ꓕꓮꓲꓹ ꓟꓵꓽ ꓡꓳ ꓟꓶꓸ꓾ ꓒ-ꓥꓼ ꓟꓵꓽ ꓬꓲ ꓡꓴꓽ ꓐꓱ ꓠꓯꓸ ꓠꓯꓸ ꓗꓪ ꓐꓲ-ꓬꓯ-ꓠ ꓗꓪ ꓐꓰ ꓲ-ꓓꓲ-ꓬ ꓟꓵꓽ꓾ ꓟꓳ-ꓐꓮꓲꓹ ꓡꓳ ꓒꓱ ꓗꓪ ꓙꓰ ꓓꓴ ꓧꓼ ꓡꓼ ꓓꓰꓼ ꓡꓲꓺ (plastic boat) ꓗꓴꓸ ꓢꓲꓸ ꓙꓰ ꓔꓬ ꓢꓴ ꓐꓲ-ꓬꓯ-ꓠ ꓒꓽ ꓕꓲ ꓣꓳ ꓔꓯ ꓕꓮꓲꓹ ꓬꓲꓻ ꓙꓬ ꓟꓯꓼ ꓡꓰ ꓚꓬꓴꓹ ꓙ ꓗꓷꓳ꓿
2022 ꓘꓳꓼ 3 ꓦ 23 ꓠꓬꓲ ꓕꓯꓽ ꓒ-ꓥꓼ ꓬꓲ ꓡꓴ ꓐꓱ ꓘꓶꓽ ꓗꓪ ꓐꓰ ꓟꓲꓺ 4971 ꓕꓷꓹ (80 km) ꓶꓽˍ ꓟ ꓗꓪ ꓡ ꓞꓳ ꓕꓲ ꓣꓳ ꓧꓼ ꓡꓼ ꓡꓲꓺ ꓕꓲ ꓟ ꓗꓴꓸ ꓔꓬ ꓟ ꓔꓯ ꓥꓪꓸ ꓢꓰꓼ ꓓꓰꓼ ꓡꓲꓺ ꓐꓴ ꓡꓳꓸ ꓟꓳ ꓢꓲꓸ ꓕꓮꓲꓹ ꓬꓲ ꓙꓬ ꓟꓯꓼ ꓓꓼ (3) ꓗꓪ ꓟ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓓꓳꓽ ꓜꓳ ꓩꓴ ꓡꓳ꓿
ꓕꓮꓲꓹ ꓬꓲ ꓙꓬ ꓟꓯꓼ ꓐꓴ ꓬꓲꓸ ꓔꓯ ꓚꓬꓴꓹ ꓙ ꓓꓴ ꓖꓳ ꓗꓪ ꓛꓲ ꓬꓰ ꓠꓬ꓾ ꓓꓰꓼ ꓡꓲꓺ ꓗꓴꓸ ꓔꓬ ꓢꓴ ꓠꓬ ꓐꓲ-ꓬꓯ-ꓠ ꓗꓴꓷꓼ ꓢꓴ Mr.HO HOANG HUNG (37 ꓘꓳꓼ) ꓥ ꓢꓲ꓾ ꓬꓲ ꓠꓬ ꓲ-ꓓꓲ-ꓬ ꓗꓴꓷꓼ ꓟꓳ-ꓐꓮꓲꓹ ꓗꓪ ꓔꓬ ꓟ ꓬꓲꓸ ꓦꓲ ꓢꓲ ꓟ ꓔꓯ ꓓꓰꓽ ꓙ ꓠꓰ ꓕꓱ ꓡꓱ ꓙꓰˍ ꓟ ꓥꓳ꓾ ꓐꓰ ꓚꓲꓸ ꓚ ꓓꓳ ꓡ ꓡꓳ꓿
ꓗꓳ-ꓪꓰꓼ ꓑꓶꓸ ꓓꓴ ꓙꓱ ꓦꓲ ꓚꓱꓹ ꓮ ꓙꓵꓽ ꓑꓲꓸ ꓞꓲꓽ ꓡꓰ ꓠꓬꓲ꓾ ꓬꓲꓸ ꓪ ꓠꓬꓲꓽ ꓫꓵꓸ ꓢꓴ ꓟꓽ ꓜꓲ ꓡꓯ ꓘꓳ ꓟ 2 ꓘꓳꓼ ꓙꓳ ꓬꓰꓳ ꓐꓯ ꓡꓳ꓿
ꓬꓲ ꓠꓬ ꓲ-ꓓꓲ-ꓬ ꓗꓪ ꓓꓵꓽ ꓪ ꓠꓹ ꓟ Visa ꓓꓰꓽ ꓥ ꓟꓲ ꓟꓽ ꓖꓶ ꓡ ꓠꓰ꓾ ꓠꓵ ꓠꓲꓹ ꓑꓶꓸ ꓓꓴ ꓫꓵꓻ ꓘꓴ ꓑꓵ ꓑꓵ ꓬꓲ ꓡꓴꓽ ꓐꓱ ꓓꓽ ꓟ ꓔꓯ ꓘꓱꓻ ꓙꓰ ꓓꓴ ꓢꓯꓼ ꓕꓵꓼ ꓩꓴ ꓡ ꓟ ꓥꓳ꓾ ꓐꓯ ꓡꓳ꓿
ꓬꓲ ꓠꓬ 2022 ꓘꓳꓼ 3 ꓦ 2 ꓠꓬꓲ ꓕꓯꓽ ꓐꓲ-ꓬꓯ-ꓠ ꓗꓴꓷꓼ꓾ ꓢꓮꓲꓽ-ꓥꓳꓽ ꓗꓪ ꓐꓰ ꓕꓮꓲꓹ ꓗꓴꓷꓼ ꓒꓴꓸ-ꓘꓯꓼ ꓗꓪ ꓛꓲ ꓡ ꓡꓳ꓿ ꓝꓮꓲ 3 ꓦ 5 ꓠꓬꓲ ꓗꓪ ꓠꓬ ꓧꓼ ꓡꓼ ꓡꓲꓺ ꓕꓲ ꓟ ꓪꓴꓻ ꓢꓲꓸ ꓒꓴ-ꓘꓯꓼ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓐꓰ ꓗꓴꓸ ꓓꓳ ꓡ ꓟ 18 ꓠꓬꓲ ꓙꓳ ꓡꓰ ꓠꓬ꓾ 4971 ꓕꓷꓹ (80 km) ꓶꓽˍ ꓟ ꓬꓲ ꓡꓴꓽ ꓐꓱ ꓠꓯꓸ ꓠꓯꓸ ꓕꓲ ꓔꓶꓸ ꓗꓪ ꓛꓲ ꓬꓰ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓖꓳ ꓗꓪ ꓐꓰ ꓬꓲꓸ ꓙꓰ ꓠꓲꓹ ꓫꓵˍ ꓟ ꓲ-ꓓꓲ-ꓬ ꓗꓪ ꓔꓱꓹ ꓔꓱꓹ ꓙꓰ ꓠꓬ꓾ 2000 ꓗꓟ ꓙꓳˍ ꓢꓰꓽ ꓠꓬꓲ꓾ (ꓮ ꓫꓵꓽ ꓟꓽ ꓘꓳ ꓟꓽ ꓟꓳꓻ ꓙꓰ ꓪ ꓥꓳ ꓐꓯ ꓡꓲꓸ) 1 ꓘꓳꓼ ꓠꓰ ꓦ ꓐ 3 ꓟ ꓙꓰ ꓠ ꓗꓹ ꓟ ꓙ ꓖꓴ ꓥ ꓡꓳ꓾ ꓐꓰ ꓕꓮꓲꓹ ꓬꓲꓻ ꓙꓬ ꓟꓯꓼ ꓜꓲꓽ ꓕꓲ ꓣꓳ ꓡꓰꓽ ꓢꓪꓼ ꓟꓸ ꓔꓸ ꓡꓳ꓿
ꓬꓲꓸ ꓓꓰꓼ ꓡꓲꓺ ꓗꓪ ꓠꓬ ꓗ-ꓟꓯꓹ 10 ꓕꓴꓽ꓾ ꓬꓲꓻ ꓙꓬ ꓮ ꓔꓲꓸ ꓤꓼ ꓐꓰ꓾ ꓑꓯꓸ ꓑꓳꓼ 1 ꓢꓶꓽ ꓡꓰꓽ ꓙꓳˍ ꓠꓬꓲ꓾ ꓬꓲꓸ ꓠꓬ ꓮ ꓡꓲ ꓡꓲꓸ ꓲ-ꓓꓲ-ꓬ ꓗꓪ ꓛꓲ ꓟꓽ ꓖꓰꓼ ꓐꓯ ꓢꓲꓸ ꓧꓳꓽ ꓡꓲꓸ ꓡ ꓡꓳ꓿ ꓬꓲꓸ ꓔꓯ ꓕꓮꓲꓹ ꓟꓵꓽ ꓗꓪ ꓙꓳˍ ꓟ ꓐꓲ-ꓬꓯ-ꓠ ꓗꓴꓷꓼ ꓝꓲ ꓓꓴ ꓦꓲ ꓗꓪ ꓧꓳꓽ ꓡꓲꓸ ꓩꓴ ꓗꓷꓳ꓾ ꓐꓯ ꓡꓳ꓿
37 ꓘꓳꓼ ꓔꓯ ꓕꓮꓲꓹ ꓬꓲ ꓙꓬ ꓟꓯꓼ ꓡꓰꓽ ꓚꓬꓴꓹ ꓙ ꓔꓬ ꓟ
ꓬꓲꓸ ꓔꓯ ꓠꓬ Social Media ꓗꓪ “ꓠꓵ ꓠꓲꓹ ꓑꓶꓸ ꓓꓴ ꓬꓲ ꓡꓴꓽ ꓐꓱ ꓘꓱꓻ ꓑꓶꓸ ꓢꓴ” ꓐꓯ ꓢꓲꓸ ꓟꓬꓱꓺ ꓓꓳꓽ ꓖꓶ ꓔꓬ ꓡꓳ꓿
ꓗꓳ-ꓪꓰꓼ ꓑꓶꓸ ꓓꓴ ꓠꓲꓹ ꓠꓵ ꓢꓴˍ ꓐꓰ ꓜꓲ ꓡꓯꓼ ꓟꓽ ꓠꓶꓽ ꓡꓰ ꓢꓴ꓾ ꓢꓲꓼ ꓙꓬ ꓠꓲꓹ ꓥꓴꓻ ꓠꓲꓹ ꓟ ꓐꓶꓽ ꓬꓰ ꓔꓬ ꓢꓴ ꓕꓲ ꓟꓲ ꓠꓯ ꓗꓪ ꓮ ꓟꓬꓹ ꓔꓬ ꓡꓳ꓿
