ꓟꓬ-ꓟ ꓘꓶꓽ ꓪꓰꓻ ꓐꓳ ꓒꓽ ꓮꓳ-ꓑꓪꓰꓼ ꓬꓲꓸ ꓤ ꓟꓶꓼ ꓡꓳ-ꓟꓼ-ꓥꓰꓹ-ꓛꓸ ꓠꓬ ꓠꓬꓲꓸ ꓠꓬꓲ 2022 ꓘꓳꓼ 4 ꓦ 2 ꓠꓬꓲ ꓠꓯꓼ 8 ꓙꓵꓹ ꓛꓲ ꓕꓯꓽ ꓓꓳꓼ ꓓꓳ ꓫꓵꓻꓳ꓿
“ꓠꓯꓼ 7:50 ꓛꓲ ꓕꓽ ꓮ ꓟ ꓠꓰ ꓥ ꓔꓯ ꓡꓵꓹ ꓡ ꓥ꓿ ꓥ ꓤꓽ ꓮ ꓟ ꓔꓯ ꓮ ꓙꓬ ꓔꓳꓺ ꓡꓯ꓿ ꓓꓳꓼ 2 ꓪꓰꓸ ꓗꓺ ꓓꓳ ꓩꓴꓳ ꓐꓯ ꓟꓸ ꓖꓶ ꓡꓻꓳ” ꓐꓰ 17 ꓘꓳꓼ ꓡꓳꓼˍ ꓢꓴ ꓬꓲꓸ ꓤꓽ ꓡꓰ ꓐꓯ ꓡꓳ꓿
ꓡꓳ-ꓟꓼ-ꓥꓰꓹ-ꓛꓸ ꓠꓬ 45 ꓘꓳꓼ ꓙꓳ ꓢꓴ꓾ ꓑ-ꓔꓲ ꓡꓳ ꓒꓱ ꓗꓪ ꓔꓬ ꓢꓴ ꓥꓳ꓿
ꓡꓳ-ꓟꓼ-ꓥꓰꓹ-ꓛꓸ ꓬꓲꓸ ꓐꓹ ꓐꓽ ꓥ ꓟꓲ 2018 ꓘꓳꓼ ꓕꓯꓽ ꓫꓵꓻꓳ꓿ ꓬꓲꓸ ꓐꓹ ꓐꓽ ꓮꓳ-ꓑꓪꓰꓼ ꓠꓬ ꓗꓴꓷꓼ ꓫꓵꓽ ꓪꓴ ꓑꓶꓸ ꓓꓴ ꓟꓯꓼ ꓡꓰꓽ ꓗꓴꓷꓼ ꓔꓯ ꓙꓵꓽˍ ꓟ ꓕꓲ ꓙ ꓖꓴ ꓗꓪ ꓐꓱ ꓓꓴꓽ ꓡꓴꓽ ꓪ ꓡꓰ ꓢꓴ꓾ ꓟꓬꓱꓺ ꓓꓳꓽ ꓙꓳˍ ꓟ ꓘꓶꓽ ꓪꓰ ꓐꓳ ꓒꓽ ꓥ ꓡꓳ꓿ ꓬꓲꓸ ꓫꓵꓻˍ ꓟ ꓥ ꓟꓲ ꓟꓯꓼ ꓠꓰ ꓚꓲꓸ ꓚ ꓕꓯꓽ ꓫꓸ ꓟꓴ ꓫꓸ ꓚꓬ ꓬꓰ ꓢꓲꓸ ꓠꓻ ꓫꓺ ꓡꓰ ꓟˍ ꓐꓰ꓾ ꓐꓱ ꓓꓴꓽ ꓗꓪ ꓟꓶ ꓤ ꓡꓴꓽ ꓪ ꓡꓰ ꓢꓲꓸ ꓠꓲꓹ ꓟ ꓫꓺ ꓡꓰˍ ꓟ ꓑꓶꓸ ꓓꓴ ꓤꓶ ꓓꓴꓸ ꓡꓰ ꓟ ꓥꓳ꓿
ꓝꓮꓲ 2021 ꓘꓳꓼ ꓗꓪ ꓥ ꓟꓲ ꓡꓳ-ꓟꓼ-ꓥꓰꓹ-ꓛꓸ ꓬꓲꓸ ꓦꓲ ꓢꓲꓺ ꓒꓽ ꓠꓬ ꓘꓴ ꓔꓴˍ ꓟ ꓗꓪ ꓔꓺ ꓗꓷ ꓠꓬꓲ ꓗꓴꓷꓼ ꓔꓯ ꓒꓳꓹ ꓔꓳꓹ ꓢꓴ ꓐꓯ ꓢꓲꓸ 2 ꓘꓳꓼ ꓡꓴꓽ ꓠꓹ ꓟ ꓫꓵꓽ ꓘꓶꓽ ꓔꓸ ꓟꓶ ꓢꓴ ꓥ ꓡꓳ꓿ ꓝꓮꓲ ꓥ ꓟꓲ ꓬꓲꓸ ꓚꓱꓹ ꓮ ꓟꓬꓹ ꓗꓪ ꓐꓰ ꓬꓲꓸ ꓔꓮ ꓫꓵꓽ ꓩꓴ ꓔꓸ ꓢꓰꓽ ꓡꓳ꓿
ꓕꓱ ꓡꓱꓳ ꓚꓵꓽ ꓫꓸ ꓘꓶꓻ ꓓꓴ ꓬꓲꓸ ꓫꓵ ꓬꓲ ꓙꓰꓽ ꓑꓶꓸ ꓓꓴ꓾ ꓠꓲꓹ ꓟ ꓠꓻ ꓛꓵꓽ ꓡꓰ ꓢꓲ꓾ ꓓꓳꓼ ꓓꓳ ꓫꓵˍ ꓟ ꓥ ꓡꓳ꓿
ꓧꓶꓸ ꓕꓯꓽ ꓬꓲꓸ ꓪ ꓕꓲ ꓦꓲ 3 ꓣꓳ ꓔꓬ ꓟ ꓗꓪ꓾ ꓮ ꓟꓶ ꓠꓬ ꓕꓲ ꓣꓳ ꓫꓵꓻ꓾ ꓕꓲ ꓣꓳ ꓠꓬ ꓐꓱ ꓓꓴꓽ ꓗꓪ꓾ 17 ꓘꓳꓼ ꓙꓳˍ ꓟ ꓬꓲꓸ ꓤꓽ ꓕꓲ ꓣꓳˍ ꓡꓰꓽ ꓦꓲ ꓗꓪ ꓜꓰ ꓒꓰꓹꓳ꓿
ꓡꓳ-ꓟꓼ-ꓥꓰꓹ-ꓛꓸ ꓬꓲꓸ ꓫꓵꓻ ꓟꓳ ꓔꓯ 2022 ꓘꓳꓼ 3 ꓦ 4 ꓠꓬꓲ ꓕꓯꓽ꓾ ꓑ-ꓔꓲ ꓡꓳ ꓒꓱ꓾ ꓔ-ꓬꓯꓼ-ꓛꓸꓳ ꓡꓱ ꓜꓳ ꓗꓪ ꓮ ꓔꓳꓸ ꓛꓴ ꓫꓺ ꓓꓴ ꓥꓳ꓾ ꓐꓯ ꓡꓳ꓿
ꓟꓬ-ꓟ ꓗꓴꓷꓼ ꓗꓪ ꓟꓯꓼ ꓡꓰ ꓙꓵꓽˍ ꓟ ꓕꓲ ꓙ ꓖꓴ ꓗꓪ ꓗꓴꓷꓼ ꓫꓵꓽ ꓪꓴ ꓑꓶꓸ ꓓꓴ ꓐꓱ ꓓꓴꓽ ꓗꓪ ꓡꓴꓽ ꓪ ꓔꓬ ꓢꓴ꓾ ꓫꓸ ꓙꓵ ꓟꓷꓽ ꓙꓲ ꓠꓲꓹ ꓥꓴ ꓟꓬ ꓥꓴ ꓔꓬ ꓢꓴ ꓐꓯ ꓖꓴ ꓟꓽ ꓓ ꓙꓳˍ ꓡꓳ꓿
