2022 ꓘꓳꓼ 5 ꓦ 10 ꓠꓬꓲ꓾ ꓢꓲ-ꓣꓲ-ꓡꓲ-ꓖ ꓗꓴꓷꓼ ꓗꓪ ꓑ ꓫꓬ ꓐꓴ ꓠꓲꓹ ꓦꓶ ꓟꓬ ꓦꓶ ꓠꓰ ꓗꓴꓷꓼ ꓙꓵꓽ ꓒꓽ Mahinda ꓦꓲ ꓒ ꓕꓲ ꓗꓪ ꓛꓲ ꓔꓷꓹ ꓑꓵꓺ ꓢꓲꓸ ꓮ ꓔꓳꓸ ꓐꓳꓽ ꓡꓳꓺ ꓡ ꓟ ꓑꓶꓸ ꓓꓴ꓾ 2022 ꓘꓳꓼ 5 ꓦ 10 ꓠꓬꓲ ꓠꓯꓼ ꓠꓯꓼ ꓕꓯꓽ ꓟꓯꓼ ꓡꓰ ꓚꓬꓴꓹ ꓙ ꓠ ꓗ ꓬꓰꓳ꓿
ꓞꓳ ꓜꓴ ꓞꓳ ꓟꓯꓼ ꓠꓬ ꓬꓲꓸ ꓔꓬ ꓖꓴ ꓦꓲ ꓐꓱ ꓔꓯ ꓘꓱꓻ ꓡ ꓢꓲꓸ ꓮ ꓔꓳꓸ ꓐꓳꓽ ꓡꓳꓺ ꓠꓬꓲ꓾ ꓦꓲ ꓒ ꓕꓲ ꓗꓪ ꓪꓱꓻ ꓡ ꓠꓬꓲ꓾ ꓬꓲꓸ ꓢꓯꓼ ꓟ ꓐꓱ ꓶ ꓙꓲ ꓣꓴ ꓓꓴ ꓙꓳˍ ꓠꓬꓲ ꓟꓯꓼ ꓡꓰ ꓮ ꓔꓳꓸ ꓟꓴꓽ ꓘꓴꓽ ꓐꓳꓽ ꓐꓶ ꓢꓲꓸ ꓬꓲꓸ ꓪ ꓕꓲ ꓦꓲ ꓢꓴ ꓔꓯ ꓚꓬꓴꓹ ꓓꓳ ꓠ ꓗ ꓬꓰˍ ꓟ ꓥ ꓡꓳ꓿
ꓬꓲꓸ ꓬ 2022 ꓘꓳꓼ 5 ꓦ 9 ꓠꓬꓲ ꓕꓯꓽ ꓟꓬꓱꓽ ꓠꓽ ꓬꓰ ꓓꓴ ꓐꓯ ꓓꓳ ꓔꓸ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓑ ꓫꓬ ꓐꓴ ꓠꓬ ꓬꓲꓸ ꓐꓰ ꓬꓲꓸ ꓛꓳ ꓒꓯꓹ ꓗꓴꓷꓼ ꓙꓵꓽ ꓜꓴ ꓐꓴ ꓔꓯ ꓐꓲꓹ ꓟ ꓦꓶˍ ꓟ ꓟꓽ ꓠꓽ ꓡꓰ꓿ 9 ꓠꓬꓲ ꓕꓲ ꓠꓬꓲ ꓟ ꓘꓴꓽ ꓗꓪ ꓡ ꓞꓳ (6) ꓣꓳ ꓫꓵꓻ꓾ ꓗꓴꓷꓼ ꓙꓵꓽ ꓜꓴ ꓦꓲ (65) ꓦꓲ꓾ ꓟꓳ-ꓓꓳ (88) ꓢꓶꓽ ꓮ ꓔꓳꓸ ꓙꓬ ꓖꓪꓽ ꓡꓰꓳ꓾ ꓐꓯ ꓡꓳ꓿
ꓝꓮꓲ ꓕꓱ ꓡꓱ ꓢꓴꓺ ꓔꓴ ꓢꓲꓸ ꓶ ꓤ ꓒꓬꓹ ꓢꓴ꓾ ꓘꓴꓽ ꓢꓴ ꓐꓴ ꓔꓯ ꓡ ꓛꓴꓸ ꓐꓶ ꓙꓵꓽ ꓪꓽ ꓥ ꓟꓲ ꓟꓯꓼ ꓡꓰ ꓓꓳ ꓩꓴ ꓡ ꓡꓳ꓿ ꓟꓯꓼ ꓠꓬ ꓡꓳ ꓒꓱ ꓮ ꓟꓬꓹ ꓗꓪ ꓕꓵꓼ ꓡꓵꓼ ꓡꓳꓸ ꓔꓬ ꓡꓳ꓿ ꓑ ꓫꓬ ꓐꓴ ꓠꓬ ꓜꓽ ꓓꓴ ꓟꓽ ꓙꓳ ꓗꓪ ꓛꓲ ꓶ ꓡꓯꓼ ꓚꓱꓹ ꓞꓳꓸ ꓗꓼ ꓬꓰ ꓡ ꓠꓬꓲ ꓠꓲꓹ ꓦꓶ ꓔꓬ ꓡꓳ꓿
76 ꓘꓳꓼ ꓙꓳ ꓢꓴ ꓗꓴꓷꓼ ꓙꓵꓽ ꓜꓴ ꓟꓬꓱꓽ ꓢꓲꓺ ꓓꓽ ꓟ ꓠꓬ Mahinda ꓥ ꓢꓲ꓾ ꓗꓴꓷꓼ ꓙꓵꓽ ꓜꓴ ꓢꓽ ꓡ ꓙꓵꓽ ꓠꓬ 72 ꓘꓳꓼ ꓙꓳˍ ꓟ Gotabaya ꓥ ꓡꓳ꓿ ꓗꓴꓷꓼ ꓙꓵꓽ ꓜꓴ ꓢꓽ ꓡ ꓙꓵꓽ ꓐꓰ ꓟꓬꓱꓽ ꓢꓲꓺ ꓠꓬ ꓬꓲꓸ ꓬꓲꓼ ꓠꓬꓲ ꓤꓽ ꓥ ꓢꓲꓸ ꓢꓲ-ꓣꓲ-ꓡꓲ-ꓖ ꓗꓴꓷꓼ ꓔꓯ 20 ꓘꓳꓼ ꓟꓽ ꓞꓲ ꓙꓵꓽ ꓗꓪꓼ ꓡ ꓟ ꓥ ꓡꓳ꓿
Source: CNN, AFP, BBC
Photo: GETTY IMAGES, AP, AFP/Ishara S Kodikara,
