2025 ꓘꓳꓼ 8 ꓦ 29 ꓠꓬꓲ ꓟꓶ ꓘꓶꓼ 4 ꓙꓵꓹ ꓛꓲ ꓕꓯꓽ꓾ ꓗꓲꓮ ꓟꓯꓼ 3 ꓣꓳ ꓡꓰ ꓤ ꓟꓶꓼ ꓕꓲ ꓣꓳ ꓔꓯ ꓓꓶꓽ ꓠꓬꓲ ꓔꓲꓸ ꓠꓬꓲ꓾ ꓡꓸ ꓕꓸ ꓕꓯꓼ ꓠꓬꓲ ꓬꓰ ꓡꓳ ꓐꓯ ꓢꓲ꓾ ꓖꓳ ꓗꓪ ꓬꓲꓼ ꓤ ꓠꓬꓲ ꓟ ꓐꓴ ꓠꓲꓹ ꓘꓪ ꓟꓽ ꓫꓵꓻ ꓘꓴ ꓔꓴ ꓔꓬ ꓡꓳ꓿
ꓓꓶꓽ ꓢꓴ ꓔꓲꓸ ꓢꓴ ꓡꓸ ꓕꓸ ꓕꓯꓼ ꓢꓴ ꓟꓯꓼ 3 ꓣꓳ ꓠꓬ꓾ ꓗꓲꓮ ꓟꓯꓼ ꓓꓼ (51) ꓗꓪ ꓟ ꓟꓯꓼ ꓜꓲꓽ ꓙꓵꓽ ꓢꓴ ꓡ-ꓒꓮꓲ ꓙ-ꓡꓲ-ꓮꓳ ꓐꓰ ꓬꓲꓸ ꓟꓯꓼ ꓤ 2 ꓣꓳ ꓥ ꓡꓳ꓾ ꓐꓯ ꓡꓳ꓿
“ꓡ-ꓒꓮꓲ ꓙ-ꓡꓲ-ꓮꓳ ꓔꓯ ꓟꓽ ꓠꓲꓹ ꓫꓵ” ꓐꓰ ꓠꓬꓲꓸ ꓠꓬꓲ ꓠꓯꓼ ꓝꓲꓸ ꓗꓪ ꓞꓳ ꓘꓹ ꓢꓴ ꓐꓴ ꓘꓴ ꓔꓴ ꓔꓬ ꓟ ꓢꓯꓸ ꓐꓬꓱꓽ ꓓꓳ ꓡ ꓡꓳ꓿
ꓠꓻ ꓓꓴ ꓡꓰ ꓢꓴ ꓤ ꓟꓶꓼ ꓤ ꓠꓬ ꓮ-ꓡꓴꓹ-ꓟꓲꓸ ꓐꓰ ꓬꓲꓸ ꓛꓳ ꓒꓯꓹ 1 ꓣꓳ ꓥ ꓡꓳ꓾ ꓐꓯ ꓡꓳ꓿
ꓮ-ꓡꓴꓹ-ꓟꓲꓸ ꓒꓬꓱ ꓟꓬ꓾ ꓡꓯ ꓒꓯꓹ꓾ ꓐꓶ ꓢꓶꓽ ꓗꓪ ꓠꓻ ꓓꓴ ꓡꓳꓸ ꓟꓳˍ ꓡꓳ꓿ ꓬꓲꓸ ꓔꓯ ꓟꓯꓼ ꓤ ꓐꓴ ꓡꓰ ꓫꓵꓻ ꓘꓴꓽ ꓡꓲꓺ ꓢꓲ꓾ ꓡ-ꓞꓰ ꓜꓽ ꓓꓴ ꓙꓲꓺ ꓔꓲꓺ ꓗꓪ ꓓꓶꓽ ꓠꓬꓲ ꓔꓲꓸ ꓠꓬꓲ ꓬꓰˍ ꓕꓯꓽ ꓗꓽ ꓙ ꓢꓴ ꓤ ꓟꓶ ꓕꓲ ꓣꓳ ꓔꓯ ꓥ ꓟꓲ ꓟꓯꓼ ꓤ ꓐꓴ ꓡꓰ ꓟꓬ ꓢꓶꓽ ꓗꓪ ꓓꓶꓽ ꓔꓸ ꓟ ꓐꓬꓱꓽ ꓡꓳꓸ ꓟꓳˍ ꓡꓳ꓿
ꓡ-ꓞꓰ ꓜꓻ ꓜꓽ ꓦꓲ
“ꓡ ꓛꓴꓸ ꓔꓯꓹ ꓢꓴ ꓠꓽ ꓑ ꓫꓬꓼ ꓔꓯ ꓕꓱ ꓡꓱ ꓠꓬꓲꓸ ꓤꓲ ꓟ ꓠꓽ ꓕꓲꓽ ꓞꓲꓼ ꓥꓳ꓿ ꓮ ꓟꓶ ꓙꓵꓽ ꓗ ꓬꓲꓸ ꓡꓲꓽ ꓙꓳ ꓙꓳ ꓟꓽ ꓬꓰ ꓬꓰ꓾ ꓤ ꓟꓶꓼ ꓕꓲ ꓣꓳ ꓔꓯ ꓟꓯꓼ ꓒꓽ 3 ꓣꓳ ꓡꓰ ꓕꓱ ꓡꓱ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰˍ ꓟ ꓠꓬ ꓟꓽ ꓜꓳꓽ ꓓꓴ ꓟ ꓥꓳ꓿ ꓬꓲꓸ ꓥꓳꓽ ꓬꓰ ꓓꓴ ꓙꓳˍ ꓠꓬ ꓙꓵꓽ ꓗ ꓡꓳ ꓚ ꓫꓸ ꓕꓱ ꓓꓹ ꓥꓳ꓿” ꓐꓰ ꓡꓔ ꓗꓪ ꓐꓰ ꓫꓸ ꓕꓱ ꓪ ꓢꓴ ꓡꓰ ꓐꓯˍ ꓡꓳ꓿
ꓗꓲꓳ/ꓗꓲꓮ ꓠꓬ ꓜꓲꓽ ꓜꓲ ꓑꓰꓹ ꓑꓰꓹ ꓑ ꓫꓬꓼ ꓔꓯ ꓠꓬꓲꓸ ꓤꓲ ꓔꓬ ꓟ ꓟꓬ-ꓟ ꓟꓯꓼ ꓔꓯ ꓔꓳꓼ ꓡꓯ ꓘꓳ ꓔꓬ ꓟ ꓟꓯꓼ ꓕꓲ ꓜꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓟ ꓠꓬ ꓑ ꓫꓬꓼ ꓕꓯꓽ ꓢꓲ ꓗꓪ ꓟꓽ ꓙꓲ ꓟ ꓟꓯꓼ ꓫꓱꓹ ꓟꓯꓼ ꓡꓲꓽ ꓣꓱꓽ ꓔꓬ ꓟ ꓡꓳꓸ ꓓꓳ ꓡ ꓟ ꓥ ꓡꓳ꓿ ꓓꓳꓽ ꓕꓱ ꓟ ꓐꓳˍ ꓟ ꓙꓵꓹ ꓗꓪ ꓛꓲ꓾ ꓗꓲꓳ/ꓗꓲꓮ ꓗꓪ ꓐꓰ ꓫꓬꓹ ꓔꓱꓹ ꓙꓽ ꓘꓶꓽ ꓩꓴ ꓡ ꓟ ꓟꓽ ꓙꓳ ꓢꓰ꓿
ꓐꓬꓱꓽ – ꓗꓮꓚꓧꓲꓠ ꓠꓰꓪꓢ ꓖꓣꓳꓴꓑ
