ꓢꓴꓑꓰꓣꓟꓮꓠ ꓕꓱ ꓟ ꓮ ꓘꓶꓸ ꓟꓬꓱ ꓓꓳꓽ ꓙꓳ ꓢꓲ꓾ ꓤ ꓠꓱ ꓐꓴ ꓮ ꓘꓶꓸ ꓠꓲꓹ ꓫꓵ ꓟ ꓚ ꓟꓲꓽ ꓕꓲ ꓚꓱꓹ ꓥ ꓡꓳ= ꓕꓱ ꓟ ꓔꓯ ꓬꓲꓸ ꓪꓴꓸ ꓚꓰꓼ ꓢꓴ ꓠꓬ ꓙꓬ-ꓣꓳ-ꓢꓰ-ꓖꓯ (Jerome Siegel) ꓥ ꓡꓳ=
ꓬꓲꓸ ꓡꓰ ꓓꓵꓽ ꓙ ꓚꓰꓼ ꓐꓳ ꓓꓳ ꓡ ꓟ ꓧꓪꓸ ꓒꓽ (ꓢꓴꓑꓰꓣꓟꓮꓠ) ꓠꓬ 1938 ꓘꓳꓼ ꓕꓯ ꓕꓳ ꓶ ꓬꓲꓸ ꓐꓬꓱꓽ ꓐꓳ ꓓꓳ ꓡ ꓡꓳ= 1938 ꓘꓳꓼ 4 ꓦ 18 ꓠꓬꓲ ꓕꓯ ꓕꓳ ꓶ ꓖꓳ ꓟ ꓠꓬꓲꓸ ꓑꓶ ꓗꓷ ꓡꓳ= ꓖꓳ ꓟ ꓗꓪ ꓐꓰ ꓤ ꓠꓱ ꓐꓴ ꓮ ꓘꓶꓸ ꓠꓲꓹ ꓫꓵ ꓢꓲꓸ ꓮ ꓟꓶ ꓗꓪ ꓛꓲ ꓕꓳ ꓶ ꓗꓪ꓾ ꓢꓯꓸ ꓐꓬꓱꓽ ꓗꓪ꓾ ꓬꓲꓸ ꓐꓬꓱꓽ ꓐꓰ ꓖꓪ ꓓꓴ ꓐꓵ ꓞꓲꓽ ꓬꓲ ꓫꓵ ꓬꓲ ꓙꓰ ꓫꓬꓹ ꓢꓲꓸ ꓪꓴꓽ ꓖꓶ ꓗꓪ ꓛꓲ ꓟꓬꓱ ꓓꓳꓽ ꓙꓳ ꓡ ꓡꓳ= ꓶ ꓡꓯꓼ ꓓꓽ ꓟ ꓒꓳꓹ ꓟꓶ ꓗꓪ ꓛꓲ ꓒꓬꓱꓼ ꓡ ꓟ ꓥ ꓡꓳ=
ꓢꓴꓑꓰꓣꓟꓮꓠ ꓚꓰꓼ ꓐꓳ ꓢꓴ ꓙꓬ-ꓣꓳ-ꓢꓰ-ꓖꓯ (Jerome Siegel) ꓠꓬ 1914 ꓘꓳꓼ 10 ꓦ 17 ꓠꓬꓲ ꓕꓯ ꓦꓵ ꓡ ꓢꓴ ꓥ ꓢꓲ꓾ 1996 ꓘꓳꓼ 1 ꓦ 28 ꓠꓬꓲ ꓕꓯ ꓫꓵꓻꓳ=
ꓕꓱ ꓟ ꓠꓬ ꓬꓲꓸ ꓕꓲ ꓖ ꓖ ꓗꓪ ꓐꓰ ꓢꓳ ꓣꓴ ꓑ ꓙꓽ ꓟꓶˍ ꓟ (ꓥ ꓠꓬ) ꓓꓵꓽ ꓙ ꓓꓳ ꓡ ꓟ ꓚꓱꓹ ꓥ ꓐꓭ ꓥꓳ= ꓖꓳ ꓡꓱ ꓥ ꓟꓲ꓾ ꓢꓴꓑꓰꓣꓟꓮꓠ ꓲꓓꓰꓮ ꓠꓬ ꓬꓲꓸ ꓫꓵꓼ ꓟꓽ ꓥ= ꓬꓲꓸ ꓡꓰ ꓪꓴꓸ ꓔꓴ ꓔꓸ ꓟ ꓟꓽ ꓥ= ꓬꓲꓸ ꓠꓬ ꓕꓱ ꓟ ꓔꓯ ꓧꓪ ꓟꓳ ꓢꓴ꓾ ꓟꓳꓸ ꓖꓶ ꓡ ꓢꓴ ꓥ ꓡꓳ=
ꓡꓲ-ꓢꓴ ꓘꓴꓽ ꓗꓪ ꓠꓬ ꓥꓳꓹ ꓒꓽ ꓐꓯ ꓟ ꓙꓳ ꓡꓳ= ꓕꓱ ꓟ ꓥ ꓟꓲ ꓡ ꓞꓳ ꓔꓯ ꓬꓰ ꓙ ꓢꓴ꓾ ꓟꓯꓼ ꓘꓶꓽ ꓗꓪ ꓟꓯꓼ ꓓꓶꓽ ꓙ ꓢꓴ ꓥ ꓡꓳ= ꓢꓯꓼ ꓪ ꓦ ꓕꓲ ꓫꓵꓽ ꓥ ꓢꓲ꓾ ꓟꓯꓼ ꓕꓲ ꓣꓳ ꓣꓳ ꓔꓯ ꓓꓵꓽ ꓡ ꓠꓬ꓾ ꓟꓯꓼ ꓘꓶꓽ ꓗꓪ ꓓꓶꓽ ꓧꓪꓸ ꓐ ꓡ ꓟ ꓥ ꓡꓳ ꓐꓰ ꓐꓯ ꓡꓳ=
ꓢꓲꓽ ꓫꓬ ꓕꓳ ꓶ ꓗꓪ ꓬꓲ-ꓢꓷ-ꓡꓰ ꓚ ꓟꓲꓽ ꓗꓪ ꓥ ꓟꓲ ꓢꓯꓼ ꓙꓳ ꓪꓽ ꓠꓬꓲ ꓢꓴ꓾ ꓟꓯꓼ ꓘꓶꓽ ꓗꓪ ꓪꓴ-ꓢ ꓢꓯꓼ ꓪ ꓔꓺ ꓙ ꓟ ꓙꓳ ꓚꓰꓼ ꓡꓳ= ꓕꓱ ꓡꓱꓳ ꓫꓵꓽ ꓔꓯ ꓙꓵꓻ ꓠꓬ ꓡꓲ-ꓢꓴ ꓚ ꓟꓲꓽ ꓗꓪ ꓙꓳ ꓟ ꓥꓳꓹ ꓒꓽ ꓔꓯ ꓟꓲ ꓘꓳ ꓣꓴ ꓠ ꓗ ꓥꓳ=
