ꓠꓬꓲꓸ ꓠꓬꓲ 2021 ꓘꓳꓼ 11 ꓦ 22 ꓠꓬꓲ ꓕꓯ ꓳꓠꓡꓲꓠꓰ ꓗꓪ ꓐꓰ ꓖꓪ ꓙꓱ ꓪꓴꓸ ꓔꓴ ꓟ ꓧꓶꓽ ꓗꓴꓷꓼ ꓐꓰ ꓮ-ꓢꓰ-ꓬ ꓜꓲꓼ ꓓꓴ ꓗꓪ ꓟꓬ-ꓟ ꓟꓯꓼ ꓟꓽ ꓚꓬꓼ ꓔꓬ=
ꓜꓲꓼ ꓓꓴ ꓕꓱ ꓟ ꓗꓪ ꓧꓶꓽ ꓗꓴꓷꓼ ꓙꓵꓽ ꓢꓴ ꓐꓴ ꓐꓰ꓾ ꓮ-ꓢꓰ-ꓬ ꓜꓴ ꓗꓪ ꓔꓺ ꓢꓴ ꓗꓴꓷꓼ ꓮ ꓙꓵꓽ ꓗꓪ ꓐꓰ ꓙꓵꓽ ꓢꓴ ꓐꓴ ꓜꓲꓼ ꓡꓯ ꓘꓳ ꓢꓲ꓾ ꓧꓶꓽ ꓗꓴꓷꓼ ꓐꓰ ꓮ-ꓢꓰ-ꓬ ꓙ ꓡꓯ ꓘꓳ ꓚꓱꓹ꓾ ꓝꓮꓲ ꓮ-ꓢꓰ-ꓬ ꓟꓵꓽ ꓗꓪ ꓟ ꓫꓵꓽ ꓪꓴ ꓬꓲ ꓫꓵ ꓬꓲ ꓙꓰ ꓔꓯ ꓖꓪ ꓙꓱ ꓟ ꓥ ꓡꓳ=
ꓕꓱ ꓟ ꓟꓽ ꓬꓰ ꓢꓰꓽ ꓕꓯ ꓧꓶꓽ ꓗꓴꓷꓼ ꓝꓲ ꓓꓴ ꓫ-ꓗꓳ-ꓢꓸ (Sun Guoxiang) ꓠꓬ ꓮ-ꓢꓰ-ꓬ ꓜꓴ ꓗꓪ ꓔꓺ ꓢꓴ ꓗꓴꓷꓼ ꓐꓴ ꓗꓪ ꓙꓰ ꓚꓳ ꓢꓲ꓾ ꓟꓬ-ꓟ ꓟꓯꓼ ꓔꓯ ꓜꓲꓼ ꓓꓴ ꓗꓪ ꓘꓳ ꓣꓴ ꓠꓹ ꓟ ꓓꓱꓽ ꓢꓯꓼ ꓖꓶꓽ ꓥ ꓟꓲ꓾ ꓮ-ꓢꓰ-ꓬ ꓜꓴ ꓔꓺ ꓔꓬ ꓟ ꓗꓴꓷꓼ ꓐꓴ ꓠꓲꓹ ꓧꓳꓹ ꓟꓽ ꓐ ꓡ=
ꓟꓬ-ꓟ ꓟꓯꓼ ꓜꓲꓽ ꓐꓴ ꓠꓬ ꓟꓬ-ꓟ ꓐꓱ ꓶ ꓮ-ꓢꓰ-ꓬ ꓗꓴꓷꓼ ꓝꓲ ꓓꓴ ꓕꓲ ꓣꓳ ꓢꓲꓻ ꓔꓸ ꓢꓴ ꓔꓯ ꓗꓴꓷꓼ ꓗꓪ ꓟꓽ ꓓꓵꓽ ꓡ ꓝꓲ ꓟ ꓐꓰ꓾ ꓮ-ꓢꓰ-ꓬ ꓡꓰ ꓟꓬ-ꓟ ꓐꓱ ꓶ ꓖꓪ ꓙꓱ ꓙ ꓚꓱꓹ (5) ꓚꓱꓹ ꓔꓯ ꓛꓳ ꓠꓲꓹ ꓫꓵ ꓟ ꓠꓲꓹ ꓡꓶꓽ ꓟꓽ ꓙꓳ ꓟ ꓑꓶꓸ ꓓꓴ ꓙ ꓡꓯ ꓘꓳ ꓚꓱꓹ ꓗꓪ ꓗꓽ ꓔꓸ ꓓꓴ ꓙꓳ ꓔꓬ ꓟ ꓥ ꓡꓳ=
ꓧꓶꓸ ꓕꓯ ꓮ-ꓢꓰ-ꓬ ꓗꓴꓷꓼ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓜꓲꓼ ꓓꓴ (10 ꓦ 26-28) ꓗꓪ ꓥ ꓟꓲ ꓟꓬ-ꓟ ꓟꓯꓼ ꓜꓲꓼ ꓟꓰꓹ-ꓮꓳ-ꓡꓮꓲꓽ ꓔꓯ ꓟꓽ ꓘꓴ=
ꓗꓴꓷꓼ ꓚꓱꓹ ꓧꓳꓽ ꓢꓴ ꓙꓵꓽ ꓪ ꓣꓴ ꓔꓸ ꓢꓴ ꓟꓽ ꓥ ꓟ ꓟꓬ-ꓟ ꓐꓶꓽ ꓟꓵꓽ ꓔꓯ ꓟꓳꓸ ꓢꓲꓽ ꓒ ꓙꓵꓽ ꓦꓲ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓳ-ꓛꓸ-ꓯꓸ ꓔꓯ ꓘꓴ ꓗꓷ ꓥ ꓟꓲ ꓟꓯꓼ ꓐꓴ ꓡꓰ ꓟꓽ ꓝꓲ ꓩꓴ ꓗꓷ ꓠꓬꓲ꓾ ꓟꓬ-ꓟ ꓟꓽ ꓜꓲꓼ ꓟ ꓮ-ꓢꓰ-ꓬ ꓜꓲꓼ ꓓꓴ ꓗꓷ ꓡꓰ ꓡꓳ=
ꓮ ꓟꓶ ꓕꓱ ꓕꓲ ꓧꓪꓹ ꓧꓶꓽ ꓗꓴꓷꓼ ꓐꓰ ꓮ-ꓢꓰ-ꓬ ꓐꓴ ꓜꓲ ꓡꓯ ꓘꓳ ꓟ ꓥ ꓟꓲ ꓟꓬ-ꓟ ꓟꓽ ꓚꓬꓼ ꓟ ꓜꓲꓼ ꓓꓴ ꓗꓷ ꓡꓰ ꓡꓳ=
ꓟꓬ-ꓟ ꓟꓯꓼ ꓐꓴ ꓡꓰ 2021 ꓘꓳꓼ 2 ꓦ 1 ꓠꓬꓲ ꓗꓪ ꓐꓰ ꓑ ꓫꓬ ꓙꓵꓽ ꓪ ꓦꓴ ꓙꓰ ꓡ ꓟ ꓗꓪ ꓐꓰ ꓟꓵꓽ ꓗꓳ ꓓꓵ ꓓꓵ ꓗꓴꓷꓼ ꓐꓴ ꓐꓰ ꓙ ꓡꓯ ꓘꓳ ꓚꓱꓹ ꓗꓪ ꓬꓲꓸ ꓐꓼ ꓬꓲꓸ ꓫꓶꓸ ꓙꓳ ꓡꓰ꓾ ꓘꓶꓽ ꓡꓶꓽ ꓡꓰ ꓔꓬ ꓟ ꓥ ꓡꓳ=
