2021 ꓘꓳꓼ 3 ꓦ 18 ꓠꓬꓲ ꓕꓯ ꓧꓶꓽ ꓒ ꓟꓵꓽ ꓪꓴ ꓮ’ ꓦꓲ (stellite) Yunhai 1-02 ꓔꓯ ꓕꓲ ꓫꓵ ꓕꓲ ꓟ ꓠꓰ ꓕꓯꓼ ꓜꓯꓼ ꓬꓰ ꓢꓲ ꓑꓳꓺ ꓐꓶꓽ ꓡꓰ ꓡꓳ꓿ ꓳꓸ ꓐꓯ ꓖꓶ ꓮ ꓫꓵꓽ ꓕꓲ ꓟ ꓠꓰ ꓟꓵꓽ ꓪꓴ ꓟ ꓗꓪ ꓘꓶ ꓡꓶꓽ ꓡ ꓟ ꓚꓲꓸ ꓚ ꓟꓽ ꓪ꓿
ꓖꓳ ꓡꓱ ꓥ ꓟꓲ ꓮ-ꓟꓯ-ꓣꓲ-ꓗ 🇺🇸 US Space Force ꓗꓪ ꓟ Space Control Squadron ꓗꓪ ꓐꓰ ꓚꓲꓸ ꓚ ꓗꓷ ꓠꓬ꓾ ꓗꓳꓸ ꓡꓳꓹ ꓡ ꓟ 3 ꓦ 18 ꓠꓬꓲ ꓕꓯ UTC 0741 ꓗꓪ ꓮ’ ꓔꓬ ꓟ Yunhai 1-02 ꓒ ꓕꓲ 1 km ꓗꓪ ꓣ-ꓫꓸ Zenit-2 ꓗꓪ ꓐꓰ ꓓꓳ ꓡ ꓟ ꓬꓲꓸ ꓘꓰꓸ ꓬꓲꓸ ꓐꓶꓽ ꓢꓰꓸ ꓐꓴ ꓙꓰ ꓫꓸ ꓡꓯ ꓘꓳ ꓙꓰ ꓟ ꓔꓯ ꓡꓳꓸ ꓟꓳ ꓡꓰꓳ꓿
ꓖꓳ ꓕꓲ ꓙꓵꓹ ꓗꓪ ꓔꓲꓸ ꓧꓶꓽ ꓒꓽ ꓟꓵꓽ ꓪꓴꓽ ꓮ’ ꓦꓲ Yunhai 1-02 ꓑꓳꓺ ꓐꓶꓽ ꓡꓰ ꓟ ꓥꓳ꓿ ꓕꓱ ꓟ ꓠꓬ 10 ꓘꓳꓼ ꓟ ꓘꓴꓽ ꓗꓪ ꓟꓵꓽ ꓪꓴꓽ ꓮ’ ꓦꓲ ꓘꓰꓹ ꓕꓯꓼ ꓡꓯ ꓘꓳ ꓢꓲꓸ ꓑꓳꓺ ꓢꓰꓸ ꓬꓰ ꓟ ꓬꓲꓸ ꓪꓴꓸ ꓕꓲ ꓧꓪꓹ ꓥ ꓡꓳ꓿
ꓕꓱ ꓟ ꓔꓯ ꓮ ꓔꓳ ꓦ ꓦ ꓟꓳ ꓟꓳ ꓓꓵꓽ ꓙ ꓟꓽ ꓓ꓿ ꓕꓱ ꓡꓱꓳ ꓫꓵꓽ ꓗꓪ ꓐꓰ ꓬꓲꓸ ꓝꓸ ꓟꓶꓽ ꓠꓬꓲꓽ ꓘꓰꓹ ꓕꓯꓼ ꓓꓴ꓾ ꓑꓳꓺ ꓢꓰꓸ ꓓꓴ ꓬꓲꓸ ꓥꓳꓽ ꓟꓽ ꓜꓯꓼ ꓒꓬꓱꓼ ꓡ ꓐ ꓡ ꓡꓳ꓿
ꓗꓳꓸ ꓗꓷ ꓟ 4 ꓦ ꓘꓴꓽ ꓗꓪ ꓥ ꓟꓲ Elon Musk ꓟꓵꓽ ꓪꓴꓽ ꓮ’ ꓦꓲ SpaceX ꓐꓰ OneWeb ꓟꓵꓽ ꓪꓴ ꓮ’ ꓦꓲ ꓮ ꓡ ꓕꓯꓼ ꓡꓯ ꓘꓳ ꓡꓰꓳ꓿ ꓖꓳ ꓠꓬꓲ ꓦꓲ ꓠꓬꓲꓽ ꓗꓴꓸ ꓚꓸ ꓗꓪ ꓟꓲꓺ ꓔꓺ 60 ꓗꓪ ꓛꓲ ꓚꓳ ꓠꓶꓽ ꓡ ꓡꓳ꓿
ꓬꓲꓸ ꓐꓶꓽ ꓢꓰꓸ ꓑꓱꓸ ꓛꓲꓽ ꓑꓱꓸ ꓟꓲ
ꓕꓱ ꓡꓱ ꓟꓵꓽ ꓪꓴꓽ ꓮ’ ꓦꓲ ꓕꓲ ꓟ ꓐꓰ ꓕꓲ ꓟ ꓟꓵꓽ ꓪꓴꓽ ꓗꓪ ꓘꓰꓹ ꓕꓯꓼ ꓡꓯ ꓘꓳ ꓟ ꓦꓬꓼ ꓠꓬꓲ ꓙꓳ ꓡ ꓥꓳ ꓐꓰ ꓢꓷꓸ ꓠꓲꓹ ꓙꓳ ꓒꓽ ꓓꓳ-ꓠꓯ-ꓗꓯꓼ-ꓔ-ꓡ ꓡꓰ 1978 ꓘꓳꓼ ꓕꓯ ꓡꓰ ꓓꓵꓽ ꓙ ꓬꓲꓼ ꓠꓬꓲꓸ ꓖꓶ ꓔꓸ ꓟ ꓥ ꓡꓳ꓿
ꓮ ꓧꓪꓹ ꓕꓱ ꓡꓱ ꓕꓯꓼ ꓡꓯ ꓘꓳ ꓡ ꓠꓬ꓾ ꓬꓲꓸ ꓘꓰꓸ ꓬꓲ ꓟꓲ ꓠꓬ ꓟꓵꓽ ꓪꓴꓽ ꓗꓪ ꓮ’ ꓔꓬ꓾ ꓥ ꓠꓬ ꓟꓲ ꓠꓯ ꓗꓪ ꓞꓰ ꓡ ꓥꓳ꓿ ꓠꓱꓸ ꓐꓯꓼ ꓮ ꓟꓬꓹ ꓔꓯ ꓟꓲ ꓘꓶ ꓡꓶꓽ ꓬꓰ ꓝꓲ ꓐ ꓡ ꓡꓳ꓿ ꓮ ꓡꓲꓳ ꓐꓯ ꓠꓬ 2030 ꓘꓳꓼ ꓗꓪ ꓛꓲ ꓕꓯ SpaceX, OneWeb, Blue Origin ꓡꓰ ꓐꓰ ꓗꓹ ꓟ ꓟꓵꓽ ꓪꓴ ꓮ’ ꓦꓲ ꓠꓬ 100000 ꓟꓽ ꓞꓲ ꓙꓳ ꓡ ꓥꓳ ꓐꓰ ꓢꓪꓼ ꓔ ꓡꓳ꓿
ꓟꓲ ꓠꓯ ꓗꓪ ꓟꓳ ꓓꓳ ꓘꓰꓹ ꓕꓯꓼ ꓡꓯ ꓘꓳ ꓟ ꓡꓰ ꓐꓰ ꓟꓵ ꓪꓴꓽ ꓗꓪ ꓟꓵ ꓪꓴꓽ ꓮ’ ꓦꓲ ꓐꓴ ꓬꓲꓸ ꓧꓶꓽ ꓕꓯꓼ ꓡꓯ ꓘꓳ ꓡ ꓟ ꓦꓬꓼ ꓠꓬꓲ ꓛꓲ ꓡ ꓔꓬ ꓡꓳ꓿
