ꓠꓬꓲꓸ ꓠꓬꓲ ꓟ ꓦꓬꓼ ꓠꓬꓲ ꓠꓬ Information Technology ꓮ ꓘꓶꓸ ꓣꓱꓽ ꓔꓬ ꓟ ꓦꓬꓼ ꓠꓬꓲ ꓥ ꓡꓳ= ꓧꓶꓸ ꓕꓯ 10 ꓘꓳꓼ ꓛꓲ ꓕꓯ ꓩꓴꓸ (Phone) ꓣꓱꓽ ꓢꓴ ꓟꓽ ꓙꓳ꓾ Internet, Social Media, Application ꓐꓯ ꓟ ꓟꓽ ꓢꓷꓸ ꓠꓬꓲ= ꓖꓳ ꓡꓱ ꓥ ꓟꓲ ꓮ ꓟꓶ ꓠꓬ ꓮ ꓙꓵꓽ ꓢꓴ ꓡꓯ ꓒꓯꓹ ꓗꓪ ꓩꓴꓸ ꓛꓲ ꓡ ꓖꓴꓳ= ꓶ ꓡꓯꓼ ꓚꓱꓹ ꓮ ꓙꓵꓽ ꓗꓪ ꓥ ꓟꓲ application ꓗꓪ ꓐꓰ ꓒꓴ ꓓꓵꓽ/ꓓꓳ ꓟꓬꓱꓽ ꓬꓰ ꓔꓬ ꓖꓴꓳ= ꓕꓱ ꓡꓱꓳ ꓫꓵꓽ ꓦꓬꓼ ꓠꓬꓲ ꓗꓪ꓾ ꓲꓔ ꓢꓷꓸ ꓠꓲꓹ ꓙꓳ ꓢꓴ ꓡꓲ-ꓢꓴ ꓤ ꓕꓲ ꓣꓳ ꓡꓰ ꓢꓲꓽ ꓫꓬ ꓕꓳ ꓶ ꓐꓰ꓾ ꓓꓳꓹ ꓟꓴ ꓟꓴ ꓖꓪ ꓔꓯ Android Phone ꓗꓪ ꓣꓱꓽ ꓐ ꓡ ꓠꓹ ꓟ ꓚꓰꓼ ꓜꓯ ꓩꓴ ꓡ ꓡꓳ= ꓬꓲꓸ ꓔꓯ ꓡꓲ-ꓢꓴ ꓤꓶ (the Lisu Times) ꓡꓰ ꓫꓸ ꓕꓱ ꓡꓯ ꓘꓳ ꓗꓷ ꓟ ꓔꓯ ꓕꓱ ꓗꓪ ꓐꓳ ꓟꓳꓸ ꓖꓶ ꓩꓴ ꓡ ꓥꓳ= ꓢꓯꓼ ꓕꓵꓼ ꓔꓬ ꓟ ꓡꓲ-ꓢꓴ ꓤꓽ ꓐꓴ ꓔꓯ ꓟꓬꓱ ꓓꓳꓽ ꓖꓶ ꓡꓯ꓾ ꓢꓯꓼ ꓖꓶ ꓡꓯ= ꓮ ꓙꓵꓽ ꓢꓴ ꓐꓱ ꓶ ꓢꓯꓼ ꓪ ꓣꓴ ꓓꓴ ꓒꓬꓱꓼ ꓡ ꓝꓲ ꓡꓯ=
=======
# ꓧꓪꓸ ꓧꓪꓸ= ꓠꓴ ꓚꓲ ꓛꓬ ꓠꓶꓽ ꓝꓸ ꓖꓶ ꓡꓯ=
ꓮ ꓙꓵꓽ ꓢꓴ ꓧꓪꓸ ꓧꓪꓸ= ꓥꓪ ꓚꓲ. ꓛꓬ ꓟꓬꓱꓺ ꓠꓬ ꓡꓯ‐ꓟꓯ‐ꓢꓲ ꓐꓯˍ ꓥꓳ꓿ ꓪꓮꓲ‐ꓟꓳ꓾ ꓪꓴ‐ꓬ꓾ ꓕꓳꓼ‐ꓗꓳꓼ ꓘ, ꓗꓪ ꓔꓬ ꓢꓴ ꓥꓳ꓿ 1994 ꓘꓳꓼ ꓗꓪ ꓦꓵꓻ ꓢꓲ꓾ ꓮ ꓐꓽ ꓐꓰ ꓮ ꓟꓺ ꓠꓬ (ꓣꓰꓦꓽ ꓡꓯ‐ꓟꓯ‐ꓑꓳ) ꓐꓰ ꓮ‐ꓩꓴ‐ꓟꓰ ꓥ ꓡꓳ꓿ ꓟꓬꓱꓽ ꓣꓱꓽ ꓬꓰ ꓔꓬ ꓟ ꓔꓯ ꓐꓯˍ ꓠꓬ꓾ ꓧꓶ. ꓕꓯꓼ ꓟꓯꓼ ꓒ ꓐꓴ ꓗꓴꓷꓼ ꓙꓵꓽ ꓪ ꓟ ꓣꓴ ꓢꓰꓽ ꓕꓯ ꓠꓬ ꓥꓪ ꓚꓲ. ꓛꓬ ꓬꓥ‐ꓖꓳꓥ ꓗꓪ ꓔꓬ ꓢꓲ. Mytel Company ꓗꓪ Software Developer (Front-End) ꓕꓲ ꓒꓳꓹ ꓗꓪ ꓐꓰ ꓣꓱꓽ ꓬꓰ ꓗꓷ ꓢꓴ ꓥꓳ꓿ ꓖꓳ ꓡꓱ ꓥ ꓟꓲ ꓟꓯꓼ ꓒ ꓐꓴ ꓗꓴꓷ ꓙꓵꓽ ꓪ ꓣꓴꓺ ꓗꓷ ꓗ. ꓠꓯ. ꓗꓴꓷꓼ ꓟꓽ ꓢꓲ ꓡꓲ ꓟ ꓑꓶ. ꓓꓴ Mytel company ꓗꓪ ꓟꓬꓱꓽ ꓬꓰ ꓟ ꓠꓽ ꓗꓷ ꓢꓲ꓾ ꓚꓲ. ꓛꓬ ꓟꓵꓽ (ꓘ,) ꓗꓪ ꓬꓲꓼ ꓡ ꓢꓲ. ꓠꓬꓲ Freelance software Developer ꓣꓱꓽ ꓬꓰ ꓔꓬ ꓟ ꓥꓳ꓿
# ꓲꓔ ꓐꓰ ꓗꓳꓸ ꓙꓲꓽ ꓙꓳ ꓢꓲꓸ ꓠꓴ ꓮ ꓡꓲ ꓢꓳ ꓔꓸ ꓟ꓾ ꓮ ꓕꓯ ꓪꓴꓸ ꓔꓴ ꓢꓲꓸ ꓢꓳ ꓗꓷ ꓟ ꓙ ꓖꓴ ꓐꓯ ꓟꓳꓸ ꓖꓶ ꓡꓯ?
ꓲꓔ ꓢꓷ. ꓠꓲ, ꓕꓲ ꓒꓳꓹ ꓗꓪ ꓐꓯ ꓠꓬ ꓟꓲ‐ꓚꓲ‐ꓠ ꓟꓵꓽ ꓗꓪ ꓟ Computer University ꓗꓪ ꓐꓰ 2010-2014 ꓘꓳꓼ ꓕꓯ ꓙꓵ ꓪꓴꓸ ꓛꓴꓽ ꓘꓳꓹ ꓟꓶꓳ= ꓖꓳ ꓡꓱ ꓥˍ ꓟꓲ ꓥꓪ ꓚꓲ. ꓛꓬ ꓐꓱ ꓶ ꓡꓯ ꓕꓲꓺ ꓟꓬꓱꓽ ꓬꓰ ꓠꓹ ꓟ ꓢꓷ. ꓠꓲ, ꓟꓽ ꓡꓳꓼ ꓢꓰꓽ ꓟ ꓑꓶ. ꓓꓴ 2015 ꓘꓳꓼ ꓕꓯ ꓬꓥ‐ꓖꓳꓥ ꓗꓪ ꓬꓯꓼ ꓙꓰ ꓢꓲ (Programming) ꓢꓳ ꓝꓸ ꓗꓷ ꓟ ꓥꓳ꓿
# ꓮ ꓟꓶ ꓓꓳ ꓡ ꓟ ꓡꓲ-ꓢꓴ ꓓꓳꓹ ꓟꓴ ꓕꓳ ꓶ Application ꓔꓯ ꓮ ꓡꓲ ꓓꓵꓽ ꓙ ꓪ ꓢꓲꓸ ꓫꓬꓹ ꓜꓯ ꓗꓷ ꓡ? ꓠꓴ ꓡꓰ ꓚꓰꓼ ꓜꓯ ꓔꓸ ꓟ ꓠꓱꓸ ꓐꓯꓼ ꓙꓳˍ ꓢꓰꓽ ꓡ?
ꓚꓵ ꓚꓵ ꓐꓯˍ ꓠꓬ꓾ ꓮ ꓟꓶ ꓬꓲꓸ ꓫꓵꓼ ꓓꓳ ꓡ ꓟ ꓡꓲ‐ꓢꓴ ꓓꓳ, ꓟꓴ ꓟꓴꓽ ꓖꓪꓽ Application ꓠꓬ ꓥꓪ ꓡꓰ ꓚꓰꓼ ꓜꓯ ꓔꓸ ꓟ ꓮꓑꓑꓡꓲꓚꓮꓔꓲꓳꓠ ꓠꓬꓲꓽ ꓟꓺ ꓕꓲꓽ ꓟ ꓟ ꓥꓳ꓿ ꓬꓲ ꓪꓴ. ꓕꓲꓽ ꓟꓺ ꓟ ꓠꓬ (The Bible – Lisu) application ꓥ ꓡꓳ꓿ ꓕꓱ ꓡꓱ ꓫꓬ, ꓠ, ꓟ ꓓꓵꓽ ꓙ ꓓꓳ ꓡ ꓟ ꓠꓬ꓾ ꓣꓳ ꓡꓲ-ꓢꓴ ꓐꓴ ꓥ ꓟꓲ ꓤꓶ ꓦꓬꓽ ꓠꓬꓲ ꓔꓯ ꓛꓳ ꓢꓲ. Mobile Phone ꓗꓪ ꓐꓰ ꓪꓴ‐ꓢ ꓐꓯ ꓘꓶ ꓐꓰ꓾ ꓫꓱꓸ ꓖꓶ ꓟꓴ ꓖꓪ ꓔꓯ ꓢ ꓢ ꓐꓰ ꓵꓺ ꓟꓶ ꓡꓰ ꓠ, ꓟ ꓥ ꓡꓳ= (The bible – Lisu) ꓫꓬ, ꓓꓳ ꓡꓰ ꓗ ꓠꓯ, ꓥꓪ ꓮ ꓬꓲꓼ (ꓠꓲ‐ꓒꓴ‐ꓢ) ꓡꓰ ꓓꓳ, ꓟꓴ ꓟꓴꓽ ꓖꓪꓽ ꓑꓷ ꓟꓲ ꓫꓬ, ꓠꓬ ꓙꓲˍ ꓡꓳ꓾ ꓘꓴ ꓜꓲꓼ ꓞꓳ ꓗꓪ ꓮ ꓘꓶꓸ ꓣꓱ ꓬꓯꓼ ꓡꓳ꓾ ꓐꓰ ꓚꓴꓽ ꓬꓲ. ꓖꓶ ꓡ ꓟ ꓑꓶ. ꓓꓴ ꓢꓯꓼ ꓕꓵꓼ ꓢꓲꓸ ꓕꓱ ꓡꓱ ꓫꓬ, ꓓꓳ ꓡ ꓟ ꓥꓳ꓿ ꓡꓲ-ꓢꓴ ꓢꓲꓽ ꓫꓬ ꓕꓳ ꓶ ꓔꓯ ꓬꓲꓸ ꓪꓴꓸ ꓜꓯꓻ ꓢꓲꓸ ꓒꓬꓱꓺ ꓩꓴ ꓗꓷ ꓟ ꓦꓬꓼ ꓠꓬꓲ ꓠꓬ꓾ 2020 ꓘꓳꓼ 1 ꓦ 25 ꓠꓬꓲ ꓥ ꓢꓲ꓾ ꓡꓲ-ꓢꓴ ꓓꓳꓹ ꓟꓴ ꓟꓴꓽ ꓖꓪ ꓔꓯ ꓬꓲꓸ ꓪꓴꓸ ꓒꓬꓱꓺ ꓩꓴ ꓡ ꓟ ꓠꓬ 2020 ꓘꓳꓼ 5 ꓦ 29 ꓠꓬꓲ ꓥ ꓡꓳ= ꓕꓲ ꓝꓸ ꓕꓲ ꓝꓸ ꓡꓯ ꓫꓵ ꓐꓲ ꓜꓲꓼ ꓡꓰ ꓠꓹ ꓟ ꓫꓬꓹ ꓑꓱ ꓔꓬ ꓡꓳ= Application ꓐꓴ ꓠꓬ Andriod ꓐꓱ ꓶ ꓡꓰ ꓥ ꓢꓲ꓾ ꓣꓴ ꓣꓱꓽ ꓠꓲꓹ ꓫꓵ ꓠꓬ꓾ Google Play Store ꓗꓪ ꓙꓰ ꓢꓲ꓾ The Bible (Lisu), Lisu Hymnbook (OMF) ꓐꓰ ꓧꓪ ꓣꓴ ꓓ ꓡꓳ=
# ꓮ ꓠꓯ! ꓡꓲ-ꓢꓴ ꓤ ꓐꓴ ꓖꓶ ꓕꓱ ꓡꓱ ꓫꓬꓹ ꓒꓬꓱꓼ ꓐ ꓡ ꓟ ꓮ ꓘꓶꓸ ꓓꓵꓽ ꓙ ꓟꓶ ꓓꓴ ꓐꓰ꓾ ꓢꓯꓼ ꓪ ꓓꓴ ꓙꓳ ꓡꓰ ꓪ= ꓖꓳ ꓡꓱꓳ ꓫꓵꓽ ꓫꓬꓹ ꓟ ꓗꓪ ꓬꓰ ꓫꓸ ꓓꓴ ꓮ ꓡꓲꓳ ꓫꓵꓽ ꓔꓳꓹ ꓜꓳ ꓗꓷ ꓡ?
ꓬꓰ ꓫ. ꓓꓴ ꓔꓯ ꓟꓳꓸ ꓐꓯ ꓠꓬ Application ꓕꓲ ꓟ ꓫꓬ, ꓕꓯ ꓮ ꓓꓲ ꓬꓳꓹ ꓚꓲ ꓟ ꓠꓬ Data ꓥꓳ꓿ ꓡꓲ‐ꓢꓴ ꓓꓳ ꓟꓴ Application ꓔꓯ ꓠꓬ ꓥꓪ ꓮ ꓬꓲꓼ ꓡꓰ ꓧꓪꓺ ꓜꓲꓼ ꓙ ꓡ ꓟ ꓑꓶ. ꓓꓴ ꓖꓳ ꓘꓶ ꓛꓲ ꓬꓰ ꓫ. ꓓꓴ ꓟ ꓙꓳ ꓟ ꓥꓳ꓿
# ꓠꓴ ꓪ ꓦꓲ ꓗꓪ ꓐꓰ ꓲꓔ ꓟꓬꓱꓽ ꓬꓰ ꓢꓴ ꓙꓳ ꓡ? ꓕꓲ ꓦꓲ ꓡ ꓞꓳ ꓐꓴ ꓡꓰ ꓠꓴ ꓕꓱ ꓡꓱ ꓟꓬꓱꓽ ꓬꓰ ꓟ ꓔꓯ ꓢꓯꓼ ꓖꓶ ꓡ ꓡ?
ꓚꓲ. ꓛꓬ ꓫꓵꓽ ꓤ ꓪꓳꓼ ꓤ ꓗꓪ ꓐꓰ ꓥꓪ ꓮ ꓬꓲꓼ ꓡꓯ-ꓟꓯ-ꓢ ꓕꓲ ꓣꓳ ꓠꓬ ꓪꓮꓲ-ꓟꓳꓽ ꓗꓪ ꓠꓲꓹ ꓒꓴ ꓢ ꓚꓳꓟꓑꓴꓔꓰꓣ ꓟꓬꓱꓽ ꓬꓰ ꓔꓶꓸ ꓙꓳ ꓡꓳ= ꓥꓪ ꓠꓴ ꓦꓲ ꓘꓴ ꓡ ꓞꓳ ꓮ ꓙꓵ ꓠꓬ ꓥꓪ ꓔꓯ ꓮ ꓒꓳ ꓒꓳ ꓗꓪ ꓔꓳꓹ ꓙ ꓬꓰ ꓙ ꓔꓬ ꓢꓯꓼ ꓖꓶ ꓔꓬ ꓟ ꓥꓳ꓿ ꓟꓽ ꓓ ꓠꓬ ꓥꓪ ꓟꓹ ꓟ ꓐꓰ꓾ ꓥꓪ ꓮ ꓝꓲ ꓮ-ꓡꓰ-ꓟꓰ ꓐꓴ ꓡꓰ ꓥꓪ ꓢꓷꓸ ꓠꓲꓹ ꓢꓳ ꓟ ꓦꓬꓼ ꓠꓬꓲ ꓗꓪ ꓐꓰ ꓮ ꓟꓶ ꓗꓪ ꓛꓲ ꓬꓰ ꓙ ꓢꓯꓼ ꓖꓶ ꓔꓬ ꓟ ꓥ ꓡꓳ= ꓬꓲꓸ ꓪ ꓔꓯ ꓮ ꓘꓶꓸ ꓫꓸ ꓟꓳ ꓔꓬ ꓥꓳ=
# ꓕꓲ ꓐꓱ ꓠꓬ ꓪ ꓘꓴ ꓦꓲ ꓗꓪ ꓩꓴꓸ (ꓑꓧꓳꓠꓰ) ꓔꓯꓹ ꓡ ꓟ ꓔꓯ ꓟꓽ ꓠꓲꓹ ꓫꓵ ꓢꓴ ꓙꓳ ꓡꓳ= ꓠꓴ ꓓꓵ ꓙ ꓟ ꓕꓲ ꓒꓳꓹ ꓗꓪ ꓐꓰ ꓮ ꓡꓲ ꓐꓯ ꓖꓶꓽ ꓠꓲꓹ ꓫꓵ ꓡ?
ꓕꓱ ꓟ ꓔꓯ ꓐꓯ ꓠꓬ ꓕꓲ ꓣꓳ ꓓꓵ ꓙ ꓚꓱ, ꓕꓲ ꓣꓳ ꓟ ꓫꓱ. ꓡꓯ ꓘꓳ ꓟ ꓥꓳ꓿ ꓮ ꓫꓵꓽ ꓗꓪ ꓟꓲ ꓟꓽ ꓙꓲ ꓟ ꓐꓰ ꓙꓲˍ ꓟ ꓕꓱ ꓠꓬꓲ ꓫꓵꓽ ꓫꓳꓹ ꓞꓹ ꓟ ꓥꓳ꓿ ꓖꓳ ꓡꓱ ꓥ ꓟꓲ ꓣꓳꓽ ꓮ ꓡꓲ ꓕꓲ ꓫꓵꓽ ꓔꓯ ꓪ ꓜꓲ ꓒꓬꓱꓼ ꓡ ꓝꓲ ꓠꓲꓹ ꓫꓵ ꓡ? ꓐꓯˍ ꓟ ꓢꓲ ꓣꓴ ꓠ ꓗ ꓟ ꓥꓳ꓿ ꓮ ꓟꓶ ꓣꓳ ꓦꓲ ꓗꓪ ꓔꓬ ꓠꓹ ꓟ ꓕꓵꓼ ꓪ (Stay Home order) ꓛꓳ ꓔꓬ ꓕꓯ ꓕꓲ ꓐꓱ ꓘꓴ ꓜꓲ ꓞꓳ ꓐꓴ ꓠꓬ Zoom Application ꓗꓪ ꓐꓰ ꓪ ꓘꓴ ꓜꓲꓽ ꓓꓴ ꓙꓵꓹ ꓧꓳꓽ ꓣꓱꓽ ꓔꓬ ꓟ ꓙꓳ ꓥꓳ꓿ ꓖꓳ ꓡꓱ ꓬꓰ ꓒꓬꓱꓼ ꓡ ꓠꓹ ꓟ ꓟ ꓥˍ ꓟꓲ Phone ꓥ ꓠꓬ꓾ Computer ꓣꓱꓽ ꓬꓯꓼ ꓟ ꓥꓳ= ꓲꓔ ꓶ ꓤꓼ ꓣꓱꓽ ꓢꓲꓸ ꓕꓲ ꓠꓲ, ꓕꓲ ꓪ ꓜꓲꓼ ꓪ ꓟ ꓐꓰ꓾ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓪ꓾ ꓶꓽ ꓓꓰ ꓟꓶˍ ꓟ ꓥꓳ꓿ ꓮ ꓟꓶ ꓣꓳ ꓡꓲ-ꓢꓴ ꓢꓲ ꓫꓬ ꓕꓳ ꓶ ꓐꓰ꓾ ꓡꓲ‐ꓢꓴ ꓓꓳꓹ ꓟꓴ ꓖꓪꓽ application ꓙꓳˍ ꓟ ꓑꓶ. ꓓꓴ ꓪ ꓘꓴ ꓦꓲ ꓗꓪ ꓡꓰꓽ ꓟꓽ ꓞꓲ ꓮ ꓡꓲ ꓗꓪˍ ꓟꓲ ꓣꓳ Phone ꓗꓪ ꓗꓷ ꓔ ꓢꓲ. ꓪꓴ‐ꓢ ꓔꓯ ꓫꓱ. ꓖꓶ꓾ ꓪꓴ‐ꓢ ꓐꓯ ꓘꓶ ꓵꓺ ꓐ ꓡ ꓟ ꓥꓳ꓿
# ꓮ ꓟꓶ ꓝꓸ ꓢꓲꓸ ꓠꓴ ꓚꓰꓼ ꓔꓬ ꓟ꓾ ꓟꓬꓱꓽ ꓬꓰ ꓔꓬ ꓟ ꓮ ꓫꓵꓽ ꓙꓳ ꓢꓰꓽ ꓡ? ꓟꓬꓱꓽ ꓬꓰ ꓓꓴ ꓟꓳꓸ ꓙ ꓔꓸ ꓟ ꓕꓲ ꓫꓵꓽ ꓫꓵ ꓙꓳ ꓡ? ꓬꓰ ꓙ ꓔ ꓙ ꓚꓱꓹ ꓣꓱꓽ ꓬꓯꓼ ꓡ? ꓮ ꓡꓲꓳ ꓫꓵꓽ ꓣꓱꓽ ꓛ ꓔꓬ ꓡ?
ꓝ. ꓢꓲ. ꓣꓳ ꓡꓲ‐ꓢꓴ ꓫꓵꓼ ꓐꓴ ꓣꓱ ꓬꓯꓼ ꓔꓬ ꓟ Application ( Software ) ꓔꓯ ꓡꓯ ꓫꓵ ꓫꓬ, ꓙꓰ ꓠ, ꓔꓶ ꓙꓱꓼ ꓙꓳ ꓡꓳ꓿ ꓮ ꓟꓶ ꓠꓬ ꓚꓲ. ꓛꓬ ꓐ ꓡ ꓟ ꓕꓲ ꓒꓳꓹ ꓗꓪ ꓐꓰ ꓡꓰ ꓢꓯꓼ ꓕꓵꓼ ꓔꓬ ꓢꓰ ꓡꓳ꓿ ꓕꓲ ꓟꓵ ꓡꓰ. ꓕꓲ ꓟꓵ ꓗꓪ ꓔꓬ ꓟ ꓣꓳꓽ ꓡꓲ‐ꓢꓴ ꓬꓲ ꓤꓼ ꓠꓬꓲ ꓤ ꓐꓴ꓾ ꓒꓴ ꓫꓵ ꓙꓳ ꓢꓴ ꓐꓴ ꓗꓪ ꓐꓰ ꓢꓯꓼ ꓪ ꓢꓷ. ꓠꓲ, ꓖꓶ ꓙ ꓡ ꓟ ꓔꓯ ꓮ ꓘꓶ. ꓣꓱ ꓬꓯꓼ ꓡꓳ꓿
# Games ꓐꓰ Social Media ꓗꓪ ꓒꓴ ꓮ ꓟꓬꓹ꓾ ꓬꓲꓸ ꓙꓵꓹ ꓮ ꓟꓬꓹ ꓖꓶ ꓔꓬ ꓟ ꓡꓲ-ꓢꓴ ꓤꓽ ꓐꓴ ꓔꓯ ꓮ ꓡꓲ ꓚꓴ ꓬꓲꓹ ꓢꓷꓸ ꓠꓲꓹ ꓐꓯ ꓖꓶ ꓠꓲꓹ ꓫꓵ ꓡ?
ꓥꓪ ꓚꓲ. ꓛꓬ ꓥˍ ꓟꓲ Game ꓗꓽ ꓠꓯ, ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ꓾ ꓣꓳꓽ ꓔꓶ ꓙꓱꓼ ꓠꓬ ꓖꓮꓟꓰ ꓥ ꓡ? ꓠꓱꓸ ꓐꓯꓼ ꓮ ꓫꓵꓽ ꓥ ꓡ? ꓐꓯ ꓟ ꓢꓷꓸ ꓠꓯ ꓡꓳ= ꓣꓳꓽ ꓚꓲ. ꓛꓬ ꓐ ꓡ ꓟ ꓔꓯ ꓛꓳ ꓢꓲ. ꓬꓰ ꓟꓬꓱꓽ ꓕꓲ ꓫꓵ ꓫꓵꓽ ꓔꓯ ꓢꓯꓼ ꓕꓵ ꓛꓵˍ ꓡꓳ꓿ ꓮ ꓟꓶ ꓟ ꓤꓶ ꓠꓬ ꓮ ꓡꓲ ꓗꓪ ꓔꓬ ꓢꓴ ꓥ ꓟꓲ ꓚꓲ ꓛꓬ ꓠꓲꓹ ꓫꓵ ꓟ ꓢꓷꓸ ꓠꓲꓹ ꓕꓲ ꓫꓵꓽ ꓫꓵꓽ ꓔꓯ ꓢꓳ ꓣꓴ ꓙꓲˍ ꓟ ꓦꓬꓼ ꓠꓬꓲ ꓥꓳ꓿ Phone ꓐꓰ Internet ꓙꓳˍ ꓠꓬ ꓐꓯ ꓖꓴ ꓟꓽ ꓓ ꓟ ꓢꓳ ꓣꓴ ꓓꓴ ꓠꓬ Google, Youtube, social media Facebook ꓗꓪ ꓓꓯˍ ꓡꓳ꓿ ꓖꓳ ꓟ ꓑꓶ. ꓓꓴ Facebook ꓣꓱ ꓥˍ ꓟꓲ꓾ Game ꓗꓽ ꓠꓬꓹ ꓢꓴ ꓥ ꓟꓲ꓾ ꓣꓳ ꓐꓱꓽ ꓶ ꓙꓲꓻ ꓖꓴ ꓒꓬꓱꓼ ꓡ ꓠꓹ ꓟ ꓓꓵ ꓙ ꓡꓯ= ꓙꓲ ꓖꓴ ꓙꓳ ꓟ ꓕꓲ ꓫꓵꓽ ꓫꓵꓽ ꓔꓯ ꓢꓳ ꓣꓴ ꓡꓯ ꓐꓰ ꓪꓴꓸ ꓖꓶ ꓠꓲꓹ ꓫꓵ ꓡꓳ=
# ꓠꓱꓸ ꓐꓯꓼ ꓕꓲ ꓫꓵ ꓫꓵ ꓕꓱ ꓔꓺ ꓠꓲꓹ ꓫꓵ ꓟ ꓙꓳ ꓠꓬ ꓐꓯ ꓖꓶ ꓡꓯ=
ꓟꓲ ꓠꓯ ꓤꓶ ꓦꓬꓼ ꓠꓬꓲ ꓠꓬ ꓕꓲꓽ ꓠꓬꓲ ꓡꓰ ꓕꓲ ꓠꓬꓲ ꓪꓴ ꓟꓴ ꓡ ꓔꓬ ꓟ ꓡꓰ ꓐꓰ IT ꓢꓷ. ꓠꓲ, ꓥ ꓟꓲ ꓮ ꓘꓶ ꓣꓱꓽ ꓬꓯꓼ ꓡ ꓔꓬ ꓡꓳ= ꓖꓳ ꓟ ꓑꓶ. ꓓꓴ ꓣꓳꓽ ꓡꓲ‐ꓢꓴ ꓬꓲ ꓤꓼ ꓠꓬꓲ ꓟ ꓐꓴꓳ꓾ Information Technology ꓔꓯ ꓮ ꓘꓶꓸ ꓢꓳ ꓣꓴ ꓠꓹ ꓟ ꓐꓯ ꓠꓲ, ꓫꓵ ꓟ ꓥꓳ꓿ ꓝꓮꓲ ꓥꓪ ꓚꓲ ꓛꓬ ꓡꓰ ꓮ ꓟꓶ ꓚꓰꓼ ꓜꓯ ꓔꓸ ꓟ application ꓐꓴ ꓐꓰ ꓗꓴ. ꓙꓲꓽ ꓙꓳ ꓢꓲ꓾ ꓠꓻ ꓠꓬꓲ ꓓꓴ꓾ ꓚꓴꓽ ꓬꓲ, ꓢꓷ. ꓠꓲ, ꓖꓶ ꓓꓴ ꓙꓳ ꓠꓬ꓾ Email – [email protected] (ꓥ ꓠꓬ) Phone – 09976800714 ꓗꓪ ꓐꓰ ꓢꓷ. ꓖꓶ ꓙ ꓡ ꓠ, ꓟ ꓟꓲ ꓓꓰꓽ ꓠꓲ, ꓫꓵ ꓟ ꓥꓳ꓿ ꓫꓸ ꓟꓳ ꓪ=
