ꓬꓲꓸ ꓟꓬꓱꓺ ꓮ ꓡꓲ ꓥ ꓡ?
ꓡꓲ-ꓢꓴ ꓤꓶ (The Lisu Times) ꓐꓯ ꓔꓸ ꓡꓳ=
ꓮ ꓕꓯꓽ ꓪꓴꓸ ꓔꓴ ꓡ?
2020 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓔ ꓡꓳ=
ꓮ ꓗꓪ ꓐꓰ ꓮ ꓟ ꓡꓰ ꓪꓴꓸ ꓔꓴ ꓡ?
ꓴꓢꓮ ꓗꓪ ꓬꓲ ꓚꓰ ꓔꓶ ꓢꓲ꓾ ꓫꓵꓽ ꓓꓳꓽ ꓐꓳ ꓠꓲꓹ ꓡꓱ ꓟ ꓞꓳ ꓡꓱ ꓐꓴ ꓡꓰ ꓪꓴꓸ ꓔꓴ ꓡꓳ=
ꓮ ꓫꓵꓽ ꓐꓱ ꓶ ꓥ ꓡ?
=== ꓢꓷꓸ ꓡꓰ ꓝꓲ ꓓꓴ (to inform)===
“ꓟꓽ ꓢꓷꓸ ꓢꓴ ꓠꓬ ꓫꓵꓻ ꓕꓲ ꓡꓰꓹ” ꓐꓯ ꓟ ꓡꓲ-ꓢꓴ ꓒꓵꓽ ꓒꓽ ꓐꓯ ꓜꓱ ꓙꓳ ꓡꓳ= ꓕꓲ ꓟꓵꓽ ꓕꓲ ꓟꓵꓽ ꓗꓪ ꓮ ꓫꓵꓽ ꓒꓬꓱꓼ ꓔꓬ ꓟ꓾ ꓮ ꓡꓲ ꓕꓲ ꓒꓳꓹ ꓗꓪ ꓬꓲꓸ ꓚꓱꓹ ꓮ ꓡꓲ ꓝꓰꓸ ꓙꓰ ꓔꓬ ꓟ ꓔꓯ ꓢꓷꓸ ꓠꓯ ꓡꓳ= ꓢꓴ ꓮ ꓡꓲ ꓬꓰ ꓔꓬ ꓟ ꓢꓷꓸ ꓡꓰ ꓕꓯ꓾ ꓣꓳ ꓮ ꓡꓲ ꓬꓰ ꓠꓯˍ ꓟ ꓓꓵꓽ ꓙ ꓧꓪꓸ ꓛꓲ ꓡ꓾ ꓓꓵꓽ ꓙ ꓞꓷꓹ ꓢꓲꓸ ꓟꓬꓱꓽ ꓬꓰ ꓐ ꓡ ꓝꓲ ꓥꓳ= ꓡꓲ-ꓢꓴ ꓤ ꓐꓴ ꓔꓯ ꓢꓷꓸ ꓙꓲꓽ ꓙꓳ ꓟ ꓓꓳꓽ ꓢꓷꓸ ꓡꓰ ꓝꓲ ꓠꓹ ꓟ ꓟꓬꓱꓽ ꓕꓱ ꓟ ꓐꓱ ꓶ ꓡꓲ-ꓢꓴ ꓤꓶ (Lisu Times) ꓙꓳ ꓔꓬ ꓟ ꓥꓳ=
=== ꓢꓷꓸ ꓠꓲꓹ ꓢꓳ ꓓꓴ (to educate) ===
“ꓟꓽ ꓟꓸ ꓠꓬ ꓟꓽ ꓢꓷꓸ” ꓐꓰ ꓒꓵꓽ ꓒ ꓐꓯ ꓜꓱ ꓕꓱ ꓡꓯ ꓐꓯ ꓚꓰꓼ ꓡꓳ= ꓣꓳ ꓮ ꓘꓶꓸ ꓢꓷꓸ ꓔꓸ ꓥꓳ ꓓꓵꓽ ꓙ ꓥ ꓟꓲ ꓢꓷꓸ ꓟꓽ ꓡꓳꓼ ꓢꓰꓽ ꓟ ꓮ ꓟꓬꓹ ꓚꓱꓹ ꓙꓳ ꓚꓰꓼ ꓡꓳ= ꓢꓷꓸ ꓠꓲꓹ ꓮ ꓡꓲ ꓕꓲ ꓗꓯ ꓥ ꓟꓲ ꓕꓲ ꓠꓬꓲ ꓡꓲꓸ ꓕꓲ ꓠꓬꓲ ꓬꓲꓸ ꓫꓵꓼ ꓧꓪ ꓟꓶ ꓟ ꓐꓰ꓾ ꓪꓴꓽ ꓟꓴ ꓡ ꓔꓬ ꓟ ꓥ ꓠꓬꓲ ꓟꓽ ꓠꓽ ꓠꓽ ꓢꓳ ꓙꓲꓽ ꓙꓳ ꓡꓳ= ꓪꓴꓽ ꓟꓴ ꓡ ꓔꓬ ꓟ ꓢꓷꓸ ꓠꓲꓹ ꓐꓰ ꓓꓵꓽ ꓙ ꓚꓱꓹ ꓬꓲꓸ ꓫꓵ ꓬꓲ ꓙꓰ ꓔꓯ ꓢꓳ ꓣꓴ ꓟꓶ ꓡꓰ ꓝꓲ ꓠꓹ ꓟ ꓐꓱ ꓶ ꓡꓲ-ꓢꓴ ꓤꓶ (Lisu Times) ꓢꓯꓼ ꓕꓵꓼ ꓓꓴ ꓥꓳ=
=== ꓡꓲꓽ ꓒꓰꓼ ꓔꓯ ꓫꓺ ꓒꓵꓽ ꓓꓴ꓾ ꓜꓶ ꓟꓴ ꓡ ꓝꓲ ꓓꓴ (to preserve language and culture) ===
“ꓥꓳꓽ ꓫꓵꓽ ꓒꓰꓼ ꓬꓰ ꓫꓵꓽ ꓒꓰꓼ ꓬꓰ” ꓕꓱ ꓡꓱ ꓐꓯ ꓚꓰꓼ ꓥ= ꓡꓲꓽ ꓒꓰꓼ ꓐꓯ ꓟ ꓗꓪ ꓕꓳ ꓶ ꓥꓳꓽ ꓫꓵꓽ ꓠꓬ ꓬꓲꓸ ꓚꓰꓺ ꓥ ꓡꓳ= ꓢꓴ ꓥꓳꓽ ꓢꓴ ꓫꓵꓽ ꓗꓪ ꓫꓵꓽ ꓓꓳꓽ ꓕꓳ ꓶ ꓮ ꓟꓬꓹ ꓓꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓡꓲ-ꓢꓴ ꓥꓳꓽ ꓗꓪ ꓐꓰ ꓫꓵꓽ ꓓꓳꓽ ꓜꓲ ꓜꓲ ꓟꓴ ꓟꓴ ꓟꓬꓱꓽ ꓬꓰ ꓔꓬ ꓟ ꓟꓽ ꓙꓳ ꓢꓰ= ꓕꓱ ꓟ ꓐꓱ ꓶ ꓡꓲ-ꓢꓴ ꓤꓶ (Lisu Times) ꓢꓯꓼ ꓕꓵꓼ ꓓꓴ ꓥꓳ=
ꓡꓲ-ꓢꓴ ꓤꓶ (Lisu Times) ꓪꓴꓸ ꓔꓴ ꓟ ꓦꓬꓼ ꓠꓬꓲ ꓗꓪ ꓟꓬ-ꓟ ꓥꓳꓽ ꓫꓵꓽ ꓗꓪ ꓐꓰ ꓐꓳ ꓪꓴꓸ ꓔꓴ ꓗꓷ ꓥ ꓟꓲ꓾ ꓮ ꓟꓶ ꓮ ꓤ ꓤ ꓠꓬ ꓡꓲ-ꓢꓴ ꓕꓳ ꓶ ꓐꓰ ꓥꓳꓽ ꓫꓵꓽ ꓣꓱꓽ ꓢꓲꓸ ꓓꓳꓽ ꓐꓰ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰ ꓐꓳ ꓐ ꓡ ꓠꓹ ꓟ ꓢꓯꓼ ꓕꓵꓼ ꓔꓬ ꓡꓳ= ꓒꓵꓽ ꓒꓽ ꓟꓽ ꓢꓷꓸ ꓠꓬꓲ ꓟ ꓐꓰ꓾ ꓟꓽ ꓕꓱ ꓠꓬꓲ ꓟ ꓝꓳꓹ ꓮ ꓟꓬꓹ ꓔꓯ ꓚꓰꓼ ꓣꓴ ꓠꓹ ꓟ ꓥ ꓟꓲ ꓢꓯꓼ ꓕꓵꓼ ꓔꓬ ꓡꓳ= ꓡ ꓠꓹ ꓟ ꓗꓪ 70% (100 ꓩꓴꓸ 70 ꓩꓴꓸ) ꓠꓬ ꓡꓲ-ꓢꓴ ꓕꓳ ꓶ ꓣꓱꓽ ꓠꓹ ꓟ ꓐꓰ꓾ ꓝꓮꓲ ꓠꓱꓸ ꓐꓯꓼ ꓥꓳꓽ ꓫꓵꓽ ꓥꓳ ꓙꓰꓽ ꓥ ꓟꓲ 30% ꓣꓱꓽ ꓠꓹ ꓟ ꓟꓳꓸ ꓙ ꓔꓸ ꓡꓳ= ꓖꓳ ꓟ ꓑꓶꓸ ꓓꓴ ꓡꓲ-ꓢꓴ ꓤꓶ (Lisu Times) ꓠꓬ ꓡꓲ-ꓢꓴ ꓕꓳ ꓶ ꓐꓰ ꓡꓲ ꓒꓰꓼ ꓥꓳꓽ ꓚꓱꓹ ꓔꓯ ꓟꓽ ꓟꓲ ꓡꓰ ꓠꓹ ꓟ ꓐꓰ꓾ ꓜꓶ ꓟꓴ ꓡ ꓠꓹ ꓟ ꓢꓯꓼ ꓕꓵꓼ ꓔꓬ ꓟ ꓥ ꓡꓳ=
ꓟꓬꓱꓽ ꓕꓱ ꓟ ꓗꓪ ꓠꓴ ꓥ ꓟꓲ ꓔꓺ ꓡꓯ
(1) ꓡꓲ-ꓢꓴ ꓤꓶ (Lisu Times) ꓓꓳꓽ ꓵꓺ ꓢꓲꓸ ꓢꓯꓼ ꓖꓶ ꓡꓯ= ꓡꓲ-ꓢꓴ ꓤꓶ (the Lisu Times) ꓠꓬ꓾ Website- lisutimes.com, Facebook Page- the Lisu Times, Application- lisutimes on ꓑlaystore for Andriod phones ꓕꓱ 3 ꓫꓵꓽ 3 ꓚꓱꓹ ꓗꓪ ꓐꓰ ꓓꓳꓽ ꓐꓯ ꓒꓬꓱꓺ ꓔꓬ ꓡꓳ= ꓚꓲ ꓛꓬ ꓗꓸ ꓘꓳ ꓟ ꓕꓲ ꓒꓳꓹ ꓗꓪ ꓐꓰ ꓝꓸ ꓢꓲꓸ ꓓꓳꓽ ꓵꓺ = ꓠꓱꓸ ꓐꓯꓼ ꓢꓴ ꓔꓯ ꓥ ꓟꓲ ꓣꓱꓽ ꓗꓴꓸ ꓡ ꓠꓹ ꓟ ꓐꓯ ꓟꓸ ꓖꓶ=
Google ꓗꓪ lisu times ꓓꓶꓽ ꓢꓲꓸ ꓧꓪ ꓗꓷ ꓠꓬ website be application ꓠꓬꓲꓽ ꓫꓵꓽ ꓕꓱ ꓡꓱ ꓡꓳꓸ ꓟꓳ ꓡ ꓥꓳ 
lisutimes.com ꓗꓪ ꓙꓰ ꓠꓬ ꓕꓱ ꓡꓱ ꓡꓳꓸ ꓟꓳ ꓥꓳ 
ꓕꓱ ꓟ ꓠꓬ Andriod Phones ꓐꓱ ꓶ lisutimes application ꓔꓯ Playstore ꓗꓪ ꓐꓰ ꓧꓪ ꓣꓴ ꓟ 
lisutimes.com ꓗꓪ ꓡꓳꓸ ꓟꓳ ꓟ ꓐꓬꓱꓽ
(2) ꓡꓲ-ꓢꓴ ꓐꓴ ꓐꓰ ꓗꓳꓸ ꓙꓲꓽ ꓙꓳ ꓟ ꓓꓳꓽ ꓐꓰ ꓢꓷꓸ ꓙ ꓟꓴ ꓙ ꓘꓶꓽ ꓐꓯ ꓟꓳꓸ ꓖꓶ ꓡꓯ= ꓚꓲ ꓛꓬ ꓟꓵꓽ ꓐꓰ ꓗꓴꓷꓼ ꓗꓪ ꓒꓬꓱꓼ ꓔꓬ ꓟ꓾ ꓡꓲ-ꓢꓴ ꓐꓴ ꓐꓱ ꓶ ꓙꓲ ꓖꓴ ꓙꓳ ꓥꓳ ꓓꓵꓽ ꓙ ꓟ ꓓꓳꓽ ꓐꓰ꓾ ꓢꓷꓸ ꓙ ꓟꓴ ꓙ ꓘꓶꓽ ꓮ ꓙꓵꓽ ꓦ ꓖꓶ ꓩꓴ ꓡꓯ= ꓕꓱ ꓡꓱ ꓦ ꓖꓶ ꓡ ꓕꓯ꓾ ꓚꓲ ꓛꓬ ꓔꓱꓹ ꓔꓱꓹ ꓟꓳ ꓗꓷ ꓟ꓾ ꓢꓷꓸ ꓟ ꓓꓳꓽ꓾ ꓦ ꓡꓱ ꓐꓳ ꓓ ꓟ ꓓꓳꓽ ꓔꓯ ꓡꓰꓽ ꓦ ꓖꓶ ꓡꓯ ꓐꓰ ꓓꓰꓽ ꓠꓲꓹ ꓫꓵ ꓡꓳ=
(3) ꓢꓷꓸ ꓠꓲꓹ꓾ ꓙ ꓡꓯ ꓘꓳ ꓝꓸ ꓡꓯ ꓘꓳ ꓚꓱꓹ꓾ ꓒꓴ ꓫꓵ ꓢꓯꓼ ꓖꓶ ꓡ ꓟ ꓗꓪ ꓐꓰ ꓢꓯꓼ ꓖꓶ ꓡꓯ=
ꓠꓴ ꓢꓷꓸ ꓟ ꓢꓷ ꓠꓲꓹ꓾ ꓙ ꓡꓯ ꓘꓳ ꓝꓸ ꓡꓯ ꓘꓳ ꓙ ꓡꓯ ꓘꓳ ꓚꓱꓹ ꓐꓰ꓾ ꓒꓴ ꓫꓵꓺ ꓗꓪ ꓐꓰ ꓢꓯꓼ ꓖꓶ ꓐ ꓡ ꓡꓳ= ꓒꓴ ꓫꓵꓺ ꓔꓲꓺ ꓖꓶ ꓠꓲꓹ ꓡꓱ ꓠꓬ ꓙ ꓡꓯ ꓘꓳ ꓡꓯ=
(4) ꓕꓳ ꓶ ꓐꓳ ꓢꓲꓸ ꓔꓺ ꓙ ꓡꓯ=
ꓓꓳꓽ ꓕꓳ ꓶ ꓐꓰ ꓠꓱꓸ ꓐꓯꓼ ꓬꓲ ꓫꓵ ꓬꓲ ꓙꓰ ꓕꓳ ꓶ ꓐꓳ ꓒꓽ ꓣꓱꓽ ꓬꓯꓼ ꓡꓳ= ꓪꓴ-ꓢ ꓟꓸ ꓟꓲꓽ ꓚꓱꓹ꓾ ꓥꓳꓽ ꓫꓵꓽ ꓥꓳ ꓙꓰꓽ ꓢꓳ ꓣꓴ ꓚꓱꓹ꓾ ꓠꓴ ꓓꓵꓽ ꓙ ꓟ ꓚꓱꓹ꓾ ꓓꓵꓽ ꓓꓳ ꓙ ꓫꓱꓽ ꓚꓱꓹ꓾ ꓔꓶ ꓜ ꓔꓶ ꓓꓳ ꓚꓱꓹ꓾ ꓟꓬꓱꓽ ꓬꓲ ꓫꓵ ꓬꓲ ꓙꓰ ꓬꓰ ꓚꓱꓹ꓾ ꓶ ꓡꓯꓼ ꓟꓴ ꓚꓱꓹ꓾ ꓧꓪ ꓖꓳ ꓓꓱ ꓔꓬ ꓢ ꓚꓱꓹ꓾ ꓙꓼ ꓢꓷꓸ ꓠꓲꓹ ꓐꓰ ꓙꓼ ꓪꓴꓸ ꓠꓷꓸ ꓟꓸ ꓟꓲ꓾ ꓫꓵꓽ ꓓꓳꓽ꓾ ꓘꓶꓽ ꓪꓰꓻ꓾ ꓐꓯ ꓜꓱ꓾ ꓮ ꓠꓱ ꓥꓳꓽ꓾ ꓚ ꓟꓲꓽ꓾ ꓢꓷꓸꓠꓲꓹ ꓬꓲ ꓫꓵ ꓬꓲꓸ ꓙꓰ ꓕꓱ ꓡꓱꓳ ꓫꓵꓽ ꓐꓳ ꓢꓲꓸ ꓦ ꓩꓴ ꓡꓯ= ꓡꓲ-ꓢꓴ ꓐꓴ ꓐꓱ ꓶ ꓙꓲ ꓖꓴ ꓙꓳ ꓟ ꓕꓳ ꓶ ꓐꓳ ꓢꓲꓸ ꓦ ꓩꓴ ꓡꓯ= ꓫꓸ ꓟꓳ ꓪ=
(5) ꓫꓸ ꓟꓳ ꓘꓶꓽ ꓐꓰ ꓓꓰꓽ ꓘꓶꓽ
ꓡꓲ-ꓢꓴ ꓤꓶ (the Lisu Times) ꓗꓪ ꓕꓲ ꓣꓳ ꓣꓳ ꓔꓯ ꓠꓲꓹ ꓟ ꓫꓸ ꓡꓰ ꓝꓲ ꓓꓴ꓾ ꓐꓯ ꓛꓬ ꓡꓰ ꓓꓴ ꓡꓳꓸ ꓓꓳ ꓡ ꓥ ꓟꓲ꓾ ꓟꓽ ꓔꓱꓹ ꓟ ꓐꓰ꓾ ꓓꓳꓽ ꓚꓬꓼ ꓐꓳ ꓪ ꓡꓰ ꓥ ꓟꓲ ꓥꓪ ꓠꓴ ꓔꓯ ꓕꓳ ꓶ ꓐꓳ ꓡꓽ ꓩꓴ ꓡꓯ= ꓬꓰ ꓙꓲꓽ ꓙꓳ ꓟ ꓡꓰ ꓐꓰ ꓫꓬꓹ ꓔꓱꓹ ꓓꓴ ꓥꓳ=
ꓡꓲ-ꓢꓴ ꓤꓶ (the Lisu Times) ꓠꓬ꓾ ꓡꓲ-ꓢꓴ ꓠꓸ ꓑꓳ꓾ ꓟꓬ ꓢꓶꓽ ꓐꓰ꓾ ꓟꓶ ꓠꓶꓹ ꓒꓬꓱꓼ ꓡ ꓝꓲ ꓓꓴ (to be Lisu ears, eyes and mouth) ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓓꓴ ꓥꓳ= ꓫꓵꓽ ꓓꓳꓽ ꓠꓬ ꓟꓽ ꓔꓱꓹ ꓟ ꓔꓯ ꓟꓲ ꓟꓰꓹ ꓓꓳ ꓡ ꓓꓴ꓾ ꓔꓱꓹ ꓟ ꓔꓯ ꓥ ꓟꓲ ꓟꓳꓸ ꓖꓶ ꓡ ꓓꓴ ꓥ ꓡꓳ= ꓣꓳ ꓚꓲ ꓛꓬ ꓦꓲ ꓠꓯꓸꓼ ꓗꓪ ꓣꓳ ꓥꓳꓽ ꓫꓵꓽ ꓗꓪ ꓐꓰ ꓟꓬ ꓢꓶꓽ ꓒꓴ꓾ ꓠꓸ ꓑꓳ ꓠ ꓠꓹ꓾ ꓫꓸ ꓕꓱ ꓢꓳ ꓔꓬ ꓟ ꓥ ꓟ ꓑꓶꓸ ꓓꓴ ꓠꓲꓹ ꓟ ꓫꓵꓺ ꓖꓶ ꓙ ꓡꓯ= ꓕꓱ ꓟ ꓠꓬ ꓪꓴꓽ ꓟꓴ ꓡ ꓟ ꓫꓵꓼ ꓐꓰ꓾ ꓗꓴꓷꓼ ꓮ ꓡꓲ ꓕꓲ ꓟ ꓗꓪ ꓥ ꓟꓲ ꓮ ꓘꓶꓸ ꓒꓵꓽ ꓟ ꓢꓪꓼ ꓔꓸ ꓟ ꓠꓴꓽ ꓢꓯꓼ (ꓢꓳꓝꓔ ꓑꓳꓪꓰꓣ) ꓕꓲ ꓫꓵꓽ ꓥ ꓡꓳ=
ꓕꓲ ꓣꓳ ꓐꓱ ꓶ ꓡꓰ ꓟꓽ ꓥ ꓥ꓾ ꓮ ꓟꓬꓹ ꓐꓱ ꓶ ꓙꓲ ꓖꓴ ꓙꓳ ꓟ ꓫꓵꓽ ꓓꓳꓽ ꓕꓳ ꓶ ꓒꓬꓱꓼ ꓡ ꓠꓹ ꓟ ꓮ ꓙꓵꓽ ꓢꓴ ꓔꓺ ꓙ ꓓꓴ ꓬꓰ ꓡꓯ= ꓬꓲꓸ ꓪꓴꓸ ꓔꓴ ꓟ ꓐꓰ ꓢꓳ ꓪꓴꓸ ꓔꓴ ꓢꓲꓸ ꓟꓬꓱꓽ ꓬꓰ ꓟ ꓗꓪ ꓛꓬ ꓡꓰ ꓓꓴ ꓟꓳ ꓠꓬ ꓐꓯ ꓟꓳꓸ ꓖꓶ ꓡꓯ= ꓫꓬꓹ ꓔꓱꓹ ꓙ ꓡ ꓠꓬ ꓮ ꓘꓶꓸ ꓫꓸ ꓟꓳ ꓪ= ꓟꓽ ꓓ ꓟꓽ ꓢ ꓔꓳꓹ ꓡꓯ ꓘꓳ꓾ ꓛꓴꓸ ꓡꓯ ꓘꓳ ꓓꓴ ꓕꓽ ꓬꓰ ꓡꓯ ꓐꓰ꓾ ꓓꓰꓽ ꓘꓶꓽ ꓐꓯ ꓠꓲꓹ ꓫꓵ ꓟ ꓥ ꓡꓳ=
ꓡꓲ-ꓢꓴ ꓠꓸ ꓑꓳ꓾ ꓟꓬ ꓢꓶꓽ ꓐꓰ꓾ ꓟꓶ ꓠꓶꓹ ꓒꓬꓱꓼ ꓡ ꓝꓲ ꓓꓴ ꓢꓯꓼ ꓕꓵꓼ ꓔꓬ ꓟ꓾
ꓙ ꓡꓯ ꓘꓳ ꓓꓴ꓾ [email protected]; [email protected]; website:www.lisutimes.com; Facebook: The Lisu Times; Address: 9013 McFarland Way , Keller TX 76244.
ꓡꓲ-ꓢꓴ ꓤꓶ (the Lisu Times)
