2021 ꓘꓳꓼ 7 ꓦ ꓗꓪ ꓠꓬ ꓧꓶ ꓒꓽ ꓗꓳ-ꓟꓴ-ꓠꓲꓼ ꓜꓴ (China Communist Party) 100 ꓘꓳꓼ ꓐꓲ ꓡꓰ ꓟ ꓦ ꓟ ꓥ ꓡꓳ= ꓕꓲ ꓗꓴꓷꓼ ꓡꓱꓸꓼ ꓗꓪ ꓕꓲ ꓦ ꓐ ꓡꓱꓸꓼ ꓚꓲꓸ ꓟꓶ ꓓꓴ ꓑꓮꓲ ꓣꓱꓽ ꓬꓰ ꓔꓬ ꓡꓳ= ꓚ ꓟꓲꓽ ꓓꓴꓸ ꓓꓴꓸ ꓤꓼ ꓠꓬꓲ ꓕꓱ ꓡꓱ ꓥꓳ=
1921 ꓘꓳꓼ 7 ꓦ 23 ꓠꓬꓲ ꓕꓯ ꓧꓶ ꓒꓽ ꓗꓳ-ꓟꓴ-ꓠꓲꓼ ꓜꓴ (China Communist Party) ꓔꓯ ꓫ-ꓧꓼ ꓡꓳ ꓒꓱ ꓗꓪ ꓡ ꓞꓳ ꓮ ꓔꓲꓸ ꓤꓼ ꓕꓲ ꓜꓴ ꓡꓰ ꓘꓴꓽ ꓘꓴ ꓠꓯ ꓠꓯ ꓒꓴ ꓪꓴꓸ ꓔꓴ ꓗꓷ ꓡꓳ= ꓬꓲꓸ ꓪ ꓠꓬ ꓣ-ꓫꓸ ꓟꓵꓽ ꓗꓪ ꓐꓳ-ꓫꓲ-ꓐꓲꓼ ꓒꓳꓹ ꓔꓳꓹ ꓟ ꓔꓯ ꓔꓯꓺ ꓥꓳꓽ ꓣꓴ ꓢꓲ꓾ ꓖꓳ ꓕꓯ ꓟ ꓬꓲꓸ ꓐꓶꓽ ꓬꓲꓸ ꓧꓽ ꓠꓴ ꓥꓪ ꓢꓰꓼ ꓡꓯ ꓘꓳ ꓔꓬ ꓢꓲ꓾ ꓫꓸ ꓠꓰ ꓪꓴꓽ ꓔꓯ ꓕꓲꓺ ꓡꓰ ꓔꓬ ꓟ ꓧꓶꓽ ꓡ ꓞꓳ ꓐꓴ ꓔꓯ ꓕꓲ ꓠꓲꓹ ꓕꓲ ꓪ ꓗꓴꓷꓼ ꓬꓲꓸ ꓫꓵꓼ ꓔꓶ ꓠꓹ ꓟ ꓧꓳꓽ ꓪꓴꓸ ꓟꓴ ꓓꓴ ꓥ ꓡꓳ=
1949 ꓘꓳꓼ ꓗꓪ ꓛꓲ ꓡ ꓠꓬ꓾ ꓧꓶꓽ ꓒꓽ ꓗꓳ-ꓟꓴ-ꓠꓲꓼ ꓜꓴ ꓡꓰ ꓓꓰ ꓟꓵꓽ ꓗꓪ ꓐꓰ ꓮ ꓖ ꓟꓵꓽ ꓘꓶꓽ ꓟꓵꓽ ꓡꓯꓼ ꓗꓪ ꓟ ꓫꓸ ꓢꓴ ꓟꓷꓼ ꓢꓴ ꓮ ꓙꓵꓽ ꓔꓯ ꓖꓼ ꓝꓲꓸ ꓪ ꓡꓰ ꓢꓲ꓾ ꓚ-ꓗ-ꓫꓲꓽ ꓗꓴꓷꓼ ꓙꓵꓽ ꓜꓴ ꓠꓬ ꓕꓮꓲ-ꓪ ꓟꓵꓽ ꓗꓪ ꓚꓲꓸ ꓙꓰ ꓠ ꓗꓷ ꓡꓰꓳ=
1949 ꓘꓳꓼ 10 ꓦ 1 ꓠꓬꓲ ꓕꓯ꓾ ꓟꓳ-ꓜꓯ-ꓔꓳ ꓡꓰ꓾ ꓐꓯ-ꓙꓲꓸ ꓡꓳ ꓒꓱ ꓗꓪ ꓑ ꓫꓬ ꓐꓴ ꓧꓶꓽ ꓒꓽ ꓗꓴꓷꓼ (People’s Republic of China) ꓔꓶꓺ ꓗꓷ ꓟ ꓐꓯ ꓒꓬꓱ ꓩꓴ ꓡ ꓡꓳ=
1958 ꓘꓳꓼ ꓕꓯ ꓛꓲ ꓝꓴ ꓓꓽ ꓟ (The Great Leap) ꓔꓶ ꓜ ꓔꓶ ꓓꓳ ꓚꓱꓹ ꓒꓳꓹ ꓔꓳ ꓟ ꓟꓬꓱꓽ ꓬꓰ ꓡ ꓢꓲ꓾ ꓗꓴꓷꓼ ꓡ ꓞꓳ 300 ꓫꓬꓹ ꓟꓽ ꓞꓲ ꓦꓰꓼ ꓟꓷꓼ ꓢꓲꓸ ꓫꓵꓻꓳ=
1966 ꓘꓳꓼ ꓕꓯ ꓧꓳꓽ ꓪꓴꓸ ꓟꓴ ꓢꓴ ꓟꓳ-ꓜꓯ-ꓔꓳ ꓡꓰ ꓡꓲ ꓒꓰꓼ ꓒꓳꓹ ꓓꓳ ꓟ ꓟꓬꓱꓽ ꓬꓰ ꓡ ꓢꓲ꓾ ꓒꓵꓽ ꓒ ꓡꓲ ꓒꓰꓼ ꓚꓱꓹ ꓮ ꓟꓬꓹ ꓐꓬ ꓡꓰ ꓖꓴꓳ= ꓟꓯꓼ ꓐꓴ ꓡꓰ ꓢꓰꓼ ꓗꓷ ꓟꓶ ꓡꓰ ꓢꓴ 20 ꓫꓬꓹ ꓙꓳ ꓥꓳ ꓐꓰ ꓚꓲꓸ ꓚ ꓢꓴ ꓐꓴ ꓡꓰ ꓐꓯ ꓡꓳ=
1976 ꓘꓳꓼ ꓕꓯ ꓧꓳꓽ ꓪꓴꓸ ꓟꓴ ꓢꓴ ꓟꓳ-ꓜꓯ-ꓔꓳ ꓫꓵꓻ ꓗꓸ ꓠꓯꓸ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓡꓰ ꓟꓵ ꓗꓳ ꓓꓵ ꓓꓵ ꓐꓴ ꓐꓰ ꓙ ꓡꓯ ꓘꓳ ꓟ ꓶ ꓡꓯꓼ ꓟꓴ ꓚꓱꓹ ꓗ ꓘꓶꓽ ꓒꓴ ꓗꓷꓳ= ꓖꓳ ꓗꓪ ꓐꓰ ꓕ ꓑꓳꓸ 50 ꓘꓳꓼ ꓟ ꓠꓯꓸꓼ ꓗꓪ ꓧꓶꓽ ꓗꓴꓷꓼ ꓠꓬ ꓶꓼ ꓡꓯꓼ ꓚꓱꓹ ꓗꓪ ꓪꓴꓽ ꓟꓴ ꓡ ꓢꓲ꓾ ꓑ ꓫꓬꓼ ꓐꓴ ꓔꓯ ꓫꓸ ꓟ ꓗꓪ ꓐꓰ ꓐꓳ ꓢ ꓔꓬ ꓢ ꓡ ꓝꓲ ꓡꓳ=
