡꓳ= ꓚ ꓟꓲ ꓠꓬ ꓓꓴꓸ ꓓꓴꓸ ꓤꓼ ꓮ ꓘꓶꓸ ꓢ ꓠꓬ ꓟꓬꓽ ꓠꓬꓲ ꓙꓲ ꓡꓳ= ꓡ ꓞꓳ ꓮ ꓡꓲ ꓕꓲ ꓣꓳ꓾ ꓮ ꓡꓲ ꓕꓲ ꓜꓴ꓾ ꓮ ꓡꓲ ꓕꓲ ꓗꓴꓷꓼ ꓗꓪ ꓥ ꓟꓲ ꓚ ꓟꓲꓽ ꓙꓳ ꓚꓰꓼ ꓡꓳ= ꓗꓳꓸ ꓗꓷ ꓟ 20 ꓦ ꓜꓴ ꓘꓳꓼ ꓠꓯꓸꓼ ꓗꓪ ꓠꓴ-ꓬꓴ-ꓬꓳꓼ꓾ ꓡ-ꓓꓮꓠ ꓐꓰ ꓐ-ꓡꓲꓠ ꓡꓳ ꓒꓱꓽ ꓓꓽ ꓟ ꓗꓪ ꓜꓽ ꓢ ꓔꓬ ꓢ ꓐꓳ ꓬꓲꓼ ꓡꓰ ꓢꓴ ꓐꓴ ꓡꓰ ꓗꓳꓸ ꓗꓷ ꓟ ꓤꓶ ꓐꓰ꓾ ꓡ ꓠꓹ ꓟ ꓦꓬꓼ ꓠꓬꓲ ꓒꓶꓻ ꓟꓸ ꓖꓶ ꓐ ꓡ ꓟ ꓚ ꓟꓲꓽ (3) ꓚꓱꓹ ꓚꓰꓼ ꓓꓳ ꓩꓴ ꓡ ꓡꓳ= ꓚ ꓟꓲꓽ ꓖꓳ (3) ꓚꓱꓹ ꓠꓬ ꓒꓯꓼ-ꓢꓲꓼ꓾ ꓗꓳ-ꓟꓴ-ꓠꓲꓼ ꓐꓰ꓾ ꓡꓲ-ꓐ-ꓬꓯ ꓥ ꓡꓳ= ꓟꓵꓽ ꓗꓳꓹ ꓓꓵ ꓓꓵ ꓢꓯꓼ ꓡꓯ ꓘꓳ ꓟ ꓟꓯꓼ ꓘꓶꓽ 2 ꓟ ꓕꓲ ꓟ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓒꓯꓼ-ꓢꓲꓼ ꓚ ꓟꓲꓽ ꓠꓬ ꓗꓸ ꓠꓯꓸ ꓢꓲꓽ ꓞꓰ ꓡꓰ ꓢꓲ꓾ 1940 ꓘꓳꓼ ꓗꓪ ꓐꓰ 1980 ꓘꓳꓼ ꓗꓪ ꓛꓲ ꓠꓬ ꓗꓳ-ꓟꓴ-ꓠꓲꓼ ꓐꓰ꓾ ꓡꓲ-ꓐ-ꓬꓯ ꓚ ꓟꓲꓽ ꓠꓬꓲꓽ ꓚꓱꓹ ꓠꓬ ꓬꓲꓸ ꓧꓶꓽ ꓜꓴ ꓠꓴ ꓟꓯꓼ ꓓꓶꓽ ꓡꓯ ꓘꓳ ꓗꓷꓳ= ꓟꓶ ꓤ ꓟꓽ ꓥ ꓠꓬ꓾ ꓗꓳ-ꓟꓴ-ꓠꓲꓼ ꓠꓬ ꓞꓳꓸ ꓡꓰ ꓢꓲ꓾ ꓡꓲ-ꓐ-ꓬꓯ ꓚ ꓟꓲꓽ ꓕꓲ ꓟˍ ꓡꓰ ꓟꓲ ꓠꓯ ꓡ ꓞꓳ ꓐꓴ ꓚ ꓟꓲꓽ ꓐꓰ꓾ ꓡ ꓠꓹ ꓟ ꓦꓬꓼ ꓠꓬꓲ ꓐꓱ ꓶ ꓦ ꓡꓱ ꓐꓳ ꓓꓴ ꓐꓰ꓾ ꓖꓴ ꓟꓳꓸ ꓖꓶ ꓓꓴ ꓚ ꓟꓲꓽ ꓒꓬꓱꓼ ꓡꓻꓳ ꓐꓰ ꓐꓳ ꓬꓲꓼ ꓡꓰ ꓢꓴ ꓐꓴ ꓡꓰ ꓓꓵꓽ ꓙ ꓔꓸ ꓡꓳ=
ꓡꓲ-ꓐ-ꓬꓯ ꓚ ꓟꓲꓽ ꓗꓪ ꓠꓬ꓾ ꓡꓲꓹ ꓗꓷ ꓟꓶ ꓟ ꓬꓲꓸ ꓒꓵꓽ ꓐꓰ꓾ ꓙꓲ ꓖꓴ ꓔꓯ ꓮ ꓘꓶꓸ ꓓꓳꓹ ꓟꓴ ꓡꓳ= ꓚ ꓟꓲꓽ ꓕꓱ ꓟ ꓡꓳ ꓚ ꓐꓯ ꓠꓬ꓾ ꓟꓲ ꓠꓯ ꓡ ꓞꓳ ꓐꓴ ꓠꓬ ꓠꓬꓲꓸ ꓤꓲ ꓟ ꓙꓵꓽ ꓢꓴ ꓗꓪꓼ ꓢꓴ ꓡꓯ ꓒꓯꓹ ꓗꓪ ꓬꓲꓸ ꓔꓴ ꓬꓲꓸ ꓟꓶꓽ ꓗꓴꓷꓼ ꓦꓬꓼ ꓠꓬꓲ ꓗꓳꓸ ꓡ ꓢꓲ꓾ ꓗꓴꓷꓼ ꓙ ꓖꓴ ꓐꓰ꓾ ꓶ ꓡꓯꓼ ꓙ ꓖꓴ ꓗꓪ ꓟꓶ ꓙꓲꓽ ꓙꓳ ꓟ ꓟꓽ ꓟꓶ꓾ ꓡ ꓞꓳ ꓐꓴ ꓠꓬ ꓬꓲꓸ ꓓ ꓬꓲꓸ ꓙꓰ ꓚꓳ ꓟꓽ ꓙꓲ꓾ ꓓꓵꓽ ꓙ ꓟꓽ ꓙꓲ꓾ ꓶ ꓡꓯꓼ ꓬꓰ ꓟꓽ ꓙꓲ ꓠꓬꓲꓸ ꓤꓲ ꓟꓶ ꓔꓸ ꓡꓳ= ꓖꓳ ꓡꓱ ꓥ ꓟꓲ ꓟꓲ ꓠꓯ ꓡ ꓞꓳ ꓐꓴ ꓠꓬ꓾ ꓬꓲꓸ ꓪ ꓟꓶ ꓙꓲꓽ ꓙꓳ ꓟ ꓬꓲꓸ ꓶꓽ ꓐꓱ ꓶ ꓢꓯꓼ ꓟꓬ ꓑ ꓢꓲꓸ ꓒꓳꓹ ꓔꓳꓹ ꓡꓯ ꓘꓳ ꓗꓷ ꓠꓬ꓾ ꓕꓲ ꓝꓸ ꓕꓲ ꓝꓸ ꓟꓶ ꓙꓲꓽ ꓙꓳ ꓟ ꓶꓽ ꓟꓶ ꓡ ꓡꓳ= ꓥꓶꓸ ꓟ ꓙꓵꓽ ꓢꓴ ꓐꓴ ꓗꓪ ꓐꓰ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓗꓪ ꓛꓲ ꓡ ꓡꓳ= ꓬꓲꓸ ꓓ ꓬꓲꓸ ꓶ ꓡꓯꓼ ꓟꓴ ꓚꓱꓹ ꓗꓪ ꓐꓰ ꓐꓱ ꓕꓴꓽ ꓗꓽ ꓔꓸ ꓟ ꓶ ꓡꓯꓼ ꓚꓱꓹ ꓔꓯ ꓧꓪꓸ ꓡꓰ ꓡꓳ= ꓡ ꓞꓳ ꓐꓴ ꓠꓬ ꓕꓲ ꓛꓱꓸ ꓡꓱꓸꓼ ꓟ ꓦ ꓡꓱ ꓚꓱꓹ ꓧꓳꓽ ꓢꓴ ꓐꓴ ꓐꓰ꓾ ꓡꓲ ꓒꓰꓼ ꓡꓲꓽ ꓚꓱꓹ ꓔꓯ ꓟꓬ ꓢꓶꓽ ꓟꓲꓸ ꓢꓲꓸ ꓟꓽ ꓖꓼ ꓙꓰ ꓙꓰ꓾ ꓚꓲ ꓛꓬ ꓠꓲꓹ ꓟ ꓗꓪ ꓐꓰ ꓓꓵꓽ ꓙ ꓢꓪꓼ ꓠꓬꓲ ꓪꓴꓸ ꓔꓴ ꓡ ꓡꓳ= ꓡꓳ ꓒꓱ ꓚꓬꓹ꓾ ꓡꓳ ꓒꓱ ꓗꓽ ꓓꓴ ꓬꓲ ꓙꓬ ꓐꓱ ꓐꓰ꓾ ꓛꓴꓽ ꓐꓱ ꓕꓴꓽ ꓔꓸ ꓟ ꓗꓪ ꓛꓽ ꓐꓲꓽ ꓛꓽ ꓗꓪ ꓙꓰ ꓙꓰ ꓡꓽ ꓡꓽ ꓬꓰ ꓔꓬ ꓖꓴ ꓟ ꓓꓽ ꓖꓴꓽ ꓐꓰ꓾ ꓐꓬꓱ ꓦꓲ ꓠꓽ ꓔꓶꓸ ꓙꓳ ꓡ ꓡꓳ=
ꓡꓲ-ꓐ-ꓬꓯ ꓚ ꓟꓲꓽ ꓗꓪ꓾ ꓮ ꓙꓵꓽ ꓫꓳꓽ ꓠꓬ ꓟꓽ ꓔꓸ ꓢꓰ= ꓔꓳꓹ ꓜꓳ ꓘꓳꓻ ꓙꓰ ꓠ ꓗꓹ ꓟ ꓘꓶ ꓡꓶꓽ ꓓꓴ ꓧꓶꓽ ꓡꓶꓽ ꓐꓯ ꓡꓯ ꓙꓳ ꓢꓰ ꓡꓳ ꓐꓰ ꓘꓳ ꓣꓴ ꓔꓸ ꓡꓳ= ꓟꓲ ꓠꓯ ꓡꓴꓸ ꓡꓴꓸ ꓕꓯ ꓢꓲ ꓟꓵꓽ ꓮ ꓟꓬꓹ ꓟ ꓗꓪ ꓬꓲꓸ ꓜꓲꓽ ꓬꓲꓸ ꓥꓳꓹ ꓙꓵꓽ ꓗꓪꓼ ꓢꓴ ꓮ ꓟꓬꓹ ꓔꓬ ꓢꓰꓽ ꓡꓳ= ꓡꓲ-ꓐ-ꓬꓯ ꓗꓴꓷꓼ ꓐꓴ ꓗꓪ ꓥ ꓟꓲ ꓫꓸ ꓓꓰꓽ ꓬꓰ ꓟ꓾ ꓜꓲ ꓜꓲ ꓑꓰꓹ ꓑꓰꓹ ꓬꓰ ꓡ ꓟ ꓐꓰ꓾ ꓠꓬꓲꓸ ꓤꓲ ꓟ ꓔꓳ ꓜꓳ ꓔꓬ ꓢꓰꓽ ꓡꓳ= ꓖꓳ ꓡꓱ ꓥ ꓟꓲ ꓕꓱ ꓡꓱꓳ ꓫꓵꓽ ꓘꓶ ꓡꓶꓽ ꓓꓴ ꓔꓯ ꓧꓪꓸ ꓡꓰ ꓠꓹ ꓟ ꓬꓲꓸ ꓚꓱꓹ ꓠꓬ ꓙꓳ ꓖꓴꓳ= ꓣꓳ ꓬꓰ ꓙꓰ ꓠꓹ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓔꓯ ꓡꓲꓹ ꓗꓷ ꓩꓴ ꓗꓷ ꓟ ꓮ ꓟꓬꓹ ꓖꓶ ꓠꓹ ꓟ ꓥ ꓡꓳ= ꓡ ꓞꓳ ꓐꓴ ꓟꓶ ꓙꓲꓽ ꓙꓳ ꓟ ꓔꓯ ꓖꓶ꓾ ꓠꓲꓹ ꓡꓶꓽ ꓟꓯꓹ ꓛꓬꓽ ꓗꓶ ꓝꓲ꓾ ꓶ ꓡꓯꓼ ꓚꓱꓹ ꓗꓪ ꓥ ꓟꓲ ꓓꓵꓽ ꓙ ꓚꓱꓹ ꓬꓲꓸ ꓫꓵꓼ ꓧꓪ ꓓꓳ ꓡ꓾ ꓶ ꓤ ꓶ ꓟꓲ ꓚꓰꓼ ꓓꓳ ꓡ ꓢꓲꓸ ꓕꓲ ꓟꓵꓽ ꓗꓪ ꓐꓰ ꓝꓮꓲ ꓕꓲ ꓟꓵꓽ ꓗꓪ ꓛꓲ ꓗꓸ ꓘꓳꓽ ꓗꓸ ꓫꓵ ꓶ ꓡꓯꓼ ꓬꓰ ꓝꓲ ꓠꓯ ꓡꓳ= ꓕꓲ ꓣꓳ ꓐꓰ ꓕꓲ ꓣꓳ ꓓꓵꓽ ꓙ ꓚꓱꓹ ꓟꓽ ꓫꓱꓸ ꓡꓯ ꓘꓳ ꓟ ꓮ ꓔꓲꓸ ꓤꓼ ꓙꓳ ꓥ ꓟꓲ꓾ ꓴꓢꓮ ꓪ ꓔꓲꓸ ꓙꓳꓼ-ꓓ-ꓐꓴ-ꓡꓴ-ꓐꓴ-ꓫꓵ (George W. Bush) ꓐꓰ꓾ ꓐ-ꓣꓼ-ꓳ-ꓐ-ꓟ (Barak Obama) ꓐꓴ ꓘꓳ ꓣꓴ ꓔꓸ ꓟ ꓢꓲꓺ ꓠꓯ ꓞꓲꓼ ꓡꓲ-ꓬꓯ ꓚ ꓟꓲꓽ ꓡꓳ ꓚ ꓗꓴꓷꓼ ꓫꓵꓽ ꓪꓴ ꓐꓰ꓾ ꓶ ꓡꓯꓼ ꓚꓱꓹ ꓔꓯ ꓣꓱꓽ ꓬꓰ ꓙꓰ ꓠꓬ ꓕꓲ ꓟꓲ ꓠꓯ ꓡꓱꓸꓼ ꓠꓬ ꓐꓳ ꓢ ꓡ꓾ ꓢꓲ ꓡꓲꓹ ꓟ ꓙꓳ ꓡ ꓥꓳ ꓐꓰ ꓐꓯ ꓡꓳ=
ꓬꓲ ꓙꓬ ꓙꓲꓽ ꓡꓰ ꓙꓲꓽ ꓒꓬꓱꓼ ꓡ ꓔꓬ ꓟ ꓚ ꓟꓲꓽ ꓕꓱ ꓕꓲ ꓚꓱꓹ ꓗꓪ ꓖꓼ ꓡ ꓟ ꓗꓴꓷꓼ ꓐꓴ ꓠꓬ ꓐꓳ ꓢ ꓚꓱꓹ ꓐꓰ꓾ ꓢꓲ ꓡꓲꓹ ꓟ ꓔꓯ ꓠꓲꓹ ꓞ ꓪ ꓓꓴ ꓥꓳ ꓐꓯ ꓡꓳ= ꓕꓱ ꓕꓲ ꓚꓱꓹ ꓔꓯ ꓔꓳꓹ ꓢꓴ ꓐꓴ ꓠꓬ꓾ ꓫꓸ ꓙꓵ ꓟꓷꓼ ꓙꓵ ꓟ ꓔꓳꓹ ꓜꓳ ꓪ ꓥꓳ= ꓬꓲꓸ ꓪ ꓪꓴꓸ ꓠꓷꓸ ꓫꓬ ꓡ ꓕꓲ ꓠꓬꓲ ꓠꓬ꓾ ꓗꓴꓷꓼ ꓔꓯ ꓒꓴ ꓗꓷ ꓠ ꓗꓷ ꓡꓰ ꓢꓲ꓾ ꓡꓲ-ꓐ-ꓬꓯ ꓚꓱꓹ ꓗꓪ ꓔꓲꓸ ꓖꓼ ꓡ ꓓꓴ ꓥꓳ= ꓬꓲꓸ ꓙꓵꓹ ꓪꓽ ꓐꓶ ꓗꓴꓸ ꓥ ꓟꓲ꓾ ꓕꓲ ꓠꓬꓲ ꓠꓬ ꓡꓳ ꓪꓴꓸ ꓗꓳ-ꓣꓲ-ꓬ꓾ ꓲ-ꓣꓼ ꓐꓰ꓾ ꓰꓡ-ꓢ-ꓐ-ꓓꓳꓹ ꓗꓴꓷꓼ ꓐꓴ ꓠꓬ꓾ ꓓꓯ-ꓟꓼ꓾ ꓲ-ꓳ-ꓪ ꓡꓰ ꓐꓰ ꓒꓬꓱꓼ ꓡ ꓓꓴ ꓥꓳ=
1990 ꓘꓳꓼ ꓗꓪ ꓐꓰ 2000 ꓘꓳꓼ ꓖ ꓡꓯꓼ ꓖꓼ ꓙꓲ ꓗꓪ ꓠꓬ꓾ ꓡꓲ-ꓐ-ꓬꓯ ꓠꓬ ꓕꓲ ꓟꓲ ꓠꓯ ꓠꓲꓹ ꓒꓴ ꓟ ꓠꓯ ꓞꓲꓼ ꓓꓽ ꓟ ꓡꓰ ꓐꓰ (ꓫꓵꓽ ꓒꓽ ꓙꓱꓽ ꓘꓶꓽ ꓡꓰ ꓐꓰ) ꓗ ꓡꓳ= ꓐꓶ-ꓬ-ꓜꓰꓸ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓲ-ꓓꓲ-ꓬ ꓗꓴꓷꓼ ꓐꓴ ꓠꓬ ꓘꓰꓹ ꓖꓴ ꓟꓽ ꓙꓳ ꓔꓳꓹ ꓕꓯꓼ ꓡ ꓟ ꓐꓳ ꓢ ꓚꓱꓹ ꓔꓯ ꓖꓼ ꓠꓹ ꓟ ꓐꓱ ꓶ ꓠꓯ ꓞꓲꓼ ꓓꓽ ꓟ ꓕꓱ ꓟ ꓔꓯ ꓓꓳ ꓠ ꓗꓷ ꓡꓰꓳ= ꓠꓯ ꓞꓲꓼ ꓕꓱ ꓟ ꓔꓯ ꓟꓽ ꓓꓳ ꓢꓴ ꓠꓬ ꓮ ꓠꓱ ꓟ ꓡ ꓞꓳ ꓐꓰ ꓢꓪꓼ ꓢꓲꓸ ꓤꓲ ꓡꓳ= 1997 ꓘꓳꓼ ꓕꓯ ꓴꓢꓮ ꓪ ꓔꓲꓸ ꓐꓲ-ꓗ-ꓡꓲ-ꓔ ꓡꓰ꓾ ꓧꓶꓽ ꓗꓴꓷꓼ ꓙꓵꓽ ꓢꓴ ꓐꓴ ꓔꓯ “ꓟꓲ ꓠꓯ ꓚ ꓟꓲꓽ ꓗꓪ ꓟꓽ ꓜꓳ ꓟ ꓕꓲ ꓒꓳꓹ ꓗꓪ ꓦꓰꓼ ꓔꓬ ꓢꓴ” ꓐꓰ ꓒꓴ ꓒꓴ ꓡꓯꓽ ꓡꓯꓽ ꓓꓰ ꓖꓴ ꓧꓪ ꓘꓶꓽ ꓕꓱ ꓡꓳ=
ꓖꓳ ꓡꓱ ꓥ ꓟꓲ꓾ 2008 ꓘꓳꓼ ꓶ ꓡꓯꓼ ꓞꓰ ꓡꓰ ꓟ ꓠꓻ ꓓꓱꓽ ꓦꓬꓼ ꓠꓬꓲ ꓔꓳꓹ ꓜꓳ ꓟ ꓗꓪ ꓐꓰ ꓕꓲ ꓟꓲ ꓠꓯ ꓗꓪ ꓟ ꓡ ꓞꓳ ꓐꓴ ꓠꓬ꓾ ꓡꓲ-ꓐ-ꓬꓯ ꓚ ꓟꓲꓽ ꓠꓬ ꓓꓵꓽ ꓙ ꓔꓸ ꓟ ꓡꓰ ꓐꓰ ꓟꓽ ꓥ ꓐꓶ ꓐꓰ ꓧꓪꓸ ꓛꓲꓽ ꓡ ꓡꓳ= ꓚꓬꓹ ꓕꓴꓽ ꓟ꓾ ꓐꓱ ꓕꓴꓽ ꓟ ꓕꓲ ꓧꓪꓸ ꓬꓰ ꓔꓯꓺ ꓡꓯ ꓘꓳ ꓡ ꓡꓳ= ꓡ ꓞꓳ ꓐꓴ ꓕꓲ ꓟꓵꓽ ꓕꓲ ꓟꓵꓽ ꓬꓯꓽ ꓐꓯꓽ ꓚꓲꓸ ꓚꓳ ꓟ ꓐꓰ꓾ ꓗꓽ ꓔꓸ ꓓꓴ ꓟꓽ ꓙꓳ ꓶ ꓡꓯ ꓬꓰ ꓚꓱꓹ ꓙ ꓟꓳ ꓘꓶꓽ ꓐꓴ ꓔꓯ ꓔꓳꓹ ꓢꓴ ꓙꓳ ꓡ ꓡꓳ= ꓓꓰ-ꓟꓳ-ꓗꓯ-ꓢꓰ ꓗꓴꓷꓼ ꓙꓵꓽ ꓜꓴ ꓐꓴ ꓥ ꓟꓲ꓾ ꓫꓵꓽ ꓘꓶꓽ ꓟꓬꓱꓽ꓾ ꓫꓵꓽ ꓓꓳ ꓟꓬꓱꓽ ꓗꓪ ꓗꓪꓽ ꓫꓵꓽ ꓡ ꓢꓲ꓾ ꓬꓲꓸ ꓪ ꓔꓯ ꓔꓳꓹ ꓢꓴ ꓐꓴ ꓔꓯ ꓠꓬꓲꓸ ꓤꓲ ꓟ ꓬꓰ ꓔꓴ ꓡ ꓡꓳ= ꓔꓴ-ꓣ-ꓗꓲ ꓐꓰ꓾ ꓣ-ꓫꓸ ꓗꓴꓷꓼ ꓓꓽ ꓟ ꓐꓴ ꓠꓬ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓟꓽ ꓥ ꓟ ꓙꓵꓽ ꓚꓱꓹ ꓔꓯ ꓒꓴ ꓒꓴ ꓡꓯꓽ ꓡꓯꓽ ꓬꓰ ꓟꓳꓸ ꓡ ꓡꓳ= ꓠꓬꓲꓸ ꓠꓬꓲ ꓠꓬ ꓧꓶꓽ ꓗꓴꓷꓼ ꓗꓳ-ꓟꓴ-ꓠꓲꓼ ꓗꓴꓷꓼ ꓙꓵꓽ ꓜꓴ ꓔꓯ “ꓚ ꓟꓲꓽ ꓗꓪ ꓟꓽ ꓜꓳ ꓟ ꓕꓲ ꓛꓱꓽ ꓗꓪ ꓦꓰꓼ ꓢꓴ” ꓐꓰ ꓮ ꓟ ꓐꓯ ꓑꓶꓸ ꓡ?
ꓰꓴ (European Union) ꓗꓪ ꓐꓰ ꓐꓶ-ꓬꓲ-ꓔꓲ (Britain) ꓐꓴ ꓓꓳ ꓙꓰ ꓠꓹ ꓟ ꓟꓯꓹ ꓗꓶ ꓡꓯ ꓘꓳ ꓟ ꓐꓰ꓾ ꓴꓢꓮ ꓗꓪ ꓓꓳ-ꓠꓯ-ꓕ-ꓣꓮꓟꓼ ꓪ ꓔꓲꓸ ꓓꓯꓺ ꓡ ꓟ 2016 ꓘꓳꓼ ꓗꓪ ꓠꓬ꓾ ꓡꓲ-ꓐ-ꓬꓯ ꓬꓲꓸ ꓟꓶꓽ ꓓꓶꓽ ꓗꓴꓷꓼ ꓥ ꓟ ꓰꓴ ꓐꓰ꓾ ꓮ-ꓟꓯ-ꓣꓲ-ꓗ ꓟꓵꓽ ꓐꓴ ꓠꓯꓸꓼ ꓗꓪ ꓓꓵꓽ ꓙ ꓟ ꓡꓰ ꓐꓰ ꓟꓽ ꓥ ꓟ ꓡꓲ-ꓐ-ꓬꓯ ꓚ ꓟꓲꓽ ꓛꓲ ꓡ ꓟ ꓒꓴ ꓒꓴ ꓡꓯꓽ ꓡꓯꓽ ꓟꓳ ꓡ ꓡꓳ= ꓟꓶ ꓤ ꓟꓽ ꓥ ꓢꓰꓽ ꓟ ꓦꓬꓼ ꓠꓬꓲ ꓗꓪ ꓮ-ꓟꓯ-ꓣ-ꓗ ꓐꓰ꓾ ꓰꓴ ꓟꓵꓽ ꓢꓴ ꓐꓴ ꓠꓬ꓾ ꓡ ꓛꓴꓸ ꓟꓳꓸ ꓜꓲꓽ ꓔꓸ ꓢꓲ꓾ ꓲ-ꓣꓼ ꓐꓰ꓾ ꓡꓲ-ꓐꓲ-ꓬ ꓗꓴꓷꓼ ꓐꓴ ꓔꓯ ꓟꓽ ꓓ ꓟꓽ ꓢ ꓡꓲ-ꓐ-ꓬꓯ ꓬꓰ ꓝꓲ ꓥ ꓟꓲ꓾ ꓮ ꓟꓶ ꓠꓬ ꓬꓲꓸ ꓪ ꓧꓪꓽ ꓒꓴ ꓫꓵꓽ ꓐꓴ (ꓗ-ꓔꓯꓼ-ꓗꓲ꓾ ꓬꓳꓼ-ꓗꓶ-ꓫꓸ-ꓬ) ꓖꓶ ꓡꓲ-ꓐ-ꓬꓯ ꓚ ꓟꓲꓽ ꓠꓬ ꓒꓬꓱꓼ ꓡ ꓟꓽ ꓓ꓾ (ꓥ ꓠꓬ) ꓮ ꓘꓶꓸ ꓠꓲꓹ ꓫꓵ ꓓꓴ ꓠꓽ ꓟꓽ ꓥ ꓐꓰ ꓢꓷꓸ ꓡ ꓡꓳ=
ꓕꓲ ꓐꓱ ꓠꓬ ꓧꓶꓸ ꓕꓯ ꓟ ꓡꓰ ꓐꓰ ꓞꓳ ꓫꓵꓽ ꓒꓯꓽ ꓢꓲ꓾ ꓞꓳ ꓙꓳ ꓙꓶ ꓒꓯꓽ ꓢꓲ꓾ ꓤ ꓑꓸ ꓤ ꓟꓶꓼ ꓒꓯꓽ ꓢꓲ ꓘꓳ ꓣꓴ ꓟꓶ ꓟ ꓶꓽ ꓔꓯ ꓡꓳ ꓩꓴ ꓟꓽ ꓬꓯꓼ= ꓕꓲ ꓐꓱ ꓠꓬ (ꓜꓳꓽ ꓟꓽ ꓜꓳ ꓠꓬ ꓕꓽ ꓐꓯ ꓢꓲꓽ) ꓡꓲ-ꓐ-ꓬꓯ ꓚ ꓟꓲꓽ ꓐꓰ꓾ ꓟꓲ ꓠꓯ ꓡꓴꓸ ꓡꓴꓸ ꓟ ꓞꓳ ꓘꓹ ꓕꓲ ꓟ ꓡꓰ ꓐꓰ ꓒꓬꓱꓼ ꓡ ꓔꓬ ꓟ ꓗꓪ ꓐꓰ ꓡ ꓞꓳ ꓮ ꓟꓬꓹ ꓠꓬꓲ ꓠꓬꓲꓸ ꓤꓲ ꓟꓶ ꓢꓴ ꓒꓬꓱꓼ ꓡ ꓖꓴ ꓢꓲ꓾ ꓡ ꓞꓳ ꓕꓲ ꓩꓴꓸ ꓤꓼ ꓡꓰ ꓐꓳ ꓬꓲꓼ ꓢꓴ ꓒꓬꓱꓼ ꓡ ꓔꓬ ꓡꓳ ꓐꓰ ꓡꓳꓸ ꓟꓳ ꓡꓳ=
1938 ꓘꓳꓼ ꓗꓪ ꓠꓬ ꓟꓲ ꓠꓯ ꓡ ꓞꓳ ꓐꓴ ꓠꓬ ꓚ ꓟꓲꓽ ꓓꓽ ꓟ (3) ꓚꓱꓹ ꓔꓯ ꓢꓲꓻ ꓣꓴ ꓐ ꓡ ꓡꓳ= 1968 ꓘꓳꓼ ꓗꓪ ꓠꓬ ꓚ ꓟꓲꓽ ꓓꓽ ꓟ (2) ꓚꓱꓹ ꓡꓰꓽ ꓜꓰ ꓡꓰꓳ= 1998 ꓘꓳꓼ ꓗꓪ ꓠꓬ ꓚ ꓟꓲꓽ ꓓꓽ ꓟ (1) ꓚꓱꓹ ꓡꓰ ꓙꓳ ꓡꓰ ꓢꓲ꓾ 2018 ꓘꓳꓼ ꓗꓪ ꓛꓲ ꓡ ꓕꓯ ꓢꓲꓻ ꓣꓴ ꓠꓹ ꓟ ꓚ ꓟꓲꓽ ꓕꓲ ꓚꓱꓹ ꓡꓲꓸ ꓟꓽ ꓜꓰ ꓡꓰꓳ= ꓕꓲ ꓟꓲ ꓠꓯ ꓔꓯ ꓗꓪꓼ ꓔꓸ ꓟ ꓚ ꓟꓲꓽ ꓓꓽ ꓟ ꓡꓲ-ꓐ-ꓬꓯ ꓔꓯ ꓙꓵꓻ ꓢꓴ ꓐꓴ ꓮ ꓙꓵꓽ ꓮ ꓡꓲ ꓬꓰ ꓟꓽ ꓥ꓾ ꓧꓶ ꓛꓰꓹ ꓧꓶ ꓟꓽ ꓟꓳ ꓗꓷ ꓡꓰ ꓖꓴꓳ= ꓚꓲ ꓟꓲ ꓕꓲ ꓟˍ ꓡꓰ ꓙꓳ ꓟ ꓠꓬ ꓮ ꓘꓶꓸ ꓜꓳ ꓡꓳ= ꓮ ꓫꓵꓽ ꓖꓶ ꓬꓲꓸ ꓖ ꓙꓳ ꓙꓳ ꓔꓬ ꓢ ꓢꓲ ꓡꓲꓹ ꓬꓰꓳ= ꓖꓳ ꓡꓱ ꓥ ꓟꓲ ꓚ ꓟꓲꓽ ꓕꓲ ꓟ ꓡꓲꓸ ꓟꓽ ꓜꓰ ꓡꓰ ꓟ ꓠꓬ꓾ ꓙꓳꓺ ꓧꓰꓸ ꓓꓴ꓾ ꓠꓲꓹ ꓟ ꓔꓶꓹ ꓫꓸ ꓓꓴ ꓒꓬꓱꓼ ꓡꓻꓳ= ꓮ ꓡꓲ ꓐꓰ ꓕꓱ ꓡꓱ ꓒꓬꓱꓼ ꓡ ꓗꓷ ꓟ ꓙ ꓖꓴ ꓔꓯ ꓡꓲ-ꓐ-ꓬꓯ ꓙꓵꓻ ꓢꓴ ꓐꓴ ꓓꓵꓽ ꓙ ꓟꓽ ꓗꓴꓸ ꓬꓰꓳ= ꓮ ꓡꓲꓳ ꓫꓵꓽ ꓕꓲ ꓚꓱꓹ ꓗꓪ ꓐꓰ ꓟꓲ ꓠꓯ ꓗꓪ ꓬꓲꓸ ꓚꓵ ꓒꓬꓱꓼ ꓔꓬ ꓟ ꓔꓯ ꓒꓶꓻ ꓐ ꓡ ꓥ ꓢꓶ ꓐꓰ ꓓꓵ ꓙ ꓮ’ ꓡꓰꓳ= ꓓꓵꓽ ꓙ ꓔꓸ ꓟ ꓡꓰ ꓐꓰ ꓟꓲ ꓠꓯ ꓚ ꓟꓲꓽ ꓔꓯ ꓚ ꓗꓸ ꓟꓽ ꓘꓳ ꓡꓰ ꓕꓯ꓾ (ꓢꓲ ꓡꓲꓹ ꓐꓰ ꓙꓳ ꓢ ꓔꓬ ꓢ ꓟ ꓟꓲ ꓠꓯ ꓒꓬꓱꓼ ꓡ ꓟꓽ ꓓ ꓟ ꓗꓪ ꓐꓰ)꓾ ꓟꓲ ꓠꓯ ꓬꓲꓸ ꓧꓶꓽ ꓢꓴ ꓙꓰ ꓡ ꓓꓴ ꓬꓰꓳ ꓐꓰ ꓓꓵ ꓙ ꓛꓲ ꓡ ꓡꓳ= ꓬꓲꓸ ꓔꓱꓹ ꓬꓲꓸ ꓒꓬꓱꓼ ꓔꓬ ꓟ ꓡꓳ ꓚ ꓘꓳ ꓣꓴ ꓟꓽ ꓗꓴꓸ꓾ ꓡꓳꓸ ꓟꓽ ꓗꓴꓸ ꓟ ꓗꓪ ꓐꓰ꓾ ꓕꓱ ꓟ ꓠꓬ ꓟꓽ ꓜꓳꓽ ꓪ꓾ ꓮ ꓙꓵꓽ ꓐꓬ ꓡꓰ ꓡ ꓓꓴ ꓬꓰ ꓔꓬꓳ꓾ ꓐꓰ ꓙ ꓫꓸ ꓡ ꓡꓳ= ꓪꓴꓸ ꓓꓵ ꓗꓪ ꓛꓰꓹ ꓢꓲꓽ ꓡꓲꓽ ꓡ ꓕꓲ ꓖꓼ ꓠꓰ ꓥꓪ ꓳꓸ ꓠꓷꓸ ꓟ ꓗꓲ-ꓢ ꓠꓻ ꓫꓵꓽ ꓜꓳꓻ ꓡꓰ ꓐꓶ ꓐꓰ ꓓꓵꓽ ꓙ ꓢꓴ ꓙꓳ ꓟ ꓡꓰ ꓐꓰ꓾ ꓡꓲ-ꓐ-ꓬꓯ ꓚ ꓟꓲꓽ ꓙꓵꓻ ꓢꓴ ꓐꓴ ꓥ ꓟꓲ꓾ ꓐ-ꓬꓲ-ꓔꓲꓠ ꓗꓴꓷꓼ ꓠꓬ ꓰꓴ ꓗꓪ ꓐꓰ ꓓꓳ ꓙꓰ ꓡ ꓕꓯ꓾ ꓴꓢꓮ ꓗꓪ ꓓꓳ-ꓠꓯ-ꓕ-ꓣꓮꓟꓼ ꓪ ꓔꓲꓸ ꓒꓬꓱꓼ ꓡ ꓕꓯ ꓟꓲ ꓠꓯ ꓦꓬꓼ ꓠꓬꓲ ꓡꓳꓹ ꓬꓰ ꓝꓲꓸ ꓠꓶꓽ ꓡꓻꓳ ( ꓮ ꓙꓵꓽ ꓐꓬ ꓡꓰ ꓡ ꓝꓲꓸ ꓛꓲꓳ) ꓐꓰ ꓢꓪꓼ ꓓꓳ ꓡ ꓢꓲ꓾ ꓮ ꓘꓶꓸ ꓙꓳꓺ ꓛꓱꓽ ꓔꓬ ꓡꓳ=
ꓦꓯꓽ ꓕꓳꓹ ꓐꓲꓸ ꓐꓲꓸ ꓔꓯ ꓢꓰꓼ ꓟ ꓐꓰ꓾ ꓓꓵꓽ ꓙ ꓚꓱꓹ ꓐꓲꓸ ꓐꓲꓸ ꓔꓯ ꓢꓰꓼ ꓟ
ꓙꓼ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰꓽ ꓕꓲ ꓕꓶꓹꓼ ꓪꓴꓽ ꓟꓴ ꓡ ꓟ ꓑꓶꓸ ꓓꓴ ꓟꓲ ꓠꓯ ꓡꓳꓹ ꓬꓰ ꓟ ꓦꓬꓼ ꓠꓬꓲ ꓛꓲ ꓡꓻꓳ ꓐꓰ ꓓꓵꓽ ꓙ ꓟ ꓔꓯ ꓟꓬꓽ ꓠꓬꓲ ꓢꓯꓼ ꓖꓶ꓾ ꓟꓬꓽ ꓠꓬꓲ ꓙꓽ ꓫꓸ ꓡꓰ ꓝꓲ ꓡꓳ= ꓬꓲ ꓞ ꓙꓼ ꓢꓯꓼ꓾ ꓬꓯꓼ-ꓠ ꓚꓸ ꓦꓲ ꓐꓰ꓾ ꓔꓦ ꓐꓴ ꓗꓪ ꓐꓰ ꓕꓲ ꓟꓲ ꓠꓯ ꓔꓯ ꓙꓵꓽ ꓠꓹ ꓟ꓾ ꓙꓼ ꓢꓷꓸ ꓠꓲꓹ ꓗꓪ ꓐꓰ ꓡꓲ-ꓐ-ꓬꓯ ꓚ ꓟꓲꓽ ꓔꓯ ꓪꓴꓽ ꓟꓴ ꓡ ꓝꓲ ꓗꓷꓳ= ꓖꓳ ꓡꓱ ꓥ ꓟꓲ꓾ ꓝꓸ ꓢꓲꓸ ꓪꓴꓽ ꓟꓴ ꓡ ꓟ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰ ꓐꓰ꓾ ꓧꓪ ꓖꓳ ꓓꓱꓽ ꓢꓷꓸ ꓠꓲꓹ ꓔꓯ ꓙꓵꓽ ꓠꓹ ꓟ ꓠꓬ ꓬꓰ ꓫꓸ ꓡꓰꓳ=
ꓗꓴꓷꓼ ꓟꓬꓱꓽ ꓬꓰ ꓢꓴ ꓐꓰ꓾ ꓟꓯꓹ ꓒꓬꓽ ꓗꓶ ꓢꓴ ꓑ ꓫꓬꓼ ꓐꓴ ꓠꓬ ꓙꓼ ꓪꓴꓸ ꓠꓷꓸ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰ ꓪꓴꓽ ꓟꓴ ꓡ ꓟ ꓔꓯ ꓙꓵꓽ ꓗꓪꓼ ꓓꓴ ꓕꓽ ꓐꓯꓼ꓾ ꓖꓼ ꓢꓳ ꓓꓴ ꓟ ꓡꓲꓸ ꓬꓰ ꓟꓽ ꓐ ꓡꓻꓳ= ꓠꓱꓸ ꓐꓯꓼ ꓮ ꓙꓵꓽ ꓕꓯ ꓢꓲ꓾ 1990 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓕꓲ ꓟꓲ ꓠꓯ ꓔꓯ ꓡꓶꓸ ꓑ ꓙꓰ ꓝꓲ ꓟ ꓠꓬ꓾ ꓲ-ꓔ-ꓠꓯꓼ (Internet) ꓥꓳ ꓐꓯ ꓠ ꓗ ꓡꓳ= ꓖꓳ ꓡꓱ ꓥ ꓟꓲ꓾ ꓙꓼ ꓪꓴꓸ ꓠꓷꓸ ꓝꓸ ꓡꓯ ꓘꓳ ꓚꓱꓹ ꓒꓳꓹ ꓔꓳꓹ ꓟ ꓤꓶ ꓕꓱ ꓟ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓠꓬ꓾ ꓗꓴꓷꓼ ꓟꓬꓱꓽ ꓬꓰ ꓢꓴ ꓐꓴ ꓕꓯ ꓢꓲ ꓙꓼ ꓪꓴꓸ ꓠꓷꓸ ꓟꓬꓱꓽ ꓬꓰ ꓢꓴ (Engineers) ꓐꓴ ꓥ ꓡꓳ= ꓙꓼ ꓪꓴꓸ ꓠꓷꓸ ꓝꓸ ꓡꓯ ꓘꓳ ꓚꓱꓹ ꓠꓬ ꓮ ꓡꓲ ꓒꓬꓱꓼ ꓡ ꓠꓯ ꓡ ꓐꓯ ꓟ ꓔꓯ ꓟꓯꓹ ꓒꓬꓽ ꓗꓶ ꓠꓬꓲ ꓪꓻꓰ? ꓓꓰ-ꓟꓳ-ꓗꓯ-ꓢꓰ ꓤꓶ ꓦꓬꓼ ꓠꓬꓲ ꓗꓪ ꓚꓹ ꓟꓼ ꓠ ꓠ ꓗꓷ ꓡꓰ ꓗꓪ ꓛꓲ ꓒꓳꓹ ꓡꓶꓸ ꓙꓰ ꓟ ꓔꓯ ꓔꓳꓹ ꓜꓳ ꓔꓬꓳ= ꓮ ꓟꓶ ꓓꓳ ꓡ ꓐꓰ ꓗꓹ ꓟ ꓪꓴꓸ ꓠꓷꓸ ꓚꓬꓼ ꓐꓰ꓾ ꓐ-ꓡꓳꓼ-ꓛꓰꓸ (blockchain) ꓢꓷꓸ ꓠꓲꓹ ꓐꓴ ꓔꓯ ꓙꓵꓽ ꓗꓪꓼ ꓠꓹ ꓟ ꓠꓬ ꓟꓽ ꓢ ꓬꓰꓳ=
ꓠꓬꓲꓸ ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓣꓱꓽ ꓔꓬ ꓟ ꓒꓴ ꓠꓬ꓾ ꓙꓼ ꓪꓴꓸ ꓠꓷꓸ ꓡꓰ ꓙꓵꓽ ꓢꓲꓸ ꓢꓪꓼ ꓡ ꓠꓬꓲ꓾ ꓬꓲꓸ ꓮ ꓡꓲ ꓟꓬꓱꓽ ꓬꓰ ꓔꓬ ꓟ ꓔꓯ ꓡ ꓞꓳ ꓐꓴ ꓙ ꓜꓲꓼ ꓫꓸ ꓡ ꓡꓳ= ꓖꓳ ꓕꓯ ꓗꓴꓷꓼ ꓙꓵꓽ ꓚꓱꓹ ꓔꓯ ꓮ ꓡꓲ ꓒꓬꓱꓼ ꓡ ꓝꓲ ꓐ ꓡ ꓥꓳ ꓪ? ꓗꓴꓷꓼ ꓙꓵꓽ ꓜꓴ ꓕꓲ ꓟ ꓠꓬ꓾ ꓗꓴꓷꓼ ꓗꓪ ꓣꓱꓽ ꓬꓯꓼ ꓟ ꓒꓴ ꓮ ꓡꓲ ꓧꓪ ꓠꓹ ꓟ ꓐꓰ꓾ ꓮ ꓡꓲ ꓣꓱꓽ ꓠꓹ ꓟ ꓔꓯ ꓟꓳꓸ ꓙꓼ ꓪꓴꓸ ꓠꓷꓸ ꓡꓰ ꓢꓪꓼ ꓖꓶ ꓡ ꓟ ꓔꓯ ꓦ ꓡꓱ ꓐꓳ ꓢꓲꓸ ꓡꓳꓸ ꓔꓬ ꓠ ꓗꓷ ꓡꓰꓳ= ꓝꓮꓲ ꓕꓲ ꓣꓳ ꓗꓪ ꓐꓰ ꓝꓮꓲ ꓕꓲ ꓣꓳ ꓔ ꓛꓲ ꓘꓴ ꓘꓴ ꓠꓯ ꓠꓯ ꓒꓴ ꓖꓶ ꓡꓯ ꓘꓳ꓾ ꓣꓴ ꓡꓯ ꓘꓳ ꓟ ꓚꓱꓹ (cryptocurrency) ꓥ ꓟ blockchain, bitcoin ꓑꓶꓸ ꓓꓴ ꓗꓴꓷꓼ ꓙꓵꓽ ꓢꓴ ꓐꓴ ꓝꓲꓸ ꓮ ꓡꓲ ꓖꓳꓻ ꓫꓺ ꓠꓹ ꓟ ꓬꓲꓸ ꓚꓰ ꓬꓲꓸ ꓪꓴꓸ ꓗꓪ ꓐꓰ ꓕꓲ ꓧꓪꓸ ꓓꓵꓽ ꓙ ꓠ ꓗꓷ ꓡ ꓗꓴꓸ ꓡꓳ= ꓔꓯ ꓥꓳꓽ꓾ ꓴꓢꓮ ꓓꓳ-ꓡ ꓒꓴ ꓔꓯ ꓝꓲꓸ ꓖꓳꓻ ꓟꓽ ꓙꓲ ꓟ꓾ ꓖꓳꓻ ꓓꓴ ꓬꓰ ꓟꓽ ꓠ ꓡꓰ ꓟ ꓦꓬꓼ ꓠꓬꓲ ꓒꓬꓱꓼ ꓡ ꓗꓴ ꓡꓳ= ꓮ ꓡꓲꓳ ꓐꓯ ꓠꓬ ꓶ ꓡꓯꓼ ꓚꓱꓹ ꓗꓪ ꓮ ꓡꓲ ꓕꓲ ꓗꓴꓷꓼ ꓗꓪ ꓟ ꓒꓴ ꓔꓯ ꓟꓲ ꓣꓱꓽ ꓟꓽ ꓛꓲ ꓟ ꓬꓲꓸ ꓚꓱꓹ ꓓꓳ ꓡ ꓔꓬ ꓟ ꓑꓶꓸ ꓓꓴ ꓥ ꓡꓳ= ꓖꓳ ꓕꓯ ꓗꓴꓷꓼ ꓙꓵꓽ ꓜꓴ ꓐꓴ ꓠꓬ ꓝꓲꓸ ꓖꓳꓻ ꓚꓱꓹ ꓬꓲꓸ ꓫꓵꓼ ꓚꓰꓼ ꓠ ꓗꓷ ꓡ ꓥꓳ= (ꓔꓯ ꓥꓳꓽ꓾ ꓓꓳꓽ ꓬꓲꓸ ꓫꓵ ꓬꓲ ꓙꓰꓽ ꓔꓯ ꓝꓲꓸ ꓖꓳꓻ ꓟ ꓒꓬꓱꓼ ꓡ ꓓ ꓡꓳ= ꓮ ꓡꓲꓳ ꓐꓯ ꓠꓬ ꓶ ꓡꓯꓼ ꓚꓱꓹ ꓮ ꓙꓵꓽ ꓗꓪ ꓓꓳꓽ ꓬꓲꓸ ꓫꓵ ꓬꓲ ꓙꓰ ꓠꓬ ꓒꓵꓽˍ ꓟ ꓕꓲ ꓫꓵꓽ ꓥ ꓢꓲ꓾ ꓮ ꓙꓵꓽ ꓢꓴ ꓖꓳ ꓟ ꓔꓯ ꓠꓲꓹ ꓫꓵ ꓟ ꓕꓲ ꓫꓵꓽ ꓒꓬꓱꓼ ꓡ ꓓ ꓡꓳ=) ꓗꓴꓷꓼ ꓙꓵꓽ ꓚꓱꓹ ꓗꓪ ꓐꓰ ꓕꓱ ꓡꓱꓳ ꓫꓵꓽ ꓒꓴ ꓟꓽ ꓣꓱꓽ ꓟ ꓦꓬꓼ ꓠꓬꓲ ꓔꓯ ꓗꓪꓽ ꓫꓵꓽ ꓠꓹ ꓟ ꓐꓰ꓾ ꓙꓵꓽ ꓠꓹ ꓟ ꓕꓵꓼ ꓡꓵꓸ ꓙ ꓖꓶꓽ ꓔꓸ ꓡ? ꓙꓵꓽ ꓐ ꓡ ꓥꓳ ꓪ?
ꓖꓳ ꓟ ꓕꓯ ꓢꓲ ꓬꓳꓹ ꓚꓲ ꓟ ꓕꓲ ꓫꓵꓽ ꓠꓬ꓾ ꓓꓳꓽ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰ ꓪꓴꓽ ꓟꓴ ꓡ ꓟ ꓐꓰ꓾ ꓧꓪ ꓖꓳ ꓓꓱꓽ ꓚꓱꓹ ꓮ ꓟꓬꓹ ꓢꓳ ꓟꓶ ꓡꓰ ꓟ ꓗꓪ ꓐꓰ ꓣꓳ ꓚꓲ ꓛꓬ ꓧꓪ ꓖꓳ ꓓꓱꓽ ꓔꓯ ꓥ ꓟꓲ ꓡꓶꓸ ꓑ ꓙꓰ ꓐ ꓡ ꓗꓪ ꓛꓲ ꓢꓷꓸ ꓠꓲꓹ ꓪꓴꓽ ꓟꓴ ꓡ ꓟ ꓚꓱꓹ ꓥ ꓡꓳ= ꓧꓶꓸ ꓕꓯ ꓠꓬ ꓡ ꓞꓳ ꓐꓴ ꓠꓽ ꓚꓲ ꓛꓬ ꓧꓪ ꓖꓳ ꓓꓱꓽ ꓖꓳ ꓐꓽ ꓗꓪ ꓙꓳ ꓟ ꓟꓴ ꓗꓪ ꓟꓲ ꓠꓯ ꓔꓯ ꓮ ꓮ ꓡꓲ ꓙꓵꓽ ꓗꓪꓼ ꓠꓹ ꓟ ꓢꓯꓼ ꓕꓵꓼ ꓡꓳ= ꓚꓲ ꓛꓬ ꓓꓵꓽ ꓙ ꓚꓱꓹ ꓔꓯ ꓙꓵꓽ ꓟꓽ ꓐ ꓡ= ꓣꓳ ꓠꓬ ꓬꓲ ꓙꓬ ꓐꓱ ꓓꓽ ꓟ ꓫꓬꓹ ꓢꓲ꓾ ꓬꓲ ꓙꓬ ꓡꓳ ꓗꓸ ꓬꓲꓻ ꓟ ꓔꓯ ꓠꓽ ꓡꓰ ꓝꓲ ꓐ ꓡ ꓡꓳ= ꓖꓳ ꓡꓱ ꓟꓲ ꓣꓳ ꓧꓪꓽ ꓖꓳ ꓓꓱꓽ ꓟꓳꓽ ꓫꓵꓸ ꓜꓳ ꓡ ꓟ ꓔꓯ ꓗꓽ ꓔꓸ ꓟꓽ ꓐ ꓡ= ꓬꓲ ꓐꓱ ꓓꓽ ꓟ ꓫꓬꓹ ꓗꓴꓸ ꓥ ꓟꓲ꓾ ꓪꓴꓸ ꓠꓷꓸ ꓔꓯ ꓫꓬꓹ ꓜꓯ ꓟꓽ ꓐ ꓡ= ꓣꓳ ꓬꓲꓼ ꓔꓸ ꓔꓬ ꓟ ꓝꓲꓸ ꓗꓪ ꓪꓴꓸ ꓓꓵ ꓗꓪ ꓦꓯꓽ ꓕꓳꓹ ꓐꓲꓸ ꓐꓲꓸ ꓟꓶ ꓡ ꓟ ꓔꓯ ꓢꓰꓼ ꓐ ꓡ ꓥ ꓟꓲ꓾ ꓓꓵꓽ ꓙ ꓚꓱꓹ ꓐꓲꓸ ꓐꓲꓸ (ꓓꓵꓽ ꓙ ꓚꓱꓹ ꓠꓽ ꓬꓰ ꓟꓽ ꓠ ꓬꓲꓼ ꓟꓶ ꓟꓽ ꓕꓳꓹ ꓗꓷ ꓡ ꓟ) ꓔꓯ ꓠꓽ ꓡꓰ ꓠꓹ ꓟ ꓬꓰ ꓟꓽ ꓗꓴꓸ ꓢꓴ ꓮ ꓟꓬꓹ ꓙꓳ ꓡꓳ=
ꓧꓪ ꓖꓳ ꓓꓱꓽ ꓢꓷꓸ ꓠꓲꓹ ꓐꓰ꓾ ꓬꓲꓸ ꓫꓵ ꓬꓲ ꓙꓰ ꓢꓷꓸ ꓠꓲꓹ ꓗꓪ ꓐꓰ ꓚꓲꓸ ꓛꓬ ꓧꓪ ꓖꓳ ꓓꓱ ꓔꓯ ꓙꓵꓽ ꓐ ꓡ꓾ ꓢꓯꓼ ꓟꓬ ꓔꓯ ꓚꓰꓼ ꓐ ꓡ ꓥꓳ= ꓧꓪ ꓖꓳ ꓓꓱꓽ ꓐꓰ꓾ ꓪꓴꓸ ꓠꓷꓸ ꓔꓯ ꓟꓲ ꓚꓰꓼ ꓐ ꓡ ꓢꓲ꓾ ꓡ ꓞꓳ ꓐꓴ ꓤꓶ ꓫꓵ ꓟꓬ ꓫꓵꓺ ꓡ ꓝꓲ ꓐ ꓡ ꓥꓳ= ꓓꓵꓽ ꓙ ꓚꓱꓹ ꓔꓯ ꓥ ꓟꓲ ꓠꓲꓹ ꓫꓵ ꓪ ꓡꓰ ꓟꓶꓽ ꓬꓰ ꓝꓲ꓾ ꓙꓳ ꓡ ꓝꓲ ꓐ ꓡ ꓥꓳ= ꓕꓱ ꓡꓱ ꓖꓳ ꓑꓳꓸ ꓮ ꓡꓲ ꓒꓬꓱꓼ ꓡ ꓟ ꓔꓯ ꓮ ꓟ ꓥ ꓟꓲ ꓜꓲ ꓜꓲ ꓟꓴ ꓟꓴ ꓟꓽ ꓢꓷꓸꓳ= ꓢꓷꓸ ꓟꓽ ꓐ ꓡꓻꓳ= ꓡ ꓞꓳ ꓐꓴ ꓠꓬ ꓚꓰꓼ ꓫꓵꓽ ꓚꓰꓼ ꓙꓰ ꓮ ꓟꓬꓹ ꓬꓰ ꓗꓴꓸ ꓥ ꓟꓲ꓾ ꓢꓷꓸ ꓠꓲꓹ ꓙꓳ ꓙꓳ꓾ ꓬꓲꓸ ꓡꓲ ꓙꓳ ꓙꓳ ꓣꓱꓽ ꓟꓽ ꓗꓴꓸ ꓟ ꓔꓯ ꓧꓶꓸ ꓕꓯ ꓟ ꓤꓶ ꓗꓪ ꓐꓰ ꓢꓳ ꓟꓶ ꓓ ꓡꓳ= ꓬꓲꓽ ꓟ ꓕꓲ ꓓꓴꓽ ꓔꓯ ꓗꓽ ꓞꓲꓽ ꓩꓴ ꓢꓲ꓾ ꓬꓲ ꓐꓱ ꓓꓽ ꓟ ꓒꓬꓱꓼ ꓡ ꓝꓲ ꓕꓯ꓾ ꓢꓯꓸ ꓫꓵꓽ ꓙꓳ ꓫꓵꓽ ꓐꓴ ꓔꓯ ꓮ ꓡꓲ ꓘꓶ ꓡꓶꓽ ꓡꓰ ꓟ ꓢꓪꓼ ꓟꓽ ꓗꓴꓸ= ꓣꓳ ꓓꓵꓽ ꓙ ꓚꓱꓹ ꓔꓯ ꓮ ꓡꓲ ꓠꓲꓹ ꓫꓵ ꓖꓳ ꓡꓱ ꓡꓶꓸ ꓑ ꓗꓷ ꓐ ꓡ ꓠꓬ ꓣꓳ ꓚꓲ ꓛꓬ ꓐꓰ꓾ ꓣꓳ ꓕꓲ ꓫꓵꓽ ꓕꓲ ꓟꓵꓽ ꓐꓱ ꓶ ꓮ ꓡꓲ ꓒꓬꓱꓼ ꓡ ꓟ ꓟꓽ ꓢꓷꓸ=
ꓗꓳꓸ ꓡꓳꓹ ꓡ ꓟ ꓦꓬꓼ ꓠꓬꓲ ꓗꓪ ꓡ ꓞꓳ ꓐꓴ ꓠꓬ ꓚꓲ ꓛꓬ ꓔꓬ ꓟ ꓟꓵꓽ ꓔꓯ ꓮ ꓡꓲ ꓠꓲꓹ ꓫꓵ ꓮ ꓡꓲ ꓬꓰ ꓐ ꓡ ꓟ ꓢꓯꓼ ꓪ ꓢꓷꓸ ꓠꓲꓹ ꓙꓳ ꓡ ꓡꓳ= ꓖꓳ ꓡꓱ ꓟꓲ ꓢꓯꓸ ꓫꓵꓽ ꓙꓳ ꓫꓵꓽ ꓔꓯ ꓮ ꓡꓲ ꓘꓶ ꓡꓶꓽ ꓡꓰ ꓟ ꓟꓽ ꓢꓷꓸ ꓠꓬꓲ ꓙꓲ ꓣꓴ ꓓꓴ ꓒꓬꓱꓼ ꓡ ꓡꓳ= ꓡ ꓠꓹ ꓟ ꓦ ꓜꓴ ꓘꓳꓼ ꓠꓯꓸꓼ ꓗꓪ ꓠꓬ ꓙꓼ ꓪꓴꓸ ꓠꓷꓸ ꓬꓲ ꓫꓵꓽ ꓬꓲ ꓙꓰ ꓐꓰ꓾ ꓧꓪ ꓖꓳ ꓓꓱꓽ ꓢꓷꓸ ꓠꓲꓹ ꓔꓺ ꓫꓳꓹ ꓗꓷ ꓢꓲ꓾ ꓡ ꓞꓳ ꓐꓴ ꓚꓲ ꓛꓬ ꓖꓳ ꓓꓱꓽ ꓐꓰ ꓓꓵꓽ ꓙ ꓚꓱꓹ ꓔꓯ ꓮ ꓡꓲ ꓠꓲꓹ ꓫꓵ ꓖꓳ ꓡꓱ ꓟꓬꓱꓽ ꓬꓰ ꓝꓲ ꓐ ꓡ ꓟ ꓦꓬꓼ ꓠꓬꓲ ꓛꓲ ꓡ ꓥꓳ= ꓖꓳ ꓡꓱ ꓥ ꓟꓲ꓾ ꓡ ꓞꓳ ꓓꓵꓽ ꓙ ꓚꓱꓹ ꓠꓯꓸ ꓟ ꓔꓯ ꓙ ꓜꓲꓼ ꓟꓽ ꓐ ꓡ ꓠꓬꓲ꓾ ꓮ ꓙꓵꓽ ꓐꓱ ꓶ ꓙꓲ ꓣꓴ ꓓꓴ ꓒꓬꓱꓼ ꓡ ꓐ ꓡ ꓥꓳ=
ꓧꓪ ꓖꓳ ꓓꓱꓽ ꓐꓰ ꓬꓲꓸ ꓫꓵꓽ ꓬꓲꓸ ꓙꓲꓽ ꓟꓸ ꓟꓲꓽ (Biotechnology and information technology) ꓢꓷꓸ ꓠꓲꓹ ꓙꓳ ꓒꓽ ꓐꓴ ꓠꓬ ꓚꓰꓼ ꓫꓵꓽ ꓬꓲ ꓫꓵꓼ ꓚꓰꓼ ꓔꓬ ꓢꓲ꓾ ꓬꓲ ꓪ ꓚꓰꓼ ꓟꓬꓱꓽ ꓗꓪ ꓐꓰ ꓗꓴꓷꓼ ꓫꓵꓽ ꓪꓴ ꓔꓯ ꓮ ꓡꓲ ꓘꓶ ꓡꓶꓽ ꓬꓰ ꓟ ꓟꓽ ꓧꓪꓸ ꓛꓲ ꓔꓬ= ꓗꓴꓷꓼ ꓟꓬꓱꓽ ꓬꓰ ꓢꓴ ꓑ ꓫꓬ ꓝꓲ ꓓꓴ ꓐꓴ꓾ ꓑ ꓫꓬ ꓝꓲ ꓓꓴ ꓖꓪ ꓙꓱ ꓜꓲꓼ ꓓꓴ ꓐꓴ ꓠꓬ ꓕꓱ ꓡꓱꓳ ꓫꓵꓽ ꓚꓱꓹ ꓔꓯ ꓬꓲꓸ ꓪ ꓡꓯ ꓒꓯꓹ ꓗꓪ ꓛꓲ ꓡ ꓠꓹ ꓟ ꓐꓰ꓾ ꓬꓲꓸ ꓪ ꓡꓰ ꓓꓵꓽ ꓙ ꓞꓷꓹ ꓐ ꓡ ꓠꓹ ꓟ ꓬꓰ ꓐ ꓡ ꓥꓳ ꓪꓻꓰ? ꓮ ꓟꓶ ꓒꓬꓱꓼ ꓔꓬ ꓟ ꓡꓳ ꓚ ꓐꓯ ꓠꓬ꓾ ꓕꓱ ꓡꓱ ꓬꓰ ꓟꓽ ꓐ ꓡ= ꓓꓽ ꓪꓴꓸ ꓢꓪꓼ ꓔꓸ ꓟ ꓗꓴꓷꓼ ꓟꓬꓱꓽ ꓬꓰ ꓚꓱꓹ ꓔꓶ ꓙꓱꓼ ꓗꓪ ꓬꓲꓸ ꓚꓱꓹ ꓬꓲꓸ ꓡꓲ ꓢꓷꓸ ꓠꓲꓹ ꓟꓸ ꓟꓲꓽ (technology) ꓟꓽ ꓕꓱꓹ ꓞꓹ ꓢꓰ= 2016 ꓘꓳꓼ ꓮ-ꓟꓯ-ꓣꓲ-ꓗ ꓗꓪ ꓗꓴꓷꓼ ꓙꓵꓽ ꓢꓴ ꓢꓲꓻ ꓣꓴ ꓡꓯ ꓘꓳ ꓟ ꓑꓮꓲ ꓗꓪ ꓧꓲ-ꓡ-ꓣꓲ-ꓗ-ꓡꓲ-ꓔꓮꓠ ꓰ-ꓟꓮꓲꓡ ꓟꓸ ꓟꓲꓽ ꓮ ꓘꓶꓸ ꓕꓱ ꓓꓳ ꓡ ꓡꓳ= ꓗꓴ ꓗꓴ ꓢꓲ ꓐꓳ ꓡꓯ ꓘꓳ ꓔꓸ ꓟ ꓙꓼ ꓕꓳ ꓶ ꓡꓯꓼ ꓫꓴ ꓐꓴ ꓰ-ꓟꓮꓲꓡ ꓥ ꓡꓳ= ꓡ ꓞꓳ ꓐꓴ ꓟꓬꓱꓽ ꓟꓽ ꓙꓳ ꓬꓰ ꓡ ꓟ ꓟꓸ ꓟꓲꓽ ꓫꓸ ꓕꓱ ꓡꓯ ꓘꓳ ꓥ ꓟꓲ꓾ ꓙꓼ ꓞꓳ ꓤ ꓚꓰꓼ ꓓꓳ ꓡ ꓢꓲ꓾ ꓞꓳ ꓤ ꓚꓵ ꓚꓵ ꓐꓴ ꓟꓬꓱꓽ ꓟꓽ ꓙꓳ ꓬꓰ ꓡ ꓟ ꓔꓯ ꓟꓳꓸ ꓮ ꓔꓲꓸ ꓥ ꓟꓲ ꓟꓽ ꓕꓱ ꓡ= ꓓꓳ-ꓠꓯ-ꓕ-ꓣꓼ ꓡꓰ ꓧꓶꓽ ꓒꓽ ꓐꓰ꓾ ꓟꓯ-ꓗ-ꓢꓰ-ꓗꓳ ꓒꓽ ꓐꓴ ꓮ-ꓟꓯ-ꓣꓲ-ꓗ ꓒꓽ ꓬꓲꓸ ꓛꓲ ꓟꓬꓱꓽ ꓮ ꓙꓵꓽ ꓣꓱꓽ ꓬꓰ ꓡ ꓢꓲ꓾ ꓮ-ꓟꓯ-ꓣꓲ-ꓗ ꓢꓴ ꓟꓬꓱꓽ ꓟꓽ ꓙꓳ ꓗꓷ ꓡꓰ ꓡ ꓟ ꓔꓯ ꓫꓸ ꓕꓱ ꓡꓳ= ꓘꓴꓽ ꓓꓵꓽ ꓡ ꓢꓴ ꓔꓯ ꓗꓽ ꓠꓹ ꓟ ꓟꓯ-ꓗ-ꓢꓰ-ꓗꓳ ꓟꓵꓽ ꓫꓸ ꓗ ꓐꓱ ꓕꓴꓽ ꓓꓴ ꓐꓯ ꓡꓳ= ꓖꓳ ꓡꓱ ꓥ ꓟꓲ ꓙꓼ ꓪꓴꓸ ꓠꓷꓸ ꓗꓪ ꓐꓰ ꓡ ꓞꓳ ꓐꓴ ꓟꓬꓱꓽ ꓟꓽ ꓙꓳ ꓡꓰ ꓠ ꓬꓰ ꓔꓬ ꓟ ꓙ ꓖꓴ ꓐꓰ꓾ ꓗꓯ-ꓡꓲ-ꓒꓳ-ꓠꓲ-ꓬ ꓡꓳ ꓒꓱ ꓗꓪ ꓙꓼ ꓪꓴꓸ ꓠꓷꓸ ꓐꓱ ꓓꓽ ꓟ ꓕꓴꓽ ꓙꓲꓽ ꓙꓳ ꓟ ꓔꓯ ꓮ ꓔꓲꓸ ꓥ ꓟꓲ ꓟꓲꓽ ꓦꓲ ꓟꓽ ꓙꓶꓼ=
ꓕꓱ ꓟ ꓠꓬ ꓐꓶꓽ ꓓꓵꓽ ꓕꓲ ꓒꓳꓹ ꓗꓪ ꓟ ꓡꓲ-ꓐ-ꓬꓯ ꓚ ꓟꓲꓽ ꓔꓯ ꓙꓵꓻ ꓢꓴ ꓐꓴ ꓠꓲꓹ ꓟ ꓐꓬ ꓡꓰ ꓟ ꓬꓲꓸ ꓑꓶꓸ ꓕꓲꓽ ꓟ ꓥ ꓡꓳ= (ꓠꓱꓸ ꓐꓯꓼ ꓬꓲꓸ ꓑꓶꓸ ꓮ ꓟꓬꓹ ꓙꓳ ꓢꓰ ꓡꓳ=) ꓑ ꓫꓬꓼ ꓐꓴ ꓠꓬ꓾ ꓪꓴꓸ ꓠꓷꓸ ꓚꓬꓼ (Artificial Intelligent) ꓟꓸ ꓟꓲꓽ ꓔꓯ ꓢꓷꓸ ꓟꓽ ꓐ ꓡ ꓟ ꓗꓪ ꓐꓰ ꓢ ꓖꓶ ꓟ ꓦꓬꓼ ꓠꓬꓲ ꓠꓬ ꓬꓲꓸ ꓪ ꓦꓬꓼ ꓠꓬꓲ ꓟꓽ ꓥꓻꓳ ꓐꓰ ꓢꓷꓸ ꓓꓳ ꓡ ꓡꓳ= 1938 ꓘꓳꓼ ꓗꓪ ꓠꓬ ꓢꓳ-ꓐꓲ-ꓬꓯꓼ-ꓣ-ꓫꓸ꓾ ꓙ-ꓟꓶ-ꓠꓰ ꓐꓰ꓾ ꓮ-ꓟꓯ-ꓣꓲ-ꓗ ꓗꓴꓷꓼ ꓗꓪ ꓟ ꓑ ꓫꓬ ꓐꓴ ꓠꓬ꓾ ꓫꓸ ꓢꓴ ꓙꓳ ꓥ ꓟꓲ꓾ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓮ ꓘꓶꓸ ꓔꓬ ꓢ ꓗꓹ ꓛꓲ ꓟ ꓗꓴꓷꓼ ꓥ ꓡꓳ ꓐꓰ ꓮ ꓙꓵꓽ ꓢꓴ ꓘꓳ ꓣꓴ ꓔꓸ ꓡꓳ= (ꓖꓳ ꓡꓱ ꓥ ꓟꓲ ꓖꓳ ꓗꓴꓷꓼ ꓓꓽ ꓟ ꓠꓯꓸꓼ ꓗꓪ ꓬꓲ-ꓢꓷ-ꓡꓰ ꓡ ꓞꓳ (ꓥ ꓠꓬ) ꓞꓳ ꓠꓯꓺ ꓒꓽ ꓟꓽ ꓥ ꓠꓬ ꓙꓳ ꓢ ꓔꓬ ꓢ ꓟ ꓥ ꓡꓳ ꓐꓰ ꓢꓪꓼ ꓓ ꓡꓳ=) ꓡꓳ ꓓꓲ ꓧꓶꓽ ꓟꓶꓽ ꓙꓲ ꓡꓲꓺ ꓚꓴꓸ ꓒꓽ ꓐꓴ꓾ ꓢꓲ-ꓔꓲꓸ ꓧꓳ ꓟꓬꓱꓽ ꓬꓰ ꓢꓴ ꓐꓴ꓾ ꓦꓲ ꓘꓴ ꓟꓬꓱꓽ ꓬꓰ ꓢꓴ ꓤ ꓟꓶ ꓤꓼ ꓐꓴ ꓠꓬ ꓓ ꓒꓽ ꓓ ꓟ ꓥ ꓡꓳ꓾ ꓐꓰ ꓫꓱꓸ ꓖꓶ ꓕꓳ ꓶ ꓐꓳ ꓒꓬꓱꓺ ꓖꓶ ꓟ ꓗꓪ ꓐꓰ꓾ ꓑ ꓫꓬꓼ ꓐꓴ ꓠꓬ "ꓥꓪ ꓖꓶ ꓠꓰ ꓢ ꓖꓶ ꓟ ꓐꓱ ꓶ ꓟꓬꓱꓽ ꓬꓰ ꓔꓬ ꓢꓴ ꓓ ꓒꓽ ꓓ ꓟ ꓕꓲ ꓣꓳ ꓥꓳ" ꓐꓰ ꓠꓲꓹ ꓢ ꓗꓹ ꓛꓲ ꓐ ꓡ ꓡꓳ=
2018 ꓘꓳꓼ ꓗꓪ ꓛꓲ ꓡ ꓠꓬ꓾ ꓟꓲ ꓠꓯ ꓗꓴꓷꓼ ꓗꓪ ꓟ ꓑ ꓫꓬ ꓮ ꓟꓬꓹ ꓠꓬ꓾ ꓚꓲ ꓛꓬ ꓔꓱꓹ ꓚꓲ ꓛꓬ ꓮ ꓫꓵꓽ ꓙꓲ ꓖꓴ ꓟꓽ ꓙꓳ ꓢꓴ ꓡꓰ ꓐꓰ ꓚꓹ ꓜꓯꓼ ꓡ ꓡꓳ= ꓬꓲꓸ ꓚꓱꓹ ꓬꓲꓸ ꓟꓲ ꓚ ꓟꓸ ꓖꓶ ꓡꓯ ꓘꓳ ꓟ Ted Talks꓾ ꓗꓴꓷꓼ ꓙꓵꓽ ꓢꓴ ꓔꓯ ꓢꓷꓸ ꓠꓲꓹ ꓚꓴ ꓬꓲꓹ ꓖꓶꓽ ꓢꓴ ꓐꓴ꓾ ꓪꓴꓽ ꓟꓴ ꓡ ꓟ ꓢꓷꓸ ꓠꓲꓹ ꓚꓱꓹ ꓖꓪ ꓙꓱ ꓜꓲꓼ ꓓꓴ ꓗꓪ ꓮ ꓕꓯ ꓕꓯ ꓑ ꓙ ꓡ ꓟ ꓟꓲ ꓠꓯ ꓠꓬ ꓞꓳ ꓘꓹ ꓤꓽ ꓕꓲ ꓟ ꓡꓰ ꓒꓬꓱꓼ ꓡ ꓡꓳ ꓐꓯ ꓟ (Globalization)꓾ ꓒꓴ ꓣꓱꓽ ꓚꓱꓹ Blockchain꓾ ꓪꓴꓸ ꓠꓷꓸ ꓬꓲꓸ ꓚꓬꓼ AI꓾ ꓙꓼ ꓗꓪ ꓐꓰ ꓢꓳ ꓣꓴ ꓟ Machine Learning ꓕꓱ ꓡꓱꓳ ꓫꓵꓽ ꓙ ꓖꓴ ꓔꓯ ꓙ ꓜꓲꓼ ꓫꓸ ꓡꓰꓳ= ꓫꓸ ꓪ ꓝꓳꓹ ꓥ ꓟꓲ ꓬꓲꓸ ꓫꓵꓼ꓾ ꓓꓵꓽ ꓙ ꓚꓱꓹ ꓥ ꓟꓲ ꓣꓳ ꓔꓯ ꓟꓽ ꓗꓪ ꓫꓵꓽ ꓟ ꓡꓰ ꓐꓰ ꓚꓹ ꓜꓯꓼ ꓡ ꓡꓳ= ꓡꓲ-ꓐ-ꓬꓯ ꓚ ꓟꓲꓽ ꓠꓽ ꓮ ꓫꓵꓽ ꓟꓽ ꓗꓴꓸ ꓟꓽ ꓢꓷꓸ ꓢꓴ ꓑ ꓫꓬꓼ ꓕꓲ ꓜꓴ ꓟ ꓐꓱ ꓶ ꓚ ꓟꓲꓽ ꓒꓬꓱꓼ ꓡ ꓡꓳ= ꓞꓳ ꓤ ꓕꓲ ꓐꓶꓽ ꓙꓼ ꓕꓲ ꓐꓶꓽ ꓢꓯꓸ ꓫꓵꓽ cyborg꓾ ꓙꓼ ꓪꓴꓸ ꓠꓷꓸ ꓝꓸ ꓡꓯ ꓘꓳ ꓟ ꓗꓪ ꓢꓪꓼ ꓓꓴ ꓚꓱꓹ internet algorithm ꓚꓱꓹ ꓔꓯ ꓮ ꓡꓲ ꓐꓰ ꓙ ꓜꓲꓼ ꓐ ꓡ ꓢꓰ=
20 ꓦ ꓜꓴ ꓘꓳꓼ ꓟ ꓠꓯꓸꓼ ꓗꓪ ꓬꓲꓸ ꓟꓶ ꓬꓲꓸ ꓙꓲꓽ ꓠꓬꓲꓸ ꓤꓲ ꓢꓲꓸ ꓬꓲꓸ ꓐꓵꓽ ꓧꓪ ꓢꓴ ꓡꓳ ꓑ ꓐꓴ ꓔꓯ ꓔꓳꓹ ꓡꓯ ꓘꓳ ꓢꓲ꓾ ꓟꓬꓱꓽ ꓬꓰ ꓢꓴ ꓪꓽ ꓤ ꓐꓴ ꓢꓯꓼ ꓪ ꓗꓪ ꓐꓰ ꓗꓴꓷꓼ ꓫꓬꓹ ꓜꓶ ꓟ ꓟꓬꓱꓽ ꓐꓰ꓾ ꓓꓵꓽ ꓙ ꓚꓱꓹ ꓗꓪ ꓡꓶꓸ ꓙꓰ ꓝꓲꓳ= ꓮ ꓟꓶ ꓑ ꓫꓬꓼ ꓐꓴ ꓠꓬ ꓮ ꓫꓵꓽ ꓙꓲ ꓖꓴ ꓟꓽ ꓙꓳ ꓟ ꓡꓰ ꓐꓰ ꓒꓬꓱꓼ ꓡ ꓢꓲ꓾ ꓓꓵ ꓙ ꓫꓸ ꓡ ꓡꓳ= ꓐ-ꓣꓲ-ꓔꓲꓠ ꓰꓴ ꓗꓪ ꓐꓰ ꓓꓳ ꓡ ꓟ ꓐꓰ꓾ ꓓꓳ-ꓠꓯ-ꓕ-ꓣꓮꓟꓼ ꓴꓢꓮ ꓪ ꓔꓲꓸ ꓒꓬꓱꓼ ꓡ ꓟ ꓠꓬ꓾ ꓧꓶꓸ ꓕꓯ ꓢꓳ-ꓫꓬ-ꓡꓲꓼ ꓚꓱꓹ ꓔꓯ ꓒꓳꓹ ꓔꓳꓹ ꓡꓯ ꓘꓳ ꓟ ꓐꓰ ꓟꓽ ꓫꓱꓸ= ꓣ-ꓫꓸ꓾ ꓧꓶꓽ ꓒꓽ꓾ ꓚꓴꓸ-ꓐꓹ ꓗꓪ ꓒꓳꓹ ꓔꓳꓹ ꓟ ꓠꓬ꓾ ꓗꓴꓷꓼ ꓙꓵꓽ ꓚꓱꓹ ꓗꓪ ꓑ ꓫꓬ ꓐꓴ ꓢꓯꓼ ꓪ ꓟꓶ ꓠꓹ ꓟ ꓥ ꓡꓳ= 2016 ꓘꓳꓼ ꓗꓪ ꓓꓳ-ꓠꓯ-ꓕ-ꓣꓮꓟꓼ ꓓꓯ ꓡ ꓟ ꓐꓰ꓾ ꓐ-ꓣꓲ-ꓔꓲꓠ ꓰꓴ ꓗꓪ ꓐꓰ ꓓꓳ ꓙꓰ ꓟ ꓚꓱꓹ ꓠꓬ ꓶ ꓡꓯꓼ ꓚꓱꓹ ꓗꓪ ꓔꓺ ꓟꓽ ꓐ ꓡ ꓐꓰ ꓓꓵꓽ ꓙ ꓟ ꓑ ꓫꓬ ꓐꓴ ꓑꓶꓸ ꓓꓴ ꓥ ꓡꓳ= 21 ꓦ ꓜꓴ ꓘꓳꓼ ꓗꓪ ꓒꓳꓹ ꓔꓳꓹ ꓟ ꓟꓬꓱꓽ ꓠꓬ ꓑ ꓫꓬ ꓔꓯ ꓠꓬꓲꓸ ꓤꓲ ꓔꓬ ꓟ ꓙꓵꓽ ꓢꓴ ꓔꓯ ꓒꓳꓹ ꓔꓳꓹ ꓟ ꓬꓲꓸ ꓛꓲ꓾ ꓑ ꓫꓬ ꓔꓯ ꓣꓱꓽ ꓟꓽ ꓬꓯꓼ ꓟ ꓙꓵꓽ ꓢꓴ ꓐꓴ ꓔꓯ ꓒꓳꓹ ꓔꓳꓹ ꓟ ꓒꓬꓱꓼ ꓡ ꓓ ꓡꓳ= ꓕꓱ ꓡꓱꓳ ꓫꓵꓽ ꓒꓳꓹ ꓔꓳꓹ ꓑꓮꓲ ꓗꓪ ꓑ ꓫꓬ ꓐꓴ ꓠꓬ ꓞꓳꓸ ꓡꓰ ꓚꓱꓹ ꓟꓬꓽ ꓡꓳ= ꓠꓬꓲꓸ ꓤꓲ ꓟ ꓔꓯ ꓒꓳꓹ ꓔꓳꓹ ꓟ ꓕꓯ ꓢꓲ꓾ ꓚꓲ ꓛꓬ ꓔꓯ ꓣꓱꓽ ꓟꓽ ꓬꓯꓼ ꓢꓴ ꓔꓯ ꓒꓳꓹ ꓔꓳꓹ ꓟ ꓠꓬ ꓟꓬꓽ ꓠꓬꓲ ꓫꓸ ꓡꓳ ꓟꓽ ꓥ ꓡ?
ꓡꓲ-ꓐ-ꓬꓯ ꓓꓵꓽ ꓙ ꓚꓱꓹ ꓚ ꓟꓲꓽ ꓓꓽ ꓟ
ꓡꓲ-ꓐ-ꓬꓯ ꓚ ꓟꓲꓽ ꓠꓬ ꓦ ꓡꓱ ꓐꓳ ꓓ ꓟ ꓚ ꓟꓲꓽ ꓥ/ ꓟꓽ ꓥ ꓤꓹ ꓫꓵꓽ ꓠꓬꓲ ꓟ ꓠꓬ ꓕꓱ ꓕꓲ ꓧꓪꓸ ꓬꓲꓸ ꓪꓴꓸ ꓕꓲ ꓧꓪꓸ ꓟꓽ ꓥ= 19 ꓦ ꓜꓴ ꓘꓳꓼ ꓕꓲ ꓐꓶꓽ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓘꓶ ꓡꓶꓽ ꓓꓴ ꓮ ꓟꓬꓹ ꓔꓳ ꓜꓳ ꓡ ꓡꓳ= ꓟꓵꓽ ꓗꓳꓹ ꓓꓵ ꓓꓵ ꓙ ꓗꓹ ꓘꓶꓽ ꓒꓴ ꓙ ꓡꓯ ꓘꓳ ꓟ ꓐꓰ꓾ ꓡꓲ-ꓐ-ꓬꓯ ꓚ ꓟꓲꓽ (Globalization and Liberalization) ꓠꓬ 19 ꓦ ꓜꓴ ꓘꓳꓼ ꓬꓲꓸ ꓔꓱꓹ ꓫꓵ ꓗꓪ ꓛꓲ ꓕꓯ꓾ ꓢꓯꓼ ꓙꓳ ꓟ ꓗꓴꓷꓼ ꓐꓴ ꓟꓵꓽ ꓧꓳ ꓡꓯ ꓘꓳ ꓟ꓾ ꓟꓵꓽ ꓗꓳ ꓓꓵ ꓓꓵ ꓢꓰꓼ ꓡꓯ ꓘꓳ ꓟꓯꓼ ꓘꓶꓽ ꓑꓶꓸ ꓓꓴ ꓮ ꓔꓳꓸ ꓮ ꓙꓬ ꓕꓲꓽ ꓩꓴ ꓪ ꓡꓰ ꓞꓴꓽ ꓐꓯ ꓠꓰ ꓕꓲ ꓑꓹ ꓤꓼ ꓠꓽ ꓬꓰꓳ= ꓪ ꓔꓲꓸ ꓤꓽ ꓒ-ꓓꓰ-ꓠ ꓔꓯ ꓢ-ꓬ-ꓬꓯ-ꓐꓳ ꓡꓳ ꓒꓱ ꓗꓪ ꓢꓰꓼ ꓟꓶ ꓡꓰ ꓟ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓢꓯꓼ ꓙꓳ ꓟ ꓗꓴꓷꓼ ꓐꓴ ꓠꓬ ꓡꓲ-ꓐ-ꓬꓯ ꓕꓯ ꓢꓲ ꓡꓽ ꓛꓴꓸ ꓗꓪ ꓐꓰ ꓟꓵꓽ ꓧꓳ ꓢꓲꓸ ꓚꓲ ꓛꓬ ꓙꓲ ꓖꓴ ꓐꓱ ꓶ ꓙꓵꓽ ꓚꓱꓹ ꓔꓯ ꓦ ꓡꓱ ꓐꓳ ꓟ ꓟꓳꓸ ꓖꓶ ꓓꓳ ꓡ ꓡꓳ= ꓶ ꓡꓯꓼ ꓬꓰ ꓚꓱꓹ ꓒꓴ ꓗꓷ ꓢꓲꓸ ꓕꓲ ꓟꓲ ꓠꓯ ꓙ ꓡꓯ ꓘꓳ ꓟ ꓬꓲꓸ ꓛꓲ ꓟꓵꓽ ꓧꓳ ꓢꓲꓸ ꓬꓲꓸ ꓜꓴ ꓬꓲꓸ ꓜꓴ ꓶ ꓡꓯꓼ ꓬꓰ ꓡ ꓡꓳ= ꓖꓳ ꓡꓱ ꓟꓲ ꓡꓲ-ꓐ-ꓬꓯ ꓚ ꓟꓲꓽ ꓠꓬ ꓒ-ꓓꓰ-ꓠ ꓢꓰꓼ ꓪ ꓡꓰ ꓟ ꓫꓸ ꓘꓶ ꓓꓴ ꓗꓪ ꓐꓰ ꓡꓲꓹ ꓡ ꓢꓲ꓾ "ꓟꓯꓼ ꓘꓶꓽ ꓕꓯ ꓟ ꓠꓬ ꓬꓲꓸ ꓟꓶꓽ ꓟꓯꓼ ꓢꓰꓼ ꓡꓯ ꓘꓳ ꓟ ꓥ ꓡꓳ" ꓐꓰ ꓐꓯ ꓒꓬꓱ ꓢꓲꓸ ꓕꓲ ꓖ ꓕꓲ ꓟ ꓛꓽ ꓐꓲꓽ ꓛꓽ ꓗꓪ ꓦꓬꓼ ꓠꓬꓲ ꓗꓪ ꓐꓰ ꓟꓬꓽ ꓠꓬꓲ ꓢꓯꓼ ꓙꓳ ꓡ ꓡꓳ= ꓟꓵꓽ ꓧꓳ ꓡꓯ ꓘꓳ ꓟꓯꓼ ꓘꓶꓽ ꓗꓪ ꓐꓰ ꓞꓳ ꓫꓵꓽ ꓬꓲ ꓙꓬ ꓡꓳ ꓡꓰ ꓬꓲꓻ ꓡꓰ ꓠꓬꓲ꓾ ꓕꓱ ꓟ ꓟꓽ ꓙꓲ ꓐꓰ ꓮ ꓙꓵꓽ ꓢꓴ ꓢꓳ ꓟꓶ ꓡꓰꓳ= ꓮ ꓟꓶ ꓠꓬ ꓡꓲꓹ ꓗꓷ ꓟ ꓐꓰ꓾ ꓢꓲ ꓡꓲꓹ ꓟ ꓚꓱꓹ ꓔꓯ ꓧꓪ ꓢꓲ ꓟꓲ ꓠꓯ ꓫꓵꓼ ꓔꓯ ꓫꓬꓹ ꓜꓶ ꓡꓯ ꓐꓰ ꓐꓯ ꓡꓳ=
ꓖꓳ ꓗꓪ ꓟ ꓟꓶ ꓤ ꓟꓽ ꓥ ꓢꓰꓽ ꓕꓯ 1930-40 ꓘꓴꓽ ꓗꓪ ꓧꓲꓼ-ꓔꓲ-ꓡ ꓕꓲ ꓤꓶ ꓓꓳ ꓡ ꓡꓳ= ꓒꓯꓼ-ꓢꓲꓼ ꓚ ꓟꓲꓽ ꓔꓯ ꓠꓵ ꓓ ꓡꓳ ꓫꓵꓽ ꓚ ꓟꓲꓽ ꓥ ꓡꓳ ꓐꓰ ꓡ ꓞꓳ ꓐꓴ ꓢꓪꓼ ꓟꓶ ꓡꓰ ꓡꓳ= ꓟꓶ ꓤ ꓟꓽ ꓥ ꓕꓯ ꓒꓯꓼ-ꓢꓲꓼ ꓚ ꓟꓲꓽ ꓔꓯ ꓡꓲ-ꓐ-ꓬꓯ ꓚ ꓟꓲꓽ ꓡꓰ ꓧꓪꓸ ꓡꓰ ꓡꓳ= ꓛꓯ-ꓘꓪꓰ-ꓐ-ꓬ ꓤꓶ ꓦꓬꓼ ꓠꓬꓲ ꓥ ꓟ 1950-70 ꓘꓳꓼ ꓖꓼ ꓡꓯꓼ ꓖ ꓙꓲ ꓗꓪ ꓠꓬ ꓡꓲ-ꓐ-ꓬꓯ ꓚ ꓟꓲꓽ ꓬꓲꓸ ꓟꓶ ꓢꓰꓼ ꓬꓰꓳ ꓐꓰ꓾ ꓓꓵꓽ ꓙ ꓗꓪ ꓛꓲ ꓗꓳ-ꓟꓴ-ꓠꓲꓼ ꓚ ꓟꓲꓽ ꓪꓽ ꓠꓬꓲ ꓡ ꓡꓳ= ꓬꓲꓸ ꓟꓶꓽ ꓗꓪ ꓠꓬ ꓗꓳ-ꓟꓴ-ꓠꓲꓼ ꓚ ꓟꓲꓽ ꓢꓯꓼ ꓐꓽ ꓡꓰ ꓢꓲ꓾ ꓡꓲ-ꓐ-ꓬꓯ ꓚ ꓟꓲꓽ ꓟꓬꓽ ꓠꓬꓲ ꓳꓸ ꓠꓬꓲ ꓡ ꓡꓳ= ꓙꓲ ꓔꓲꓺ ꓓꓽ ꓟ (super market) ꓠꓬ ꓖꓴ-ꓡꓼ ꓐꓯ ꓟ ꓞꓳ ꓜꓴ ꓟꓬꓱꓽ ꓬꓰ ꓔꓶꓸ ꓕꓯ ꓢꓲ ꓙꓲˍ ꓟ ꓔꓯ ꓢꓳꓽ ꓟꓶ ꓡꓰ ꓡꓳ= (ꓖꓴ-ꓡꓼ ꓠꓬ ꓢꓳ-ꓐꓲ-ꓬꓯꓼ-ꓣ-ꓫꓸ ꓗꓴꓷꓼ ꓡꓲ-ꓠꓲ ꓦꓬꓼ ꓠꓬꓲ ꓗꓪ ꓟꓽ ꓓ ꓟꓽ ꓢ ꓜꓴ ꓟꓬꓱꓽ ꓬꓰ ꓝꓲ ꓟ ꓟꓬꓱꓽ ꓬꓰ ꓔꓶꓸ ꓔꓯ ꓐꓯ ꓡꓳ=) ꓕꓱ ꓗꓪ ꓟꓽ ꓓ ꓢꓯꓼ ꓙꓳ ꓟ ꓠꓬ꓾ ꓡꓲ-ꓐ-ꓬꓯ ꓚ ꓟꓲꓽ ꓠꓬ ꓠꓱꓸ ꓐꓯꓼ ꓚ ꓟꓲꓽ ꓐꓴ ꓕꓯ ꓢꓲ ꓫꓬꓹ ꓔꓱꓹ ꓫꓬꓹ ꓡꓶꓸ ꓙꓲ ꓢꓲ꓾ ꓢꓯꓼ ꓙꓳ ꓙꓳ ꓟꓬꓱꓽ ꓬꓰ ꓙꓲ ꓟ ꓥ ꓡꓳ= ꓟꓵꓽ ꓧꓳ ꓡꓯ ꓘꓳ ꓚꓱꓹ꓾ ꓗꓳ-ꓟꓴ-ꓠꓲꓼ ꓚꓱꓹ ꓐꓰ꓾ ꓒꓯꓼ-ꓢꓲꓼ ꓙ ꓖꓴ ꓗꓪ ꓟ ꓙꓲˍ ꓟ ꓕꓲ ꓫꓵ ꓫꓵꓽ ꓙꓳ ꓠꓬ ꓢꓳ ꓣꓴ ꓢꓲꓸ ꓡꓲ-ꓐ-ꓬꓯ ꓚꓱꓹ ꓗꓪ ꓣꓱꓽ ꓐ ꓡ ꓡꓳ= ꓡꓲ-ꓐ-ꓬꓯ ꓚ ꓟꓲꓽ ꓚꓱꓹ ꓗꓪ ꓡꓲꓹ ꓗꓷ ꓟꓶ ꓟ ꓚꓱꓹ ꓔꓯ ꓒꓵꓽ ꓟ ꓡꓰꓽ ꓟꓽ ꓞꓲ꓾ ꓕꓲ ꓣꓳ ꓛꓳ ꓕꓲ ꓣꓳ ꓙ ꓗꓳ ꓡꓯ ꓘꓳ ꓟ ꓐꓰ꓾ ꓕꓲ ꓡꓰꓹꓼ ꓥ ꓟ ꓓꓵꓽ ꓙ ꓚꓱꓹ ꓔꓯ ꓥ ꓟꓲ ꓢꓳ ꓣꓱꓽ ꓡ ꓡꓳ=
ꓡꓲ-ꓐ-ꓬꓯ ꓚ ꓟꓲꓽ ꓬꓲꓸ ꓪꓴꓸ ꓔꓴ ꓟ ꓦꓬꓼ ꓠꓬꓲ ꓗꓪ ꓠꓬ꓾ ꓬꓴ-ꓣꓳ ꓟꓵꓽ ꓓꓽ ꓗꓪ ꓟ ꓞꓳ ꓐꓳ ꓐꓴ ꓐꓱ ꓶ ꓡꓲꓹ ꓗꓷ ꓟꓶ ꓟ ꓙꓵꓽ ꓪ ꓥ ꓢꓲ꓾ ꓟꓬꓱꓽ ꓬꓰ ꓢꓴ ꓫꓸ ꓤ ꓟꓷꓼ ꓤ ꓢꓴ ꓡꓲꓹ ꓗꓷ ꓟꓶ ꓟ ꓙꓵꓽ ꓪ ꓐꓰ꓾ ꓟꓶ ꓙꓲꓽ ꓙꓳ ꓟ ꓶꓽ ꓟꓬ ꓢꓶꓽ ꓟꓲꓸ ꓔꓸ ꓡꓳ= 1918 ꓘꓳꓼ ꓗꓪ ꓝ-ꓬꓯꓼ ꓗꓴꓷꓼ ꓐꓰ꓾ ꓐ-ꓣꓲ-ꓔꓲꓠ ꓗꓴꓷꓼ (French and Britain) ꓐꓴ ꓡꓲꓹ ꓗꓷ ꓟꓶ ꓟ ꓙꓵꓽ ꓪ ꓐꓱ ꓶ ꓖꓪ ꓙꓱ ꓡꓯ ꓘꓳ ꓕꓯ꓾ ꓬꓲꓸ ꓪ ꓡꓰ ꓚꓳ ꓑꓸ ꓬꓰ ꓔꓸ ꓟ ꓗꓴꓷꓼ ꓐꓴ ꓐꓱ ꓶ ꓟꓽ ꓓꓵꓽ ꓙ= ꓔꓯ ꓥꓳ꓾ ꓲ-ꓓꓲ-ꓬ ꓡ ꓞꓳ ꓐꓴ ꓚꓲ ꓛꓬ ꓔꓱꓹ ꓚꓲ ꓛꓬ ꓙꓵꓽ ꓠꓹ ꓟ ꓙꓵꓽ ꓪ ꓓꓰꓽ ꓡ ꓕꓯ꓾ ꓮ-ꓟ-ꓬꓲ-ꓢ ꓞꓳ ꓜꓴ ꓞꓳ ꓟꓯꓼ ꓢꓰꓼ ꓑꓮꓲ ꓬꓰ ꓢꓲꓸ ꓡꓯꓽ ꓔꓯꓽ ꓩꓴ ꓡ ꓟ ꓥ ꓡꓳ=
ꓟꓵꓽ ꓗꓳꓹ ꓓꓵ ꓓꓵ ꓢꓰꓼ ꓡꓯ ꓘꓳ ꓟ ꓟꓯꓼ ꓘꓶꓽ 2 ꓧꓪꓸ ꓕꓲ ꓧꓪꓸ ꓖꓴ ꓡꓰ ꓗꓪ ꓛꓲ꓾ ꓴ-ꓣꓳ ꓟꓵꓽ ꓓꓽ ꓟ ꓗꓪ ꓟ ꓗꓴꓷꓼ ꓙꓵꓽ ꓢꓴ ꓐꓴ ꓠꓬ꓾ ꓟꓵꓽ ꓗꓳ ꓓꓵ ꓓꓵ ꓐꓱ ꓶ ꓒꓵꓽ ꓟ ꓐꓰ ꓪ ꓙꓲꓽ ꓙꓳ ꓟ ꓙꓵꓽ ꓪ ꓔꓯ ꓟꓳꓸ ꓐꓯ ꓡ ꓕꓯ꓾ ꓬꓲꓸ ꓪ ꓟꓽ ꓥ ꓠꓬ ꓠꓱꓸ ꓐꓯꓼ ꓢꓴ ꓔꓯ ꓖꓳ ꓡꓱꓳ ꓫꓵꓽ ꓙꓵꓽ ꓪ ꓖꓶ ꓠꓲꓹ ꓟꓽ ꓫꓵ ꓢꓰ= ꓠ-ꓜꓲ ꓜꓲ ꓜꓲ ꓑꓰꓹ ꓑꓰꓹ ꓙꓵꓽ ꓚꓱꓹ ꓔꓯ (5) ꓘꓳꓼ ꓔꓳꓹ ꓡꓯ ꓘꓳ ꓢꓲꓸ 1945 ꓘꓳꓼ ꓕꓯ ꓡꓲꓹ ꓙꓰ ꓟꓶ ꓟ ꓓ-ꓛꓲ ꓗꓴꓷꓼ ꓠꓬ꓾ ꓬꓲꓸ ꓪꓴꓸ ꓮ ꓫꓵꓽ ꓬꓰ ꓡ? ꓟꓯꓼ ꓜꓴ ꓓꓽ ꓟ ꓫꓳ ꓢꓲ꓾ ꓧꓶꓸ ꓕꓯ ꓬꓲꓸ ꓪ ꓚꓳ ꓑꓸ ꓬꓰ ꓗꓷ ꓟ ꓲ-ꓓꓳ-ꓠꓰ-ꓫꓸ ꓗꓴꓷꓼ ꓔꓯ ꓕꓲ ꓧꓪꓹ ꓓꓶꓽ ꓣꓴ ꓡ ꓡꓳ= 1940 ꓘꓳꓼ ꓕꓯ ꓓ-ꓛꓲ ꓐꓴ ꓠꓬ ꓬꓲꓸ ꓪ ꓡꓲꓹ ꓗꓷ ꓟꓶ ꓟ ꓙꓵꓽ ꓪ ꓔꓯ ꓠ-ꓜꓲ ꓟꓯꓼ ꓐꓴ ꓡꓰ ꓦꓴ ꓡ ꓕꓯ 4 ꓦꓬꓼ 4 ꓠꓬꓲ ꓔꓳꓹ ꓡꓯ ꓘꓳ ꓢꓲꓸ ꓞꓳꓸ ꓡꓰꓳ= ꓖꓳ ꓡꓱ ꓥ ꓟꓲ꓾ ꓐꓶꓽ ꓓꓳ ꓕꓲ ꓟꓵꓽ ꓗꓪ ꓟ ꓲ-ꓓꓳ-ꓠꓰ-ꓫꓸ ꓢꓴ ꓡꓰ 4 ꓘꓳꓼ ꓔꓳꓹ ꓡ ꓟ ꓔꓯ ꓜꓲ ꓜꓲ ꓑꓰꓹ ꓑꓰꓹ ꓠꓬꓲꓸ ꓤꓲ ꓢꓲꓸ ꓢꓰꓼ ꓡꓳ= ꓖꓳ ꓟ ꓑꓶꓸ ꓓꓴ ꓕꓲ ꓟꓲ ꓠꓯ ꓗꓪ ꓡꓲꓹ ꓗꓷ ꓟꓶ ꓟ ꓙꓵꓽ ꓪ ꓙꓳ ꓢꓴ ꓐꓯ ꓢꓲꓸ ꓐꓯ ꓒꓬꓱ ꓔꓬ ꓟ ꓐꓶꓽ ꓓꓵꓽ ꓕꓲ ꓟꓵꓽ ꓗꓪ ꓟ ꓗꓴꓷꓼ ꓐꓴ ꓕꓯ ꓢꓲ꓾ ꓟꓳ-ꓢꓲ-ꓗꓳ ꓐꓰ ꓐꓯ-ꓙꓲꓸ ꓡꓳ ꓒꓱ ꓐꓴ ꓔꓯ ꓟꓬꓽ ꓠꓬꓲ ꓪꓽ ꓪꓴ ꓘꓳꓹ ꓡ ꓟ ꓥ ꓡꓳ=
ꓖꓳ ꓡꓱ ꓥ ꓟꓲ ꓡꓲ-ꓐ-ꓬꓯ ꓚ ꓟꓲꓽ ꓠꓬ ꓕꓲ ꓝꓸ ꓕꓲ ꓝꓸ ꓬꓲꓸ ꓓꓵꓽ ꓙ ꓚꓱꓹ ꓔꓯ ꓪꓴꓽ ꓟꓴ ꓡ ꓝꓲ ꓢꓲ꓾ ꓗꓸ ꓠꓯꓸ ꓢꓲ ꓗꓪ ꓠꓬ ꓙꓵꓽ ꓗ ꓕꓳ ꓶ ꓗꓪ ꓡ ꓞꓳ ꓥ ꓕ ꓑꓳꓸ ꓔꓯ ꓒꓵꓽ ꓟ ꓐꓰ꓾ ꓡꓲꓹ ꓗꓷ ꓟꓶ ꓢꓴ ꓚꓬꓹ ꓠꓹ ꓟ ꓗꓪ ꓛꓲ ꓢꓯꓼ ꓙꓳ ꓡ ꓡꓳ= ꓡꓲꓹ ꓗꓷ ꓟꓶ ꓟ ꓙꓵꓽ ꓪ ꓔꓯ ꓮ ꓘꓶꓸ ꓒꓵꓽ ꓟ ꓥ ꓡꓳ ꓢꓪꓼ ꓔꓸ ꓡꓳ ꓐꓰ ꓐꓯ ꓓꓳ ꓡꓳ= ꓡꓲꓹ ꓙꓰ ꓟꓶ ꓟ ꓙꓵꓽ ꓪ ꓢꓯꓼ ꓙꓳ ꓡ ꓟ ꓡꓰ ꓐꓰ ꓕꓲ ꓡꓰꓹꓼ ꓗꓳ-ꓟꓴ-ꓠꓲꓼ ꓚ ꓟꓲ ꓡꓳ ꓚ ꓬꓰ ꓙ ꓔꓳꓹ ꓙ ꓡꓯ ꓘꓳ ꓚꓱꓹ ꓥ ꓟꓲ ꓬꓳꓹ ꓚꓲ ꓟ ꓔꓯ ꓙ ꓜꓲꓼ ꓡ ꓡꓳ= ꓡꓲꓹ ꓗꓷ ꓟꓶ ꓟ ꓙꓵꓽ ꓪ ꓠꓬ꓾ ꓔꓬ ꓢ ꓙꓳ ꓢ ꓚꓱꓹ ꓠꓱꓸ ꓐꓯꓼ ꓕꓲ ꓫꓵꓽ ꓫꓵꓽ ꓟꓽ ꓙꓳ ꓕꓯ ꓬꓲꓸ ꓒꓵꓽ ꓮ ꓘꓶꓸ ꓟꓽ ꓒꓵꓽ= ꓢꓳ-ꓫꓬ ꓓꓰ-ꓟꓳ-ꓗ-ꓬꓯ-ꓔꓲꓼ ꓗꓴꓷꓼ ꓐꓴ ꓠꓬ ꓓꓰ-ꓟꓳ-ꓗꓯ-ꓢꓰ꓾ ꓡ ꓞꓳ ꓐꓴ ꓙꓵꓽ ꓪ ꓙꓳ ꓟ ꓐꓰ꓾ ꓗꓴꓷꓼ ꓜꓴ ꓗꓪ ꓐꓰ ꓬꓰ ꓙ ꓔꓳꓹ ꓙ ꓟ ꓢꓷꓸ ꓠꓲꓹ ꓢꓳ ꓚꓱꓹ꓾ ꓖꓳ ꓓꓱꓽ ꓔꓬ ꓢ ꓚꓱꓹ ꓔꓯ ꓕꓲ ꓠꓲꓹ ꓕꓲ ꓪ ꓬꓰ ꓡ ꓡꓳ= ꓡꓳ ꓑ ꓪꓴꓸ ꓓꓵ ꓣꓱꓽ ꓢꓴ ꓥ ꓟ ꓮ-ꓟꓯ-ꓣꓲ-ꓗ ꓗꓴꓷꓼ ꓥ ꓟꓲ ꓡ ꓞꓳ ꓐꓴ ꓔꓯ ꓬꓰ ꓙ ꓔꓳꓹ ꓙ ꓚꓱꓹ ꓮ ꓔꓲꓸ ꓔꓲꓸ ꓠꓽ ꓙꓳ ꓠ ꓗ ꓡꓳ ꓐꓯ ꓟ ꓔꓯ ꓙ ꓜꓲꓼ ꓡ ꓡꓳ= ꓜꓽ ꓓꓴ ꓟꓽ ꓙꓳ ꓦꓰꓼ ꓟꓷꓼ ꓜꓲꓽ ꓔꓬ ꓟ ꓤ ꓠꓱ ꓕꓲ ꓣꓳ ꓐꓱ ꓶ ꓡꓲꓹ ꓗꓷ ꓟꓶ ꓟ ꓠꓬ ꓮ ꓫꓵꓽ ꓙꓲ ꓖꓴ ꓙꓳ ꓥꓳ ꓪ?
1990 ꓘꓳꓼ ꓬꓲꓸ ꓪꓴꓸ ꓠꓬꓲꓽ ꓢ ꓘꓳꓼ ꓗꓪ ꓠꓬ ꓟꓲ ꓠꓯ ꓚ ꓟꓲꓽ ꓮ ꓙꓵꓽ ꓬꓲꓸ ꓟꓶꓽ ꓢꓰꓼ ꓡꓰꓳ= ꓗꓴꓷꓼ ꓧꓳꓽ ꓣꓱꓽ ꓚꓱꓹ ꓐꓰ꓾ ꓶ ꓡꓯꓼ ꓟꓴ ꓚꓱꓹ ꓮ ꓙꓵꓽ ꓗꓪ ꓡꓲ-ꓐ-ꓬꓯ ꓚ ꓟꓲꓽ ꓕꓯ ꓢꓲ ꓪꓴꓽ ꓓꓰ ꓟ ꓐꓰ꓾ ꓠꓵ ꓓ ꓡꓳ ꓫꓵ ꓟꓲ ꓠꓯ ꓗꓪ ꓟꓽ ꓙꓳ ꓡꓰꓳ= ꓕꓱ ꓟ ꓟꓽ ꓥ ꓠꓬ ꓠꓱꓸ ꓐꓯꓼ ꓟꓽ ꓙꓳ ꓓꓵꓽ ꓙ ꓚꓱꓹ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓐꓰ꓾ ꓗꓴꓷꓼ ꓫꓵꓽ ꓪꓴ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓑꓶꓸ ꓑꓶꓸ ꓫꓸ ꓕꓱ ꓐ ꓡ ꓡꓳ= ꓕꓱ ꓟ ꓗꓪ ꓐꓰ ꓕꓲ ꓗꓴꓷꓼ ꓕꓲ ꓗꓴꓷꓼ ꓕꓴꓽ ꓔꓸ ꓟ ꓐꓱ ꓮ ꓙꓵꓽ ꓒꓬꓹ ꓩꓴ ꓗꓷ ꓢꓲ꓾ ꓗꓴꓷꓼ ꓚꓱꓹ ꓐꓰ ꓶ ꓡꓯꓼ ꓚꓱꓹ ꓮ ꓙꓵꓽ ꓗꓪ ꓗꓽ ꓔꓸ ꓓꓴ ꓟꓽ ꓙꓳ꓾ ꓕꓲ ꓟꓲ ꓠꓯ ꓕꓲ ꓡ ꓞꓳ ꓡꓲꓹ ꓗꓷ ꓟꓶ ꓢꓴ ꓐꓴ ꓒꓬꓱꓼ ꓡ ꓝꓲ ꓥꓳ ꓐꓰ ꓥꓳꓸ ꓡꓳꓸ ꓗꓷꓳ=
ꓖꓳ ꓡꓱ ꓥ ꓟꓲ ꓟꓲ ꓠꓯ ꓚ ꓟꓲꓽ ꓠꓬ ꓬꓲꓸ ꓟꓶꓽ ꓢꓰꓼ ꓟꓽ ꓙꓲ ꓢꓰ= ꓒ-ꓓꓰ-ꓠ꓾ ꓧꓰꓼ-ꓔ-ꓡ꓾ ꓛꓰ-ꓘꓪꓰ-ꓐ-ꓬ ꓐꓴ ꓤꓶ ꓦꓬꓼ ꓠꓬꓲ ꓗꓳꓸ ꓡ ꓠꓬ꓾ ꓓꓳ-ꓠꓯ-ꓕ-ꓣꓮꓟꓼ ꓦꓬꓼ ꓠꓬꓲ ꓗꓪ ꓛꓲ ꓡꓻꓳ= ꓕꓱ ꓕꓲ ꓧꓪꓸ ꓡꓲ-ꓐ-ꓬꓯ ꓚ ꓟꓲꓽ ꓠꓬ ꓟꓵꓽ ꓧꓳ ꓡꓯ ꓘꓳ ꓟ ꓚꓱꓹ꓾ ꓒꓯꓼ-ꓢꓲꓼ ꓚ ꓟꓲꓽ ꓐꓰ꓾ ꓗꓳ-ꓟꓴ-ꓠꓲꓼ ꓚ ꓟꓲꓽ ꓡꓰ ꓐꓰ ꓓꓵꓽ ꓙ ꓣꓱꓽ ꓬꓰ ꓚꓱꓹ ꓚ ꓟꓲꓽ ꓔꓯ ꓔꓳꓹ ꓕꓯꓼ ꓡꓯ ꓘꓳ ꓟ ꓟꓽ ꓥꓻꓳ= ꓕ-ꓣꓮꓟꓼ ꓦꓬꓼ ꓠꓬꓲ ꓗꓪ ꓠꓬ ꓮ ꓫꓵꓽ ꓦ ꓡꓱ ꓐꓳ ꓖꓴ ꓟꓽ ꓙꓳ ꓡꓰ꓾ ꓮ ꓡꓲ ꓒꓶ ꓖꓶ ꓟꓽ ꓗꓴꓸ ꓟ "ꓬꓲꓸ ꓖꓳꓽ" ꓔꓯ ꓔꓳꓹ ꓜꓳ ꓟ ꓗꓪ ꓐꓰ ꓗꓹ ꓡꓳ=
20 ꓦ ꓜꓴ ꓘꓳꓼ ꓟ ꓠꓯꓸꓼ ꓗꓪ ꓕꓲ ꓟꓲ ꓠꓯ ꓔꓯ ꓗꓪꓽ ꓫꓵ ꓟ꓾ ꓟꓵꓽ ꓦꓴ ꓣꓴ ꓟ꓾ ꓒꓳꓹ ꓔꓳꓹ ꓟ꓾ ꓡꓲꓹ ꓗꓷ ꓟꓶ ꓟ ꓕꓱ ꓡꓱꓳ ꓫꓵꓽ ꓗꓪ ꓮ ꓡꓲ ꓒꓬꓱꓼ ꓡ ꓠꓯ ꓟ ꓐꓯ ꓟꓳꓸ ꓖꓶ ꓢꓴ ꓙꓳ ꓥ ꓟꓲ꓾ ꓕ-ꓣꓮꓟꓼ ꓦꓬꓼ ꓠꓬꓲ ꓗꓪ ꓠꓬ ꓖꓳ ꓡꓱ ꓟꓽ ꓥꓻꓳ= ꓬꓲꓸ ꓡꓰ ꓕꓲ ꓟꓲ ꓠꓯ ꓔꓯ ꓗꓪꓽ ꓫꓵꓽ ꓢꓲꓸ ꓔꓶ ꓙꓱꓼ ꓧꓪ ꓠꓹ ꓟ ꓐꓰ꓾ ꓖꓳ ꓟ ꓡꓳ ꓚ ꓣꓱꓽ ꓬꓰ ꓙꓰ ꓠꓹ ꓟ ꓠꓬ ꓮ-ꓟꓯ-ꓣꓲ-ꓗ ꓟꓬꓱꓽ ꓟꓽ ꓥ ꓐꓯ ꓡꓳ= ꓴ-ꓣꓳ ꓗꓪ ꓐꓰ ꓓꓳ ꓡ ꓟ ꓐ-ꓣꓲ-ꓔꓲꓠ ꓐꓱ ꓶ ꓥ ꓟꓲ ꓮ ꓡꓲ ꓕꓲ ꓒꓳꓹ ꓗꓪ ꓫꓵꓸ ꓙꓰ ꓠꓹ ꓟ ꓚꓱꓹ ꓙ ꓖꓴ ꓧꓪ ꓟꓽ ꓟꓳ= ꓬꓲꓸ ꓪ ꓠꓬ ꓡꓲ-ꓐ-ꓬꓯ ꓚ ꓟꓲꓽ ꓮ ꓙꓵꓽ ꓔꓯ ꓒꓬꓹ ꓩꓴ ꓗꓷ ꓟ ꓠꓬ ꓟꓽ ꓥ= ꓖꓳ ꓡꓱ ꓥ ꓟꓲ ꓡꓲ-ꓐ-ꓬꓯ ꓚ ꓟꓲꓽ ꓔꓯ ꓕꓲ ꓟꓲ ꓠꓯ ꓗꓪ ꓛꓲ ꓡꓰ ꓠꓹ ꓟ ꓢꓯꓼ ꓩꓴꓽ ꓟ ꓙ ꓖꓴ ꓔꓯ ꓟꓽ ꓘꓳ ꓣꓴ ꓟ꓾ ꓢꓯꓼ ꓟꓽ ꓖꓶꓽ ꓟ ꓥ ꓡꓳ= ꓓꓰ-ꓟꓳ-ꓗꓯ-ꓢꓰ꓾ ꓗꓹ ꓘꓶ ꓒꓴ ꓔꓸ ꓟ ꓶ ꓡꓯꓼ ꓚꓱꓹ꓾ ꓡ ꓞꓳ ꓐꓴ ꓟꓶ ꓙꓲꓽ ꓙꓳ ꓟ ꓙꓵꓽ ꓪ ꓐꓰ꓾ ꓞꓳ ꓡꓲ ꓞꓳ ꓒꓰꓼ ꓬꓰ ꓟꓬꓱꓽ ꓔꓯ ꓒꓵꓽ ꓔꓬ ꓢꓰꓽ ꓥ ꓟꓲ꓾ ꓖꓳ ꓡꓱꓳ ꓫꓵꓽ ꓓꓵꓽ ꓙ ꓚꓱꓹ ꓚ ꓟꓲꓽ ꓮ ꓙꓵꓽ ꓠꓬ ꓬꓲꓸ ꓪ ꓗꓴꓷꓼ ꓟꓵꓽ ꓫꓸ ꓗ ꓗꓪ ꓬꓲꓸ ꓟꓶꓽ ꓢꓰꓼ ꓙꓰ ꓡꓳ= ꓡꓯꓼ ꓕꓲ ꓙꓲ ꓖꓴ ꓙꓳ ꓟ ꓠꓬ꓾ ꓮ-ꓟꓯ-ꓣꓲ-ꓗ ꓗꓪ ꓘꓴꓽ ꓓꓵꓽ ꓡ ꓢꓴ ꓔꓯ ꓗꓽ ꓓꓴ ꓟꓵꓽ ꓫꓸ ꓗ ꓚꓬꓹ ꓓꓽ ꓟ ꓜꓶ ꓢꓲꓸ ꓔꓬ ꓟ ꓠꓬ ꓟꓬꓽ ꓠꓬꓲ ꓙꓲ ꓖꓴ ꓙꓳ ꓡꓳ ꓐꓰ꓾ ꓢꓪꓼ ꓓꓳ ꓡ ꓡꓳ=
ꓢꓯꓼ ꓙꓳ ꓪ ꓠꓬꓲ ꓡ ꓟ ꓧꓶꓽ ꓗꓴꓷꓼ ꓬꓰ ꓓꓳ ꓡ ꓟ ꓟꓬꓱꓽ ꓠꓬ ꓠꓬ ꓐ ꓗꓪ ꓡꓯꓽ ꓘꓳ ꓔꓯ ꓡꓯ ꓶꓸ꓾ ꓡꓯ ꓶꓸ ꓔꓯ ꓡꓯꓽ ꓘꓳ ꓡꓳꓸ ꓟꓳ ꓟ ꓡꓰ ꓐꓰ ꓗꓹ ꓡꓳ= ꓬꓲꓸ ꓗꓴꓷꓼ ꓘꓴꓽ ꓗꓪ ꓠꓬ ꓗꓳ-ꓟꓴ-ꓠꓲꓼ ꓚ ꓟꓲꓽ ꓔꓯ ꓘꓳ ꓣꓴ ꓢꓲ ꓕꓶ ꓕꓶ ꓣꓱꓽ ꓔꓬ ꓥ ꓟꓲ꓾ ꓠꓱꓸ ꓐꓯꓼ ꓗꓴꓷꓼ ꓗꓪ ꓙ ꓡꓯ ꓘꓳ ꓕꓯ ꓠꓬ ꓡꓲ-ꓐ-ꓬꓯ ꓚ ꓟꓲꓽ ꓡꓳ ꓚ ꓛꓳ ꓡꓳ= ꓗ ꓘꓶ ꓒꓴ ꓟ ꓶ ꓡꓯꓼ ꓚꓱꓹ ꓐꓰ꓾ ꓗꓴꓷꓼ ꓜꓴ ꓐꓴ ꓟꓬꓱꓽ ꓬꓰ ꓚꓱꓹ ꓗꓪ ꓠꓬ ꓳ-ꓐ-ꓟ ꓪ ꓔꓲꓸ ꓔꓯ ꓛꓲ ꓝꓸ ꓡꓯꓽ ꓝꓸ ꓢꓴ ꓠꓬ ꓫꓲ-ꓚꓰꓸ-ꓒꓲ ꓥ ꓡꓳ ꓐꓰ ꓢꓷꓸ ꓓ ꓡꓳ= ꓟ-ꓢꓲꓼ ꓡꓲ-ꓠꓲ ꓚꓱꓹ ꓔꓯ ꓡꓳ ꓔꓸ ꓢꓲ꓾ ꓕꓲ ꓟꓲ ꓠꓯ ꓗꓪ ꓡꓲ-ꓐ-ꓬꓯ ꓒꓬꓱꓼ ꓔꓬ ꓟ ꓔꓯ ꓧꓶꓽ ꓗꓴꓷꓼ ꓠꓬ ꓗꓹ ꓛꓲ ꓠꓲꓹ ꓒꓴ ꓢ ꓔꓬ ꓟ ꓡꓰ ꓐꓰ ꓗ ꓡꓳ=
ꓢꓯꓼ ꓟ ꓠꓵꓽ ꓡ ꓟ ꓣ-ꓫꓸ ꓠꓬ ꓟꓯꓼ ꓕꓲ ꓒꓳꓹ ꓗꓪ ꓡꓲ-ꓐ-ꓬꓯ ꓔꓯ ꓔꓳꓹ ꓡꓯ ꓘꓳ ꓠꓹ ꓟ ꓢꓯꓼ ꓩꓴ ꓡ ꓥ ꓟꓲ꓾ ꓓꓵꓽ ꓙ ꓚꓱꓹ ꓚ ꓟꓲꓽ ꓡꓳ ꓚ ꓠꓬ ꓚ ꓚꓶꓹ ꓟꓽ ꓙꓳ ꓟ ꓛꓬꓹ ꓡꓰ ꓐꓰ ꓥꓳ= ꓣ-ꓫꓸ ꓪ ꓔꓲꓸ ꓑꓴ-ꓔꓲ ꓔꓯ ꓔꓳꓹ ꓙ ꓢꓴ ꓮ ꓟꓬꓹ ꓙꓳ ꓥ ꓟꓲ꓾ ꓟꓬꓱꓽ ꓟꓽ ꓙꓳ ꓟ ꓢ-ꓑꓲ ꓡ ꓞꓳ ꓐꓴ꓾ ꓠꓲꓹ ꓘꓪ ꓟꓽ ꓫꓵ ꓔꓬ ꓟ ꓐ-ꓣ-ꓜꓰꓸ ꓡ ꓞꓳ ꓐꓴ꓾ ꓚꓮꓟꓐꓣꓲꓓꓖꓰ ꓗꓯ-ꓐ-ꓣꓲꓼ-ꓛꓲ ꓟꓴ ꓕꓲꓸ ꓕꓳ ꓶ ꓢꓳ ꓦꓲ ꓓꓽ ꓟ ꓗꓪ ꓟ ꓢꓳ ꓒ ꓢꓳ ꓟ ꓐꓴ ꓔꓯ ꓠꓲꓹ ꓟ ꓢ ꓡꓰ ꓝꓲ ꓟ ꓓꓵꓽ ꓙ ꓚꓱꓹ ꓬꓰ ꓖꓶꓽ ꓟꓽ ꓐ ꓡ=
ꓡꓲ-ꓐ-ꓬꓯ ꓚ ꓟꓲꓽ ꓔꓯ ꓔꓯꓺ ꓡꓯ ꓘꓳ ꓠꓹ ꓟ ꓓꓵꓽ ꓙ ꓚꓱꓹ ꓕꓲ ꓟ ꓟ ꓣ-ꓫꓸ ꓡꓰ ꓟꓽ ꓚꓰꓼ ꓩꓴ ꓡ ꓟ ꓟꓽ ꓥ= ꓖꓳ ꓡꓱ ꓟꓲ ꓬꓲꓸ ꓟꓸ ꓟꓲꓽ ꓙꓳ ꓙꓳ꓾ ꓬꓲꓸ ꓝ ꓙꓳ ꓙꓳ ꓚꓰꓼ ꓩꓴ ꓡ ꓟ ꓗꓴꓷꓼ ꓫꓵ ꓪꓴ ꓔꓯ ꓒꓶ ꓐ ꓡ ꓟ ꓓꓵꓽ ꓙ ꓚꓱꓹ ꓟꓽ ꓥ= ꓗꓴꓷꓼ ꓙꓵꓽ ꓪ ꓔꓯ ꓡ ꓞꓳ ꓕꓲ ꓜꓴ ꓡꓰ ꓮ ꓕꓯ ꓥ ꓟꓲ ꓣꓴ ꓔꓸ ꓠꓹ ꓟ ꓟꓳꓸ ꓙ ꓔꓸ ꓢꓲ꓾ ꓫꓵꓽ ꓓꓳ ꓕꓳ ꓶ ꓮ ꓙꓵꓽ ꓔꓯ ꓖꓳ ꓟ ꓐꓱ ꓶ ꓟꓬꓱꓽ ꓬꓰ ꓝꓲ ꓟ ꓗꓴꓷꓼ ꓟꓬꓱꓽ ꓬꓰ ꓚꓱꓹ ꓕꓲ ꓟ ꓡꓰꓽ ꓥ ꓡꓳ= ꓙꓵꓽ ꓪ ꓗꓪ ꓔꓬ ꓕꓶ ꓡꓰ ꓚꓱꓹ ꓡꓰ ꓥ ꓡꓳ= ꓑ ꓫꓬ ꓐꓴ ꓐꓱ ꓶ ꓙꓲ ꓖꓴ ꓙꓳ ꓟ ꓚꓱꓹ ꓟꓽ ꓬꓰ ꓒꓬꓱꓼ ꓡ= ꓓꓰ-ꓟꓳ-ꓗꓯ-ꓢꓰ ꓠꓬ꓾ ꓮ-ꓐ-ꓡ-ꓦ ꓡꓲ-ꓚꓳꓸ ꓡꓰ꓾ "ꓡ ꓞꓳ ꓮ ꓙꓵꓽ ꓔꓯ ꓬꓲꓸ ꓙꓵꓹ ꓕꓲ ꓔꓳꓸ ꓗꓪ ꓗꓶꓸ ꓐ ꓡ ꓠꓬ ꓐ ꓡ ꓥꓳ= ꓕꓲ ꓐꓱ ꓔꓯ ꓠꓬ ꓮ ꓕꓯ ꓟꓲ ꓗꓶꓸ ꓪꓴ ꓡꓰ ꓐ ꓡ ꓡꓳ= ꓖꓳ ꓡꓱ ꓥ ꓟꓲ ꓕꓲ ꓐꓱ ꓔꓯ ꓠꓽ ꓮ ꓕꓯ ꓟꓶ ꓕꓯ ꓗꓶꓸ ꓟꓽ ꓐ ꓡ" ꓐꓰ ꓐꓯ ꓘꓶꓽ ꓔꓯ ꓫꓱꓸ ꓡꓳ= ꓗꓴꓷꓼ ꓙꓵꓽ ꓜꓴ ꓕꓲ ꓜꓴ ꓠꓬ ꓟꓽ ꓔꓱꓹ ꓟꓽ ꓜꓳ ꓟ ꓬꓰ ꓢꓲ ꓑ ꓫꓬ ꓐꓴ ꓐꓱ ꓶ ꓙꓲ ꓖꓴ ꓙꓳ ꓟ ꓟꓽ ꓬꓰ ꓒꓬꓱꓼ ꓡ ꓠꓬ꓾ (ꓗꓴꓷꓼ ꓑ ꓫꓬ ꓐꓱ ꓶ ꓙꓲ ꓖꓴ ꓙꓳ ꓟ ꓟꓽ ꓬꓰ ꓔꓬ ꓟ ꓔꓯ ꓢꓷꓸ ꓡꓰ ꓠꓬ) ꓕꓲ ꓠꓬꓲ ꓙꓳ ꓕꓯ ꓖꓳ ꓗꓴꓷꓼ ꓙꓵꓽ ꓜꓴ ꓔꓯ ꓒꓬꓹ ꓩꓴ ꓢꓴ ꓓꓳ ꓡ ꓥꓳ= ꓖꓳ ꓡꓱ ꓥ ꓟꓲ ꓫꓵꓽ ꓓꓳꓽ ꓕꓳ ꓶ ꓔꓯ ꓗꓪꓼ ꓢꓲꓸ ꓔꓱꓹ ꓟ ꓓꓳꓽ ꓔꓯ ꓑ ꓫꓬꓼ ꓐꓴ ꓟꓽ ꓢꓷꓸ ꓡꓰ ꓠꓹ ꓟ ꓑꓲꓸ ꓔꓸ ꓠꓬ꓾ ꓮ-ꓐ-ꓡ-ꓦ ꓡꓲ-ꓚꓳꓸ ꓐꓯ ꓟ ꓡꓰ ꓐꓰ ꓟꓽ ꓒꓬꓱꓼ ꓡꓻꓳ= ꓟꓰꓓꓲꓮ ꓫꓵꓽ ꓓꓳ ꓕꓳ ꓶ ꓔꓯ ꓗꓪꓼ ꓔꓸ ꓟ ꓗꓴꓷꓼ ꓙꓵꓽ ꓢꓴ ꓐꓴ ꓠꓬ꓾ ꓬꓲꓸ ꓪ ꓝꓴꓲꓸ ꓔꓯ ꓑ ꓫꓬ ꓐꓴ ꓟꓽ ꓡꓳꓸ ꓢꓷꓸ ꓡꓰ ꓠꓹ ꓟ ꓑꓲꓸ ꓔ ꓢꓲ꓾ ꓠꓱꓸ ꓐꓯꓼ ꓕꓲ ꓫꓵ ꓫꓵ ꓗꓪ ꓓꓵꓽ ꓙ ꓳꓽ ꓧꓶ ꓔꓬ ꓝꓲ ꓟ꓾ ꓓꓵ ꓙ ꓚꓱꓹ ꓒꓯꓹ ꓡꓰ ꓝꓲ ꓟ ꓬꓰ ꓓꓳ ꓡ ꓡꓳ=
ꓖꓳ ꓡꓱꓳ ꓫꓵꓽ ꓗꓴꓷꓼ ꓙꓵꓽ ꓢꓴ ꓐꓴ ꓠꓯꓸ ꓘꓪ ꓢꓯꓸ ꓔꓬ ꓠ ꓗꓷ ꓡꓰ ꓟ ꓑ ꓫꓬꓼ ꓐꓴ ꓠꓬ꓾ ꓕꓲ ꓙꓵꓹ ꓡꓲꓸ ꓕꓲ ꓙꓵꓹ ꓗꓪ ꓠꓲꓹ ꓞ ꓠꓲꓹ ꓧꓳꓽ ꓗꓹ ꓟ ꓟꓬꓱꓽ ꓚꓱꓹ ꓕꓲ ꓟ ꓑꓶꓸ ꓝꓸ ꓕꓲ ꓟ ꓔꓳꓹ ꓜꓳ ꓡ ꓡꓳ= ꓖꓳ ꓓꓱ ꓔꓬ ꓢ ꓙꓳ ꓢ ꓚꓱꓹ ꓐꓰ꓾ ꓟꓵꓽ ꓟꓽ ꓢꓲꓽ ꓟꓽ ꓫꓬ ꓗꓹ ꓟ ꓓꓳꓽ ꓠꓬ ꓬꓲ ꓪ ꓟꓽ ꓑ ꓙꓻꓳ= ꓗꓴꓷꓼ ꓠꓬ ꓢꓴ ꓗꓴꓷꓼ ꓗꓪ ꓐꓰ ꓓꓶꓽ ꓡ ꓟ ꓔꓯ ꓙ ꓖꓶꓽ ꓔꓬ ꓟ ꓦꓬꓼ ꓠꓬꓲ꓾ ꓗꓪꓼ ꓙꓵꓽ ꓢꓴ ꓔꓯ ꓒꓳꓹ ꓔꓳꓹ ꓢꓴ ꓔꓯ ꓧꓪ ꓟꓰꓹ ꓠꓬꓲꓸ ꓤꓲ ꓠꓹ ꓟ ꓬꓰ ꓔꓬ ꓟ ꓙꓵꓹ ꓗꓪ ꓠꓯ ꓞꓲꓼ ꓦꓲ ꓟꓸ ꓟꓲꓽ ꓐꓰ꓾ ꓦꓲ ꓖꓼ ꓦꓲ ꓙꓲ ꓘꓹ ꓡꓳ ꓒꓱ ꓢꓲꓽ ꓫꓬ ꓟꓬꓱꓽ ꓔꓯ ꓮ ꓟ ꓠꓲꓹ ꓥꓳꓺ ꓐ ꓡ ꓥꓳ ꓪ? ꓮ ꓟ ꓢꓰꓸ ꓮ ꓢꓸ ꓐ ꓡ ꓥꓳ ꓪ= ꓑ ꓫꓬ ꓐꓴ ꓔꓯ ꓟꓽ ꓡꓯꓼ ꓕꓱꓼ ꓝꓲ= ꓬꓳꓹ ꓚꓲ ꓟ ꓚꓱꓹ ꓕꓲ ꓟ ꓑꓶꓸ ꓝꓸ ꓕꓲ ꓟ ꓒꓬꓱꓼ ꓡ ꓝꓲ ꓢꓲꓸ ꓬꓲꓸ ꓪ ꓙꓵꓽ ꓪ ꓕꓶ ꓡꓰ ꓠꓹ ꓟ ꓐꓰ꓾ ꓟꓶ ꓤ ꓙꓵꓽ ꓠꓹ ꓟ ꓚꓴ ꓬꓲꓹ ꓡꓯꓼ ꓕꓲ ꓬꓰ ꓒꓬꓱꓼ ꓡ ꓡꓳ=
ꓡ ꓞꓳ ꓠꓲꓸ ꓠꓲꓸ ꓤꓼ ꓕꓲ ꓜꓴ ꓡꓰ ꓑ ꓫꓬ ꓮ ꓟꓬꓹ ꓔꓯ ꓙꓵꓽ ꓧꓪꓸ ꓔꓬ ꓟ ꓔꓯ ꓮ ꓟ ꓥ ꓟꓲ ꓟꓽ ꓠꓲꓹ ꓒꓴ= ꓠꓱꓸ ꓐꓯꓼ ꓓꓵ ꓙ ꓚꓱꓹ ꓐꓴ ꓠꓬ ꓒꓴ ꓒꓴ ꓡꓯꓽ ꓡꓯꓽ ꓐꓯ ꓢꓲꓸ ꓟꓬꓱ ꓓꓳꓽ ꓧꓪ ꓙꓲ ꓥ ꓟꓲ꓾ ꓕꓱ ꓡꓱꓳ ꓫꓵꓽ ꓙꓵꓽ ꓚꓱꓹ ꓠꓬ ꓟꓬꓱ ꓓꓳꓽ ꓟꓽ ꓙꓳ= ꓖꓳ ꓟ ꓑꓶꓸ ꓓꓴ ꓕꓱ ꓡꓱꓳ ꓫꓵꓽ ꓙꓵꓽ ꓚꓱꓹ ꓡꓰ ꓗꓴꓷꓼ ꓔꓯ ꓙꓵꓽ ꓔꓬ ꓢꓴ ꓐꓴ ꓥ ꓟꓲ꓾ ꓠꓱꓸ ꓐꓯꓼ ꓗꓴꓷꓼ ꓙꓵꓽ ꓚꓱꓹ ꓕꓲ ꓫꓵ ꓫꓵ ꓡꓰ ꓙꓵꓽ ꓔꓬ ꓟ ꓡꓰ ꓐꓰ ꓗꓶꓸ ꓗꓴ ꓡꓳ= ꓣ-ꓫꓸ ꓠꓬ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓐꓰ꓾ ꓣ-ꓫꓸ ꓗꓴꓷꓼ ꓡ ꓞꓳ ꓐꓴ ꓐꓰ꓾ ꓬꓲ ꓚꓰ ꓙꓲ-ꓢꓴ ꓘꓴ ꓜꓲꓼ ꓞꓳ ꓟꓸ ꓚꓱꓹ ꓔꓯ ꓮ ꓘꓶꓸ ꓒꓵꓽ ꓟ ꓡꓰ ꓐꓰ ꓬꓰ ꓗꓶꓸ ꓡꓳ= ꓪꓰ ꓕꓳꓹ ꓠꓬ ꓮ ꓣꓳ ꓙꓲ ꓘꓳꓹ ꓟ ꓡꓰ ꓐꓰ ꓥ ꓡꓳ= ꓝꓣꓰꓠꓚꓧ ꓐꓰ ꓐ-ꓣꓲ-ꓔꓲꓠ ꓗꓪ ꓟ ꓕꓲ ꓐꓱ ꓠꓬ ꓣ-ꓫꓸ ꓡꓰ ꓔꓳꓹ ꓙ ꓡ ꓟ ꓜꓽ ꓢꓲ꓾ ꓣ-ꓫꓸ ꓔꓯ ꓟꓬꓱ ꓓꓳꓽ ꓖꓶ ꓔꓬ ꓥ ꓟꓲ꓾ ꓬꓲꓸ ꓪ ꓗꓴꓷꓼ ꓗꓪ ꓟ ꓑ ꓫꓬꓼ ꓐꓴ ꓠꓬ ꓑ ꓫꓬ ꓐꓱ ꓶ ꓟꓬꓱꓽ ꓟꓽ ꓬꓰ ꓔꓬ ꓟ ꓐꓰ꓾ ꓐꓯ ꓟꓴ ꓘꓶꓽ ꓚꓱꓹ ꓗꓪ ꓘꓶ ꓕꓴꓸ ꓜꓽ ꓟ ꓣ-ꓫꓸ ꓗꓴꓷꓼ ꓗꓪ ꓔꓬ ꓠꓲꓹ ꓟꓽ ꓫꓵ= ꓕꓲ ꓐꓱ ꓚꓲꓸ ꓚ ꓠꓬꓲ ꓢꓴ ꓡꓰ ꓐꓯ ꓠꓬ꓾ ꓣ-ꓫꓸ ꓠꓬ ꓡ ꓞꓳ ꓬꓲꓸ ꓙꓶ ꓟꓽ ꓫꓱꓸ ꓡꓯ ꓘꓳ ꓟ ꓗꓪ ꓮ ꓘꓶꓸ ꓶꓽ ꓡꓯꓽ ꓘꓳ ꓟ ꓗꓴꓷꓼ ꓕꓲ ꓟ ꓥ ꓡꓳ꓾ ꓐꓯ ꓡꓳ= ꓗꓴꓷꓼ ꓗꓪ ꓐꓳ ꓬꓲꓼ ꓡꓰ ꓢꓴ 10% ꓟ ꓡꓰ ꓗꓴꓷꓼ ꓗꓪ ꓐꓳ ꓶꓽ 87% ꓔꓯ ꓙꓵꓽ ꓔꓬ ꓡꓳ= ꓝꓣꓰꓠꓚꓧ ꓗꓴꓷꓼ ꓗꓪ ꓟ ꓗꓴꓷꓼ ꓟꓬꓱꓽ ꓬꓰ ꓜꓴ ꓝꓣꓳꓠꓔ ꓠꓮꓔꓲꓳꓠꓮꓡ ꓑꓮꓣꓔꓬ ꓠꓬ ꓕꓱ ꓡꓱꓳ ꓫꓵꓽ ꓔꓯ ꓮ ꓡꓲ ꓐꓰ ꓝꓣꓰꓠꓚꓧ ꓗꓪ ꓬꓰ ꓡ ꓥꓳ ꓪ?
ꓟꓲ ꓠꓯ ꓡ ꓞꓳ ꓐꓴ ꓠꓬ ꓛꓲ ꓒꓯꓹ ꓡꓰ ꓟꓯꓹ ꓒꓬꓽ ꓖꓶ ꓡꓳ= ꓥꓪ ꓟꓵꓽ ꓚꓳ ꓡꓳ ꓚꓳ ꓙꓰ ꓟ ꓙ ꓖꓴ ꓗꓪ꓾ ꓮ-ꓟꓯ-ꓣꓲ-ꓗ꓾ ꓙ-ꓟꓶ-ꓠꓰ꓾ ꓗ-ꓠꓯ-ꓓ꓾ ꓳ-ꓢꓲ-ꓔꓯ-ꓡꓲ-ꓬ ꓟꓵꓽ ꓗꓪ ꓚꓲꓸ ꓙꓰ ꓔꓬ ꓟ ꓬꓯꓽ ꓐꓯꓽ ꓮ ꓟꓬꓹ ꓟꓳ ꓠꓬꓲꓳ= ꓧꓶꓽ ꓗꓴꓷꓼ ꓐꓰ꓾ ꓙ-ꓑ ꓗꓴꓷꓼ ꓗꓪ ꓚꓲꓸ ꓙꓰ ꓠꓲꓹ ꓫꓵ ꓢꓴ ꓮ ꓔꓲꓸ ꓔꓲꓸ ꓙꓳ ꓡꓳ= ꓖꓳ ꓡꓱ ꓥ ꓟꓲ꓾ ꓣ-ꓫꓸ ꓗꓴꓷꓼ ꓗꓪ ꓚꓲꓸ ꓙꓰ ꓠꓲꓹ ꓫꓵ ꓢꓴ ꓕꓲ ꓣꓳ ꓟꓲ ꓟꓽ ꓟꓳ ꓠꓬꓲ= "ꓟꓲ ꓠꓯ ꓡꓴꓸ ꓡꓴꓸ ꓲ-ꓢꓲ-ꓡ ꓦ ꓡꓱ ꓚꓱꓹ" ꓠꓬ꓾ ꓖꓳ ꓡꓱꓳ ꓫꓵꓽ ꓦ ꓡꓱ ꓚꓱꓹ ꓪꓽ ꓢꓴ ꓔꓬ ꓟ ꓟꓵꓽ ꓗꓪ ꓢꓯꓼ ꓙꓳ ꓡꓳ= ꓢꓲ-ꓬꓲ-ꓬ꓾ ꓲ-ꓣꓼ꓾ ꓙ-ꓟꓶ-ꓠꓰ꓾ ꓐ-ꓣꓲ-ꓔꓲꓠ ꓗꓪ ꓟ ꓟꓴ-ꓢꓲ-ꓡꓲ ꓞꓳ ꓡꓱ ꓐꓴ ꓠꓲꓹ ꓡꓱ ꓟ ꓚꓱꓹ ꓒꓬꓱꓼ ꓡ ꓓ ꓥ ꓟꓲ꓾ ꓗ-ꓠꓯ-ꓓ꓾ ꓡꓳꓸ ꓟꓶꓸ ꓗꓳ-ꓣꓲ-ꓬ꓾ ꓖ-ꓣꓲꓼ꓾ ꓡꓳ ꓟꓶꓸ ꓮ-ꓝ-ꓣꓲ-ꓗ ꓗꓪ ꓟ ꓡ ꓞꓳ ꓐꓴ ꓠꓬ꓾ ꓟꓲ ꓠꓯ ꓫꓵꓽ ꓪꓴ ꓔꓯ ꓒꓶꓻ ꓫꓬꓽ ꓡꓰ ꓝꓲ ꓠꓹ ꓟ ꓲ-ꓢꓲ-ꓡ ꓦ ꓡꓱ ꓚꓱꓹ ꓧꓳꓽ ꓢꓴ ꓗ-ꓡꓲ-ꓒꓽ ꓐꓴ ꓐꓯ ꓘꓶꓽ ꓠ ꓠꓹ ꓡ ꓠꓹ ꓟ ꓬꓰ ꓫꓸ ꓡꓳ= ꓕꓱ ꓡꓱꓳ ꓫꓵꓽ ꓚꓱꓹ ꓗꓪ ꓥ ꓟꓲ ꓡ ꓞꓳ ꓐꓴ ꓠꓬ ꓛꓲ ꓒꓯꓹ ꓡꓰ ꓟꓯꓹ ꓒꓬꓽ ꓗꓶ ꓡꓳ= ꓙ-ꓟꓶ-ꓠꓰ ꓗꓴꓷꓼ ꓗꓪ ꓐꓰ ꓟꓴ-ꓢꓲ-ꓡꓲ ꓕꓲ ꓣꓳ ꓟꓲ ꓠꓯ ꓔꓱꓹ ꓫꓵ ꓟꓵꓽ ꓗꓪ ꓛꓲ ꓡ ꓢꓲ꓾ ꓖꓳ ꓗꓪ ꓟ ꓟꓴ-ꓢꓲ-ꓡꓲ ꓦ ꓡꓱ ꓚꓱꓹ ꓧꓳꓽ ꓢꓴ ꓡꓯ ꓒꓯꓹ ꓗꓪ ꓔꓬ ꓠꓲꓹ ꓫꓵ ꓡꓳ꓾ ꓐꓯ ꓠꓬꓲ ꓡꓯ= ꓖꓳ ꓕꓲ ꓙꓵꓹ ꓟ ꓠꓯꓸꓼ ꓗꓪ ꓟꓲ ꓠꓯ ꓔꓱꓹ ꓫꓵ ꓟꓵꓽ ꓗꓪ ꓐꓰ 100 ꓣꓳ ꓟꓽ ꓞꓲ ꓟ ꓞꓳ ꓡꓯꓸ ꓐꓴ ꓠꓬ ꓔꓬ ꓢ ꓙꓳ ꓢ ꓟ ꓤꓶ ꓫꓵꓼ ꓧꓪ ꓙꓰ ꓠꓹ ꓟ ꓙ-ꓟꓶ-ꓠꓰ ꓗꓴꓷꓼ ꓗꓪ ꓓꓵꓽ ꓙꓰ ꓠꓲꓹ ꓫꓵ ꓢꓴ ꓙꓳ ꓡꓳ=
ꓕꓱ ꓟ ꓔꓯ ꓡꓳꓸ ꓠꓬꓲ ꓠꓬ꓾ ꓠꓬꓲꓸ ꓠꓬꓲ ꓡꓲ-ꓐ-ꓬꓯ ꓚ ꓟꓲꓽ ꓔꓯ ꓦ ꓡꓱ ꓟꓽ ꓐꓳ ꓗꓷ ꓡꓰ ꓟ ꓠꓬ ꓧꓶꓸ ꓕꓯ ꓗꓳꓸ ꓡꓳꓹ ꓡ ꓟ ꓦꓬꓼ ꓠꓬꓲ ꓡꓰ ꓠꓽ ꓟꓽ ꓪꓴꓽ ꓢꓰ ꓐꓯ ꓓ ꓡꓳ= ꓗꓳꓸ ꓡꓳꓹ ꓡ ꓟ 1918꓾ 1938꓾ 1968 ꓘꓳꓼ ꓗꓪ ꓮ ꓟꓬ ꓛꓲ ꓬꓼ ꓗꓷ ꓟ ꓔꓯ ꓡꓳꓸ ꓢꓲꓸ ꓠꓲꓹ ꓘꓪ ꓫꓵ ꓜꓲꓽ ꓓ ꓡꓰ ꓓ ꓡꓳ= ꓟꓲ ꓠꓯ ꓡ ꓞꓳ ꓐꓴ ꓠꓬ ꓡꓲ-ꓐ-ꓬꓯ ꓚ ꓟꓲꓽ ꓔꓯ ꓮ ꓡꓳ ꓗꓷ ꓡ= ꓮ ꓡꓲꓳ ꓐꓯ ꓠꓬ ꓠꓱꓸ ꓐꓯꓼ ꓢꓲꓻ ꓣꓴ ꓓꓴ ꓟꓽ ꓙꓳ ꓠꓬꓲ ꓥꓳ= ꓚ ꓟꓲꓽ ꓔꓯ ꓐꓽ ꓚꓹ ꓫꓶꓹ ꓠꓲꓹ ꓫꓵ ꓥ ꓟꓲ꓾ ꓬꓲꓸ ꓟꓶ ꓗꓪ ꓮ ꓗꓪ ꓬꓲꓼ ꓙꓰ ꓖꓴ ꓟꓽ ꓙꓳ ꓠꓬꓲ ꓡꓲ-ꓐ-ꓬꓯ ꓚ ꓟꓲꓽ ꓦꓲ ꓗꓪ ꓔꓲꓸ ꓡꓽ ꓡ ꓠ ꓗꓷ ꓡꓰ ꓟ ꓥꓳ=
ꓖꓳ ꓡꓱ ꓟꓽ ꓥ ꓢꓲ꓾ ꓟꓲ ꓠꓯ ꓡ ꓞꓳ ꓐꓴ ꓠꓬ ꓕꓱ ꓡꓱꓳ ꓫꓵꓽ ꓚ ꓟꓲꓽ ꓓꓽ ꓟ ꓔꓯ ꓟꓽ ꓧꓪ ꓧꓪ꓾ ꓚꓲ ꓛꓬ ꓞꓳ ꓫꓵꓽ ꓐꓰ꓾ ꓦ ꓡꓱ ꓚꓱꓹ ꓮ ꓠꓱ ꓥꓳꓽ ꓗꓪ ꓦ ꓡꓱ ꓐꓳ ꓢꓲꓸ ꓔꓬ ꓡ ꓗꓴꓸ ꓡꓳ= 20 ꓦ ꓜꓴ ꓘꓳꓼ ꓟ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓞꓳ ꓫꓵꓽ ꓐꓱ ꓶ ꓢꓯꓼ ꓕꓵꓼ ꓡꓯ ꓘꓳ ꓡ ꓡꓳ= ꓖꓳ ꓡꓱ ꓥ ꓟꓲ꓾ ꓟꓲ ꓠꓯ ꓔꓯ ꓬꓲꓸ ꓐꓶꓽ ꓬꓲꓸ ꓧꓽ ꓕꓲ ꓫꓵꓽ ꓕꓲ ꓜꓴ꓾ ꓕꓲ ꓗꓴꓷꓼ ꓕꓲ ꓠꓲꓹ ꓟ ꓗꓷ ꓡꓰ ꓝꓲ ꓟ ꓡꓰ ꓟꓽ ꓥ ꓠꓬ꓾ ꓕꓲ ꓟꓲ ꓠꓯ ꓡꓱꓸꓼ ꓔꓯ ꓧꓳꓽ ꓪꓴꓸ ꓟꓴ ꓐ ꓡ ꓟ ꓓꓵꓽ ꓙ ꓚꓱꓹ ꓬꓲꓸ ꓪ ꓠꓯꓸꓼ ꓗꓪ ꓟꓽ ꓙꓳ= ꓖꓳ ꓟ ꓑꓶꓸ ꓓꓴ ꓡꓲꓹ ꓙꓰ ꓟꓶ ꓟ ꓙꓵꓽ ꓪ ꓐꓱ ꓶ ꓲ-ꓓꓳ-ꓠꓰ-ꓫꓸ ꓞꓳ ꓫꓵꓽ ꓐꓴ ꓠꓬ ꓓ-ꓛꓲ ꓗꓴꓷꓼ ꓔꓯ ꓔꓳꓹ ꓡꓯ ꓘꓳ ꓟ ꓐꓰ꓾ ꓐꓰ-ꓬꓯꓼ-ꓠꓮꓟ ꓞꓳ ꓫꓵꓽ ꓠꓬ ꓮ-ꓟꓯ-ꓣꓲ-ꓗ ꓔꓯ ꓢꓰꓼ ꓡꓯ ꓘꓳ ꓟ ꓙꓳ ꓥ ꓟꓲ꓾ ꓲ-ꓓꓳ-ꓠꓲ-ꓫ ꓚ ꓟꓲꓽ ꓐꓰ꓾ ꓐꓰ-ꓬꓯꓼ-ꓠꓮꓟ ꓚ ꓟꓲꓽ ꓗꓪ ꓐꓰ ꓕꓲ ꓟꓲ ꓠꓯ ꓔꓯꓺ ꓢꓳ ꓓꓴ ꓟꓽ ꓒꓬꓱꓼ ꓡ= ꓞꓳ ꓫꓵꓽ ꓔꓯ ꓬꓲ ꓚꓰꓺ ꓔꓶ ꓔꓸ ꓟ ꓗꓴꓷꓼ ꓐꓴ ꓠꓬ꓾ ꓗꓴꓷꓼ ꓛꓳ ꓗꓴꓷꓼ ꓮ ꓡꓲ ꓙ ꓡꓯ ꓘꓳ ꓠꓯ ꓟ ꓐꓰ꓾ ꓕꓲ ꓟꓲ ꓠꓯ ꓐꓱ ꓶ ꓓꓵꓽ ꓙ ꓠꓹ ꓟ ꓮ ꓔꓳꓸ ꓟꓲꓸ ꓐꓳꓽ ꓙꓲ ꓣꓴ ꓓꓴ ꓔꓯ ꓖꓪ ꓙꓱ ꓪꓽ ꓡꓰ ꓠꓹ ꓟ ꓐꓱ ꓶ ꓠꓬ꓾ ꓡꓲ-ꓐ-ꓬꓯ (ꓥ ꓠꓬ) ꓗꓳ-ꓟꓴ-ꓠꓲꓼ ꓚ ꓟꓲꓽ ꓔꓯ ꓖꓼ ꓙꓰ ꓠ ꓗꓷ ꓡꓰ ꓡꓳ=
ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓡꓲ-ꓐ-ꓬꓯ ꓐꓰ꓾ ꓗꓳ-ꓟꓴ-ꓠꓲꓼ ꓚ ꓟꓲꓽ ꓠꓬꓲꓽ ꓚꓱꓹ ꓡꓱꓸꓼ ꓟꓬꓱꓽ ꓬꓰ ꓟꓽ ꓙꓲ ꓬꓰꓳ ꓐꓰ꓾ ꓐꓯ ꓠꓬ ꓕꓲ ꓟꓲ ꓠꓯ ꓔꓯ ꓗꓪꓼ ꓐ ꓡ ꓟ ꓓꓵꓽ ꓙ ꓚꓱꓹ ꓟꓽ ꓙꓳ ꓡꓰꓳ ꓐꓰ ꓐꓯ ꓠ ꓗ ꓡ? ꓕꓲ ꓟꓲ ꓠꓯ ꓔꓯ ꓗꓪꓼ ꓐ ꓡ ꓟ ꓓꓵꓽ ꓙ ꓚꓱꓹ ꓚ ꓟꓲꓽ ꓐꓴ ꓮ ꓙꓵꓽ ꓠꓬ꓾ ꓚꓵ ꓚꓵ ꓐꓯ ꓠꓬ ꓐꓶꓽ ꓓꓵꓽ ꓕꓲ ꓒꓳꓹ ꓗꓪ ꓟ ꓡ ꓞꓳ ꓐꓴ ꓡꓰ ꓧꓪ ꓟꓰꓹ ꓓꓳ ꓡ ꓟ ꓟꓽ ꓥ ꓡ? ꓐꓲ-ꓬꓯꓼ-ꓠꓮꓟ ꓞꓳ ꓘꓹ ꓡ ꓞꓳ ꓕꓲ ꓣꓳ ꓠꓬ꓾ ꓔꓲ-ꓬ ꓗꓪ ꓟ ꓙ-ꓟ ꓕꓲ ꓣꓳ ꓐꓰ꓾ ꓟ-ꓛꓬ-ꓢꓲ-ꓔ ꓗꓪ ꓟ ꓙꓼ ꓟꓬꓱꓽ ꓬꓰ ꓚꓱꓹ ꓶꓼ ꓡꓯ ꓟꓴ ꓒꓽ ꓕꓲ ꓣꓳ ꓓꓵꓽ ꓙ ꓧꓪꓸ ꓛꓲ ꓡ ꓟ ꓚꓱꓹ ꓔꓯ ꓮ ꓡꓲ ꓔꓸ ꓢꓲꓸ ꓠ ꓠꓹ ꓙꓲꓽ ꓙꓳ ꓡ? ꓗꓴꓷꓼ ꓮ ꓡꓲ ꓕꓲ ꓗꓴꓷꓼ ꓥ ꓟꓲ꓾ ꓚꓲ ꓛꓬ ꓗꓴꓷꓼ ꓚ ꓟꓲꓽ ꓐꓰ ꓚꓲ ꓛꓬ ꓗꓴꓷꓼ ꓙꓰ ꓠꓹ ꓟ ꓙ ꓖꓴ ꓔꓯ ꓝꓰꓸ ꓠ ꓗ ꓡꓳ ꓟꓽ ꓥ ꓡ? ꓐꓶꓽ ꓓꓵꓽ ꓟꓵ ꓗꓪ ꓟ ꓡ ꓞꓳ ꓐꓴ ꓠꓬ ꓕꓲ ꓟꓲ ꓠꓯ ꓡꓱꓸꓼ ꓕꓱ ꓡꓱ ꓒꓬꓱꓼ ꓡ ꓠ ꓗ ꓡꓳ ꓐꓰ꓾ ꓟꓽ ꓐꓯ ꓐꓯ ꓚꓲ ꓛꓬ ꓗꓴꓷꓼ ꓐꓱ ꓶ ꓡꓰ ꓓꓵꓽ ꓙ ꓠꓬ ꓜꓳ ꓡꓳ ꓟꓽ ꓥ ꓡ?
ꓕꓲ ꓟꓲ ꓠꓯ ꓡꓱꓸꓼ ꓗꓪ ꓮ ꓟꓶ ꓕꓱ ꓡꓱ ꓒꓬꓱꓼ ꓔꓬ ꓡꓳ ꓐꓰ ꓐꓯ ꓓ ꓡꓳ= ꓡꓲ-ꓐ-ꓬꓯ ꓚ ꓟꓲꓽ ꓐꓱꓽ ꓬꓰ ꓡ ꓠꓬ꓾ ꓖꓳ ꓕꓲ ꓟꓵꓽ ꓗꓪ ꓮ ꓠꓱ ꓠꓱ ꓟ ꓔꓬ ꓢ ꓗꓹ ꓛꓲ ꓟ ꓚ ꓟꓲꓽ ꓔꓯ ꓠꓲꓹ ꓥꓳꓺ ꓢꓴ ꓙꓳ ꓡ ꓡꓳ= ꓓꓳ-ꓠꓯ-ꓕ-ꓣꓮꓟꓼ ꓠꓬ "ꓮ-ꓟꓯ-ꓣꓲ-ꓗ ꓟꓬꓱ ꓓꓳꓽ ꓙꓳ ꓟ ꓤꓶ ꓗꓪ ꓡꓽ ꓙꓰ ꓡꓯ" ꓐꓯ ꓢꓲꓸ ꓟꓯꓹ ꓘꓳ ꓡꓳ= ꓬꓲꓸ ꓪ ꓡꓰ ꓐꓯ ꓟ ꓡꓳ ꓚ ꓠꓬ꓾ 1980 ꓘꓳꓼ (ꓥ ꓠꓬ) 1950 ꓘꓳꓼ ꓗꓪ ꓟ ꓮ-ꓟꓯ-ꓣꓲ-ꓗ ꓠꓬ ꓐꓲ ꓜꓲꓼ ꓟ ꓐꓰ ꓟꓬꓱ ꓓꓳꓽ ꓙꓳ ꓟ ꓮ-ꓟꓯ-ꓣꓲ-ꓗ ꓗꓴꓷꓼ ꓥꓳ ꓐꓰ ꓐꓯ ꓔꓬ ꓟ ꓥꓳ= ꓖꓳ ꓦꓬꓼ ꓠꓬꓲ ꓟ ꓡꓰ ꓐꓰ 21 ꓦ ꓜꓴ ꓘꓳꓼ ꓗꓪ ꓬꓰ ꓙꓲꓽ ꓙꓳ ꓡꓳ ꓐꓯ ꓔꓬ ꓟ ꓡꓰ ꓐꓰ ꓗꓹ ꓡꓳ= ꓐ-ꓣꓲ-ꓔꓲꓠ ꓥ ꓟꓲ ꓙꓼ ꓪꓴꓸ ꓠꓷꓸ ꓣꓱꓽ ꓟ ꓦꓬꓼ ꓠꓬꓲ ꓐꓰ ꓕꓲ ꓟꓲ ꓠꓯ ꓞꓻ ꓢꓯꓼ ꓟꓴ ꓡ ꓟ ꓦꓬꓼ ꓠꓬꓲ ꓗꓪ ꓪ ꓔꓲꓸ ꓟ ꓡꓰ ꓙꓵꓽ ꓟ ꓠꓯꓸꓼ ꓗꓪ ꓬꓲꓸ ꓫꓳꓽ ꓗꓪ ꓔꓲꓺ ꓢꓲꓸ ꓔꓬ ꓟ ꓠꓬ ꓒꓬꓱꓼ ꓡ ꓓ ꓡꓳ ꓐꓰ ꓳ ꓟꓬ ꓘꓳ ꓔꓬ ꓡꓳ= ꓧꓶꓽ ꓒꓽ ꓟꓬꓱ ꓓꓳ ꓙꓳ ꓢꓴ ꓐꓴ ꓐꓰ꓾ ꓞꓳ ꓐꓳ ꓐꓴ ꓠꓬ꓾ ꓮ ꓠꓱ ꓠꓱ ꓗꓪ ꓟ ꓧꓶꓽ ꓪ ꓔꓲꓸ ꓦꓬꓼ ꓠꓬꓲ ꓐꓰ꓾ ꓗꓳ-ꓩꓴ-ꓫꓼ ꓢꓷꓸ ꓠꓲꓹ ꓙꓳ ꓒꓽ ꓦꓬꓼ ꓠꓬꓲ ꓔꓯ ꓟ-ꓢꓲꓼ ꓗꓳ-ꓟꓴ-ꓠꓲꓼ ꓬꓲꓸ ꓛꓲ ꓔꓶ ꓠꓹ ꓟ ꓧꓪ ꓟꓳ ꓡꓰꓳ= ꓣ-ꓫꓸ ꓗꓪ ꓠꓬ ꓑꓴ-ꓔꓲ ꓡꓰ ꓒꓴ ꓒꓴ ꓡꓯꓽ ꓡꓯꓽ ꓐꓯ ꓓꓳ ꓩꓴ ꓡ ꓟ ꓠꓬ꓾ (ꓠꓱꓸ ꓠꓱꓸ ꓤꓼ ꓟ ꓙꓵꓽ ꓢꓴ ꓐꓴ ꓘꓶꓽ ꓕꓴꓸ ꓜꓽ ꓢꓲꓸ ꓐꓳ ꓬꓲꓼ ꓔꓬ ꓟ ꓟꓽ ꓥ) ꓮ ꓠꓱ ꓗꓪ ꓟ ꓜ ꓪ ꓔꓲꓸ ꓦꓬꓼ ꓠꓬꓲ ꓔꓯ ꓕꓲ ꓧꓪꓸ ꓡꓽ ꓙꓰ ꓠꓹ ꓟ ꓥ ꓡꓳ= ꓧꓶꓸ ꓕꓯ ꓟ ꓜ ꓪ ꓔꓲꓸ ꓡꓰ ꓙꓵꓽ ꓔꓬ ꓟ ꓟꓵꓽ ꓮ ꓙꓵꓽ ꓔꓯ ꓕꓲ ꓧꓪꓸ ꓡꓲꓸ ꓟꓶ ꓡꓰ ꓢꓲ꓾ ꓪꓽ ꓠꓬꓲ ꓟ ꓜ ꓪ ꓔꓲꓸ ꓗꓴꓷꓼ ꓔꓯ ꓣ-ꓫꓸ ꓞꓳ ꓫꓵꓽ ꓐꓴ ꓐꓰ꓾ ꓦ ꓡꓱ ꓚꓱꓹ ꓔꓯ ꓞꓳ ꓒꓵꓽ ꓢꓲꓸ ꓣꓱꓽꓬꓰ ꓙꓰ ꓓꓴ ꓥꓳ ꓐꓯ ꓡꓳ=
ꓖꓳ ꓟ ꓡꓰ ꓐꓰ꓾ ꓞꓳ ꓫꓵꓽ ꓐꓰ꓾ ꓦ ꓡꓱ ꓚꓱꓹ ꓡꓲ ꓒꓰꓼ ꓔꓯ ꓒꓵꓽ ꓢꓲꓸ ꓮ ꓠꓱ ꓗꓪ ꓟ ꓔꓯ ꓟꓬꓱ ꓓꓳꓽ ꓖꓶ ꓟ ꓚꓱꓹ ꓠꓬ ꓲ-ꓓꓲ-ꓬ꓾ ꓑꓳ-ꓡ꓾ ꓔꓴ-ꓣ-ꓗꓲ꓾ ꓐꓰ꓾ ꓕꓲ ꓟꓵꓽ ꓕꓲ ꓟꓵꓽ ꓗꓪ ꓟ ꓗꓴꓷꓼ ꓙꓵꓽ ꓢꓴ ꓐꓴ ꓠꓯꓸꓼ ꓗꓪ ꓡꓳꓸ ꓟꓳ ꓓ ꓡꓳ= ꓕꓱ ꓡꓱꓳ ꓫꓵꓽ ꓮ ꓠꓱ ꓟ ꓔꓯ ꓡꓽ ꓙꓰ ꓠꓲꓹ ꓫꓵ ꓟ ꓓꓵꓽ ꓙ ꓚꓱꓹ ꓠꓬ ꓟꓲ ꓠꓯ ꓔꓱꓹ ꓫꓵꓺ ꓕꓲ ꓟꓵꓽ ꓗꓪ ꓟꓬꓽ ꓠꓬꓲ ꓢꓯꓼ ꓙꓳ ꓡꓳ= ꓲ-ꓢꓲ-ꓡ ꓬꓲꓸ ꓟꓶ ꓬꓲꓸ ꓙꓲꓽ ꓦ ꓡꓱ ꓢꓴ ꓐꓴ ꓠꓬ꓾ ꓝꓲ ꓓꓴ ꓟꓳ-ꓧ-ꓟꓯꓼ ꓡꓰ ꓗꓳꓸ ꓗꓷ ꓟ 1400 ꓘꓳꓼ ꓛꓲ ꓕꓯ ꓟ-ꓓꓲ-ꓠ ꓡꓳ ꓒꓱ ꓗꓪ ꓣꓱꓽ ꓬꓰ ꓗꓷ ꓟ ꓚꓱꓹ ꓔꓯ ꓖꓼ ꓛꓳ ꓠꓲꓹ ꓫꓵ ꓡꓳ= ꓕꓱ ꓟ ꓕꓯ ꓢꓲ ꓬꓼ ꓟ ꓕꓲ ꓜꓴ ꓠꓬ ꓦ ꓡꓱ ꓚꓱꓹ ꓮ ꓘꓶꓸ ꓢꓯꓼ ꓕꓵꓼ ꓠꓲꓹ ꓫꓵ ꓟ ꓬꓲ-ꓢꓷ-ꓡꓰ ꓐꓴ ꓥ ꓡꓳ= ꓬꓲꓸ ꓪ ꓠꓬ ꓗꓳꓸ ꓗꓷ ꓟ 2500 ꓕꓯ ꓢꓲ ꓗꓪ ꓟ ꓦꓬꓼ ꓠꓬꓲ ꓗꓪ ꓮ ꓡꓲ ꓬꓰ ꓗꓷ ꓠꓬ ꓖꓳ ꓟ ꓔꓯ ꓧꓪ ꓟꓰꓹ ꓢꓲꓸ ꓬꓰ ꓠꓲꓹ ꓫꓵ ꓡꓳ= ꓢꓲꓽ ꓫꓬ ꓕꓳ ꓶ ꓗꓪ ꓙꓳ ꓟ ꓬꓲ-ꓢꓷ-ꓡꓰ ꓗꓴꓷꓼ ꓟꓵꓽ ꓫꓸ ꓗ ꓔꓯ ꓠꓬꓲꓸ ꓠꓬꓲ ꓥ ꓟꓲ ꓣꓴ ꓡꓲꓸ ꓢꓲꓸ ꓟꓴ-ꓢꓲ-ꓡꓲ ꓐꓴ ꓡꓰ ꓫꓬꓹ ꓔꓸ ꓟ ꓰꓡ-ꓰꓼ-ꓢꓲ ꓪ ꓘꓴ ꓦꓲ ꓕꓲ ꓟꓵꓽ ꓗꓪ ꓬꓲ-ꓢꓷ-ꓡꓰ ꓐꓴ ꓢꓲꓽ ꓫꓬ ꓦꓲ ꓫꓬꓹ ꓠꓹ ꓟ ꓒꓴ ꓒꓴ ꓡꓯꓽ ꓡꓯ ꓕꓱ ꓓꓳ ꓡ ꓡꓳ=
ꓡꓲ-ꓐ-ꓬꓯ ꓟꓬꓱ ꓓꓳꓽ ꓙꓳ ꓢꓴ ꓐꓰ ꓞꓳ ꓐꓳ ꓐꓴ ꓠꓬ ꓕꓱ ꓡꓱꓳ ꓫꓵꓽ ꓔꓯ ꓧꓰꓸ ꓛꓲ ꓧꓰꓸ ꓒ ꓡꓳꓸ ꓠꓬꓲ ꓔꓬ ꓢꓲ꓾ ꓟꓲ ꓠꓯ ꓞꓳ ꓤ ꓐꓴ ꓟꓶꓽ ꓬꓰ ꓡ ꓚꓱꓹ ꓢꓰꓼ ꓡꓯ ꓘꓳ ꓖꓴ ꓗꓪ ꓟꓽ ꓙꓰ ꓙꓰ꓾ ꓡꓲ-ꓐ-ꓬꓯ ꓚꓱꓹ ꓗꓪ ꓮ ꓙꓵꓽ ꓢꓴ ꓕꓲ ꓡꓰꓹꓼ ꓫꓱꓽ ꓡ ꓠꓹ ꓟ ꓥꓳ ꓡꓳꓸ ꓔꓬ ꓡꓳ= 2016 ꓘꓳꓼ ꓗꓪ ꓴꓢꓮ ꓪ ꓔꓲꓸ 0-ꓐ-ꓟ ꓡꓰ꓾ " ꓗꓴꓷꓼ꓾ ꓞꓳ ꓫꓵꓽ꓾ ꓦ ꓡꓱ ꓚꓱꓹ꓾ ꓞꓳ ꓪꓳꓼ ꓕꓱ ꓡꓱꓳ ꓫꓵꓽ ꓔꓯ ꓬꓲꓸ ꓚꓰꓺ ꓔꓶ ꓣꓴ ꓔꓸ ꓢꓲ꓾ ꓕꓲ ꓠꓲꓹ ꓕꓲ ꓪ ꓟ ꓒꓰꓼ ꓬꓰ ꓢꓲ꓾ ꓢꓰꓼ ꓡꓯ ꓘꓳ ꓟ ꓗꓪ ꓟꓲ ꓠꓯ ꓡ ꓞꓳ ꓐꓴ ꓬꓲꓸ ꓟꓶꓽ ꓟꓽ ꓢꓰꓼ ꓡꓰ ꓠꓹ ꓟ ꓤ ꓟꓳ ꓡꓯ" ꓐꓰ ꓬꓲꓸ ꓔꓯ ꓛꓳ ꓢꓴ ꓐꓴ ꓔꓯ ꓬꓲꓼ ꓠꓬꓲꓸ ꓖꓶ ꓗꓷꓳ= ꓳ-ꓐ-ꓟ ꓡꓰ꓾ "ꓗ ꓘꓶꓽ ꓒꓴ ꓔꓸ ꓟ ꓶꓼ ꓡꓯ ꓚꓱꓹ ꓐꓰ꓾ ꓶ ꓣꓴ ꓟ ꓙꓵꓽ ꓚꓱꓹ꓾ ꓓꓰ-ꓟꓳ-ꓗꓯ-ꓢꓰ ꓐꓰ꓾ ꓡ ꓞꓳ ꓶꓽ ꓔꓯ ꓒꓵꓽ ꓟ꓾ ꓟꓵ ꓗꓳ ꓓꓵ ꓓꓵ ꓛꓳ ꓫꓱꓽ ꓠꓯ ꓟ ꓙꓵꓽ ꓗ ꓡꓳ ꓚ ꓬꓰ ꓟ ꓕꓱ ꓟ ꓠꓬ ꓕꓱ ꓕꓲ ꓦ ꓜꓴ ꓘꓳꓼ ꓠꓯꓸꓼ ꓗꓪ ꓟꓲ ꓠꓯ ꓡ ꓞꓳ ꓐꓴ ꓪꓴꓽ ꓟꓴ ꓡ ꓚꓱꓹ ꓬꓲꓸ ꓚꓰ ꓥ ꓡꓳ" ꓐꓰ ꓐꓯ ꓗꓷꓳ=
ꓳ-ꓐ-ꓟ ꓡꓰ ꓬꓲꓼ ꓠꓬꓲꓸ ꓟꓳꓸ ꓖꓶ ꓡ ꓟ ꓠꓬ ꓜꓳ ꓡꓳ= ꓡꓲ-ꓐ-ꓬꓯ ꓓꓵꓽ ꓙ ꓚꓱꓹ ꓗꓪ ꓟꓽ ꓐꓲ ꓜꓲꓼ ꓟ ꓮ ꓟꓬꓹ ꓙꓳ ꓢꓰꓽ ꓥ ꓟꓲ꓾ ꓠꓱꓸ ꓐꓯꓼ ꓓꓵꓽ ꓙ ꓚꓱꓹ ꓔꓯ ꓔꓯꓺ ꓠꓬꓲ ꓕꓯ ꓡꓲ-ꓐ-ꓬꓯ ꓠꓬ ꓚ ꓟꓲꓽ ꓙꓲ ꓡꓳ= ꓟꓲ ꓠꓯ ꓞꓳ ꓤ ꓮ ꓟꓬꓹ ꓠꓬ 21 ꓦ ꓜꓴ ꓘꓳꓼ ꓬꓲꓸ ꓪꓴꓸ ꓔꓴ ꓕꓲ ꓡꓶꓸ ꓟ ꓟꓳ ꓘꓳꓼ ꓗꓪ ꓟ ꓤꓶ ꓡꓰ ꓐꓰ꓾ ꓢꓲ ꓡꓲꓹ ꓟ꓾ ꓐꓳ ꓢ ꓔꓬ ꓢ ꓟ ꓚꓱꓹ ꓟꓽ ꓔꓳꓹ ꓜꓳꓽ ꓠꓬꓲ ꓢꓰ= ꓟꓲ ꓠꓯ ꓚ ꓟꓲꓽ ꓕꓲ ꓙ ꓖꓴ ꓡꓱꓸꓼ ꓗꓪ ꓠꓻ ꓓꓱꓽ ꓑꓶꓸ ꓓꓴ ꓫꓵꓻ ꓢꓴ ꓠꓬ꓾ ꓞꓲꓼ ꓪꓴ ꓡ ꓟꓳꓽ ꓡ ꓢꓲꓸ ꓫꓵꓻ ꓢꓴ ꓠꓯꓸ ꓘꓪ ꓠꓲꓸ ꓡꓳ= ꓜꓽ ꓓꓴ ꓦꓰꓼ ꓟꓷꓼ ꓢꓲꓸ ꓫꓵꓻ ꓢꓴ ꓠꓬ꓾ ꓜꓽ ꓟꓬꓽ ꓜꓲ ꓘꓪꓽ ꓟꓬꓽ ꓜꓲ ꓢꓲꓸ ꓫꓵꓻ ꓢꓴ ꓙꓱ ꓘꓪ ꓠꓲꓸ ꓡꓳ= ꓜꓲ ꓜꓲ ꓑꓰꓹ ꓑꓰꓹ ꓢꓰꓼ ꓡꓯ ꓘꓳ ꓢꓲꓸ ꓫꓵꓻ ꓟ ꓠꓬ꓾ ꓕꓲ ꓖ ꓕꓲ ꓧꓪꓸ ꓬꓰ ꓟꓽ ꓜꓳ ꓢꓲꓸ ꓫꓵꓻ ꓟ ꓙꓱ ꓘꓪ ꓠꓲꓸ ꓡꓳ=
ꓖꓳ ꓡꓱ ꓥ ꓟꓲ꓾ ꓡꓲ-ꓐ-ꓬꓯ ꓚ ꓟꓲꓽ ꓚꓱꓹ ꓗꓪ ꓔꓳꓹ ꓜꓳꓽ ꓡ ꓟ ꓪꓴꓽ ꓓꓰ ꓟ ꓘꓶ ꓡꓶꓽ ꓓꓴ ꓠꓬ꓾ ꓟꓲ ꓠꓯ ꓢꓯꓸ ꓫꓵꓽ ꓙꓳ ꓫꓵꓽ ꓐꓬ ꓡꓰ ꓟ ꓐꓰ꓾ ꓢꓷꓸ ꓠꓲꓹ ꓬꓲ ꓫꓵ ꓬꓲꓸ ꓙꓰ ꓪꓴꓽ ꓟꓴ ꓡ ꓟ ꓥ ꓡꓳ= ꓕꓱ ꓡꓱꓳ ꓫꓵꓽ ꓐꓱ ꓶ ꓡꓲ-ꓐ-ꓬꓯ ꓡꓰ ꓗꓪꓽ ꓫꓵꓽ ꓠꓹ ꓟ ꓢꓷꓸ ꓠꓲꓹ ꓐꓰ꓾ ꓒꓶꓻ ꓘꓶꓽ ꓟꓽ ꓙꓳ ꓢꓰ= ꓡꓲ-ꓐ-ꓬꓯ ꓚꓱꓹ ꓗꓪ ꓶ ꓡꓯꓼ ꓟꓴ ꓚꓱꓹ ꓪꓴꓽ ꓟꓴ ꓡ ꓟ ꓗꓪ ꓐꓰ ꓞꓳ ꓫꓵꓽ ꓞꓳ ꓪꓳꓼ ꓫꓵꓽ ꓪꓴ꓾ ꓗꓴꓷꓼ ꓫꓵꓽ ꓪ ꓔꓯ ꓒꓶꓻ ꓫꓬ ꓐ ꓡ ꓡꓳ= ꓡꓲ-ꓐ-ꓬꓯ ꓚꓱꓹ ꓗꓪ ꓐꓰ ꓙꓵꓽ ꓢꓴ ꓡꓳꓸ ꓢꓴ꓾ ꓑ ꓫꓬ ꓐꓴ ꓐꓰ꓾ ꓬꓯꓽ ꓐꓯꓽ ꓮ ꓙꓵꓽ ꓔꓯ ꓟꓬꓽ ꓠꓬꓲ ꓪꓴꓽˍ ꓟ ꓑ ꓑ ꓖꓶꓽ ꓓꓴ ꓥꓳ ꓐꓰ ꓙ ꓟꓳ ꓘꓶꓽ ꓖꓶ ꓢꓲ꓾ ꓕꓲ ꓠꓲꓹ ꓕꓲ ꓪ ꓒꓬꓱꓼ ꓡ ꓝꓲ ꓡꓳ= ꓑ ꓑ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓪꓴꓽ ꓡ ꓐꓶꓹ ꓡ ꓠꓬ ꓕꓱ ꓟ ꓒꓬꓱꓼ ꓡ ꓓ ꓡꓳ= ꓖꓳ ꓡꓱ ꓥ ꓟꓲ ꓶ ꓡꓯꓼ ꓚꓱꓹ ꓪꓴꓽ ꓟꓴ ꓡ ꓟ ꓗꓪ ꓐꓰ ꓟꓲ ꓠꓯ ꓗꓪ ꓢꓯꓸ ꓫꓵꓽ ꓙꓳ ꓫꓵꓽ ꓐꓬ ꓡꓰ ꓔꓬ ꓟ ꓔꓯ ꓚꓬꓴꓹ ꓟꓽ ꓐ ꓡ= ꓡꓯ ꓟꓰꓹ ꓒꓬꓱꓼ ꓡ ꓡꓳ= ꓶ ꓡꓯꓼ ꓚꓱꓹ ꓪꓴꓽ ꓟꓴ ꓡ ꓠꓬ ꓟꓲ ꓠꓯ ꓗꓪ ꓢꓯꓸ ꓫꓵꓽ ꓙꓳ ꓫꓵꓽ ꓬꓲꓸ ꓚꓱꓹ ꓬꓲ ꓡꓲꓽ ꓮ ꓙꓵꓽ ꓐꓬ ꓧꓶꓽ ꓡꓰ ꓡ ꓡꓳ= ꓝꓮꓲ ꓶ ꓡꓯꓼ ꓪꓴꓽ ꓟꓴ ꓡ ꓟ ꓗꓪ ꓐꓰ꓾ ꓙꓼ ꓪꓴꓸ ꓠꓷꓸ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰ ꓕꓳꓽ ꓥꓳꓽ ꓔꓯ ꓠꓽ ꓡꓰ ꓝꓲ ꓟꓽ ꓐ ꓡ= ꓶ ꓡꓯꓼ ꓪꓴꓽ ꓟꓴ ꓡ ꓠ ꓟ ꓐꓱ ꓶ ꓙꓼ ꓪꓴꓸ ꓠꓷꓸ ꓐꓰ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰ ꓔꓯ ꓟꓬꓽ ꓠꓬꓲ ꓪꓽ ꓪꓴ ꓘꓳꓹ ꓠ ꓗꓷ ꓡ ꓡꓳ=
ꓡꓲ-ꓐ-ꓬꓯ ꓐꓰ ꓞꓳ ꓐꓳ ꓙ ꓖꓴ ꓗꓪ ꓗ ꓘꓶꓽ ꓒꓴ ꓔꓸ ꓟ ꓶ ꓡꓯꓼ ꓟꓴ ꓚꓱꓹ ꓠꓬ ꓡ ꓞꓳ ꓮ ꓟꓬꓹ ꓔꓯ ꓥꓳ ꓡꓳꓸ ꓓꓴ ꓓꓽ ꓟ ꓖꓶꓽ ꓐ ꓡ ꓡꓳ= 20 ꓦ ꓜꓴ ꓘꓳꓼ ꓟ ꓕ ꓑꓳꓸ ꓠꓬ꓾ ꓧꓴ-ꓢꓲ-ꓔ꓾ ꓫꓼ-ꓧꓮꓲ꓾ ꓲ-ꓢꓲ-ꓔ-ꓐꓴ꓾ ꓢꓮꓳ-ꓑꓳ-ꓡꓳ ꓗꓪ ꓟ ꓡ ꓞꓳ ꓐꓴ ꓠꓬ꓾ ꓬꓲꓸ ꓪ ꓞꓲꓼ ꓤ ꓡꓯꓹ ꓤꓼ ꓐꓴ ꓔꓯ ꓟꓬꓽ ꓠꓬꓲ ꓙꓲ ꓟ ꓢꓷꓸ ꓠꓲꓹ ꓢꓳ ꓚꓱꓹ꓾ ꓟꓬꓽ ꓠꓬꓲ ꓙꓲ ꓟ ꓧꓪ ꓖꓳ ꓓꓱꓽ ꓔꓬ ꓢ ꓠꓯ ꓞꓲꓼ ꓚꓱꓹ ꓐꓰ꓾ ꓦ ꓐ ꓪꓽ ꓒꓵꓽ ꓮ ꓟꓴꓹ ꓟꓴ ꓪ ꓡꓳ= ꓖꓳ ꓡꓱ ꓥ ꓟꓲ ꓮ ꓟꓶ ꓗꓪ ꓐꓰ 10 ꓘꓳꓼ ꓟ ꓘꓴꓽ ꓗꓪ ꓢꓷꓸ ꓠꓲꓹ ꓬꓲꓸ ꓫꓵ ꓬꓲ ꓙꓰ ꓪꓴꓽ ꓟꓴ ꓡ ꓟ ꓕꓳꓽ ꓥꓳꓽ ꓐꓰ꓾ ꓟꓲ ꓠꓯ ꓢꓯꓸ ꓫꓵ ꓙꓳ ꓫꓵꓽ ꓐꓬ ꓡꓰ ꓔꓬ ꓟ ꓑꓶꓸ ꓓꓴ꓾ ꓡ ꓠꓹ ꓟ ꓕꓲ ꓤꓶ ꓢꓴ ꓐꓴ ꓮ ꓟꓶ ꓟ ꓡꓰ ꓐꓰ ꓔꓬ ꓢ ꓙꓳ ꓢ ꓡ ꓠꓬ ꓧꓪ ꓟꓶ ꓟꓽ ꓓꓻꓳ=
ꓖꓳ ꓟ ꓑꓶꓸ ꓓꓴ ꓟꓲ ꓠꓯ ꓐꓱ ꓶ ꓚ ꓟꓲꓽ ꓓꓽ ꓟ ꓬꓲꓸ ꓫꓵꓼ ꓚꓰꓼ ꓠꓯ ꓟ ꓶꓻ ꓙꓳ ꓡ ꓡꓳ= ꓙꓼ ꓶ ꓤ ꓣꓱꓽ ꓢꓲꓸ ꓶ ꓡꓯꓼ ꓬꓰ ꓗꓷ ꓟ ꓦꓬꓼ ꓠꓬꓲ ꓗꓪ ꓓꓳ ꓡ ꓟ ꓫꓵꓽ ꓪꓴ ꓔꓯ 20 ꓦ ꓜꓴ ꓘꓳꓼ ꓗꓪ ꓚ ꓟꓲꓽ ꓫꓵꓼ ꓚꓰꓼ ꓢꓲꓸ ꓒꓶꓻ ꓫꓬꓽ ꓡꓰ ꓝꓲ ꓟ ꓡꓰ ꓐꓰ꓾ ꓮ ꓟꓶ ꓧꓪꓽ ꓖꓳ ꓓꓱꓽ ꓐꓰ ꓙꓼ ꓢꓷꓸ ꓠꓲꓹ ꓬꓲ ꓫꓵ ꓬꓲꓸ ꓙꓰ ꓪꓴꓽ ꓟꓴ ꓡ ꓟ ꓤꓶ ꓦꓬꓼ ꓠꓬꓲ ꓐꓱ ꓶ ꓧꓳꓽ ꓪꓴꓸ ꓟꓴ ꓚꓱꓹ ꓚ ꓟꓲꓽ ꓬꓲꓸ ꓫꓵꓼ꓾ ꓓꓵꓽ ꓙ ꓚꓱꓹ ꓬꓲꓸ ꓫꓵꓼ ꓣꓱꓽ ꓬꓯꓼ ꓡ ꓡꓳ= ꓖꓳ ꓟ ꓑꓶꓸ ꓓꓴ ꓟꓶ ꓤ ꓟꓽ ꓥ ꓕꓯ ꓡ ꓞꓳ ꓐꓴ ꓠꓯꓸꓼ ꓗꓪ ꓟ ꓠꓲꓹ ꓟ ꓔꓯ ꓧꓪ ꓟꓰꓹ ꓠꓬꓲ ꓢꓲ꓾ ꓞꓳ ꓚꓱꓹ ꓪꓽ ꓚꓱꓹ꓾ ꓗꓴꓷꓼ ꓚꓱꓹ ꓐꓱ ꓶ ꓖꓴ ꓟꓳꓸ ꓖꓶ ꓓꓴ ꓚ ꓟꓲꓽ ꓚꓰꓼ ꓓꓳ ꓡ ꓠ ꓗ ꓡꓳ= 1930 ꓘꓳꓼ ꓐꓰ꓾ 1960 ꓘꓳꓼ ꓗꓪ ꓔꓳꓹ ꓜꓳ ꓗꓷ ꓟ ꓘꓶ ꓡꓶꓽ ꓓꓴ ꓬꓲꓸ ꓫꓵ ꓬꓲ ꓙꓰ ꓔꓯ ꓘꓱ ꓙ ꓙꓰ ꓐ ꓡ ꓟ ꓡꓰ ꓐꓰ꓾ ꓠꓬꓲꓸ ꓠꓬꓲ ꓘꓶ ꓡꓶꓽ ꓓꓴ ꓐꓰ ꓙꓲ ꓣꓴ ꓓꓴ ꓗꓪ ꓐꓰ ꓡꓲ-ꓐ-ꓬꓯ ꓓꓵꓽ ꓙ ꓚꓱꓹ ꓠꓬ ꓘꓱ ꓙ ꓙꓰ ꓐ ꓡ ꓥꓳ ꓪ? ꓧꓶꓸ ꓕꓯ ꓟ ꓕꓯ ꓢꓲ ꓟꓬꓽ ꓠꓬꓲ ꓙꓲ ꓟ ꓐꓰ ꓦ ꓡꓱ ꓐꓳ ꓓ ꓟ ꓒꓬꓱꓼ ꓡ ꓥꓳ ꓪ? ꓮ ꓠꓱ ꓠꓱ ꓗꓪ ꓐꓰ ꓞꓳ ꓫꓵꓽ ꓠꓲꓹ ꓟ ꓒ ꓐꓲ ꓙꓳ ꓢꓴ ꓐꓴ ꓐꓰ꓾ ꓦ ꓡꓱ ꓚꓱꓹ ꓬꓲꓸ ꓠꓸ ꓟꓶꓽ ꓙꓲꓽ ꓢꓯꓼ ꓙꓳ ꓢꓴ ꓐꓴ ꓐꓱ ꓶ ꓪꓽ ꓓ ꓟ ꓒꓶꓻ ꓫꓬꓽ ꓚꓱꓹ ꓒꓬꓱꓼ ꓡ ꓥꓳ ꓪ? ꓬꓲꓸ ꓪ ꓔꓯ ꓠꓲꓹ ꓘꓪ ꓫꓵ ꓡꓰ ꓗꓪ ꓛꓲ ꓧꓳꓽ ꓪꓴꓸ ꓟꓴ ꓐ ꓡ ꓥꓳ ꓪ? ꓟꓽ ꓥ ꓢꓲ꓾ ꓮ ꓠꓱ ꓠꓱ ꓗꓪ ꓟ ꓞꓳ ꓫꓵꓽ ꓟꓸ ꓟꓲꓽ꓾ ꓗꓴꓷꓼ ꓟꓸ ꓟꓲꓽ ꓐꓰ꓾ ꓠꓲꓽ ꓢꓲꓺ ꓦ ꓡꓱ ꓚꓱꓹ ꓮ ꓙꓵꓽ ꓔꓯ ꓡꓳꓺ ꓗꓷ ꓢꓲ꓾ ꓓꓵꓽ ꓙ ꓚꓱꓹ ꓚ ꓟꓲꓽ ꓬꓲꓸ ꓫꓵꓼ ꓕꓲ ꓟ ꓚꓰꓼ ꓣꓴ ꓠꓹ ꓟ ꓬꓲꓸ ꓙꓵꓹ ꓛꓲ ꓥꓳ ꓪ?
ꓠꓬꓲꓸ ꓠꓬꓲ ꓗꓪ ꓛꓲ ꓕꓱ ꓡꓱꓳ ꓫꓵꓽ ꓠꓻ ꓠꓬꓲ ꓘꓶꓽ ꓐꓱ ꓶ ꓡ ꓞꓳ ꓮ ꓟꓬꓹ ꓠꓵ ꓓ ꓟ ꓐꓰ꓾ ꓓꓽ ꓔꓳꓹ ꓡ ꓟ ꓒꓶꓻ ꓘꓶꓽ ꓟꓽ ꓙꓳ ꓢꓰ= ꓣꓳ ꓠꓬ ꓓꓵꓽ ꓙ ꓚꓱꓹ ꓚ ꓟꓲꓽ ꓬꓲꓸ ꓡꓵꓺ ꓔꓯ ꓦ ꓡꓱ ꓟꓽ ꓐꓳ ꓗꓷ ꓡꓰ ꓢꓲ꓾ ꓚ ꓟꓲꓽ ꓬꓲꓸ ꓫꓵꓼ ꓥ ꓟꓲ ꓟꓽ ꓓꓳ ꓡ ꓢꓰꓽ ꓟ ꓠꓬꓲꓽ ꓗꓴꓸ ꓚꓸ ꓗꓪ " ꓬꓲꓸ ꓖꓳꓽ" ꓔꓯ ꓔꓳꓹ ꓜꓳꓽ ꓔꓬ ꓟ ꓦꓬꓼ ꓠꓬꓲ ꓥ ꓡꓳ= ꓝꓸ ꓢꓲꓸ ꓮ ꓫꓵꓽ ꓒꓬꓱꓼ ꓡ ꓓꓴ ꓥ ꓡ? ꓬꓲꓸ ꓪꓴꓸ ꓬꓰ ꓠ ꓗꓹ ꓟ ꓕꓲ ꓫꓵꓽ ꓠꓬ꓾ ꓟꓲ ꓠꓯ ꓠꓬ ꓐꓬ ꓡꓰ ꓝꓲꓸ ꓛꓲꓳ ꓐꓰ ꓚꓺ ꓒꓬꓱ ꓔꓬ ꓟ ꓔꓯ ꓠꓽ ꓩꓴ ꓢꓲ꓾ ꓟꓲ ꓠꓯ ꓠꓬ ꓓꓵꓽ ꓙ ꓪꓴꓽ ꓧꓶ ꓓꓴ ꓕꓲ ꓟ ꓥ ꓡꓳ ꓐꓰ ꓘꓳ ꓣꓴ ꓠꓯ ꓡꓳ= ꓙꓳ ꓦꓰꓸ ꓡꓰ ꓟ ꓠꓬ ꓟꓲ ꓠꓯ ꓠꓬ ꓚꓵ ꓚꓵ ꓐꓬ ꓡꓰ ꓓꓴ ꓥꓳ ꓐꓰ ꓔꓳꓼ ꓔꓳꓼ ꓠꓰ ꓢꓷꓸ ꓡꓳ ꓐꓰ ꓚꓲ ꓛꓬ ꓔꓱꓹ ꓚꓲ ꓛꓬ ꓘꓶꓽ ꓘꓹ ꓠꓲꓹ ꓗꓪ ꓐꓰ ꓡ ꓡꓳ= ꓓꓵ ꓙ ꓪꓴꓽ ꓧꓶ ꓓꓴ ꓥ ꓡꓳ꓾ ꓐꓰ ꓐꓯ ꓠꓬ ꓚꓲ ꓛꓬ ꓘꓶꓽ ꓘꓹ ꓠꓲꓹ ꓟꓽ ꓙꓳ ꓡꓰꓳ= ꓮ ꓡꓲ ꓐꓰ ꓒꓶꓻ ꓫꓬꓽ ꓡꓰ ꓝꓲ ꓠꓹ ꓟ ꓔꓯ ꓟꓳꓸ ꓓꓵꓽ ꓙ ꓪꓴꓸ ꓔꓴ ꓡ ꓝꓲ ꓡꓳ= " ꓟꓲ ꓠꓯ ꓐꓬ ꓡꓰꓳ" ꓐꓰ ꓘꓴ ꓔꓴ ꓢꓰꓽ ꓡꓲꓽ ꓡ ꓕꓯ꓾ "ꓟꓽ ꓥ ꓢꓲꓽ= ꓮ ꓟꓶ ꓟꓲ ꓠꓯ ꓕꓱ ꓟ ꓮ ꓡꓲ ꓗꓷ ꓡꓰ ꓔꓳꓼ ꓡꓲꓸ ꓟꓽ ꓢꓷꓸ" ꓐꓰ ꓚꓲ ꓛꓬ ꓔꓱꓸ ꓚꓲꓸ ꓛꓬ ꓡꓯꓽ ꓔꓯꓽ ꓠꓬ ꓟꓬꓽ ꓠꓬꓲ ꓙꓲ ꓡꓳ=
ꓮ ꓟꓶ ꓡ ꓠꓹ ꓟ ꓕꓳ ꓶ ꓗꓪ ꓠꓬ꓾ ꓣꓳ ꓮ ꓙꓵꓽ ꓠꓬ ꓟꓲ ꓠꓯ ꓗꓪ ꓮ ꓡꓲ ꓐꓰ ꓓꓵꓽ ꓙ ꓪꓴꓽ ꓧꓶ ꓓꓴ ꓔꓳꓹ ꓜꓳ ꓔꓬ ꓟ ꓐꓰ꓾ ꓕꓱ ꓟ ꓔꓯ ꓮ ꓡꓲ ꓒꓶꓻ ꓫꓬꓽ ꓡꓰ ꓝꓲ ꓠꓹ ꓟ ꓐꓳ ꓙꓰ ꓓꓴ ꓥꓳ= ꓟꓲ ꓠꓯ ꓡ ꓞꓳ ꓐꓴ ꓔꓳꓹ ꓜꓳꓽ ꓔꓬ ꓟ ꓫꓵꓽ ꓪꓴ ꓔꓯ ꓟꓽ ꓒꓶꓻ ꓢꓰꓽ ꓕꓯ꓾ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰ ꓮ ꓡꓲꓳ ꓫꓵꓽ ꓥ ꓟ꓾ ꓣꓳ ꓔꓯ ꓮ ꓡꓲ ꓒꓬꓱꓼ ꓡ ꓝꓲ ꓐ ꓡ ꓟ ꓔꓯ ꓧꓶꓸ ꓕꓯ ꓢꓷꓸ ꓠꓯ ꓡꓳ= ꓮ ꓟꓶ ꓗꓪ ꓛꓲ ꓢꓷꓸ ꓠꓲꓹ ꓬꓲꓸ ꓫꓵ ꓬꓲ ꓙꓰ ꓠꓬ ꓤ ꓘꓶꓽ ꓟꓯꓻ ꓔꓸ ꓟ ꓕꓲ ꓔꓳꓸ ꓗꓪ ꓛꓲ ꓔꓬ ꓢꓲ꓾ ꓡꓲ-ꓐ-ꓬꓯ ꓚ ꓟꓲꓽ ꓗꓪ ꓮ ꓡꓲ ꓐꓰ ꓘꓶ ꓡꓶꓽ ꓗꓽ ꓔꓸ ꓓꓴ ꓒꓬꓱꓼ ꓡ ꓔꓬ ꓟ ꓔꓯ ꓡꓳꓸ ꓟꓳ ꓪ ꓓ ꓢꓰꓽ ꓡꓳ= ꓐ-ꓟꓲ-ꓖ꓾ ꓲ-ꓢꓲ-ꓔ-ꓐꓴ꓾ ꓢꓲꓼ-ꓑꓲ-ꓔ-ꓢꓲ-ꓐꓼ ꓐꓰ꓾ ꓟꓳ-ꓐꓮꓲꓹ ꓗꓪ ꓟ ꓡ ꓞꓳ ꓐꓴ ꓠꓬ꓾ ꓪꓴꓸ ꓠꓷꓸ ꓚꓬꓼ ꓚꓰꓼ ꓓꓳ ꓡ ꓟ ꓗꓪ ꓐꓰ ꓬꓲꓸ ꓪ ꓤꓶ ꓗꓪ ꓮ ꓡꓲ ꓒꓬꓱꓼ ꓡ ꓔꓬ ꓟ ꓔꓯ ꓢꓷꓸ ꓥꓳ ꓐꓯ ꓥ ꓟꓲ꓾ ꓮ ꓔꓲꓸ ꓤꓼ ꓡꓰ ꓢꓷꓸ ꓟ ꓥ ꓢꓰꓽ ꓡꓳ= ꓖꓳ ꓡꓱ ꓥ ꓟꓲ ꓢꓷꓸ ꓠꓲꓹ ꓕꓱ ꓡꓱꓳ ꓫꓵꓽ ꓠꓬ ꓡ ꓠꓹ ꓟ 10 ꓘꓳ ꓖꓼ ꓡꓯꓼ ꓖꓼ ꓙꓲ ꓗꓪ ꓮ ꓘꓶꓸ ꓪꓴꓽ ꓟꓴ ꓡ ꓢꓲ꓾ ꓟꓲ ꓠꓯ ꓡ ꓞꓳ ꓐꓴ ꓕꓲ ꓧꓪꓸ ꓡꓲꓸ ꓟꓽ ꓔꓳꓹ ꓜꓳꓽ ꓠꓬꓲ ꓟ ꓒꓬꓱꓼ ꓡ ꓥꓳ= ꓟꓲ ꓠꓯ ꓡ ꓞꓳ ꓐꓴ ꓦ ꓡꓱ ꓐꓳ ꓔꓬ ꓟ ꓓꓵꓽ ꓙ ꓚꓱꓹ ꓚ ꓟꓲꓽ ꓮ ꓡꓲ ꓕꓲ ꓚꓱꓹ ꓥ ꓟꓲ꓾ ꓪꓴꓸ ꓠꓷꓸ ꓚꓬꓼ ꓢꓷꓸ ꓠꓲꓹ (ꓮꓲ) ꓕꓱ ꓟ ꓔꓯ ꓜꓲ ꓡꓯ ꓘꓳ ꓗꓸ ꓠꓯꓸ ꓦ ꓡꓱ ꓐꓳ ꓓ/ ꓟꓽ ꓓ ꓢꓷꓸ ꓡ ꓓꓴ ꓥꓳ= ꓞꓳ ꓫꓵꓽ ꓔꓯ ꓠꓲꓹ ꓠꓵ ꓟ ꓓꓵꓽ ꓙ ꓚꓱꓹ꓾ ꓲ-ꓢꓲ-ꓡ ꓦ ꓡꓱ ꓚꓱꓹ (ꓥ ꓠꓬ) ꓠꓱꓸ ꓐꓯꓼ ꓮ ꓫꓵꓽ ꓦ ꓡꓱ ꓚꓱꓹ ꓥ ꓟꓲ꓾ ꓡꓲ-ꓐ-ꓬꓯ ꓚ ꓟꓲꓽ ꓚꓱꓹ ꓥ ꓟꓲ꓾ 2050 ꓘꓳꓼ ꓗꓪ ꓟ ꓟꓲ ꓠꓯ ꓦꓬꓼ ꓠꓬꓲ ꓔꓯ ꓗꓪꓼ ꓠꓲꓹ ꓫꓵ ꓠꓬ꓾ ꓪꓴꓸ ꓠꓷꓸ ꓚꓬꓼ ꓢꓷꓸ ꓠꓲꓹ꓾ ꓢꓷꓸ ꓠꓲꓹ ꓬꓲ ꓫꓵ ꓬꓲꓸ ꓙꓰ ꓢꓪꓼ ꓚꓱꓹ (ꓓꓮꓔꓮ ꓮꓡꓲꓖꓳꓣꓲꓔꓧꓬꓟ) ꓐꓰ꓾ ꓧꓪ ꓖꓳ ꓓꓱꓽ ꓚꓰꓼ ꓜꓯ ꓢꓷꓸ ꓠꓲꓹ ꓗꓪ ꓬꓲꓸ ꓪ ꓓꓵꓽ ꓙ ꓚꓱꓹ ꓔꓯ ꓮ ꓡꓲ ꓐꓰ ꓜꓯꓻ ꓜꓳꓽ ꓡꓰ ꓝꓲ ꓠꓯ ꓡꓳ=
ꓕꓱ ꓡꓱꓳ ꓫꓵꓽ ꓢꓷꓸ ꓠꓲꓹ ꓮ ꓡꓲ ꓥ ꓟ ꓐꓰ꓾ ꓡ ꓞꓳ ꓐꓴ ꓤꓶ ꓗꓪ ꓮ ꓡꓲ ꓘꓶ ꓡꓶꓽ ꓡ ꓗꓴꓸ ꓟ ꓔꓯ ꓓꓵꓽ ꓙ ꓧꓪꓸ ꓛꓲ ꓡ ꓠꓹ ꓟ꓾ ꓟꓬꓱꓽ ꓬꓰ ꓚꓱꓹ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓖꓪ ꓙꓱ ꓐꓯ ꓟꓳꓸ ꓖꓶ ꓠꓲꓹ ꓫꓵ ꓡꓳ= 2015 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓕꓲ ꓟꓲ ꓠꓯ ꓗꓪ ꓟ ꓢꓷꓸ ꓠꓲꓹ ꓢꓳ ꓢꓴ ꓐꓴ꓾ ꓗꓴꓷꓼ ꓙꓵꓽ ꓢꓴ ꓐꓴ꓾ ꓶ ꓡꓯꓼ ꓟꓴ ꓢꓴ ꓐꓴ ꓐꓰ꓾ ꓕꓲ ꓚꓱꓹ ꓚꓱꓹ ꓗꓪ ꓠꓲꓹ ꓡꓱ ꓢꓴ ꓐꓴ ꓔꓯ ꓜꓲ ꓡꓯ ꓘꓳ ꓢꓲꓸ ꓟꓲ ꓠꓯ ꓡ ꓞꓳ ꓐꓴ ꓔꓳꓹ ꓜꓳꓽ ꓔꓬ ꓟ ꓫꓸ ꓘꓶ ꓓꓴ ꓮ ꓫꓵꓽ ꓙꓳ ꓟ ꓖꓪ ꓙꓱ ꓠꓬꓲꓳ= ꓪꓴꓸ ꓠꓷꓸ ꓚꓬꓼ (ꓮꓲ)꓾ ꓪꓴꓽ ꓓꓰ ꓟ ꓢꓷꓸ ꓠꓲꓹ ꓚꓱꓹ ꓞꓳꓽ ꓦꓲ ꓐꓰ ꓙ ꓖꓴ ꓚꓱꓹ (ꓟꓰꓖꓮ ꓓꓮꓔꓮ ꓮꓠꓓ ꓮꓡꓲꓖꓳꓣꓲꓔꓧꓬꓟ) ꓐꓰ꓾ ꓧꓪ ꓖꓳ ꓓꓱꓽ ꓝꓸ ꓜꓯ ꓢꓷꓸ ꓠꓲꓹ ꓔꓯ ꓖꓪ ꓙꓱ ꓡꓯ ꓘꓳ ꓕꓯ ꓬꓲꓸ ꓪ ꓐꓴ ꓡ ꓟ ꓑꓶꓸ ꓓꓴ꓾ "ꓟꓬꓱꓽ ꓬꓰ ꓚꓱꓹ" ꓐꓯ ꓟ ꓠꓲꓽ ꓠꓯ ꓞꓲꓼ ꓚꓱꓹ ꓗꓪ ꓐꓰ ꓬꓲꓸ ꓪ ꓔꓯ ꓢꓰꓸ ꓮ ꓢꓸ ꓡ ꓝꓲ ꓗꓷꓳ= ꓙꓼ ꓪꓴꓸ ꓠꓷꓸ ꓢꓷꓸ ꓠꓲꓹ ꓪꓴꓽ ꓟꓴ ꓡ ꓟ ꓗꓪ ꓐꓰ ꓟꓶ ꓤ ꓟꓽ ꓥ ꓕꓯ ꓡ ꓞꓳ ꓢꓯꓹ ꓢꓯꓹ ꓪꓹ ꓪꓹ ꓠꓬ ꓟꓬꓱꓽ ꓟꓽ ꓙꓳ ꓗꓷ ꓡꓰ ꓡ ꓗꓴꓸ ꓡꓳ= ꓖꓳ ꓕꓯ ꓞꓳ ꓚꓱꓹ ꓪꓽ ꓚꓱꓹ꓾ ꓡꓲ ꓒꓰꓼ ꓚꓱꓹ꓾ ꓗꓴꓷꓼ ꓫꓵꓽ ꓪꓴ ꓮ ꓙꓵꓽ ꓠꓬ ꓛꓽ ꓐꓲꓽ ꓗꓴ ꓕꓴꓽ ꓢꓴ ꓙꓰ ꓖꓴ ꓢꓲ꓾ ꓮ ꓡꓲꓳ ꓫꓵꓽ ꓓꓵꓽ ꓙ ꓚꓱꓹ ꓐꓰ ꓧꓳꓽ ꓪꓴꓸ ꓟꓴ ꓚꓱꓹ ꓚ ꓟꓲꓽ ꓥ ꓟꓲ ꓟꓲ ꓠꓯ ꓡ ꓞꓳ ꓔꓯ ꓧꓳꓽ ꓟꓽ ꓐ ꓡ꓾ ꓢꓲꓽ ꓘꓪ ꓓꓰꓼ ꓡꓰ ꓝꓲ ꓟꓽ ꓐ ꓡ ꓟ ꓦꓬꓼ ꓠꓬꓲ ꓛꓲ ꓡ ꓥꓳ= ꓪꓴꓽ ꓟꓴ ꓡ ꓔꓬ ꓟ ꓙꓼ ꓪꓴꓸ ꓠꓷꓸ ꓐꓰ ꓧꓪ ꓖꓳ ꓓꓱꓽ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰ ꓐꓰ꓾ ꓓꓵꓽ ꓙ ꓚꓱꓹ ꓚ ꓟꓲꓽ ꓐꓴ ꓠꓬ ꓚꓲ ꓛꓬ ꓔꓯ ꓮ ꓫꓵꓽ ꓗꓪꓽ ꓫꓵꓽ ꓓꓴ ꓟꓽ ꓙꓳ ꓟ ꓡꓰ ꓐꓰ ꓗꓹ ꓥ ꓟꓲ꓾ ꓕꓱ ꓟ ꓑꓶꓸ ꓓꓴ ꓡ ꓞꓳ ꓮ ꓟꓬꓹ ꓠꓬ ꓟꓬꓱꓽ ꓟꓽ ꓙꓳ ꓒꓬꓱꓼ ꓡ ꓗꓴꓸ ꓡꓳ= ꓟꓬꓱꓽ ꓟꓽ ꓙꓳ ꓠꓬ ꓜꓽ ꓓꓴ ꓟꓽ ꓙꓳ ꓒꓬꓱꓼ ꓡ ꓥꓳ= ꓟꓬꓱꓽ ꓟꓽ ꓙꓳ꓾ ꓜꓽ ꓓꓴ ꓟꓽ ꓙꓳ ꓟ ꓦꓬꓼ ꓠꓬꓲ ꓗꓪ ꓘꓰꓹ ꓕꓯꓼ ꓡ ꓔꓬ ꓟ ꓔꓯ ꓮ ꓫꓵꓽ ꓡꓲꓸ ꓟꓽ ꓔꓸ ꓪ ꓡꓰ ꓐꓰ ꓮ ꓟ ꓔꓬ ꓐ ꓡ ꓢꓰꓽ?=
Like this:
Like Loading...
