ꓣ-ꓫꓸ ꓠꓬ ꓬꓴ-ꓗ-ꓣꓲꓸ ꓔꓯ ꓓꓶꓽ ꓔꓬ ꓟ ꓔꓶ ꓙꓱꓼ ꓐꓲ ꓜꓲꓼ ꓡꓰ ꓟ ꓑꓶꓸ ꓓꓴ ꓮ ꓟꓶ ꓗꓪ ꓐꓰ ꓠꓬ ꓬꓴ-ꓗ-ꓣꓲꓸ ꓗꓪ ꓐꓰ ꓧꓹ ꓠꓹ ꓫꓵ_ ꓟ ꓓꓳ-ꓠꓬꓼ ꓐꓰ ꓡꓴ-ꓧꓼ ꓟꓵꓽ ꓡꓲꓹ ꓗꓷ ꓠꓹ ꓟ ꓢꓲꓸ ꓢꓯꓼ ꓕꓵꓼ ꓙꓰ ꓓꓴ ꓥꓳ꓾ ꓐꓰ ꓣ-ꓫꓸ ꓟꓯꓼ ꓜꓲꓽ ꓓꓽ ꓟ Rudskoy ꓡꓰ 2022 ꓘꓳꓼ 3 ꓦ 26 ꓠꓬꓲ ꓕꓯ ꓢꓷ ꓙ ꓟꓴ ꓙ ꓡꓳ=
“ꓥꓪ ꓠꓴ ꓬꓰ ꓓꓴ ꓓꓵꓽ ꓙ ꓔꓸ ꓟ ꓬꓲꓸ ꓪꓴꓸ ꓕꓲ ꓕꓳꓼ ꓐꓲ ꓜꓲꓼ ꓡꓰꓳ= ꓬꓴ-ꓗ-ꓣꓲꓸ ꓟꓯꓼ ꓒꓱ꓾ ꓟꓯꓼ ꓶ ꓤ ꓞꓳꓽ ꓦꓲ ꓐꓴ ꓔꓯ ꓒꓬꓹ ꓧꓶꓽ ꓗꓷꓳ= ꓮ ꓟꓶ ꓖꓳ ꓑꓳꓸ ꓠꓬ ꓓꓳ-ꓠꓬꓼ ꓐꓰ ꓡꓴ-ꓧꓼ ꓟꓵꓽ ꓡꓲꓹ ꓙꓰ ꓚꓱꓹ ꓔꓯ ꓢꓯꓼ ꓕꓵꓼ ꓙ ꓓꓴ ꓥꓳ” ꓐꓰ ꓣ-ꓫꓸ ꓟꓯꓼ ꓜꓲꓽ ꓓꓽ ꓟ Rudskoy ꓡꓰ ꓐꓯ_ ꓡꓳ=
ꓖꓳ ꓡꓱ ꓥ ꓟꓲ ꓣꓴ-ꓗ-ꓣꓲꓸ ꓟꓯꓼ ꓕꓲ ꓒꓳꓹ ꓗꓪ ꓐꓰ ꓠꓬ꓾ ꓣ-ꓫꓸ ꓐꓴ ꓓꓵꓽ ꓙ ꓔꓸ ꓟ ꓡꓰ ꓐꓰ ꓟꓽ ꓒꓬꓱꓼ ꓡ ꓠꓬꓲ꓾ ꓫꓳꓺ ꓡꓽ ꓙꓰ ꓓꓴ ꓬꓰ_ ꓟ ꓥ ꓡꓳ꓾ ꓐꓰ ꓐꓯ ꓡꓽ ꓩꓴ ꓡ ꓡꓳ=
ꓣ-ꓫꓸ ꓡꓰ ꓟꓯꓼ ꓢꓰꓼ ꓔꓬ ꓟ ꓗꓪ ꓕꓲ ꓠꓬꓲ ꓕꓯꓽ ꓣꓴ-ꓣꓳ ꓒꓴ 20 ꓪꓹ ꓛꓲ ꓣꓱꓽ ꓔꓬ ꓟ ꓥ ꓡꓳ= ꓟꓯꓼ ꓘꓶꓽ 31 ꓠꓬꓲ ꓟ ꓘꓴꓽ ꓗꓪ ꓣ-ꓫ ꓟꓯꓼ ꓜꓲꓽ ꓓꓽ ꓟ 7 ꓣꓳ ꓫꓵꓻꓳ= ꓖꓳ ꓗꓪ ꓐꓰ ꓙꓵꓽ ꓪ ꓪꓴꓽ ꓡꓳꓹ ꓬꓰ ꓢꓴ ꓟꓯꓼ ꓜꓲꓽ ꓠꓬ Lt. Gen. Yakov Rezantsev ꓥ ꓡꓳ=
ꓣ-ꓫꓸ ꓕꓲ ꓒꓳꓹ ꓗꓪ ꓐꓰ ꓮ ꓟꓬ ꓛꓲ ꓞꓳꓸ ꓡꓰ ꓗꓷ ꓟ ꓔꓯ ꓬꓴ-ꓗ-ꓣꓲꓸ ꓡꓰ ꓠꓬꓲꓸ ꓠꓬꓲ 2022 ꓘꓳꓼ 3 ꓦ 26 ꓠꓬꓲ ꓗꓪ ꓢꓪꓼ ꓓꓳ ꓩꓴ ꓡ ꓢꓲ꓾ the Kyiv Independent ꓗꓪ ꓐꓳ ꓟꓸ ꓩꓴ ꓡ ꓡꓳ=
ꓬꓲꓸ ꓪ ꓡꓰ ꓧꓪ ꓜꓲꓼ ꓔꓸ ꓟ ꓠꓬ꓾ ꓣ-ꓫꓸ ꓟꓯꓼ ꓒꓽ 16400 ꓣꓳ꓾ ꓐꓳꓽ ꓞꓰ ꓙꓱ ꓦꓲ 117 ꓦꓲ꓾ ꓙꓱ ꓦꓲ ꓑꓳꓼ ꓡꓳꓼ 127 ꓦꓲ꓾ ꓔꓼ ꓟꓳ-ꓓꓳ 575꓾ ꓟꓳ ꓓꓳ ꓬꓲ ꓫꓵ ꓬꓲ ꓙꓰ 1131 ꓐꓰ ꓠꓱꓸ ꓐꓯꓼ ꓮ ꓟꓬꓹ ꓐꓶ ꓛꓬꓹ ꓐꓶ ꓢꓰꓼ ꓪ ꓡꓰꓳ꓾ ꓐꓯ ꓔꓸ ꓡꓳ=
ꓬꓴ-ꓗ-ꓣꓲꓸ ꓗꓴꓷꓼ ꓙꓵꓽ ꓒꓽ ꓜꓲ-ꓡ-ꓢꓲ-ꓗꓲ ꓠꓬ ꓟꓽ ꓔꓷꓹ ꓘꓰꓹ ꓘꓰꓹ ꓬꓲꓸ ꓟꓯꓼ ꓤ ꓐꓴ ꓐꓰ ꓕꓲ ꓛꓳ ꓗꓴꓷꓼ ꓔꓯ ꓗꓽ ꓔꓳꓹ ꓔꓬ ꓟ ꓗꓪ ꓐꓰ ꓧꓪꓸ ꓟꓽ ꓧꓪꓸ ꓡꓲꓸ ꓟꓬꓱꓺ ꓓꓳꓽ ꓞꓼ ꓓꓳꓽ ꓠꓬ ꓪꓴꓽ ꓡ ꓔꓬ ꓡꓳ=
ꓢꓴ ꓟꓵꓽ ꓔꓯ ꓦꓴ ꓢꓴ ꓣ-ꓫꓸ ꓠꓬ ꓓꓵꓽ ꓙ ꓔꓸ ꓟ ꓡꓰ ꓐꓰ ꓠꓲꓹ ꓞ ꓟꓽ ꓢꓰꓼ ꓧꓪꓸ ꓡꓰ꓾ ꓫꓵꓻ ꓢꓴ ꓥ ꓟꓲ ꓟꓬꓽ ꓡ꓾ ꓒꓴ ꓥ ꓟꓲ ꓮ ꓘꓶꓸ ꓞꓳꓸ ꓡꓰ꓾ ꓕꓲ ꓟꓲ ꓠꓯ ꓗꓪ ꓟ ꓶ ꓡꓯꓼ ꓚꓱꓹ ꓥ ꓟꓲ ꓞꓳꓸ ꓡꓰ ꓔꓬ ꓠꓬꓲ꓾ ꓬꓲꓸ ꓟꓶꓽ ꓗꓪ ꓠꓬ ꓠꓴ-ꓗ-ꓡꓲꓸ-ꓬꓸ ꓐꓳꓽ ꓓꓽ ꓟ ꓣꓱꓽ ꓡ ꓡꓲꓸ ꓟꓽ ꓢꓷꓸ ꓐꓰ ꓟꓲ ꓠꓯ ꓗꓴꓷꓼ ꓧꓳꓽ ꓢꓴ ꓐꓴ ꓙ ꓫꓸ ꓔꓬ ꓡꓳ=
ꓠꓴ-ꓗ-ꓡꓲꓸ-ꓬ ꓐꓳꓽ ꓣꓱꓽ ꓡ ꓠꓬ ꓧꓪꓸ ꓢꓴ ꓟꓽ ꓙꓳ꓾ ꓮ ꓙꓵꓽ ꓟꓴꓽ ꓘꓴꓽ ꓢꓴ ꓙꓰ ꓟ_ ꓡꓰꓽ ꓥꓳ꓾ ꓟꓲ ꓠꓯ ꓗꓪ ꓟ ꓙꓳ ꓫꓵꓽ ꓙꓳ ꓙꓰꓽ ꓐꓰ꓾ ꓢꓯꓸ ꓫꓵ ꓢꓯꓸ ꓙꓰꓽ ꓞꓲꓼ ꓤ ꓡꓯꓹ ꓤꓼ ꓗꓪ ꓐꓰ ꓐꓬ ꓡꓰ ꓓꓴ ꓙꓳ ꓥꓳ ꓐꓰ ꓐꓯ ꓡꓯ ꓘꓳ ꓔꓬ ꓡꓳ=
