ꓴnited ꓠations- ꓟꓲ ꓠꓯ ꓗꓴꓷꓼ ꓜꓴ ꓗꓪ ꓦꓰꓼ ꓔꓬ ꓟ ꓟꓬ-ꓟ ꓝꓲ ꓓꓴ ꓓꓽ ꓟ ꓚꓳ-ꓟꓳꓹ-ꓕꓴꓸ (Kyaw Moe Tun) ꓔꓯ ꓘꓶ ꓡꓶꓽ ꓢꓴ ꓙꓳ ꓡ ꓠꓬꓲ ꓬꓲꓸ ꓐꓱ ꓶ ꓟꓯꓼ ꓡꓳꓸ ꓙ ꓔꓬ ꓡꓳ꓿
ꓕꓱ ꓟ ꓠꓬ ꓡ ꓠꓹ ꓟ 2021 ꓘꓳꓼ꓾ 9 ꓦ ꓘꓴꓽ ꓟ ꓗꓪ ꓬꓲꓸ ꓠꓬꓲꓺ ꓖꓴ ꓔꓯ ꓟꓬ-ꓟ ꓟꓯꓼ ꓕꓲ ꓒꓳꓹ ꓗꓪ ꓐꓰ ꓦꓴ ꓡ ꓔꓬ ꓟ ꓔꓯ ꓟꓲ ꓠꓯ ꓗꓴꓷꓼ ꓜꓴ ꓗꓪ ꓐꓰ ꓫꓵꓽ ꓘꓶꓽ ꓖꓶ ꓙꓵꓹ ꓠꓶꓽ ꓡ ꓔꓬ ꓟ ꓑꓶꓸ ꓓꓴ ꓔꓯꓺ ꓡꓯ ꓘꓳ꓾ ꓠꓲꓹ ꓖꓳꓼ ꓓꓴ ꓬꓰ ꓡ ꓟ ꓥ ꓡꓳ꓿
ꓗꓳꓸ ꓗꓷ ꓟ 2 ꓦ 1 ꓠꓬꓲ ꓕꓯꓽ ꓟꓯꓼ ꓐꓴ ꓡꓰ ꓑ ꓫꓬ ꓙꓵꓽ ꓪ ꓦꓴ ꓙꓰ ꓢꓲ꓾ ꓚꓳ-ꓟꓳꓹ-ꓕꓴꓸ ꓔꓯ ꓥ ꓟꓲ ꓟꓬꓱꓽ ꓗꓪ ꓐꓰ ꓠꓽ ꓗꓷ ꓟ ꓕꓳ ꓶ ꓓꓳ ꓡ ꓡꓳ꓿ ꓮ ꓡꓲꓳ ꓐꓯ ꓠꓬ ꓚꓳ-ꓟꓳꓹ-ꓕꓴꓸ ꓠꓬ ꓟꓬ-ꓟ ꓑ ꓫꓬ ꓐꓰ꓾ ꓑ ꓫꓬ ꓡꓰ ꓢꓲꓻ ꓣꓴ ꓔꓸ ꓟ ꓚꓣꓑꓧ ꓕꓲ ꓛꓱꓽ ꓗꓪ ꓦꓰꓼ ꓗꓷ ꓠꓬꓲ꓾ ꓟꓯꓼ ꓐꓴ ꓮ ꓘꓶꓸ ꓠꓲꓹ ꓢꓲꓼ ꓫꓸ ꓔꓳ ꓡꓰ ꓢꓲ꓾ ꓬꓲ ꓔꓯ ꓗꓴꓷꓼ ꓒꓳꓹ ꓔꓳꓹ ꓢꓴ ꓐꓯ ꓢꓲ ꓐꓯ ꓟꓴ ꓩꓴ ꓔꓸ ꓡꓳ꓿ ꓬꓲꓸ ꓔꓯ ꓟꓬ-ꓟ ꓗꓴꓷꓼ ꓗꓪ ꓡꓽ ꓡ ꓝꓲ ꓠꓹ ꓟ ꓴꓢꓮ ꓔꓯ ꓓꓰꓽ ꓕꓳ ꓶ ꓥ ꓟꓲ ꓟꓯꓼ ꓕꓲ ꓛꓱꓽ ꓗꓪ ꓟ ꓪꓳ-ꓠꓼ ꓟꓮꓳ-ꓡꓱ (Wanna Maung Lwin) ꓡꓰ ꓐꓳ ꓩꓴ ꓔꓸ ꓥ ꓟꓲ ꓴꓢ ꓡꓰꓽ ꓟꓽ ꓓ ꓔꓳꓹ ꓖꓶ ꓡ꓿ ꓮ ꓟꓶ ꓗꓪ ꓛꓲ ꓟꓯꓼ ꓕꓲ ꓛꓱ ꓗꓪ ꓐꓰ ꓝꓲ ꓩꓴ ꓡ ꓢꓴ ꓔꓴ-ꓣꓲ-ꓮꓳꓽ (Thurein Aung) ꓔꓯ ꓟꓽ ꓘꓳ ꓣꓴ ꓣꓴ꓾ ꓑ ꓫꓬ ꓕꓲ ꓛꓱꓽ ꓗꓪ ꓦꓰꓼ ꓢꓴ ꓝꓲ ꓓꓴ ꓓꓽ ꓟ ꓚꓳ-ꓟꓳꓹ-ꓕꓴꓸ ꓔꓯ ꓡꓰ ꓟꓲ ꓠꓯ ꓗꓴꓷꓼ ꓜꓴ ꓖꓪ ꓙꓱ ꓜꓲꓼ ꓓꓴ ꓗꓪ ꓔꓺ ꓝꓲ꓾ ꓫꓸ ꓕꓱ ꓝꓲˍ ꓡꓳ꓿
ꓚꓣꓑꓧ ꓡꓰ ꓒꓴ ꓔꓸ ꓟ ꓠꓴꓖ ꓗꓴꓷꓼ ꓙꓵꓽ ꓜꓴ ꓙꓳ ꓡ ꓗꓸ ꓠꓯꓸ ꓟꓯꓼ ꓗꓳ-ꓢꓰ ꓥ ꓟꓲ ꓦꓲ ꓡꓳꓸ ꓗꓴꓷꓼ ꓙꓵꓽ ꓜꓴ ꓐꓯ ꓢꓲꓸ 8 ꓦ 1 ꓠꓬꓲ ꓕꓯ ꓒꓴ ꓗꓷ ꓡꓳ꓿ ꓖꓳ ꓡꓱ ꓢꓲ ꓟꓲ ꓠꓯ ꓗꓴꓷꓼ ꓜꓴ ꓗꓪ ꓠꓬꓲ ꓖꓴ ꓦꓴ ꓚꓱꓹ ꓔꓯ ꓮ ꓘꓶꓸ ꓢꓯꓼ ꓩꓴ ꓡ ꓡꓳ꓿ ꓕꓱ ꓡꓱ ꓟꓬ-ꓟ ꓐꓱ ꓶ ꓗꓴꓷꓼ ꓙꓵꓽ ꓜꓴ 2 ꓟ ꓔꓯꓺ ꓡꓯ ꓘꓳ ꓡ ꓟ ꓑꓶꓸ ꓓꓴ ꓡ ꓠꓹ ꓟ 9 ꓦ ꓘꓴꓽ ꓗꓪ꓾ ꓟꓲ ꓠꓯ ꓗꓴꓷꓼ ꓜꓴ ꓜꓲꓼ ꓓꓴ ꓬꓰ ꓢꓲꓸ ꓮ ꓡꓲ ꓕꓲ ꓜꓴ ꓠꓬ ꓟꓬ-ꓟ ꓗꓴꓷꓼ ꓐꓱ ꓶ ꓬꓲꓸ ꓛꓲ ꓦꓰꓼ ꓢꓴ ꓬꓰ ꓙꓲꓽ ꓙꓳ ꓟ ꓢꓪꓼ ꓠꓬꓲ ꓗꓳ-ꓟꓲ-ꓔꓲ ( credentials committee) ꓡꓰ ꓐꓯ ꓞꓷꓹ ꓠꓹ ꓟ ꓥ ꓡꓳ꓿
ꓖꓳ ꓡꓱ ꓮ ꓢꓡꓲ ꓕꓲ ꓜꓴ ꓦꓰꓼ ꓙꓲꓽ ꓙꓳ ꓟ ꓐꓯ ꓞꓷꓹ ꓗꓳ-ꓟꓲ-ꓔꓲ ꓗꓪ ꓠꓬ ꓗꓴꓷꓼ 9 ꓗꓴꓷꓼ ꓝꓲ ꓓꓴ ꓓꓽ ꓟ ꓐꓴ ꓡꓰ ꓖꓪ ꓙꓱ ꓟꓰꓹ ꓠꓬꓲ ꓢꓲꓸ ꓫꓵꓽ ꓫꓬꓹ ꓓꓴ ꓥꓳ꓿ ꓒꓬꓱꓼ ꓡ ꓓ ꓟ ꓚꓱꓹ 2 ꓫꓵꓽ ꓙꓳ ꓡꓳ꓿ ꓕꓲ ꓜꓴ ꓔꓯ ꓟꓲ ꓠꓯ ꓗꓴꓷꓼ ꓜꓴ ꓗꓪ ꓐꓰ ꓘꓳ ꓣꓴ ꓟ꓾ ꓝꓮꓲ ꓠꓬꓲꓽ ꓜꓴ ꓕꓲ ꓡꓰ ꓔꓯ ꓟꓽ ꓘꓳ ꓣꓴ ꓣꓴ ꓬꓲꓸ ꓙꓵꓹ ꓕꓲ ꓟ ꓛꓲ ꓗꓪ ꓛꓲ ꓡꓳꓸ ꓔꓬ ꓟ ꓠꓬꓲꓽ ꓫꓵꓽ ꓬꓰ ꓙꓲ ꓚꓰꓼ ꓡꓳ꓿ ꓟꓬ-ꓟ ꓗꓴꓷꓼ ꓐꓱ ꓶ ꓗꓴꓷꓼ ꓙꓵꓽ ꓜꓴ ꓠꓬꓲꓽ ꓟ ꓠꓬ ꓮ ꓟꓶ ꓟꓲ ꓠꓯ ꓗꓴꓷꓼ ꓜꓴ ꓗꓪ ꓠꓬꓲ ꓖꓴ ꓐꓱ ꓶ ꓢꓷꓸ ꓠꓲꓹ ꓚꓱꓹ ꓗꓪ ꓐꓰ ꓟꓯꓼ ꓘꓶꓽ ꓓꓽ ꓟ ꓓꓶꓽ ꓡꓯ ꓘꓳ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓬꓰ ꓔꓬ ꓟ ꓗꓰ ꓜꓲ ꓜꓲ ꓑꓰꓹ ꓑꓰꓹ ꓥꓶꓸ ꓟ ꓬꓰ ꓠꓲꓹ ꓫꓵ ꓢꓴ ꓓꓳ ꓡ ꓔꓬ ꓟ ꓥ ꓡꓳ꓿
ꓕꓱ ꓡꓱ ꓗꓹ ꓟ ꓙꓵꓹ ꓗꓪ ꓝꓲ ꓓꓴ ꓓꓽ ꓟ ꓚꓳ-ꓟꓳꓹ-ꓕꓴꓸ ꓢꓯꓼ ꓟꓬ ꓔꓯ ꓘꓶ ꓡꓶꓽ ꓡ ꓟ ꓥ ꓡꓳ꓿ ꓕꓱ ꓟ ꓠꓬ꓾ ꓠꓱꓸ ꓐꓯꓼ ꓟꓽ ꓥ꓿ ꓴꓢꓮ ꓗꓪ ꓛꓲ ꓔꓬ ꓢꓲ꓾ ꓟꓯꓼ ꓕꓲ ꓛꓱꓽ ꓗꓪ ꓦꓰꓼ ꓢꓴ ꓜꓲ ꓜꓲ ꓑꓰꓹ ꓑꓰꓹ ꓥꓶꓸˍ ꓟ ꓬꓰ ꓢꓴ ꓐꓴ ꓥ ꓡꓳ ꓐꓰ ꓕꓲ ꓟꓲ ꓠꓯ ꓢꓷꓸ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓡꓲ ꓘꓶ ꓡꓶꓽ ꓡ ꓟ ꓐꓰ꓾ ꓮ ꓡꓲ ꓚꓲꓸ ꓚ ꓔꓬ ꓟ ꓚꓱꓹ ꓔꓯ ꓝꓐꓲ ꓡꓰ ꓟꓽ ꓕꓱ ꓓꓳ ꓡ ꓢꓰ꓿
“ꓥꓪ ꓠꓴ ꓮ ꓡꓲ ꓟꓬꓱꓽ ꓬꓰ ꓔꓬ ꓟ ꓙ ꓖꓴ ꓜꓲ ꓜꓲ ꓟꓴ ꓟꓴ ꓐꓯ ꓟꓽ ꓚꓰꓼ꓿ ꓖꓳ ꓡꓱ ꓥ ꓟꓲ ꓥꓪ ꓠꓴ ꓟꓬꓱꓽ ꓥꓪ ꓠꓬ ꓬꓰ ꓔꓬ ꓡꓳ” ꓐꓰ ꓝꓐꓲ ꓗꓪ ꓟ ꓫ. ꓕꓱ ꓢꓴ ꓡꓰ ꓐꓯ ꓡꓳ꓿
“ꓘꓶ ꓡꓶꓽ ꓓꓴ ꓙꓳ ꓟ ꓠꓯꓸꓼ ꓗꓪ ꓥꓪ ꓐꓱ ꓶ ꓟꓯꓼ ꓡꓰ ꓡꓳꓸ ꓙ ꓔꓬ ꓡꓳ꓿” ꓐꓰ ꓴꓠ ꓗꓪ ꓟꓬ-ꓟ ꓑ ꓫꓬꓼ ꓐꓱ ꓶ ꓦꓰꓼ ꓔꓬ ꓟ ꓟꓬ-ꓟ ꓝꓲ ꓓꓴ ꓓꓽ ꓟ ꓚꓳ-ꓟꓳꓹ-ꓕꓴꓸ ꓡꓰ ꓔꓪꓲꓔꓔꓰꓣ ꓗꓪ ꓐꓳ ꓩꓴ ꓡ ꓡꓳ꓿
