2020 ꓘꓳꓼ ꓢꓲꓻ ꓣꓴ ꓑꓮꓲ ꓗꓪ ꓟꓯꓹ ꓛꓬꓽ ꓙꓵꓽ ꓢꓴ ꓐꓴ ꓔꓯ “ꓥꓪ ꓠꓴ ꓟꓽ ꓜꓳꓽ ꓟꓽ ꓔꓱꓹ ꓬꓰ ꓥꓳꓽ ꓡꓰꓳ” ꓐꓰ ꓡꓳ ꓒꓱ 330 ꓗꓪ ꓟ ꓐꓯ ꓟꓴ ꓘꓶꓽ ꓢꓲꓽ ꓒ ꓐꓴ ꓡꓰ ꓟꓽ ꓓ ꓟꓽ ꓢ ꓣꓷꓠꓸ ꓝꓲ ꓔꓬ ꓡꓳ꓿
“ꓥꓪ ꓠꓴ ꓕꓲ ꓜꓴ ꓟ ꓔꓯ ꓥꓳꓽ ꓡꓰꓳ꓾ ꓟꓽ ꓜꓳ ꓟꓽ ꓔꓱꓹ ꓬꓰ ꓗꓷꓳ ꓣꓷꓠꓸ ꓝꓲ ꓢꓲꓸ ꓫꓵꓽ ꓘꓶꓽ ꓖꓴ ꓗꓪ ꓐꓰ ꓕꓲ ꓣꓳ 10ꓹ000 ꓒꓯꓼ ꓐꓶ ꓝꓲ ꓓꓴ ꓐꓯ ꓩꓴ ꓡ ꓡꓳ꓿ ꓕꓲ ꓐꓱ ꓠꓽ ꓘꓰꓹ ꓠꓲꓹ ꓟꓽ ꓫꓵ ꓠꓰ ꓐꓶ ꓓꓳ ꓢꓴ ꓙꓳ ꓡꓳ꓿ ꓥꓪ ꓠꓴ ꓠꓽ ꓣꓳ ꓟꓽ ꓜꓳ ꓟꓽ ꓔꓱꓹ ꓟꓽ ꓬꓰ ꓔꓸꓳ ꓫꓵꓽ ꓕꓲ ꓟ ꓔꓯ ꓬꓰ ꓗꓷꓳ ꓐꓯ ꓟꓴ ꓟꓽ ꓢꓱ” ꓐꓯ ꓢꓲꓸ ꓢꓯꓼ ꓟꓬ ꓐꓱ ꓶ ꓟꓵꓽ ꓘꓶꓽ ꓗꓪ ꓘꓰꓹ ꓑꓬ ꓔꓬ ꓟ 2020 ꓘꓳꓼ ꓕꓯꓽ ꓟꓯꓹ ꓢꓲꓻ ꓗꓪ ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓡꓰꓽ ꓐꓯˍ ꓡꓳ꓿
ꓕꓲ ꓗꓴꓷꓼ ꓡꓱꓸꓼ ꓗꓪ ꓟꓵꓽ ꓘꓹ ꓫꓴ 73 ꓫꓴ꓾ ꓡꓳ ꓒꓱ 330 ꓗꓪ ꓟꓬꓱꓽ ꓬꓰ ꓗꓷ ꓢꓴ ꓟꓯꓹ ꓢꓲꓻ ꓣꓴ ꓑꓮꓲ ꓙꓵꓽ ꓢꓴ 3000 ꓣꓳ ꓟꓽ ꓞꓲ ꓔꓯ ꓡꓳ ꓒꓱ ꓗꓪ ꓟ ꓐꓯ ꓟꓴ ꓘꓶꓽ ꓢꓲꓽ ꓒꓽ ꓐꓴ ꓡꓰꓽ “ꓥꓪ ꓠꓴ ꓟꓽ ꓜꓳ ꓟꓽ ꓔꓱꓹ ꓬꓰ ꓗꓷꓳ” ꓐꓰ ꓟꓽ ꓓ ꓟꓽ ꓢ ꓣꓷꓠꓸ ꓝꓲˍ ꓟ ꓔꓯ 2022 ꓘꓳꓼ 2 ꓦ ꓟ ꓘꓴꓽ ꓗꓪ ꓮ ꓘꓶꓸ ꓢꓯꓼ ꓕꓵꓼ ꓡ ꓔꓬ ꓡꓳ꓿
2020 ꓢꓲꓻ ꓣꓴ ꓑꓮꓲ ꓗꓪ ꓡꓳꓸ ꓠꓬꓲ ꓢꓴ ꓜꓴ ꓐꓴ ꓮ ꓟꓬꓹ ꓡꓰ ꓢꓲꓻ ꓣꓴ ꓑꓮꓲ ꓕꓱ ꓟ ꓠꓬ ꓜꓳ ꓜꓳꓽ ꓔꓱꓹ ꓔꓱꓹ (free and fair election) ꓕꓲ ꓟ ꓥ ꓡꓳ ꓐꓰ ꓐꓯ ꓔꓸ ꓢꓲꓸ ꓠꓡꓓ ꓗꓴꓷꓼ ꓟꓬꓱꓽ ꓬꓰ ꓜꓴ ꓑ-ꓔꓲ ꓧꓪꓸ ꓡꓰˍ ꓟ ꓥꓳ꓿
ꓖꓳ ꓡꓱ ꓥ ꓟꓲ 2021 ꓘꓳꓼ 2 ꓦ 1 ꓠꓬꓲ ꓕꓯꓽ ꓟꓬ-ꓟ ꓟꓯꓼ ꓡꓰ ꓗꓴꓷꓼ ꓙꓵꓽ ꓪ ꓣꓴ ꓙꓰꓳ꓿
ꓖꓳ ꓡꓱ ꓙꓵꓽ ꓪ ꓣꓴ ꓔꓸ ꓟ ꓔꓯ ꓬꓲꓸ ꓑꓶꓸ ꓕꓶꓻ ꓡꓰ ꓝꓲ ꓠꓹ ꓟ ꓐꓱ ꓶ ꓟꓽ ꓓ ꓟꓽ ꓢ ꓬꓲꓸ ꓑꓶꓸ ꓧꓪꓺ꓾ ꓟꓽ ꓓ ꓟꓽ ꓢ ꓣꓷꓠꓸ ꓝꓲ ꓔꓬ ꓟ ꓥꓳ ꓐꓰ꓾ ꓗꓴꓷꓼ ꓙ ꓖꓴ ꓢꓪꓼ ꓢꓴ ꓡꓰ ꓢꓪꓼ ꓔꓬ ꓡꓳ꓿
