#ꓟꓯꓼ ꓘꓶꓽ ꓠꓬ ꓣ-ꓫꓸ ꓓꓵꓽ ꓙ ꓔꓸ ꓟ ꓡꓰ ꓐꓰ ꓟꓽ ꓥ
ꓣ-ꓫꓸ ꓠꓬ ꓬꓴ-ꓗ-ꓣꓲꓸ ꓕꓯꓽ ꓢꓲ ꓟꓯꓼ ꓵꓺ ꓟꓬꓱꓺ ꓐꓰ ꓟꓯꓼ ꓶ ꓤꓼ ꓢꓯꓼ ꓪ ꓪꓴꓽ_ ꓟ ꓑꓶꓸ ꓓꓴ 2 ꓠꓬꓲ 2 ꓦꓬꓼ ꓘꓴꓽ ꓗꓪ ꓓꓶꓽ ꓧꓪꓸ ꓡꓰ ꓥꓳ ꓐꓰ ꓓꓵꓽ ꓙ ꓢꓪꓼ ꓔꓸ ꓥ ꓟꓲ꓾ ꓮ ꓟꓶ 5 ꓠꓬꓲ 5 ꓦꓬꓼ ꓗꓪ ꓛꓲ ꓓꓶꓽ ꓧꓪꓸ ꓡꓰ ꓟꓽ ꓐ ꓡ ꓢꓰꓽ=
ꓟꓯꓼ ꓘꓶꓽ ꓗꓪ ꓣ-ꓫꓸ ꓟꓯꓼ 4300 ꓣꓳ ꓫꓵꓻ꓾ ꓔꓲꓼ ꓟꓳ-ꓓꓳ 146 ꓟ꓾ ꓙꓱ ꓦꓲ 27 ꓦꓲ꓾ ꓙꓱ ꓦꓲ ꓑꓳꓼ ꓡꓳꓼ 26 ꓦꓲ ꓐꓬ ꓡꓰꓳ ꓐꓰ ꓬꓴ-ꓗ-ꓣꓲꓸ ꓡꓰ ꓢꓷꓸ ꓙ ꓟꓴ ꓙ ꓔꓸ ꓡꓳ=
ꓕꓱ ꓟꓬ ꓟ ꓬꓲꓸ ꓚꓽ ꓥ/ ꓟꓽ ꓥ ꓐꓯ ꓟꓽ ꓙꓲ ꓢꓰꓽ ꓥ ꓟꓲ꓾ ꓣ-ꓫꓸ ꓠꓬ ꓧꓶꓸ ꓕꓯ ꓓꓵꓽ ꓙ ꓔꓸ ꓟ ꓡꓰ ꓐꓰ ꓬꓴ-ꓗ-ꓣꓲꓸ ꓔꓯ ꓧꓪꓸ ꓡꓰ ꓟꓽ ꓘꓴ꓾ ꓝꓮꓲ ꓟꓽ ꓓꓵꓽ ꓙ ꓔꓸ ꓟ ꓗꓪ ꓚꓲ ꓛꓬ ꓟꓯꓼ꓾ ꓟꓯꓼ ꓶ ꓤ ꓐꓬ ꓡꓰ ꓔꓬꓳ ꓐꓯ_ ꓟ ꓚꓽ ꓡꓰꓳ=
ꓮ ꓡꓲ ꓡꓲꓸ ꓔꓯꓺ ꓟꓽ ꓐ ꓡ ꓗꓪ ꓛꓲ ꓞꓳ ꓤ ꓢꓯꓼ꓾ ꓙꓼ ꓶ ꓤ ꓢꓯꓼ ꓙꓳ_ ꓟ ꓣ-ꓫꓸ ꓔꓯ ꓬꓴ-ꓗ-ꓣꓲꓸ ꓗꓴꓷꓼ ꓡꓰ ꓔꓳꓹ ꓔꓬ ꓟ ꓔꓯ ꓟꓵꓽ ꓗꓳ ꓓꓵ ꓓꓵ ꓡ ꓞꓳ ꓮ ꓙꓵꓽ ꓓꓵꓽ ꓙ ꓮ’ ꓡꓰ ꓔꓬ ꓡꓳ=
ꓟꓯꓼ ꓘꓶꓽ ꓟꓶ ꓫꓵꓺ ꓫꓵ ꓗꓷ ꓡ ꓠꓬ ꓣ-ꓫꓸ ꓗꓴꓷꓼ ꓙꓵꓽ ꓢꓲꓽ ꓒꓽ ꓑꓴ-ꓔꓲ ꓟꓬꓱꓺ ꓓꓳꓽ ꓡꓯ ꓫꓵ ꓒꓰꓼ ꓬꓰ ꓔꓬ ꓡꓳ= ꓬꓲ ꓗꓴꓷꓼ ꓗꓪ ꓟ ꓑ ꓫꓬ ꓐꓴ ꓥ ꓟꓲ ꓬꓲ ꓔꓯ ꓒꓳꓹ ꓔꓳꓹ ꓢꓴ ꓓꓳ ꓡ ꓔꓬ ꓡꓳ= ꓝꓮꓲ ꓟꓵꓽ ꓗꓳ ꓓꓵ ꓓꓵ ꓗꓪ ꓟ ꓗꓴꓷꓼ ꓐꓴ ꓥ ꓟꓲ ꓬꓲ ꓔꓯ ꓠꓲꓹ ꓜꓳ ꓡ ꓔꓬ ꓡꓳ= ꓶ ꓡꓯꓼ ꓚꓱꓹ ꓗꓪ ꓑꓲꓸ ꓞꓲꓽ ꓡ ꓔꓬ ꓡꓳ=
ꓣ-ꓫꓸ ꓟꓯꓼ ꓫꓵꓻ ꓟꓳ ꓔꓯ ꓬꓴ-ꓗ-ꓣꓲꓸ ꓗꓪ ꓐꓰ ꓟꓳ-ꓓꓳ ꓡꓰ ꓚꓰꓹ ꓓꓳ ꓡ ꓔꓬ ꓡꓳ= ꓖꓳ ꓡꓱ ꓥ ꓟꓲ ꓕꓱ ꓟ ꓠꓬ ꓟꓬꓱꓺ ꓓꓳꓽ ꓟꓽ ꓙꓳ= ꓮ ꓡꓲꓳ ꓐꓯ ꓠꓬ ꓢꓴ ꓟꓵꓽ ꓢꓴ ꓗꓴꓷꓼ ꓗꓪ ꓓꓵꓽ ꓙꓰ ꓢꓲꓸ ꓫꓵꓻ ꓟ ꓪꓴꓸ ꓠꓬꓲ ꓥ ꓡꓳ= ꓢꓴ ꓔꓯ ꓘꓶ ꓡꓶꓽ ꓬꓰ ꓢꓲꓸ ꓫꓵꓻ ꓟ ꓠꓬ ꓟꓯꓼ ꓟꓬꓱ ꓓꓳ ꓟꓽ ꓙꓳ= ꓝꓮꓲ ꓕꓲ ꓒꓳꓹ ꓗꓪ ꓠꓬ ꓬꓴ-ꓗ-ꓣꓲꓸ ꓗꓴꓷꓼ ꓙꓵꓽ ꓢꓴ ꓜꓲ-ꓡ ꓢꓲ-ꓗꓲꓸ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓟꓯꓼ ꓐꓴ꓾ ꓑ ꓫꓬ ꓐꓴ ꓮ ꓙꓵꓽ ꓠꓬ ꓚꓲ ꓛꓬ ꓟꓵꓽ ꓐꓱ ꓶ ꓢꓯꓼ ꓟꓬ ꓑꓺ ꓢꓲꓸ ꓣ-ꓫꓸ ꓔꓯ ꓔꓳꓹ ꓡꓯ ꓘꓳ ꓔꓬ ꓡꓳ= ꓬꓲꓸ ꓪ ꓠꓬ ꓫꓵꓻ ꓥ ꓟꓲ ꓟꓬꓱꓺ ꓓꓳ ꓙꓳ_ ꓡꓳ= ꓕꓱ ꓟ ꓠꓬ ꓟꓯꓼ ꓘꓶꓽ ꓗꓪ ꓮ ꓡꓲ ꓒꓬꓱꓼ ꓔꓬ ꓟ ꓔꓯꓸ ꓟꓳꓸ ꓥ ꓡꓳ=
#ꓐꓲ-ꓡ-ꓣꓴ-ꓢꓲ ꓗꓴꓷꓼ ꓥ ꓟꓲ ꓣ-ꓫꓸ ꓐꓰ ꓕꓲ ꓪ ꓫꓸ ꓡꓰ ꓚꓱꓹ ꓝꓰꓸ ꓔꓬꓳ
ꓐꓲ-ꓡ-ꓣꓴ-ꓢꓲ ꓗꓴꓷꓼ ꓠꓬ ꓣ-ꓫꓸ ꓕꓲ ꓛꓱꓽ ꓗꓪ ꓦꓰꓼ ꓢꓲꓸ ꓣ-ꓫꓸ ꓟꓯꓼ ꓐꓴ ꓬꓲꓸ ꓗꓴꓷꓼ ꓗꓪ ꓐꓰ ꓕꓲ ꓝꓸ ꓬꓴ-ꓗ-ꓣꓲꓸ ꓔꓯ ꓟꓯꓼ ꓢꓰꓼ ꓝꓲ ꓔꓬ ꓡꓳ= ꓖꓳ ꓟ ꓑꓶꓸ ꓓꓴ ꓬꓴ-ꓬꓳꓼ ꓗꓴꓷꓼ ꓜꓴ ꓗꓪ ꓐꓰ ꓬꓲꓸ ꓔꓯ ꓥ ꓟꓲ ꓣ-ꓫꓸ ꓔꓯ_ ꓡꓰ ꓐꓰ ꓶ ꓡꓯꓼ ꓚꓱꓹ ꓗꓪ ꓑꓲꓸ ꓞꓲꓽ ꓗꓷꓳ= ꓬꓲꓸ ꓗꓴꓷꓼ ꓑ ꓫꓬ ꓐꓴ ꓠꓬ ꓶ ꓡꓯꓼ ꓚꓱꓹ ꓗꓪ ꓬꓰ ꓫꓸ ꓡꓰꓳ=
ꓝꓮꓲ ꓬꓲꓸ ꓗꓴꓷꓼ ꓘꓴꓽ ꓗꓪ ꓐꓰ ꓥ ꓟꓲ ꓣ-ꓫꓸ ꓟꓯꓼ ꓜꓴ ꓓꓳ ꓡꓽ ꓙꓰ ꓝꓲ ꓠꓹ ꓟ ꓮ ꓡꓲ ꓬꓰ ꓟꓽ ꓐ ꓡꓻꓳ= ꓬꓲꓸ ꓠꓬ ꓣ-ꓫꓸ ꓗꓪ ꓐꓰ ꓠꓴ-ꓗ-ꓡꓲ-ꓬꓸ ꓐꓳꓽ ꓔꓯ ꓬꓲꓸ ꓗꓴꓷꓼ ꓘꓴꓽ ꓗꓪ ꓔꓯꓹ ꓓꓵꓽ ꓡ ꓢꓲꓸ ꓗꓴꓷꓼ ꓔꓯ ꓗꓽ ꓡꓳꓸ ꓓꓴ ꓥꓳ ꓐꓰ ꓐꓯ ꓔꓬ ꓡꓳ= ꓕꓱ ꓟ ꓠꓬ ꓟꓲ ꓠꓯ ꓟꓯꓼ ꓘꓶꓽ 3 ꓛꓲ ꓡ ꓠꓹ ꓟ ꓚꓱꓹ ꓝꓰꓸ ꓔꓬ ꓟ ꓥ ꓡꓳ=
#ꓜꓽ ꓫꓵꓽ ꓓꓳ ꓫꓵꓽ ꓒꓵꓽ ꓓꓯꓺ ꓡ ꓔꓬꓳ
ꓬꓴ-ꓗ-ꓣꓲꓸ ꓠꓬ ꓫꓪꓺ ꓮ ꓘꓶꓸ ꓔꓶ_ ꓟ ꓗꓴꓷꓼ ꓥ ꓡꓳ= ꓕꓲ ꓟꓲ ꓠꓯ ꓗꓪ ꓟ ꓫꓪꓺ ꓮ ꓙꓵꓽ ꓗꓪ ꓐꓰ 29% ꓠꓬ ꓬꓴ-ꓗ-ꓣꓲꓸ ꓗꓪ ꓐꓰ ꓓꓳ ꓡ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓬꓴ-ꓗ-ꓣꓲꓸ ꓗꓴꓷꓼ ꓗꓪ ꓐꓰ ꓫꓪꓺ ꓪꓴꓻ ꓜꓽ ꓔꓬ ꓟ ꓬꓲ-ꓙꓲ ꓟꓵꓽ꓾ ꓡꓯ-ꓐꓶ-ꓠꓳ ꓟꓵꓽ꓾ ꓬꓲ-ꓟꓲ ꓐꓰ ꓮ-ꓬ ꓟꓵꓽ꓾ ꓢꓴ-ꓓ ꓟꓵꓽ ꓮ ꓙꓵꓽ ꓗꓪ ꓫꓪꓺ ꓜꓽ ꓓꓴ ꓐꓱ ꓶ ꓠꓲꓹ ꓫꓸ ꓟꓬ ꓫꓸ ꓔꓬ ꓡꓳ= ꓬꓲꓸ ꓒꓵꓽ ꓓꓯꓺ ꓡ ꓔꓬ ꓡꓳ= ꓫꓪꓺ ꓧꓶꓽ ꓜꓽ ꓓꓴ ꓟꓽ ꓙꓳ ꓡꓰ ꓟ ꓑ ꓫꓬ ꓐꓴ ꓠꓬ ꓗꓴꓷꓼ ꓙꓵꓽ ꓢꓴ ꓐꓴ ꓔꓯ ꓔꓳꓹ ꓡ ꓟ ꓔꓯ ꓖꓳ ꓟꓬ ꓟ ꓗꓴꓷꓼ ꓙꓵꓽ ꓢꓴ ꓐꓴ ꓙ ꓫꓸ ꓔꓴ ꓡ ꓡꓳ= ꓣ-ꓫꓸ ꓡꓰ ꓬꓴ-ꓗ-ꓣꓲꓸ ꓔꓯ ꓢꓰꓼ ꓪꓴꓸ ꓔꓴ_ ꓟ ꓬꓲꓸ ꓪꓴꓸ ꓕꓲ ꓠꓬꓲ ꓗꓪ ꓫꓪꓺ 1 ꓓꓽ ꓒꓵꓽ ꓠꓬ ꓓꓳ-ꓡ 384 ꓗꓷ ꓡꓰꓳ= ꓟꓯꓼ ꓢꓰꓼ ꓡꓯ ꓘꓳ ꓔꓬ ꓟ ꓟꓵꓽ ꓗꓪ ꓜꓽ ꓓꓴ ꓚꓸ ꓖꓶ ꓔꓬ ꓟ ꓜꓴ ꓪꓝꓑ-World Food Program ꓡꓰ ꓫꓪꓺ ꓐꓰ ꓘꓶꓽ ꓫꓺ ꓕꓲ ꓐꓶꓽ ꓛꓲ ꓠꓬ ꓬꓴ-ꓗ-ꓣꓲꓸ ꓗꓴꓷꓼ ꓗꓪ ꓐꓰ ꓪꓴꓻ ꓔꓸ ꓟ ꓥ ꓡꓳ=
#ꓟꓲ ꓠꓯ ꓗꓪ ꓐꓰ ꓓꓳ_ ꓟ ꓶ ꓤꓼ ꓒꓵꓽ ꓓꓯꓺ ꓡ ꓔꓬꓳ
ꓣ-ꓫꓸ ꓐꓰ ꓬꓴ-ꓗ-ꓣꓲꓸ ꓠꓬ ꓠꓲ-ꓗꓯ꓾ ꓙꓲꓽ꓾ ꓧꓳꓺ ꓮ ꓟꓬꓹ ꓪꓴꓽ ꓖꓶ ꓔꓬ ꓟ ꓗꓴꓷꓼ ꓐꓴ ꓥ ꓡꓳ= ꓬꓲꓸ ꓪ ꓠꓬꓲꓽ ꓗꓴꓷꓼ ꓘꓴꓽ ꓗꓪ ꓟꓯꓼ ꓢꓰꓼ ꓡꓯ ꓘꓳ ꓔꓬ ꓟ ꓑꓶꓸ ꓓꓴ ꓟꓲ ꓠꓯ ꓗꓴꓷꓼ ꓠꓱꓸ ꓐꓯꓼ ꓗꓪ ꓠꓲ-ꓗꓯ꓾ ꓙꓲꓽ ꓐꓰ꓾ ꓧꓳꓺ ꓶ ꓤ ꓶ ꓟꓲ ꓒꓵꓽ ꓠꓬ ꓡꓴ ꓡꓴ ꓓꓯꓻ ꓡ ꓓꓴ ꓥꓳ=
Palladium ꓒꓵꓽ ꓠꓬ ꓮ ꓟꓶ 80% ꓬꓲꓸ ꓒꓵꓽ ꓓꓯ ꓙꓰꓳ= ꓩꓴꓸ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓟꓳ-ꓓꓳ ꓗꓪ ꓛꓲ ꓣꓱꓽ ꓬꓯꓼ ꓟ ꓣꓱꓽ ꓫꓵꓽ ꓕꓲ ꓫꓵꓽ ꓥ ꓡꓳ= ꓝꓮꓲ Titanium, neon, platinum, palladium ꓥ ꓟꓲ ꓣ-ꓫꓸ ꓐꓰ ꓬꓴ-ꓗ-ꓣꓲꓸ ꓗꓴꓷꓼ ꓗꓪ ꓐꓰ ꓓꓳ_ ꓡꓳ= ꓮ ꓟꓶ ꓟꓯꓼ ꓢꓰꓼ ꓡꓯ ꓘꓳ ꓔꓬ ꓠ ꓗꓷ ꓡꓰ ꓠꓬꓲ ꓕꓱ ꓡꓱꓳ ꓫꓵꓽ ꓠꓬ ꓠꓱꓸ ꓐꓯꓼ ꓗꓴꓷꓼ ꓗꓪ ꓐꓰ ꓧꓪ ꓫꓸ ꓡ ꓥꓳ= ꓟꓶ ꓤ ꓟꓽ ꓥ ꓕꓯꓽ ꓟꓳ-ꓓꓳ ꓒꓵꓽ꓾ ꓩꓴꓸ ꓒꓵꓽ꓾ ꓙꓱ ꓦꓲ ꓒꓵꓽ ꓮ ꓙꓵꓽ ꓓꓯꓺ ꓡ ꓥꓳ=
ꓢꓲ ꓡꓲꓹ ꓗꓹ ꓟ ꓬꓲ ꓐꓱ ꓗꓪ ꓡꓳ ꓓꓲ ꓒꓽ ꓡꓳ ꓩꓴ ꓠꓬ ꓬꓲ ꓡꓯꓼ ꓟꓲꓼ ꓙꓳ ꓡ ꓟ ꓡꓰ ꓐꓰ ꓸꓸꓸ ꓟꓲ ꓠꓯ ꓗꓴꓷꓼ ꓕꓲ ꓘꓴꓸ ꓕꓲ ꓖ ꓗꓪ ꓟꓯꓼ ꓘꓶꓽ ꓙꓳ_ ꓠꓱꓸ ꓐꓯꓼ ꓗꓴꓷꓼ ꓗꓪ ꓛꓲ ꓟꓯꓼ ꓘꓶꓽ ꓬꓲ ꓡꓯꓼ ꓟꓲꓼ ꓥ_ ꓟ꓾ ꓞꓳ ꓫꓵꓻ ꓪ ꓫꓵꓻ ꓬꓲ ꓡꓯꓼ ꓟꓲꓼ꓾ ꓜꓽ ꓓꓴ ꓓꓳ ꓓꓴ ꓬꓲ ꓡꓯꓼ ꓟꓲꓼ꓾ ꓣꓱ ꓫꓵꓽ ꓣꓱ ꓙꓰ ꓬꓲ ꓡꓯꓼ ꓟꓲꓼ ꓙꓶꓼ ꓛꓲ ꓡ ꓔꓬ ꓡꓳ=
