ꓟꓬ-ꓟ ꓟꓯꓼ ꓔꓯ ꓢꓯꓼ ꓟꓽ ꓖꓶꓽ ꓠꓹ ꓟ ꓧꓶꓽ ꓗꓴꓷꓼ ꓙꓵꓽ ꓢꓴ ꓫꓵ-ꓚꓲ-ꓒꓰꓽ ꓔꓯ ꓟꓬ-ꓟ ꓗꓴꓷꓼ ꓗꓪ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓡꓲꓸ ꓟꓶ ꓠꓹ ꓟ ꓢꓯꓼ ꓕꓵꓼ ꓔꓬ ꓟ ꓜꓴ 558 ꓜꓴ ꓡꓰꓽ 2022 ꓘꓳꓼ 4 ꓦ 25 ꓠꓬꓳ ꓕꓯꓽ ꓕꓳ ꓶ ꓕꓲ ꓚꓴꓸ ꓐꓳ ꓩꓴ ꓡ ꓡꓳ꓿
“ꓥꓪ ꓠꓴ ꓠꓬ ꓟꓬ-ꓟ ꓗꓴꓷꓼ ꓐꓰ ꓧꓶꓽ ꓗꓴꓷꓼ ꓐꓰ ꓙ ꓡꓯ ꓘꓳ ꓚꓱꓹ ꓕꓶꓻ ꓡ ꓟ ꓔꓯ ꓥꓳ ꓡꓳꓸ ꓔꓬ ꓥꓳ꓿ ꓖꓳ ꓟ ꓑꓶꓸ ꓓꓴ ꓟꓬ-ꓟ ꓟꓯꓼ ꓔꓯ ꓔꓳꓹ ꓡꓯ ꓘꓳ ꓔꓬ ꓟ ꓠꓴꓖ ꓗꓴꓷꓼ ꓙꓵꓽ ꓜꓴ ꓐꓰ ꓑ-ꓔꓲ ꓐꓴ ꓔꓯ ꓙ ꓡꓯ ꓘꓳ꓾ ꓖꓪ ꓙꓱ ꓡꓯ ꓘꓳ ꓓꓴ ꓬꓰ꓿” ꓐꓰ ꓢꓯꓼ ꓖꓶ ꓔꓸ ꓡꓳ꓿
“ꓧꓶꓽ ꓗꓴꓷꓼ ꓙꓵꓽ ꓢꓴˍ ꓐꓰ ꓶ ꓡꓯꓼ ꓬꓰ ꓢꓴ ꓐꓴ ꓕꓱ ꓡꓱ ꓔꓲꓸ ꓟꓬ-ꓟ ꓟꓯꓼ ꓔꓯ ꓢꓯꓼ ꓖꓶ ꓔꓬ ꓟ ꓟꓽ ꓠꓽ ꓡꓰˍ ꓠꓬ꓾ ꓠꓴ ꓪ ꓖꓴꓽ ꓙꓴꓽ ꓐꓰ ꓶ ꓡꓯꓼ ꓚꓱꓹ ꓐꓬ ꓡꓰ ꓓꓴ ꓙꓳ ꓡ ꓥ” ꓐꓰ ꓐꓯ ꓡꓳ꓿
“ꓕꓲ ꓠꓱ ꓮ ꓬꓲꓼ ꓠꓬꓲ ꓤꓽ ꓙ ꓡꓯ ꓘꓳ ꓚꓱꓹ” ꓐꓯˍ ꓟ ꓠꓬ꓾ ꓟꓬ-ꓟ ꓑ ꓫꓬ ꓔꓯ ꓐꓯˍ ꓟ ꓥ ꓡ? ꓠꓬꓲꓸ ꓤꓲ ꓢꓴ ꓟꓬ-ꓟ ꓟꓯꓼ ꓔꓯ ꓐꓯˍ ꓟ ꓥ ꓡ? ꓐꓰ ꓕꓳ ꓶ ꓐꓳ ꓩꓴ ꓡ ꓟ ꓜꓴ ꓗꓪ ꓔꓺ ꓢꓴ ꓗꓳ-ꓬꓯꓹ ꓡꓰ ꓐꓯ ꓡꓳ꓿
“ꓕꓲ ꓠꓱ ꓮ ꓬꓲꓼ ꓠꓬꓲ ꓤꓽ ꓙ ꓡꓯ ꓘꓳ ꓚꓱꓹ” ꓐꓯˍ ꓟ ꓠꓬ ꓟꓬ-ꓟ ꓑ ꓫꓬ ꓔꓯ ꓖꓴ ꓠꓬ꓾ ꓟꓬ-ꓟ ꓑ ꓫꓬ ꓠꓲꓹ ꓫꓵˍ ꓟ ꓚꓱꓹ ꓔꓯ ꓛꓳ ꓠ ꓔꓸ ꓥ꓿ ꓟꓬ-ꓟ ꓟꓯꓼ ꓠꓲꓹ ꓫꓵˍ ꓟ ꓚꓱꓹ ꓔꓯ ꓢꓯꓼ ꓖꓶꓽ ꓔꓬ ꓠꓬ ꓧꓶꓽ ꓗꓴꓷꓼ ꓐꓰ ꓟꓬ-ꓟ ꓗꓴꓷꓼ ꓑ ꓫꓬ ꓙ ꓡꓯ ꓘꓳ ꓚꓱꓹ ꓠꓬ ꓛꓴꓽ ꓙꓳ ꓢꓴ ꓙ ꓡꓯ ꓘꓳ ꓚꓱꓹ꓾ ꓫꓬꓹ ꓔꓱꓹ ꓫꓬꓹ ꓡꓲꓸ ꓟꓽ ꓓ ꓗꓪ ꓛꓲ ꓥꓶꓸˍ ꓟ ꓒꓬꓱꓼ ꓡ ꓓꓴ ꓥꓳ꓿ ꓖꓳ ꓟ ꓑꓶꓸ ꓓꓴ ꓧꓶꓽ ꓗꓴꓷꓼ ꓙꓵꓽ ꓢꓴ ꓐꓴ ꓓꓵꓽ ꓙ ꓚꓱꓹ ꓡꓶꓸ ꓠ ꓡꓹ ꓟ ꓙꓵꓹ ꓥꓳ꓿ ꓮ ꓡꓲ ꓕꓲ ꓒꓳꓹ ꓬꓰ ꓠꓹ ꓟ ꓓꓵꓽ ꓙ ꓠꓬꓲ” ꓐꓰ ꓗꓳ-ꓬꓯꓹ ꓡꓰꓽ ꓐꓯ ꓡꓳ꓿
ꓟꓬ-ꓟ ꓗꓴꓷꓼ ꓑ ꓫꓬ 558 ꓜꓴ ꓪꓽ ꓢꓲꓸ ꓐꓳ ꓩꓴ ꓡ ꓟ ꓕꓳ ꓶ ꓕꓱ ꓟ ꓔꓯ ꓬꓥ-ꓖꓳꓥ ꓗꓪ ꓙꓳˍ ꓟ ꓧꓶꓽ ꓗꓴꓷꓼ ꓙ ꓡꓯ ꓘꓳ ꓓꓴ ꓝꓲ ꓓꓴ ꓦꓲ ꓐꓰ꓾ ꓠꓱꓸ ꓐꓯꓼ ꓗꓴꓷꓼ ꓝꓲ ꓓꓴ ꓐꓴ ꓮ ꓟꓬꓹ ꓔꓯ 2022 ꓘꓳꓼ 4 ꓦ 26 ꓠꓬꓲ ꓕꓯꓽ ꓦ ꓖꓶ ꓩꓴ ꓗꓷ ꓟ ꓥ ꓡꓳ꓿
ꓢꓰ-ꓖ-ꓑꓳ ꓐꓰ ꓧꓶꓽ ꓗꓴꓷꓼ ꓔꓺ ꓩꓴ ꓠꓬ ꓟꓬ-ꓟ ꓐꓰ ꓐꓶꓽ ꓗꓴꓷꓼ ꓶ ꓡꓯꓼ ꓬꓰ ꓔꓬ ꓟ ꓚꓱꓹ ꓮ ꓙꓵꓽ ꓟ ꓗꓪ ꓐꓰ ꓕꓲꓽ ꓐꓶꓽ ꓕꓯꓽ ꓢꓲꓺ (52%) ꓙꓳˍ ꓡꓳ ꓐꓰ 2021 ꓘꓳꓼ ꓕꓯꓽ ꓢꓪꓼ ꓔꓸ ꓡꓳ꓿
