ꓗ-ꓬ ꓟꓵ꓾ ꓓꓰ-ꓟꓳ-ꓢꓳ ꓡꓳ ꓒꓱ ꓗꓪ ꓟꓲ ꓠꓯ ꓗꓴꓷꓼ ꓜꓴ (ꓴꓠ) ꓐꓵ ꓞꓲꓽ ꓖꓪꓽ ꓔꓸ ꓟ ꓞꓳ ꓟꓳꓽ ꓒꓽ ꓕꓲ ꓣꓳ ꓔꓯ 2021 ꓘꓳꓼ 9 ꓦ 26 ꓠꓬꓲ ꓕꓯꓽ ꓟꓬ-ꓟ ꓟꓯꓼ ꓐꓴ ꓡꓰ ꓐꓶ ꓢꓰꓼꓳ꓿
“ꓬꓲ ꓠꓬ ꓗꓳꓸ-ꓔ-ꓬ ꓘꓹ ꓢꓴ ꓥꓳ꓿ ꓟꓯꓼ ꓐꓴ ꓡꓰ ꓬꓲꓸ ꓳ’ ꓟꓶꓽ ꓗꓪ ꓡꓴ ꓡꓴꓹ ꓐꓶ ꓢꓰꓼꓳ꓿ ꓡꓱ ꓜꓳ ꓗꓪ ꓔꓵꓸ ꓙꓰ ꓟ ꓙ ꓖꓴ ꓗꓪ ꓥ ꓟꓲ ꓟꓳ-ꓓꓳ ꓛꓲ ꓪꓳꓽ ꓔꓯ ꓐꓳꓽ ꓑꓳ ꓬꓰꓳ꓿ ꓳꓸ ꓟ ꓖꓶ ꓘꓹ ꓖꓴꓽ ꓗꓪ ꓓꓼ ꓝꓯꓸ ꓠꓬꓹ ꓟ ꓟꓬ-ꓟ ꓟꓯꓼ ꓐꓴ ꓡꓰ ꓕꓴꓻ ꓔꓸ ꓟ ꓔꓲꓸ ꓥꓳ” ꓐꓰ ꓞꓳ ꓘꓹ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿
ꓟꓯꓼ ꓘꓶꓽ ꓗꓪ ꓥ ꓟꓲ ꓟꓲ ꓠꓯ ꓗꓴꓷꓼ ꓜꓴ ꓔꓳꓹ ꓠꓷꓼ ꓓꓴ꓾ ꓢꓷ ꓡꓰ ꓓꓴ ꓕꓲ ꓟ ꓟ ꓔꓯ ꓠꓬ ꓟꓯꓼ ꓐꓴ ꓐꓶ ꓡꓲꓽ ꓟꓽ ꓙꓳ ꓟ ꓥ ꓡꓳ꓿ ꓮ ꓡꓲꓳ ꓫꓵꓽ ꓟꓯꓼ ꓥ ꓟꓲ ꓒꓵꓽ ꓛꓳ ꓠꓹ ꓟ ꓶꓽ ꓙꓳ ꓟ ꓥ ꓡꓳ꓿
“ꓴꓠ ꓐꓯ ꓞꓲꓽ ꓖꓪ ꓔꓸ ꓢꓴ꓾ ꓚꓲ ꓛꓬ ꓘꓹ ꓗꓪ ꓚꓲ ꓛꓬ ꓦꓲ ꓗꓪ ꓔꓬ ꓢꓴ ꓞꓳ ꓟꓳꓽ ꓒꓽ ꓔꓯ ꓕꓱ ꓡꓱ ꓐꓶ ꓢꓰꓼ ꓡ ꓔꓬ ꓟ ꓠꓬ꓾ ꓗꓴꓷꓼ ꓜꓴ ꓠꓬ ꓟꓬ-ꓟ ꓑ ꓫꓬ ꓐꓱ ꓶ ꓮ ꓫꓵꓽ ꓗꓪ ꓟꓲ ꓗꓽ ꓙ ꓟꓽ ꓐ ꓡ ꓟ ꓢꓷꓸ ꓡꓰ ꓓꓴ ꓕꓲ ꓟ ꓥꓳ” ꓐꓰ ꓟꓬ-ꓟ ꓫꓵꓽ ꓓꓳꓽ ꓐꓳ ꓢꓴ ꓐꓴ ꓡꓰ ꓙꓽ ꓘꓶꓽ ꓩꓴ ꓡ ꓡꓳ꓿
2020 ꓘꓳꓼ 4 ꓦ 20 ꓠꓬꓲ ꓗꓪ ꓥ ꓟꓲ ꓣ-ꓘ ꓟꓵꓽ ꓗꓪ ꓚꓳꓦꓲꓓ-19 ꓐꓱ ꓶ ꓟꓬꓱꓽ ꓬꓰ ꓔꓬ ꓟ ꓟꓲ ꓠꓯ ꓗꓴꓷꓼ ꓜꓴ ꓖꓳ ꓓꓱ ꓔꓬ ꓢ ꓚꓱꓹ ꓧꓳꓽ ꓜꓴ (ꓪꓳꓣꓡꓓ ꓧꓰꓮꓡꓔꓧ ꓳꓣꓖꓮꓠꓲꓜꓮꓔꓲꓳꓠ) ꓟꓳ-ꓓꓳ ꓔꓯ ꓟꓯꓼ ꓐꓴ ꓡꓰ ꓐꓶ ꓡ ꓠꓬꓲ ꓟꓳ-ꓓꓳ ꓫꓵꓸ ꓒꓽ ꓫꓵꓻꓳ꓿
ꓐꓬꓱꓽ꓾ ꓚꓙ
